Kapitulo 48

Pagbiya sa Balay ni Jairo kag Pagduaw Liwat sa Nasaret

MASAKO gid ang adlaw para kay Jesus​—⁠naglakbay sia sa dagat gikan sa Decapolis, gin-ayo niya ang isa ka babayi nga ginatagasan sing dugo, kag ginbanhaw niya ang anak nga babayi ni Jairo. Apang wala pa matapos ang adlaw. Sang maghalin si Jesus sa balay ni Jairo, ginsundan sia sang duha ka bulag nga lalaki, nga nagasinggit: “Kaluuyi kami, Anak ni David.”

Paagi sa pagtawag kay Jesus “Anak ni David,” ginpabutyag sining mga lalaki ang ila pagtuo nga si Jesus manunubli sa trono ni David, busa amo sia ang ginsaad nga Mesias. Apang, daw wala pagsapaka ni Jesus ang ila pagpangayo sing bulig, ayhan agod tilawan ang ila pagpamilit. Apang wala mag-untat ang mga lalaki. Ginsundan nila si Jesus sa iya ginadayunan, kag sang magsulod sia sa balay, nagsulod man sila.

Didto si Jesus namangkot: “Nagatuo bala kamo nga sarang ako makahimo sini?”

“Huo, Ginuo,” sabat nila nga may pagsalig.

Gani, sang gintandog ang ila mga mata, si Jesus nagsiling: “Suno sa inyo pagtuo tuguti ini nga mahanabo sa inyo.” Sa hinali nakakita sila! Nian matigdas nga gintugunan sila ni Jesus: “Andam kamo nga wala sing tawo nga makahibalo sini.” Apang bangod napuno sing kalipay, wala nila pagsunda ang sugo ni Jesus kundi ginpamalita nila sia sa bug-os nga duog.

Sang makahalin ining mga lalaki, gindala sang mga tawo ang isa ka tawo nga ginsuuban sang demonyo kag ginpaapa. Gintabog ni Jesus ang demonyo, kag sa gilayon nakahambal ang tawo. Natingala ang kadam-an sa sining mga milagro, nga nagasiling: “Wala pa gid makita ang subong sini sa Israel.”

Didto man ang mga Fariseo. Indi nila mapanghiwala ang mga milagro, apang bangod sang malaut nga indi pagtuo ginsulit nila ang ila panumbungon tuhoy sa ginahalinan sang gamhanan nga mga buhat ni Jesus, nga nagasiling: “Ginasubol niya ang mga demoyo paagi sa manuggahom sang mga demonyo.”

Wala madugay sa tapos sining mga hitabo, nagbalik si Jesus sa iya natubuan nga banwa sang Nasaret, sini nga tion gin-updan sia sang iya mga disipulo. Mga isa ka tuig antes sini, nagduaw sia sa sinagoga kag nagpanudlo didto. Bisan pa sang primero natingala ang katawhan sa iya kalahamut-an nga mga pulong, sang ulihi naakig sila sa iya panudlo kag nagtinguha sa pagpatay sa iya. Sa karon, sing maluluy-on, si Jesus nagtinguha liwat sa pagbulig sa iya mga kasimanwa anay.

Samtang sa iban nga mga duog ang mga tawo nagapanong kay Jesus, ang mga tawo diri wala magpanong sa iya. Gani, sa Adlaw nga Inugpahuway, nagpanudlo sia sa sinagoga. Ang kalabanan nga nakabati sa iya natingala. “Diin bala nagkuha ining tawo sining kaalam kag sining mga buhat nga gamhanan?” pamangkot nila. “Indi bala ini ang anak sang panday? Indi bala ang iya iloy ginatawag si Maria, kag ang iya mga utod si Santiago kag si Jose kag si Simon kag si Judas? Kag ang iya mga utod nga babayi, wala bala sila diri tanan kaupod naton? Busa diin bala nagkuha ining tawo sini tanan?”

‘Si Jesus isa lamang ka lokal nga tawo kaangay naton,’ pangatarungan nila. ‘Nakita naton sia nga nagdaku, kag kilala naton ang iya pamilya. Paano sia mangin ang Mesias?’ Gani walay sapayan sang tanan nga pamatuod​—⁠ang iya dakung kaalam kag mga milagro​—⁠ginsikway nila sia. Bangod sang ila pagkasuod, bisan ang iya mga paryente nasandad sa iya, kag bangod sini si Jesus naghinakop: “Ang manalagna may kadungganan luwas sa iya kaugalingon nga duta kag sa tunga sang iya kaugalingon nga paryente kag sa iya kaugalingon nga panimalay.”

Sa pagkamatuod, natingala si Jesus sa ila kakulang sing pagtuo. Gani wala sia didto maghimo sing mga milagro luwas sa pagpandong sang iya mga kamot sa pila ka balatianon nga mga tawo kag gin-ayo sila. Mateo 9:27-34; 13:54-58; Marcos 6:1-6; Isaias 9:7.

▪ Paagi sa pagtawag kay Jesus nga “Anak ni David,” ano ang ginpakita sang bulag nga mga lalaki nga gintuuhan nila?

▪ Ano ang paathag sang mga Fariseo sa mga milagro ni Jesus?

▪ Ngaa maluluy-on si Jesus sa pagbalik agod buligan ang mga sa Nasaret?

▪ Paano ginbaton si Jesus sa Nasaret, kag ngaa?