Kapitulo 29

Paghimo sing Maayong mga Buhat sa Adlaw

nga Inugpahuway

TIGPAMULAK karon sang 31 C.⁠E. Mga pila na ka bulan ang nagligad kutob sang makighambal si Jesus sa isa ka babayi sa bubon sang Samaria samtang manugkadto sa Galilea halin sa Judea.

Sa karon, sa tapos makapanudlo sing masangkad sa bug-os nga Galilea, si Jesus naglakat liwat pakadto sa Judea, diin magabantala sia sa mga sinagoga. Ipaanggid sa igtalupangod nga ginahatag sang Biblia sa iya ministeryo sa Galilea, diutay lamang ang ginasugid sini nahanungod sa hilikuton ni Jesus sa Judea sa sini nga pagduaw niya kag sa mga binulan nga ginhinguyang niya didto pagkatapos sang nagligad nga Paskuwa. Mahimo gid nga ang iya ministeryo wala ginbaton sa Judea sing subong sa pagbaton sa Galilea.

Sang ulihi si Jesus nagkadto sa Jerusalem, ang daku nga siudad sang Judea, para sa Paskuwa sang 31 C.⁠E. Diri, sa tupad sang Gawang sang mga Karnero, may punong nga ginatawag Betesda, diin madamong balatianon, bulag, kag piang ang nagakadto. Nagapati sila nga ang tawo sarang maayo paagi sa paglusong sa tubig sang punong kon ini natublag.

Adlaw ini nga Inugpahuway, kag nakita ni Jesus ang tawo sa punong nga nagmasakit sing 38 na ka tuig. Bangod nahibaluan niya ang madugay na nga pagbalatian sang tawo, si Jesus namangkot: “Luyag mo bala mag-ayo?”

Ginsabat niya si Jesus: “Ginuo ko, wala ako sing tawo nga magabutang sa akon sa punong kon matublag ang tubig; apang samtang nagapakadto ako ang isa nagalusong sing una sa akon.”

Si Jesus nagsiling sa iya: “Tindog ka, dalha ang imo higdaan kag maglakat.” Kag sa gilayon nag-ayo ang tawo, kag nagdala sang iya higdaan kag naglakat!

Apang sang makita sang mga Judiyo ang tawo, nagsiling sila: “Adlaw karon nga Inugpahuway, kag indi tugot sa imo ang pagdala sang imo higdaan.”

Apang nagsabat sia sa ila: “Ang nag-ayo sa akon nagsiling sa akon, ‘Dalha ang imo higdaan kag maglakat.’ ”

“Sin-o bala ang tawo nga nagsiling sa imo, ‘Dalha ang imo higdaan kag maglakat’?” pamangkot nila. Si Jesus naghalin bangod sang kadam-an, kag wala makilala sang tawo nga gin-ayo ang ngalan ni Jesus. Apang sang ulihi, si Jesus kag ang tawo nagkitaay sa templo, kag nahibaluan sang tawo nga amo sia ang nag-ayo sa iya.

Gani ang gin-ayo nga tawo naglakat kag nagsugid sa mga Judiyo nga si Jesus amo ang nag-ayo sa iya. Sang mahibaluan ini, nagkadto ang mga Judiyo kay Jesus. Bangod sa anong rason? Agod bala hibaluon kon paagi sa ano nga nahimo niya ining makatilingala nga mga butang? Indi. Kundi agod makapangita sing inugsumbong sa iya bangod naghimo sia sining maayong butang sa adlaw nga Inugpahuway. Kag nagsugod sila sa paghingabot sa iya! Lucas 4:​44; Juan 5:​1-16.

▪ Daw ano kalawig nga tion ang nagligad kutob sang katapusan nga ginduaw ni Jesus ang Judea?

▪ Ngaa tuman kabantog ang punong nga ginatawag Betesda?

▪ Ano nga milagro ang ginhimo ni Jesus sa punong, kag ano ang reaksion sang mga Judiyo?