Kapitulo 43

Pagtudlo Paagi sa mga Ilustrasyon

MAATHAG nga si Jesus yara sa Capernaum sang ginsabdong niya ang mga Fariseo. Sang ulihi sadto gihapon nga adlaw, naglakat sia kag nagkadto sa malapit nga Dagat sang Galilea, diin nagtipon ang kadam-an sang tawo. Didto nagsakay sia sa isa ka sakayan, nagpalayo diutay, kag nagsugod sa pagtudlo sa mga tawo sa higad sang baybay nahanungod sa Ginharian sang mga langit. Ginhimo niya ini paagi sa mga serye sang mga parabola, ukon mga ilustrasyon, ang tagsa may kahimtang nga pamilyar sa mga tawo.

Una, si Jesus nagsugid tuhoy sa isa ka manugsab-ug nga nagsab-ug sing binhi. Ang iban nga binhi nagtupa sa higad sang dalan kag gintuka sang mga pispis. Ang iban nga binhi nagtupa sa batuhon nga duog. Bangod ang gamot kulang sing kadalumon, ang bag-ong mga tanom nalayong sang nagsubang ang adlaw. Ang iban pa gid nga binhi nagtupa sa mga talungon, nga naglumos sa tanom sang mag-ulhot sila. Sa katapusan, ang iban nga binhi nagtupa sa maayong duta kag nagpamunga sing isa ka gatos ka pilo, ang iban kan-uman, kag ang iban katluan.

Sa isa pa gid ka ilustrasyon, ginpaanggid ni Jesus ang Ginharian sang Dios sa isa ka tawo nga nagsab-ug sing binhi. Sa pagligad sang inadlaw, samtang nagatulog ang tawo kag nagabugtaw, ang binhi nagtubo. Wala mahibalui sang tawo kon paano. Nagtubo ini sing kinaugalingon kag nagpatubas sing uhay. Sang ang uhay alanyon na, gin-ani ini sang tawo.

Si Jesus nagsugid sang ikatlo nga ilustrasyon nahanungod sa tawo nga nagsab-ug sang husto nga sahi sang binhi, apang “sang nagakatulog ang mga tawo,” nag-abot ang kaaway kag nagsab-ug sing gamhon sa tunga sang trigo. Ang mga suluguon sang tawo namangkot kon bala gabuton nila ang mga gamhon. Apang nagsabat sia: ‘Indi, basi magabot ninyo ang iban nga trigo. Pabayai nga magtubo anay sila sing tingob tubtob sa ani. Ugaling magasiling ako sa mga mangangani nga gabuton ang mga gamhon kag sunugon kag tipunon ang trigo sa tambubo.’

Dugang sa iya pamulongpulong sa kadam-an sa higad sang baybay, si Jesus naghatag sing duha pa ka ilustrasyon. Ginpaathag niya nga “ang ginharian sang mga langit” kaangay sang binhi sang mustasa nga gintanom sang isa ka tawo. Bisan pa nga amo ini ang pinakamagamay sa tanan nga binhi, siling niya, nagatubo ini nga mangin ang pinakadaku sa tanan nga utanon. Nangin kahoy ini nga ginakadtuan sang mga pispis, kag nagahulon sa mga sanga sini.

Ang iban karon nagapamatok nga may ma­gagmay pa sa binhi sang mustasa. Apang si Jesus wala nagahatag sing leksion sa botaniya. Tuhoy sa mga binhi nga pamilyar ang mga taga-Galilea sang adlaw niya, ang binhi sang mustasa amo gid ang pinakamagamay. Gani nahangpan nila ang talalupangdon nga pagtubo nga ginailustrar ni Jesus.

Sa katapusan, ginpaanggid ni Jesus “ang ginharian sang mga langit” sa tapay nga ginkuha kag gintago sang isa ka babayi sa tatlo ka sukob sang harina. Sang ulihi, siling niya, bug-os ini nga nalatom.

