Kapitulo 19

Pagtudlo sa Isa ka Babayi nga Samariahanon

SA ILA dalanon gikan sa Judea pa Galilea, si Jesus kag ang iya mga disipulo nag-agi sa distrito sang Samaria. Nalapyo sa ila paglakbay, sang mga udtong adlaw nagdulog sila agod magpahuway sa luyo sang isa ka bubon malapit sa siudad sang Sicar. Ini nga bubon ginkutkot mga siglo sang una ni Jacob, kag yara gihapon tubtob karon, malapit sa modernong-adlaw nga siudad sang Nablus.

Samtang nagapahuway diri si Jesus, ang iya mga disipulo nagkadto sa siudad agod magbakal sing kalan-on. Sang mag-abot ang isa ka babayi nga Samariahanon agod magsag-ub sing tubig, si Jesus nagsiling: “Paimna ako.”

Sa kabilugan indi maayo ang pagtamdanay sang mga Judiyo kag mga Samariahanon bangod sang tudok nga kaugot sa isa kag isa. Gani, sa katingala, ang babayi namangkot: “Ano bala nga ikaw, nga isa ka Judiyo, nagapangayo sa akon sing mainom, nga ako isa ka babayi nga Samariahanon?”

“Kon ikaw nakakilala,” sabat ni Jesus, “kon sin-o sia nga nagasiling sa imo, ‘Paimna ako,’ nagpangayo ka kuntani sa iya, kag sia magahatag sa imo sing tubig nga buhi.”

“Ginuo,” sabat niya, “wala ikaw sing itimba, kag ang bubon madalom. Diin bala ikaw magakuha sinang tubig nga buhi? Daku ka pa bala sa amon amay nga si Jacob, nga naghatag sa amon sang bubon, kag sia gid nag-inom sa sini, kag ang iya mga anak, kag ang iya kahayupan?”

“Ang tagsatagsa nga nagainom sining tubig uhawon liwat,” siling ni Jesus. “Apang ang bisan sin-o nga nagainom sang tubig nga akon ihatag sa iya indi na gid pag-uhawon, kundi ang tubig nga akon ihatag sa iya mangin tuburan sa sulod niya nga nagaibwal sa paghatag sing kabuhi nga wala sing katapusan.”

“Ginuo, hatagi ako sining tubig, agod nga indi ako pag-uhawon, ukon magkari diri sa pagsag-ub,” sabat sang babayi.

Si Jesus nagsiling sa iya: “Lakat, tawga ang imo bana kag magbalik diri.”

“Wala ako sing bana,” sabat niya.

Nag-ugyon si Jesus sa iya ginsiling. “Nagasiling ikaw sing husto, ‘Wala ako sing bana.’ Kay may lima ka na ka bana kag ang yara sa imo karon indi mo bana.”

“Ginuo, ginahantop ko nga ikaw manalagna,” siling sang babayi nga may katingala. Sa pagpakita sang iya interes sa espirituwal nga butang, nagsiling sia nga ang mga Samariahanon “nagsimba sa sining bukid [Gerizim, nga yara sa malapit]; apang kamo [mga Judiyo] nagasiling nga sa Jerusalem amo ang duog diin ang mga tawo dapat magsimba.”

Apang, ang duog sang pagsimba indi importante, siling ni Jesus. “Ang oras magaabot,” siling niya, “nga ang matuod nga mga sumilimba magasimba sa Amay sa espiritu kag kamatuoran, kay, sa pagkamatuod, ang Amay nagapangita sing subong nga mga sumilimba sa iya. Ang Dios Espiritu, kag ang mga nagasimba sa iya dapat magsimba sa espiritu kag kamatuoran.”

Nahamuot gid ang babayi. “Nakahibalo ako nga ang Mesias magakari, nga ginatawag Cristo,” siling niya. “Kon sia mag-abot, magapahayag sia sa amon sing tanan nga butang.”

“Ako nga nagapakighambal sa imo amo sia,” siling ni Jesus. Hunahunaa ini! Ining babayi nga nagkari sa udtong adlaw agod magsag-ub sing tubig, ayhan agod likawan ang iya kasimanwa nga mga babayi nga nagatamay sa iya bangod sang iya pagkabuhi ginpaboran ni Jesus sa isa ka makadalayaw nga paagi. Gintu-ad ni Jesus sa iya ang wala niya matu-ad kay bisan sin-o. Ano ang mga resulta?

