Kapitulo 49

Pagbantala Liwat sa Galilea

PAGKATAPOS sang mga duha ka tuig sang maid-id nga pagbantala, si Jesus bala magauntat na kag magapahuway? Sa kabaliskaran, ginpasangkad niya ang iya pagbantala nga hilikuton paagi sa paglibot liwat sing ikatlo sa Galilea. Ginduaw niya ang tanan nga siudad kag minuro sa teritoryo, nagtudlo sa mga sinagoga kag nagbantala sang maayong balita sang Gin­harian. Ang nakita niya sa sini nga paglibot nagkombinse sa iya sing labi pa sa kinahanglanon nga dugangan ang pagbantala nga hilikuton.

Bisan diin magkadto si Jesus, nakita niya ang kadam-an nga nagakinahanglan sing espirituwal nga pagbulong kag paumpaw. Kaangay sila sang mga karnero nga wala sing manugbantay, maniwang kag nag-alaplaag, kag naluoy sia sa ila. Ginsilingan niya ang iya mga disipulo: “Sa pagkamatuod, ang alanyon bugana, apang pila lamang ang mga mangangani. Busa pangamuyo kamo sa Agalon sang alanyon agod nga magpadala sia sing mga mangangani sa iya alanyon.”

Si Jesus may plano sa pagpanghikot. Ginpatawag niya ang 12 ka apostoles, nga pinili niya mga isa ka tuig ang nagligad. Ginparisparis niya sila, nga naghimo sing anom ka grupo sang mga manugbantala, kag ginhatagan sila sing instruksion. Sia nagpaathag: “Dili kamo maglakat sa dalan sang mga pungsod, kag dili magsulod sa bisan anong siudad sang mga Samariahanon; kundi hinunuo kadto kamo sa mga tawo sang Israel nga kaangay sa mga karnero nga nagkaladula. Kag wali sa nagakadto kamo, nga nagasiling, ‘Ang ginharian sang langit malapit na.’ ”

Ining Ginharian nga ibantala nila amo ang gintudlo sa ila ni Jesus nga ipangamuyo sa modelo nga pangamuyo. Ang Ginharian malapit na sa kahulugan nga ang gintangdo nga Hari sang Dios, si Jesucristo, yara na. Agod tukuron ang mga kredensiyal sang iya mga disipulo subong mga tiglawas sinang labaw sa tawo nga pangulohan, ginhatagan sila ni Jesus sing gahom nga maayo ang balatianon kag mabanhaw bisan ang patay. Ginsugo niya sila nga himuon ini nga mga pag-alagad nga wala sing bayad.

Masunod ginsilingan niya ang iya mga disipulo nga indi magbalon para sa pagbantala. “Dili kamo magbalon sing bulawan ukon pilak ukon saway sa inyo mga wagkos, ukon balalunan sa inyo panlakatan, ukon duha ka bayo, ukon sandalyas, ukon sungkod; kay ang mamumugon takus sa iya kalan-on.” Ang mga nagaapresyar sa mensahe magahulag kag magaamot sing kalan-on kag dalayunan. Subong sang ginsiling ni Jesus: “Bisan diin nga siudad ukon minuro ang inyo sudlan, usisaon ninyo kon sin-o didto ang takus, kag pabilin kamo didto tubtob nga maghalin kamo.”

Nian ginhatag ni Jesus ang mga instruksion kon paano palapitan ang mga tagbalay upod ang mensahe sang Ginharian. “Sa nagasulod kamo sa balay,” siling niya, “abiabiha ini; kag kon ang balay takus, ang inyo paghidait magdangat sa iya; apang kon indi takus, pabalika sa inyo ang inyo paghidait. Kag kon sin-o ang indi magabaton sa inyo ukon magpamati sang inyo mga pulong, sa pagguwa ninyo didto sadtong balay ukon siudad itaktak ninyo ang yab-ok sa inyo mga tiil.”

Tuhoy sa siudad nga wala nagabaton sang ila mensahe, ginpahayag ni Jesus nga mangin daku gid ang paghukom sa sini. Sia nagsiling: “Magahaganhagan pa sa duta sang Sodoma kag Gomorra sa Adlaw sang Paghukom sang sa sadtong siudad.” Mateo 9:35⁠–⁠10:15; Marcos 6:6-12; Lucas 9:1-5.

▪ San-o ginsugdan ni Jesus ang ikatlo nga pagbantala sa Galilea, kag sa ano ini nagkombinse sa iya?

▪ Sang ginpadala ang iya 12 ka apostoles sa pagbantala, anong instruksion ang ginhatag niya sa ila?

▪ Ngaa husto para sa mga disipulo ang itudlo nga ang Ginharian malapit na?