Sa tapos mahatag ining lima ka ilustrasyon, ginpalakat ni Jesus ang kadam-an kag nagbalik sa balay nga ginadayunan niya. Sang ulihi ang iya 12 ka apostoles kag ang iban pa nagkadto sa iya didto.

Pagbenepisyo Gikan sa mga Ilustrasyon ni Jesus

Sang magpalapit ang mga disipulo kay Jesus sa tapos sia makapamulongpulong sa kadam-an sa higad sang baybay, luyag nila mahibal-an ang iya bag-o nga metodo sa pagpanudlo. Nakabati na sila nga naggamit sia anay sing mga ilustrasyon, apang indi gid tanto. Gani namangkot sila: “Ngaa nagapamulong ikaw sa ila paagi sa mga ilustrasyon?”

Ang isa ka rason amo ang pagtuman sa mga pulong sang manalagna: “Magabungat ako sa mga ilustrasyon, magamitlang ako sang butang nga nalipdan kutob sa pagtukod sang kalibutan.” Apang indi lamang ini. Ang iya paggamit sing mga ilustrasyon nagabulig sa pagbuyagyag sang panimuot sang tagipusuon sang mga tawo.

Ang matuod, ang kalabanan nga tawo interesado lamang kay Jesus bangod matahom sia magsugilanon kag nagahimo sia sing mga milagro, apang indi agod alagdon sia subong Ginuo kag sundon sing dimakagod. Indi nila luyag nga matublag sa ila pagtamod sa mga butang ukon sa ila pagkabuhi. Indi nila luyag nga maapektohan ini sang mensahe.

Gani si Jesus nagsiling: “Bangod sini nagapamulong ako sa ila paagi sa mga ilustrasyon, kay sa nagatulok wala sila makakita, kag sa nagapamati wala sila makabati, kag wala man sila makahangop; kag natuman sa ila ang tagna ni Isaias, nga nagasiling, ‘ . . . Kay ang tagipusuon sining katawhan ginkibulan.’ ”

“Apang,” nagpadayon si Jesus sa pagsiling, “malipayon ang inyo mga mata kay makakita sila, kag ang inyo mga dulunggan kay nagapamati sila. Sa pagkamatuod nagasiling ako sa inyo, Madamo ang mga manalagna kag ang matarong nga mga tawo nga naghandum sa pagtan-aw sang inyo ginatan-aw, kag wala makakita sini, kag sa pagpamati sang inyo ginapamatian, kag wala makabati sini.”

Huo, ang 12 ka apostoles kag ang mga kaupod nila may mabinatunon nga tagipusuon. Busa, si Jesus nagsiling: “Sa inyo nahatag ang paghangop sa balaan nga mga tinago sang ginharian sang langit, apang sa ila wala nahatag.” Bangod sang ila handum nga makahangop, ginpaathag ni Jesus sa iya mga disipulo ang ilustrasyon nahanungod sa manugsab-ug.

“Ang binhi amo ang pulong sang Dios,” siling ni Jesus, kag ang duta amo ang tagipusuon. Tuhoy sa binhi nga ginsab-ug sa higad sang dalan, sia nagpaathag: “Nagaabot ang Yawa kag nagakuha sang pulong sa ila tagipusuon agod nga indi sila magtuo kag maluwas.”

Sa pihak nga bahin, ang binhi nga ginsab-ug sa batuhon nagapatuhoy sa tagipusuon sang mga tawo nga nagbaton sa pulong nga may kalipay. Apang, bangod ang pulong indi makapanggamot sing madalom sa sina nga mga tagipusuon, ining mga tawo wala magpadayon sang mag-abot ang tion sang pagtilaw ukon paghingabot.

Tuhoy sa binhi nga nagtupa sa tunga sang mga talungon, padayon ni Jesus, nagapatuhoy ini sa mga tawo nga nakabati sa pulong. Apang, nadala ini sila sang mga kabalaka kag mga manggad kag mga kalipayan sang kabuhi, gani nalumsan sila kag wala mamunga.