Madamo nga mga Samariahanon ang Nagtuo

Pagbalik nila halin sa Sicar nga dala ang pagkaon, nakita sang mga disipulo si Jesus sa bubon ni Jacob diin ginbilin nila sia, kag diin nagapakighambal sia karon sa isa ka Samariahanon nga babayi. Sang mag-abot ang mga disipulo, naglakat sia, ginbilin ang iya banga kag nagkadto sa siudad.

Interesado gid sa mga butang nga ginsugid ni Jesus sa iya, ginsilingan niya ang katawhan sa siudad: “Kari kamo, tan-awa ang tawo nga nagsugid sa akon sang tanan nga butang nga nahimo ko.” Nian, agod pukawon ang ila kalangkag, namangkot sia: “Amo ayhan ini ang Cristo?” Epektibo ang pamangkot​—ang katawhan naglakat agod tan-awon ini.

Samtang, ginpalig-on sang mga disipulo si Jesus nga kan-on ang pagkaon nga gindala nila gikan sa siudad. Apang nagsabat sia: “May kalan-on ako nga wala ninyo mahibalui.”

“May nagdala ayhan sa iya sing kalan-on?” pamangkot sang mga disipulo sa isa kag isa. Si Jesus nagpaathag: ‘Ang akon kalan-on amo ang paghimo sang kabubut-on sang nagpadala sa akon kag ang pagtuman sang iya buluhaton. Wala bala kamo nagasiling, may apat pa ka bulan, nian mag-abot ang ani?’ Apang, sa pagpatuhoy sa espirituwal nga ani, si Jesus nagsiling: “Bayawa ang inyo mga mata, kag lantawa ang kaumhan nga maputi na nga alanyon. Ang nagaani nagabaton na sing mga suhol kag nagatipon sing bunga tungod sa kabuhi nga wala sing katapusan, agod nga ang nagasab-ug kag ang nagaani magkalipay sing tingob.”

Ayhan nakita na ni Jesus ang daku nga epekto sang iya pagpakigsugilanon sa Samariahanon nga babayi​—nga madamo ang nagatuo sa iya bangod sang iya pagpanaksi. Nagpanaksi sia sa mga tawo sang banwa, nga nagasiling: “Ginsugid niya sa akon ang tanan nga butang nga nahimo ko.” Busa, sang ang katawhan sang Sicar nagkari sa iya sa bubon, ginpangabay nila sia nga magpabilin kag sugiran sila sing dugang pa. Ginbaton ni Jesus ang pangagda kag nagpabilin sa duha ka adlaw.

Samtang nagapamati ang mga Samariahanon, madamo pa ang nagtuo. Nian nagsiling sila sa babayi: “Karon nagatuo kami indi tungod sang imo hambal; kay kami gid nakabati kag nakakilala nga ini amo gid ang manluluwas sang kalibutan.” Sa pagkamatuod ang Samariahanon nagahatag sing matahom nga halimbawa kon paano kita makapanaksi nahanungod kay Cristo paagi sa pagpukaw sang interes agod ang mga manugpalamati magausisa sing dugang pa!

Dumduma nga apat pa ka bulan ini antes sang tig-alani​—ayhan ang tig-alani sang sebada, nga sa Palestina nagakatabo kon tigpamulak. Gani mga Nobiembre ukon Disiembre ini. Nagakahulugan ini nga pagkatapos sang Paskuwa sang 30 C.E., si Jesus kag ang iya mga disipulo naghinguyang sing walo ka bulan ukon kapin pa sa Judea nga nagapanudlo kag nagabawtismo. Manugpauli na sila karon sa ila teritoryo sa Judea. Ano ang nagahulat sa ila didto? Juan 4:3-43.

▪ Ngaa nakibot ang babayi nga Samariahanon nga si Jesus nakighambal sa iya?

▪ Ano ang gintudlo sa iya ni Jesus nahanungod sa tubig nga buhi kag kon sa diin magsimba?

▪ Paano ginpahayag ni Jesus sa iya kon sin-o sia, kag ngaa makatilingala gid ining pagpahayag?

▪ Ano nga pagpanaksi ang ginhimo sang Samariahanon nga babayi kag ano ang resulta?

▪ Paano may kahilabtanan sa tig-alani ang kalan-on ni Jesus?

▪ Paano naton mahibaluan ang kalawigon sang ministeryo ni Jesus sa Judea pagkatapos sang Paskuwa sang 30 C.E.?