Kapitulo 103

Pagduaw Liwat sa Templo

SI Jesus kag ang iya mga disipulo bag-o lang nagpaligad sang ila ikatlo nga gab-i sa Betania kutob sang mag-abot sila halin sa Jerico. Pamanagbanag pa lamang sang Lunes, Nisan 10, naglakat na sila pakadto sa Jerusalem. Gutom si Jesus. Gani sang makita niya sa malayo ang kahoy nga higuera nga may mga dahon, nagpalapit sia basi kon may makita sia nga higos didto.

Temprano pa katama nangdahon ang kahoy, bangod ang panag-on para sa higos sa Hunyo pa, kag talipuspusan pa lamang karon sang Marso. Apang, bangod kay temprano ang pagpangdahon sini, abi ni Jesus mangin temprano man ang pagpamunga. Apang nabang-awan sia. Ang mga dahon naghatag sa kahoy sing madayaon nga dagway. Nian ginpakamalaut ni Jesus ang kahoy, nga nagasiling: “Wala na sing tawo nga magakaon liwat sang bunga mo.” Ang resulta sang ginhimo ni Jesus kag ang kahulugan sini nahibal-an pagkaaga.

Sa pagpadayon, si Jesus kag ang iya mga disipulo nakalab-ot sang ulihi sa Jerusalem. Nagkadto sia sa templo, nga gin-usisa niya sang nagligad nga hapon. Apang, sa karon, naghulag sia, subong sang ginhimo niya tatlo ka tuig ang nagligad sang nagkadto sia sa Paskuwa sang 30 C.⁠E. Ginpanabog ni Jesus ang mga nagapamaligya kag mga nagapamakal sa sulod sang templo kag ginpamaliskad niya ang mga lamisa sang mga manugbaylo sang kuwarta kag ang mga pulungkuan sang mga nagapamaligya sing mga salampati. Gindumili niya sa tanan ang paglaktod sa templo nga nagadala sang bisan ano nga butang.

Ginpakamalaut niya ang mga manugbaylo sang kuwarta kag ang mga nagapamaligya sing mga sapat sa sulod sang templo, nga nagsiling: “Wala bala masulat, ‘Ang akon balay tawgon nga balay nga palangamuyuan sa tanan nga kapungsuran’? Apang ginhimo ninyo ini nga lungib sang mga makawat.” Mga makawat sila bangod sobra kamahal ang ila baligya kag wala na sing mahimo ang manugbakal kundi ang magbakal sa ila sang mga sapat nga kinahanglanon para sa halad. Gani gintamod ni Jesus ining negosyo subong isa ka dagway sang pagpangilkil ukon pagpangawat.

Sang nabatian sang puno nga mga saserdote, mga escriba, kag mga pangulo sang katawhan ang ginhimo ni Jesus, nagpangita sila liwat sing paagi sa pagpatay sa iya. Busa ginpamatud-an nila nga indi sila mapabag-o. Apang, indi nila mahibaluan kon paano patyon si Jesus, kay ang tanan nga tawo pirme nagasunodsunod sa iya sa pagpamati sa iya.

Luwas sa kinaugali nga mga Judiyo, ang mga Gentil nagkari man sa Paskuwa. Mga proselita sila, buot silingon mga kombertido sila sa relihion sang mga Judiyo. Ang pila ka Griego, ayhan mga proselita, nagpalapit karon kay Felipe kag nangabay nga makigkita kay Jesus. Nagkadto si Felipe kay Andres, ayhan sa pagpamangkot kon bala nagakaigo ina nga pagpakigkita. Si Jesus posible nga yara pa sa templo, diin mahimo sia makita sang mga Griego.

Nahibaluan ni Jesus nga pila na lamang ka adlaw ang nabilin sa iya kabuhi, gani ginlaragway niya sing matahom ang iya kahimtangan: “Nag-abot na ang oras nga ang Anak sang tawo paghimayaon. Sa pagkamatuod nagasiling ako sa inyo, Kon ang binato sang trigo indi mahulog sa duta kag mapatay, nagapadayon ini nga isa lamang; apang kon mapatay ini, nagapamunga sing madamo.”

Ang isa ka binato sang trigo diutay sing bili. Apang, ano kon ginbutang ini sa duta kag “napatay,” nga nagatapos sang iya kabuhi subong binhi? Nian magatubo ini kag sa ulihi mangin tanom nga nagapamunga sing madamo gid katama nga binato sang trigo. Sing kaanggid, si Jesus isa lamang ka himpit nga tawo. Apang kon mapatay sia nga matutom sa Dios, sia mangin paagi sa pagpaalinton sang kabuhi nga wala sing katapusan sa mga matutom nga may kaanggid sa iya nga espiritu sang pagsakripisyo sa kaugalingon. Busa, si Jesus nagsiling: “Ang nagahigugma sang iya kalag nagadula sini, apang ang nagadumot sang iya kalag sa sining kalibutan magatipig sini sa kabuhi nga wala sing katapusan.”

Maathag nga indi ang iya kaugalingon ang ginahunahuna ni Jesus, kay masunod nga nagsiling sia: “Kon ang bisan sin-o nga tawo mag-alagad sa akon, magsunod sia sa akon, kag kon diin ako didto man ang akon mga alagad. Kon ang bisan sin-o nga tawo mag-alagad sa akon, sia padunggan sang Amay.” Daw ano katahom nga padya para sa pagsunod kay Jesus kag sa pag-alagad sa iya! Amo ini ang padya nga padunggan sang Amay nga makig-upod kay Cristo sa Ginharian.

Ginahunahuna ang daku nga pag-antos kag masakit nga kamatayon nga nagahulat sa iya, si Jesus nagpadayon: “Karon nalisang ang akon kalag, kag ano bala ang isiling ko? Amay, luwasa ako sa sining oras.” Kon malikawan lang kuntani ang nagahulat sa iya! Apang, indi, kay subong sang ginsiling niya: “Tungod sa sining katuyuan nag-abot ako sa sining oras.” Si Jesus nagaugyon sa bug-os nga kahimusan sang Dios, lakip ang iya kaugalingon mahalaron nga kamatayon. Mateo 21:​12, 13, 18, 19; Marcos 11:​12-18; Lucas 19:​45-48; Juan 12:​20-27.

▪ Ngaa nagpaabot si Jesus nga makakita sing higos bisan indi pa panahon sini?

▪ Ngaa gintawag ni Jesus nga “mga makawat” ang mga nagapamaligya sa templo?

▪ Sa anong paagi si Jesus kaangay sang binato sang trigo nga napatay?

▪ Ano ang ginabatyag ni Jesus nahanungod sa pag-antos kag kamatayon nga nagahulat sa iya?