Sa katapusan, tuhoy sa binhi nga ginsab-ug sa maayo nga duta, siling ni Jesus, amo ini sila nga, sa tapos mabatian ang pulong nga may maayo kag mabinatunon nga tagipusuon, nagtipig sini kag namunga nga may pagbatas.

Daw ano ka ginpakamaayo ining mga disipulo nga nagpangita kay Jesus agod mangayo sing paathag tuhoy sa iya mga panudlo! Katuyuan ni Jesus nga mahangpan ang iya mga ilustrasyon agod makapaambit sa iban sing kamatuoran. “Ang suga wala ginatabunan sing suludlan ukon ginabutang sa idalom sang higdaan, indi bala?” pamangkot niya. Wala, “kundi ginabutang ini sa tulungtungan.” Sa amo, si Jesus nagdugang: “Busa, mag-andam kon paano ang inyo pagpamati.”

Ginpakamaayo sing Dugang nga Instruksion

Sa tapos mabatian ang paathag ni Jesus tuhoy sa ilustrasyon sang manugsab-ug, luyag sang mga disipulo nga makahibalo sing dugang pa. “Saysayi kami,” pangabay nila, “sang ilustrasyon sang mga gamhon sa uma.”

Daw ano ka tuhay ang mga disipulo gikan sa iban nga kadam-an sa higad sang baybay! Yadto nga mga tawo wala sing hanuot nga handum sa paghibalo sang kahulugan sa likod sang mga ilustrasyon, kay naayawan na sila sa balayan lamang sang mga butang nga ginhatag sa ila. Nagapatuhay sa mga tumalambong sa higad sang baybay sa iya mausisaon nga mga disipulo nga nagkari sa iya sa balay, si Jesus nagsiling:

“Sa talaksan nga ginataksan ninyo takson kamo, kag kapin pa ang idugang sa inyo.” Ang mga disipulo takus sa hanuot nga interes kag igtalupangod ni Jesus, kag gani ginpakamaayo sila sa pagbaton sing dugang nga instruksion. Busa, bilang sabat sa pamangkot sang iya mga disipulo, si Jesus nagapaathag:

“Ang nagasab-ug sang maayong binhi amo ang Anak sang tawo; ang uma amo ang kalibutan; kag ang maayong binhi amo ang mga anak sang ginharian; apang ang mga gamhon amo ang mga anak sang malaut, kag ang kaaway nga nagsab-ug sa ila amo ang Yawa. Ang tig-alani amo ang konklusion sang sistema sang mga butang, kag ang mga mangangani amo ang mga anghel.”

Sa tapos mapakilala ang tagsa ka bahin sang iya ilustrasyon, si Jesus naglaragway sang resulta. Sa konklusion sang sistema sang mga butang, sia nagasiling nga ang mga mangangani, ukon mga anghel, magapain sang katulad gamhon nga butig nga mga Cristiano gikan sa matuod nga “mga anak sang ginharian.” Nian “ang mga anak sang malaut” pagatandaan para sa kalaglagan, apang ang mga anak sang Ginharian sang Dios, “ang mga matarong,” magaiwag sing masanag sa Ginharian sang ila Amay.

Masunod nga ginpakamaayo ni Jesus ang iya mausisaon nga mga disipulo sing tatlo pa ka ilustrasyon. Una, siling niya: “Ang ginharian sang langit kaangay sang isa ka bahandi nga natago sa latagon, nga nakita sang isa ka tawo kag gintago; nian sa kalipay naglakat sia kag nagbaligya sang tanan niya kag nagbakal sadtong latagon.”

“Liwat,” padayon niya, “ang ginharian sang langit kaangay sang isa ka manugpatikang nga nagpangita sing maayong mga perlas. Nga, sang pagkakita niya sang isa ka perlas nga bilidhon, naglakat kag ginbaligya ang tanan niya kag ginbakal ang perlas.”

