Kapitulo 17

Pagtudlo kay Nicodemo

SAMTANG nagatambong sia sa Paskuwa sang 30 C.E., naghimo si Jesus sing talalupangdon nga mga tanda, ukon mga milagro. Subong resulta, madamo nga tawo ang nagtuo sa iya. Si Nicodemo, isa ka katapo sang Sanhedrin, ang Judiyong mataas nga hukmanan, nahamuot kag luyag makatuon sing dugang pa. Gani ginduaw niya si Jesus sang gab-i, ayhan bangod nahadlok sia nga basi mapierdi ang iya kadungganan sa iban nga Judiyong mga lider kon makita sia.

“Rabbi,” siling niya, “nahibaluan namon nga ikaw manunudlo gikan sa Dios; kay wala sing isa nga makahimo sining mga tanda nga imo ginahimo kon indi ang Dios kaupod niya.” Sa pagsabat, ginsilingan ni Jesus si Nicodemo nga agod makasulod sa Ginharian sang Dios, ang isa ka tawo dapat nga “matawo liwat.”

Apang, paano matawo liwat ang isa ka tawo? “Makasulod bala sia sa makaduha sa tiyan sang iya iloy kag matawo?” pamangkot ni Nicodemo.

Indi, indi ina ang buot silingon sang matawo liwat. “Kon ang isa indi matawo sa tubig kag sa espiritu,” paathag ni Jesus, “indi sia makasulod sa ginharian sang Dios.” Sang ginbawtismuhan si Jesus kag ang balaan nga espiritu nanaug sa iya, sia sa amo nga paagi natawo “sa tubig kag sa espiritu.” Paagi sa kaupod nga pagpahayag gikan sa langit, ‘Ini ang akon Anak nga akon nahamut-an,’ ginpahibalo sang Dios nga nagbun-ag sia sing isa ka espirituwal nga anak nga may paglaum nga makasulod sa langitnon nga Ginharian. Sa ulihi, sa Pentecostes 33 C.E., ang iban pa nga mabawtismuhan magabaton sing balaan nga espiritu kag sa amo nga paagi matawo man liwat subong espirituwal nga mga anak sang Dios.

Apang ang papel sang pinasahi nga tawhanon nga Anak sang Dios importante. “Subong nga si Moises nagbayaw sang man-ug sa kamingawan,” siling ni Jesus kay Nicodemo, “kinahanglan man pagbayawon ang Anak sang tawo, agod nga ang bisan sin-o nga magtuo sa iya may kabuhi nga wala sing katapusan.” Huo, subong nga ang mga Israelinhon sadto nga nakagat sang dalitan nga mga man-ug kinahanglan magtulok sa saway nga man-ug agod maluwas, ang tanan nga tawo dapat man magtuo sa Anak sang Dios agod maluwas sila gikan sa ila nagakapatay nga kahimtangan.

Sa pagpadaku sang mahigugmaon nga papel ni Jehova sa sini, masunod nga ginsilingan ni Jesus si Nicodemo: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga wala sing katapusan.” Sa amo, diri sa Jerusalem anom ka bulan lamang sa tapos niya ginsugdan ang iya ministeryo, maathag nga ginpakita ni Jesus nga sia ang paagi ni Jehova nga Dios para sa pagluwas sa katawhan.

Dugang pa nga nagpaathag si Jesus kay Nicodemo: “Kay ginpadala sang Dios ang iya Anak sa kalibutan, indi sa paghukom sa kalibutan,” kon sayoron, indi sa paghukom sa sini sing malaglagon, ukon pakamalauton ini, nga ginapamatbatan ang katawhan sing kalaglagan. Sa baylo, subong ginsiling ni Jesus, ginpadala sia “agod ang kalibutan maluwas paagi sa iya.”

Si Nicodemo may kahadlok nga nagkadto kay Jesus sang gab-i agod indi makita. Gani makawiwili nga gintakpan ni Jesus ang iya pagpakighambal sa iya sa pagsiling: “Amo ini ang sadsaran sang paghukom, nga ang kapawa [nga ginpakita ni Jesus sa iya kabuhi kag mga panudlo] nagkari sa kalibutan apang ang mga tawo naghigugma sang kadudulman labi sa kapawa, kay ang ila mga buhat malaut. Kay sia nga nagabuhat sing malaut nagadumot sang kapawa kag wala nagapalapit sa kapawa, agod nga ang iya mga buhat indi masabdong. Apang sia nga nagabuhat sang kamatuoran nagapalapit sa kapawa, agod nga ang iya mga buhat mapahayag nga nahisanto sa Dios.” Juan 2:​23–​3:​21; Mateo 3:​16, 17; Binuhatan 2:​1-4; Numeros 21:9.

▪ Ano ang ginbangdan sang pagduaw ni Nicodemo, kag ngaa gab-i sia nagkari?

▪ Ano ang buot silingon sang “matawo liwat”?

▪ Paano gin-ilustrar ni Jesus ang iya papel sa aton kaluwasan?

▪ Ano ang buot silingon nga si Jesus wala magkari sa paghukom sa kalibutan?