Kapitulo 30

Pagsabat sa mga Nagsumbong sa Iya

SANG ginsumbong si Jesus sang Judiyo nga relihioso nga mga lider nga ginlapas niya ang Adlaw nga Inugpahuway, sia nagsabat: “Ang akon Amay nagapangabudlay tubtob karon, kag magapangabudlay ako.”

Walay sapayan sang ginasiling sang mga Fariseo, ang hilikuton ni Jesus indi ang sahi nga ginadumilian sang kasuguan tuhoy sa Adlaw nga Inugpahuway. Ang iya hilikuton sa pagbantala kag pag-ayo gikan sa Dios, kag, bilang pag-ilog sa huwaran sang Dios, padayon nga ginhimo niya ini sa adlaw-adlaw. Apang, labi pa nga naakig ang mga Judiyo sa iya sabat, kag nagtinguha sila sa pagpatay sa iya. Ngaa?

Bangod karon indi lamang nga nagapati sila nga ginlapas ni Jesus ang Adlaw nga Inugpahuway kundi ginkabig nila ang iya pangangkon subong personal nga Anak sang Dios subong pasipala. Apang, wala mahadlok si Jesus kag dugang pa nga nagsabat sia sa ila tuhoy sa iya nahamut-an nga kaangtanan sa Dios. “Ang Amay nagahigugma sa Anak,” siling niya, “kag nagapakita sa iya sang tanan nga iya ginahimo.”

“Kag subong nga ang Amay nagabangon sang mga minatay,” padayon ni Jesus, “sa amo nga bagay ang Anak man nagahatag sing kabuhi sa kay sin-o nga luyag niya.” Sa pagkamatuod, ang Anak nagabanhaw na sing minatay sa espirituwal nga paagi! “Ang nagapamati sang akon pulong kag nagatuo sa nagpadala sa akon,” siling ni Jesus, “naglaton gikan sa kamatayon pa kabuhi.” Huo, padayon niya: “Ang oras magaabot, kag karon amo na, nga ang mga patay magapamati sang tingog sang Anak sang Dios kag ang mga nagapamati magakabuhi.”

Bisan pa wala pa sing rekord nga si Jesus literal nga nagbanhaw sing patay tubtob sa sini nga tion, ginsingganan niya ang mga nagasumbong sa iya nga inang literal nga pagkabanhaw sang mga patay mahanabo. “Dili kamo matingala,” siling niya, “kay ang oras magaabot nga ang tanan nga yara sa mga lulubngan magapamati sang iya tingog kag magaguwa.”

Tubtob sadto nga tinion, maathag nga wala pa gid malaragway ni Jesus sa publiko ang iya importante nga papel sa katuyuan sang Dios sa isa ka maathag kag pat-od nga paagi. Apang indi lamang ang pagpanaksi ni Jesus nahanungod sining mga butang ang nabatian sang mga nagsumbong sa iya. “Ginpasuguan ninyo si Juan,” pahanumdom ni Jesus sa ila, “kag nagsaksi sia sa kamatuoran.”

Duha ka tuig lamang antes sini, ginsugiran ni Juan Bautista ining Judiyo nga relihioso nga mga lider nahanungod sa Isa nga magaabot sa tapos niya. Nagapahanumdom sa ila sang ila anay mataas nga pagtahod sa nabilanggo na karon nga si Juan, si Jesus nagsiling: “Naluyag kamo magkalipay sa malip-ot nga tion sa iya kapawa.” Ginpahanumdom ini ni Jesus sa ila sa paglaum nga buligan sila, huo, luwason sila. Apang wala sia nagasandig sa panaksi ni Juan.

“Ang mga buluhaton nga akon ginahimo [lakip ang milagro nga bag-o lang niya matapos] nagasaksi nahanungod sa akon nga ang Amay nagpadala sa akon.” Apang luwas pa sina, si Jesus nagpadayon: “Ang Amay nga nagpadala sa akon nagsaksi nahanungod sa akon.” Ang Dios nagsaksi kay Jesus, halimbawa, sang iya bawtismo, nga nagasiling: “Ini ang akon Anak, nga hinigugma.”

Sa pagkamatuod, wala sing balibad ang mga nagsumbong kay Jesus sa pagsikway sa iya. Ang Kasulatan gid nga ila ginausisa suno sa ila pangangkon nagapamatuod nahanungod sa iya! “Kon nagtuo kamo kay Moi­ses, magatuo kamo sa akon,” hinakop ni Jesus, “kay nagsulat sia nahanungod sa akon. Apang kon kamo wala nagatuo sa iya nga sinulat, paano bala ang pagtuo ninyo sa akon pulong?” Juan 5:​17-47; 1:19-27; Mateo 3:17.

▪ Ngaa ang hilikuton ni Jesus indi paglapas sa Adlaw nga Inugpahuway?

▪ Paano ginlaragway ni Jesus ang iya importante nga papel sa katuyuan sang Dios?

▪ Sa pagpamatuod nga Anak sia sang Dios, kay sin-o panaksi ang gintudlo niya?