Kapitulo 44

Pagpatunong sa Makahaladlok nga Unos

ANG adlaw ni Jesus puno sing hilikuton, lakip ang pagtudlo sa kadam-an sa higad sang baybay kag pagkatapos pagpaathag sang mga ilustrasyon sing pribado sa iya mga disipulo. Sang maggab-i, sia nagsiling: “Matabok kita.”

Sa sidlangan nga baybayon sang Dagat sang Galilea amo ang rehiyon nga gintawag Decapolis, gikan sa Griegong deʹka, nga nagakahulugan “napulo,” kag poʹlis, nga nagakahulugan “siudad.” Ang mga siudad sang Decapolis amo ang sentro sang Griegong kultura, bisan pa wala sing duhaduha amo man ini ang puluy-an sang madamo nga Judiyo. Apang, limitado gid ang pagpanghikot ni Jesus sa rehiyon. Bisan sa sini nga pagduaw, subong makita naton karon dugaydugay, ginpunggan sia sa pagpabilin sing malawiglawig.

Sang mangabay si Jesus nga matabok na sila, gindala sia sang iya mga disipulo sa sakayan. Apang, nadunggan ang ila paglakat. Wala magdugay ang iban pa nagsakay man sa ila mga sakayan agod mag-upod sa ila. Indi malayo ang talabukon. Ang matuod, ang Dagat sang Galilea isa lamang ka daku nga linaw nga mga 21 kilometros sa kalabaon kag 12 kilometros sa kasangkaron.

Halangpunon nga kapoy na si Jesus. Gani, pagtulak nila, naghigda sia sa ulin, nag-ulon sa ulunan, kag nagtulog. Ang iban sang mga apostoles eksperiensiado nga mga mananagat, bangod nagapangisda sila anay sa Dagat sang Galilea. Gani sila ang nagpaandar sang sakayan.

Apang indi ini mahapos nga paglakbay. Bangod sang mainit nga temperatura sa kadaygan sang linaw, nga mga 210 metros sa ubos sang nibel sang dagat, kag sang mabugnaw nga hangin sa malapit nga kabukiran, ang mabaskog nga madlos nagahuyop kon kaisa kag nagatuga sing hinali nga unos sa linaw. Amo sini karon ang natabo. Wala madugay ang mga balod nagtap-ok sa sakayan kag nagtugob sini, amo kon ngaa nagbaha sa sulod sini. Apang, nagakatulog gihapon si Jesus!

Ang eksperiensiado nga mga mananagat nagdalidali sa paggiya sa sakayan. Wala sing duhaduha nga nakamaniobra sila sa mga unos sang una. Apang sini nga tion wala na sila sing mahimo. Sa kahadlok nga mapatay sila, ginpukaw nila si Jesus. ‘Agalon, wala ka bala nagakabalaka? Malunod na kita!’ tuaw nila. ‘Luwasa kami, malunod kita!’

Pagmata niya, ginmanduan ni Jesus ang hangin kag ang dagat: “Maglinong! Magpuas!” Kag ang mabaskog nga hangin nagtunong kag ang dagat nagkalma. Nagliso sa iya mga disipulo, namangkot sia: ‘Ngaa nahadlok gid kamo? Wala bala kamo sing pagtuo?’

Nian, ginhugakom ang mga disipulo sing tumalagsahon nga kahadlok. ‘Sin-o gid ini nga tawo?’ pamangkot nila sa isa kag isa, ‘kay bisan ang hangin kag tubig ginamanduan niya, kag nagatuman sila sa iya.’

Daw ano nga gahom ang ginpasundayag ni Jesus! Daw ano ka makapasalig mahibaluan nga ang aton Hari may gahom sa ibabaw sang kinaugali nga mga elemento kag nga kon ang iya bug-os nga igtalupangod ipatuhoy sa aton duta sa tion sang iya paggahom sa Ginharian, ang tanan nga katawhan magapuyo sa kalig-unan gikan sa makahaladlok nga kinaugali nga mga kalamidad!

Pagligad sang pila ka tion sa tapos magtunong ang unos, si Jesus kag ang iya mga disipulo nag-abot sa sidlangan nga baybayon. Mahimo nga ang iban nga mga sakayan naluwas sa mabaskog nga unos kag nakapauli nga wala mahaliti. Marcos 4:35–5:1; Mateo 8:18, 23-27; Lucas 8:22-26.

▪ Ano ang Decapolis, kag sa diin ini nahamtang?

▪ Anong pisikal nga mga kahimtangan ang ginabangdan sang mabaskog nga mga unos sa Dagat sang Galilea?

▪ Sang indi sila maluwas sang ila kalantip sa pagpanagat, ano ang ginhimo sang mga disipulo?