Kapitulo 51

Pagpatay sa Tion sang Sinalusalo sang Kaadlawan

SANG mahatag ang mga instruksion sa iya mga apostoles, ginpalakat sila ni Jesus sing parisparis sa teritoryo. Ayhan ang mag-utod nga sanday Pedro kag Andres ang magkaupod, subong man sanday Santiago kag Juan, sanday Felipe kag Bartolome, sanday Tomas kag Mateo, sanday Santiago kag Tadeo, kag sanday Simon kag Judas Iscariote. Ang anom ka paris sang mga ebanghelisador nagbantala sing maayong balita sang Ginharian kag naghimo sing milagruso nga pagpang-ayo bisan diin sila magkadto.

Samtang, si Juan Bautista yara gihapon sa bilangguan. Mga duha ka tuig na sia didto. Madumduman ninyo nga si Juan nagbantala sing dayag nga sayop para kay Herodes Antipas nga pangasaw-on si Herodias, ang asawa sang iya utod nga si Felipe. Bangod ginasiling ni Herodes Antipas nga ginasunod niya ang Mosaikong Kasuguan, nagakaigo nga ginbuyagyag ni Juan ining makihilahion nga pag-asawahay. Gani ginpabilanggo ni Herodes si Juan, ayhan sa sugyot ni Herodias.

Nahibaluan ni Herodes Antipas nga si Juan isa ka matarong nga tawo kag nalipay sia sa pagpamati sa iya. Gani indi niya mahibaluan kon ano ang himuon kay Juan. Sa pihak nga bahin, akig si Herodias kay Juan kag nanikasog nga patyon sia. Sang ulihi, nag-abot ang kahigayunan nga ginahulat niya.

Antes sang Paskua sang 32 C.⁠E., si Herodes naghiwat sing daku nga pagsaulog sang iya kaadlawan. Nagtipon sa sinalusalo ang tanan nga mataas nga mga opisyal kag mga puno sang hangaway, kag subong man ang kilala nga mga banwahanon sang Galilea. Samtang nagagab-i, si Salome, nga anak nga dalaga ni Herodias sa iya anay bana nga si Felipe, ginpasaot para sa mga bisita. Naluyagan sang kalalakin-an ang iya saot.

Nahamuot sing daku si Herodes kay Salome. “Pangayo ka sa akon sang bisan ano nga imo naluyagan, kag ihatag ko ini sa imo,” siling niya. Kag nagsumpa sia: “Bisan ano ang imo pangayuon sa akon, ihatag ko sa imo, tubtob sa katunga sang akon ginharian.”

Sa wala pa magsabat, nagguwa si Salome kag nagpamangkot sa iya iloy. “Ano bala ang akon pangayuon?” pamangkot niya.

Nag-abot na ang kahigayunan! “Ang ulo ni Juan Bautista,” sabat ni Herodias nga wala sing pangalag-ag.

Dalidali nga nagbalik si Salome sa hari kag nangayo: “Luyag ko nga imo ihatag sa akon sa gilayon sa bandihado ang ulo ni Juan Bautista.”

Si Herodes nagkasubo sing daku. Apang bangod nabatian sang iya mga bisita ang iya sumpa, nahuya sia nga indi ini pag-ihatag, bisan pa nga nagakahulugan ini sang pagpatay sa tawo nga wala sing sala. Sa gilayon ginpadala ang manugpatay sa bilangguan agod tumanon ang iya makasiligni nga sugo. Sang ulihi nagbalik sia nga dala ang ulo ni Juan sa bandihado, kag ginhatag niya ini kay Salome. Ginhatag man niya ini sa iya iloy. Sang mabatian sang mga disipulo ni Juan ang natabo, nag-abot sila kag ginkuha ang iya bangkay kag ginlubong ini, kag nian ginreport ang natabo kay Jesus.

Sang ulihi, sang mabatian ni Herodes ang pagpang-ayo kag pagpaguwa sang mga demonyo ni Jesus, hinadlukan sia, nahadlok nga si Jesus basi amo si Juan nga ginbanhaw gikan sa patay. Busa, luyag gid niya makita si Jesus, indi agod pamatian ang iya pagbantala, kundi agod lig-unon kon bala ang iya kahadlok nagakabagay ukon indi. Mateo 10:1-5; 11:1; 14:1-12; Marcos 6:14-29; Lucas 9:7-9.

▪ Ngaa nabilanggo si Juan, kag ngaa indi luyag ni Herodes nga patyon sia?

▪ Paano napapatay sang ulihi ni Herodias si Juan?

▪ Sang mapatay si Juan, ngaa luyag ni Herodes nga makita si Jesus?