Kapitulo 34

Pagpili sang Iya mga Apostoles

ISA ka tuig kag tunga na ang nagligad kutob sang ginpakilala ni Juan Bautista si Jesus subong ang Kordero sang Dios, kag si Jesus nagsugod sa pagministeryo sa publiko. Sadtong tion, sanday Andres, Simon Pedro, Juan, kag ayhan si Santiago (utod ni Juan), subong man si Felipe kag si Natanael (gintawag man Bartolome), nangin una nga mga disipulo niya. Sang ulihi, madamo pa ang nagbuylog sa ila sa pagsunod kay Cristo.

Handa na karon si Jesus sa pagpili sang iya mga apostoles. Amo ini sila ang iya mangin suod nga mga kaupod nga hanason sing pinasahi. Apang sa wala pa sila ginpili, nagkadto anay si Jesus sa bukid kag nangamuyo didto sa bug-os nga gab-i, ayhan agod mangayo sing kaalam kag pagpakamaayo sang Dios. Sang mag-adlaw na, gintawag niya ang iya mga disipulo kag gikan sa ila nagpili sia sing 12. Apang, bangod padayon sila nga nangin mga estudyante ni Jesus, gintawag man sila nga mga disipulo.

Ang anom nga ginpili ni Jesus nga ginhingadlan sa ibabaw amo ang iya nangin una nga mga disipulo. Napilian man si Mateo nga gintawag ni Jesus gikan sa opisina nga balayran sing buhis. Ang lima pa nga napilian amo sanday Judas (gintawag man Tadeo), Judas Iscariote, Simon nga Canaanhon, Tomas, kag Santiago nga anak ni Alfeo. Ining si Santiago gintawag man nga Santiago nga Bataon, ayhan bangod gamay sia sa panglawason ukon bata sa edad kon ipaanggid kay apostol Santiago.

Sini nga tion madugaydugay na nga nakaupod ni Jesus ang 12, kag nakilala niya sila sing maayo. Sa kamatuoran, ang pila sa ila mga paryente niya. Si Santiago kag ang iya utod nga si Juan mga pakaisa ni Jesus. Kag posible nga si Alfeo utod ni Jose, ang nag-adoptar nga amay ni Jesus. Gani ang anak ni Alfeo, si apostol Santiago, pakaisa man ni Jesus.

Sa pagkamatuod, wala nabudlayan si Jesus sa pagdumdom sang mga ngalan sang iya mga apostoles. Apang madumduman mo bala sila? Ti, dumduma lamang nga may duha ka Simon, duha ka Santiago, kag duha ka Judas kag si Simon may utod nga si Andres, kag si Santiago may utod nga si Juan. Amo ina ang sekreto sa pagdumdom sa walo ka apostoles. Ang apat pa nagalakip sa manugsukot sing buhis (Mateo), sa isa nga sang ulihi nagduhaduha (Tomas), sa isa nga gintawag gikan sa idalom sang kahoy (Natanael), kag ang iya abyan nga si Felipe.

Ang napulog-isa sang mga apostoles naghalin sa Galilea, ang teritoryo ni Jesus. Si Natanael taga-Cana. Sanday Felipe, Pedro, kag Andres taga-Betsaida anay, sanday Pedro kag Andres nagsaylo sang ulihi sa Capernaum nga daw amo ang ginapuy-an ni Mateo. Sanday Santiago kag Juan mga mangingisda kag mahimo man nga nagapuyo sa Capernaum ukon malapit sa sini. Daw si Judas Iscariote lamang, nga sang ulihi nagluib kay Jesus, ang apostol nga taga-Judea. Marcos 3:​13-19; Lucas 6:​12-16.

▪ Sin-o nga mga apostoles ang ayhan mga paryente ni Jesus?

▪ Sin-o ang mga apostoles ni Jesus, kag paano mo madumduman ang ila ngalan?

▪ Sa diin nga mga teritoryo naghalin ang mga apostoles?