Si Jesus mismo kaangay sang tawo nga nakakita sang bahandi nga natago kag kaangay sang manugpatikang nga nakakita sang isa ka perlas nga bilidhon. Ginbaligya niya ang tanan, kon hambalon pa, ginbayaan ang dungganon nga posisyon sa langit agod mangin kubos nga tawo. Nian, subong tawo sa duta, nag-antos sia sing pasipala kag madinumtanon nga paghingabot, nagapamatuod nga takus mangin Gumalahom sang Ginharian sang Dios.

Ang hangkat ginbutang man sa atubangan sang mga sumulunod ni Jesus nga ibaligya ang tanan nga butang agod matigayon ang dakung padya nga mangin kaupod nga gumalahom ni Cristo ukon dutan-on nga sakop sang Ginharian. Kabigon bala naton ang pagpakigbahin sa Ginharian sang Dios nga labi pa ka bilidhon sang sa bisan ano nga butang sa kabuhi, subong bilidhon nga tinago ukon hamili nga perlas?

Sa katapusan, ginpaanggid ni Jesus “ang ginharian sang mga langit” sa isa ka sahid nga nakakuha sing sarisari nga mga isda. Sang ginpainpain ang isda, ang mga malain ginpilak apang ang mga maayo gintipon. Gani, si Jesus nagsiling, mangin subong sina sa konklusion sang sistema sang mga butang; ang mga anghel magapain sang malaut gikan sa matarong, nagatigana sang mga malaut para sa kalaglagan.

Ginsugdan mismo ni Jesus ining proyekto sa pagpangisda, nagatawag sang iya nahaunang mga disipulo nga mangin “mga mangingisda sang tawo.” Sa idalom sang angheliko nga pagtuytoy, ang hilikuton sa pagpangisda nagapadayon sa sulod sang mga siniglo. Sa katapusan nag-abot ang tion sa pagbutong sang “sahid,” nga nagasimbulo sa mga organisasyon sa duta nga nagaangkon nga Cristiano.

Bisan pa nga ang malain nga isda gintigana sa kalaglagan, sing mapasalamaton sarang kita maisip sa tunga sang ‘maayong isda’ nga pagatipunon. Paagi sa pagpakita sing hanuot nga handum subong sang iya sang mga disipulo ni Jesus para sa dugang nga ihibalo kag paghangop, pakamaayuhon kita indi lamang sing dugang nga instruksion kundi sing pagpakamaayo sang Dios nga kabuhi nga dayon. Mateo 13:1-52; Marcos 4:1-34; Lucas 8:4-18; Salmo 78:2; Isaias 6:9, 10.

▪ San-o kag diin nagpamulong si Jesus paagi sa mga ilustrasyon sa mga kadam-an?

▪ Ano ang lima ka ilustrasyon nga ginsugid karon ni Jesus sa kadam-an?

▪ Ngaa nagsiling si Jesus nga ang binhi sang mustasa amo ang pinakamagamay sa tanan nga binhi?

▪ Ngaa naghambal si Jesus paagi sa mga ilustrasyon?

▪ Paano ginpakita sang mga disipulo ni Jesus nga tuhay sila sa kadam-an?

▪ Ano nga paathag ang ginhatag ni Jesus sa ilustrasyon tuhoy sa manugsab-ug?

▪ Ano ang kinatuhayan sang mga disipulo gikan sa mga kadam-an sa higad sang baybay?

▪ Sin-o ukon ano ang ginalaragway sang nagasab-ug, sang uma, sang maayong binhi, sang kaaway, sang tig-alani, kag sang mga mangangani?

▪ Anong tatlo ka dugang nga ilustrasyon ang ginhatag ni Jesus, kag ano ang matun-an naton gikan sa sini?