Kapitulo 50

Paghanda sa Pag-atubang sa Paghingabot

SA TAPOS matudluan ang iya mga apostoles sing mga metodo sa pagbantala, ginpaandaman sila ni Jesus nahanungod sa mga manugpamatok. Sia nagsiling: “Yari karon! ginapadala ko kamo subong sang mga karnero sa tunga sang mga lobo . . . Mag-andam sa mga tawo; kay itugyan kamo sa mga korte, kag bunalon kamo nila sa ila mga sinagoga. Kag dalhon kamo sa atubangan sang mga gobernador kag sang mga hari bangod sa akon.”

Walay sapayan sang mabaskog nga paghingabot nga atubangon sang iya mga sumulunod, si Jesus mapasaligon nga nanaad: “Kon kamo itugyan nila, dili kamo maghimud-os kon paano ukon ano ang inyo ipamulong; kay sa sadto nga oras ihatag sa inyo ang inyo ipamulong; kay indi kamo ang nagapamulong, kundi ang espiritu sang inyo Amay nga nagapamulong paagi sa inyo.”

“Dugang pa,” padayon ni Jesus, “ang utod magatugyan sang utod sa kamatayon, kag ang amay sang iya anak, kag ang mga anak magabato sa mga ginikanan kag magapapatay sa ila.” Sia nagdugang: “Dumtan kamo sang tanan nga tawo bangod sa akon ngalan; apang ang nagapadayon tubtob sa katapusan maluwas.”

Ang pagbantala amo ang labing importante. Bangod sini ginapadaku ni Jesus nga kinahanglan ang pagkamahinantupon agod magpabilin nga hilway sa pagtuman sang hilikuton. “Kon sila maghingabot sa inyo sa isa ka siudad, palagyo kamo sa madason,” siling niya, “kay sa pagkamatuod nagasiling ako sa inyo, Indi ninyo malibot ang mga siudad sa Israel tubtob nga magkari ang Anak sang tawo.”

Matuod nga ginhatag ni Jesus ining instruksion, paandam, kag pagpalig-on sa iya 12 ka apostoles, apang gintuyo man ini para sa mga magapakigbahin sa bug-os kalibutan nga pagbantala sa tapos sang iya kamatayon kag pagkabanhaw. Ginapakita ini sang iya pagsiling nga ang iya mga disipulo ‘dumtan sang tanan nga tawo,’ indi lamang sang mga Israelinhon nga sa ila ginpadala ang mga apostoles sa pagbantala. Dugang pa, ang mga apostoles maathag nga wala gindala sa atubangan sang mga gobernador kag sang mga hari sang ginpadala sila ni Jesus sa ila malip-ot nga kampanya sa pagbantala. Isa pa, ang mga tumuluo sadto wala gintugyan sa kamatayon sang mga katapo sang ila pamilya.

Gani sang magsiling sia nga indi makompleto sang iya mga disipulo ang ila paglibot nga nagabantala “tubtob nga magkari ang Anak sang tawo,” matagnaon nga nagpamulong si Jesus sa aton nga indi makompleto sang iya mga disipulo ang paglibot sa bug-os napuy-an nga duta paagi sa pagbantala sang natukod nga Ginharian antes magkari ang ginhimaya nga Hari Jesucristo subong opisyal ni Jehova sa pagpanglaglag sa Armagedon.

Sa pagpadayon sang iya mga instruksion sa pagbantala, si Jesus nagsiling: “Ang disipulo indi labi sa iya manunudlo, ukon ang ulipon labi sa iya agalon.” Gani ang mga sumulunod ni Jesus dapat magpaabot nga makabaton sing malain nga pagtrato kag paghingabot subong sang naagihan niya bangod sa pagbantala sing Ginharian sang Dios. Apang sia nagalaygay: “Dili kamo mahadlok sa mga nagapatay sa lawas apang indi makapatay sa kalag; kundi hinunuo kahadlukan ninyo ang makalaglag sa kalag kag lawas sa Gehenna.”

Magapakita si Jesus sing huwaran sa sini. Maisugon nga batason niya ang kamatayon sa baylo nga ikompromiso ang iya katutom sa Isa nga makagagahom sa tanan, si Jehova nga Dios. Huo, si Jehova ang makalaglag sang “kalag” sang isa (sa sini nga bahin nagakahulugan sang palaabuton nga paglaum sang isa subong buhi nga kalag) ukon sa baylo makabanhaw sang isa ka tawo agod mag-agom sing kabuhi nga walay katapusan. Daw ano ka mahigugmaon, maluluy-on nga langitnon nga Amay si Jehova!

Masunod nga ginpalig-on ni Jesus ang iya mga disipulo paagi sa isa ka ilustrasyon nga nagapadaku sang mahigugmaon nga pag-atipan ni Jehova sa ila. “Wala bala ginabaligya ang duha ka magamay nga pispis sa diutay nga bili?” pamangkot niya. “Kag wala sing isa sa ila nga mahulog sa duta nga indi mahibal-an sang inyo Amay. Apang bisan pa ang mga buhok sa inyo ulo naisip tanan. Busa dili kamo mahadlok: mahal pa kamo sa madamo nga magamay nga pispis.”

Ang mensahe sang Ginharian nga ginsugo ni Jesus sa iya mga disipulo nga ibantala nila magabahinbahin sa mga panimalay, kay ang pila ka katapo sang pamilya magabaton sini kag ang iban magasikway sini. “Dili kamo maghunahuna nga ako nagkari sa pagdala sing paghidait sa duta,” paathag niya. “Wala ako magkari sa pagdala sing paghidait, kundi sing espada.” Sa amo, kinahanglan sang isa ka katapo sang pamilya ang kaisog sa pagbaton sa kamatuoran sang Biblia. “Ang nagahigugma sa amay ukon iloy labi pa sa akon indi takus sa akon,” siling ni Jesus, “kag ang nagahigugma sa anak nga lalaki ukon anak nga babayi labi pa sa akon indi takus sa akon.”

Sa paghinakop sang iya mga instruksion, ginpaathag ni Jesus nga ang magabaton sa iya mga disipulo magabaton man sa iya. “Kag ang bisan sin-o nga magpainom sing isa ka tagayan lamang nga tubig nga mabugnaw sa isa sining mga magamay bangod nga sia disipulo ko, sa pagkamatuod nagasiling ako sa inyo, indi niya nga mas-a madula ang iya balos.” Mateo 10:16-42.

▪ Anong mga paandam ang ginahatag ni Jesus sa iya mga disipulo?

▪ Ano nga pagpalig-on kag paglipay ang ginahatag niya sa ila?

▪ Ngaa ang mga instruksion ni Jesus naaplikar man sa modernong-adlaw nga mga Cristiano?

▪ Sa anong paagi ang isa ka disipulo ni Jesus indi labi pa sa iya manunudlo?