Kapitulo 33

Pagtuman sa Tagna ni Isaias

SANG mahibaluan ni Jesus nga ang mga Fariseo kag mga sumulunod ni Herodes nagaplano sa pagpatay sa iya, sia kag ang iya mga disipulo naglikaw pakadto sa Dagat sang Galilea. Diri ang dakung kadam-an gikan sa bilog nga Palestina, kag bisan gikan sa guwa sang mga dulunan sini, nagdugok sa iya. Gin-ayo niya ang madamo, amo kon ngaa ang tanan nga nagabalatian sing grabe nagdinaguso sa pagtandog sa iya.

Bangod daku ka tama ang kadam-an, ginsilingan niya ang iya mga disipulo nga maghanda pirme sing sakayan nga magamit niya. Paagi sa pagsakay sa sakayan, mapunggan niya ang kadam-an sa pagdinaguso sa iya. Matudluan niya sila gikan sa sakayan ukon makalakbay sa iban nga lugar sa baybayon agod mabuligan ang mga tawo didto.

Si disipulo Mateo nagsiling nga ang ginhimo ni Jesus nagatuman “sang ginpamulong ni Isaias nga manalagna.” Nian ginkutlo ni Mateo ang tagna nga ginatuman ni Jesus:

“Yari karon! Ang akon alagad nga ginpili ko, ang akon hinigugma, nga nahamut-an sang akon kalag! Ibutang ko sa iya ang akon espiritu, kag sia magapahayag sing paghukom sa mga pungsod. Indi sia magabais, ukon magasinggit, kag bisan sin-o indi makabati sang iya tingog sa mga dalan. Ang tabun-ak nga basag indi niya pagbalion, ukon ang pabilo nga nagapuog pagpalungon, tubtob nga iya madala ang katarungan sa pagdaug. Kag sa iya ngalan magalaum ang mga pungsod.”

Sa pagkamatuod, si Jesus amo ang hinigugma nga alagad nga nahamut-an sang Dios. Kag ginpahayag ni Jesus ang matuod nga katarungan, nga ginlikom sang butig nga relihiosong mga tradisyon. Bangod sang ila dimakatarunganon nga pag-aplikar sa kasuguan sang Dios, ang mga Fariseo indi gani magbulig sa tawo nga nagamasakit sa Adlaw nga Inugpahuway! Paagi sa pagpaathag sang katarungan sang Dios, gindula ni Jesus sa mga tawo ang lulan sang dimakatarunganon nga mga tradisyon, kag bangod sini, nagtinguha ang relihiosong mga lider nga patyon sia.

Ano ang buot silingon sang ‘indi sia magabais, ukon magasinggit agod ang iya tingog indi mabatian sa mga dalan’? Ti, sang gin-ayo niya ang katawhan, si Jesus ‘nagtugon gid nga indi nila pag-ipakilala sia.’ Indi niya luyag ang magahod nga pagpahibalo tuhoy sa iya sa mga dalan ukon ang tiko nga pagpamalita.

Subong man, si Jesus nagadala sing makapaumpaw nga mensahe sa mga tawo nga daw subong sang tabun-ak nga basag, nga nabali kag gintapaktapak. Kaangay sila sang nagapuog nga pabilo, nga daw indi na maduktan sang kalayo. Si Jesus wala nagabali sa tabun-ak nga basag ukon nagapalong sa nagakipawkipaw, nagapuog nga pabilo. Apang upod ang kalum-ok kag gugma malantipon nga ginalipay niya ang mapainubuson. Sa pagkamatuod, si Jesus amo gid ang isa nga malauman sang mga pungsod! Mateo 12:​15-21; Marcos 3:​7-12; Isaias 42:​1-4.

▪ Paano ginpahayag ni Jesus ang katarungan, nga wala nagabais ukon nagasinggit sa mga dalan?

▪ Sin-o ang kaangay sa tabun-ak nga basag kag pabilo, kag ano ang ginhimo ni Jesus sa ila?