Kapitulo 31

Pagpangutol sing Uhay sa Adlaw nga Inugpahuway

HALIN sa Jerusalem, si Jesus kag ang iya mga disipulo nagbalik sa Galilea. Tigpamulak sadto, kag ang mga uma may mga uyas. Gingutom ang mga disipulo. Gani nagpangutol sila sing mga uhay kag nagkaon. Apang sanglit Adlaw nga Inugpahuway, ang ginhimo nila gintalupangod.

Bag-o lang gintinguhaan sang relihioso nga mga lider sa Jerusalem nga patyon si Jesus bangod sang paglapas kuno sa Adlaw nga Inugpahuway. Karon ang mga Fariseo amo ang nagsumbong. “Tuluka! Ang imo mga disipulo nagahimo sing indi tugot nga pagbuhaton sa Adlaw nga Inugpahuway,” panumbungon nila.

Ang mga Fariseo nagsiling nga ang pagpangutol sing uyas kag pagnusnos sini sa kamot agod kaunon pag-ani kag paglinas. Apang ang ila estrikto nga paghangop sa kon ano ang makabig nga trabaho naghimo sa Adlaw nga Inugpahuway nga isa ka lulan, samtang gintuyo ini nga mangin makalilipay, makapalig-on sa espirituwal nga tion. Gani si Jesus nagsabat paagi sa Makasulatanhon nga mga halimbawa nga nagapakita nga wala gid pagtuyua ni Jehova nga Dios inang dinagakaigo nga pag-aplikar sing estrikto sa Iya kasuguan sa Adlaw nga Inugpahuway.

Nagsiling si Jesus nga sang gingutom si David kag ang iya mga tinawo, nagdulog sila sa tabernakulo kag nagkaon sang tinapay nga pahayag. Yadtong mga tinapay ginkuha na sa atubangan ni Jehova kag gin-islan sing bag-o, kag sa kinaandan ginatigana ini agod kaunon sang mga saserdote. Apang, sa idalom sang mga sirkunstansia, si David kag ang iya mga tinawo wala ginkondenar bangod sang pagkaon sini.

Nagahatag sing isa pa ka halimbawa, si Jesus nagsiling: “Wala bala ninyo mabasahi sa Kasuguan nga sa adlaw nga inugpahuway ang mga saserdote sa templo nagapasipala sa adlaw nga inugpahuway kag dimalinapason sila?” Huo, bisan sa Adlaw nga Inugpahuway ang mga saserdote padayon nga nagaihaw kag nagahimo sang iban pa nga hilikuton sa templo sa paghanda sa mga sapat nga ihalad! “Apang ako nagasiling sa inyo,” siling ni Jesus, “ang isa nga daku pa sa templo yari diri.”

Nagapaandam sa mga Fariseo, si Jesus nagpadayon: “Kon nahibaluan ninyo kon ano ang kahulugan sini, ‘Buot ko ang kaluoy, kag indi ang halad,’ wala ninyo kuntani mapakamalaut ang mga dimalinapason.” Nian naghinakop sia: “Ang Anak sang tawo Ginuo sang adlaw nga inugpahuway.” Ano ang buot silingon ni Jesus sa sina? Ginapatuhuyan ni Jesus ang iya mahidaiton nga paggahom sa Ginharian sa isa ka libo ka tuig.

Sa 6,000 ka tuig ang katawhan nag-antos sing mabudlay nga pagkaulipon sa idalom ni Satanas nga Yawa, kag kinaandan karon ang kasingki kag inaway. Sa pihak nga bahin, ang daku nga kasuguan ni Cristo sa adlaw nga Inugpahuway mangin tion sa pagpahuway gikan sa tanan nga pag-antos kag pagpamigos. Mateo 12:​1-8; Levitico 24:​5-9; 1 Samuel 21:​1-6; Numeros 28:​9; Oseas 6:6.

▪ Ano ang ginsumbong batok sa mga disipulo ni Jesus, kag paano ini ginsabat ni Jesus?

▪ Ano nga sayop sang mga Fariseo ang ginhambal ni Jesus?

▪ Sa anong paagi si Jesus “Ginuo sang adlaw nga inugpahuway”?