Kapitulo 105

Pamuno sang Makatalagam nga Adlaw

SANG maghalin si Jesus sa Jerusalem sang Lunes sang gab-i, nagbalik sia sa Betania sa nasidlangan nga bahin sang Bukid nga Olivo. Natapos na ang duha ka adlaw sang iya katapusan nga ministeryo sa Jerusalem. Walay duhaduha nga ginpaligad liwat ni Jesus ang gab-i kaupod sang iya abyan nga si Lazaro. Kutob sang pag-abot niya halin sa Jerico sang Biernes, amo ini ang iya ikaapat nga gab-i sa Betania.

Karon, kaagahon sang Martes, Nisan 11, sia kag ang iya mga apostoles naglakat liwat. Isa gid ini ka makatalagam nga adlaw sa ministeryo ni Jesus, ang pinakamasako gid. Amo ini ang katapusan nga adlaw nga nagkadto sia sa templo. Kag amo ini ang katapusan nga adlaw sang iya dayag nga ministeryo sa wala pa ang pagbista kag pagpatay sa iya.

Amo gihapon nga ruta ang gin-agihan ni Jesus kag sang iya mga disipulo sa Bukid nga Olivo pakadto sa Jerusalem. Sa dalan halin sa Betania, nakita ni Pedro ang kahoy nga ginpakamalaut ni Jesus sang nagligad nga aga. “Rabbi, tan-awa!” siling niya, “ang higuera nga imo ginpakamalaut nalaya.”

Apang ngaa ginpatay ni Jesus ang kahoy? Ginpakita niya kon ngaa sang nagsiling sia: “Sa pagkamatuod nagasiling ako sa inyo, Kon may pagtuo kamo kag wala sing pangduhaduha, indi lamang ninyo mahimo ang nahimo sa higuera, kundi bisan pa kon magsiling kamo sa sining bukid [ang Bukid nga Olivo nga ginatindugan nila], ‘Halin ka kag lukso sa dagat,’ mahimo ina. Kag ang bisan ano nga inyo pangayuon sa pangamuyo, mabaton ninyo, kon may pagtuo kamo.”

Gani paagi sa pagpalaya sa kahoy, ginhatagan ni Jesus ang iya mga disipulo sing leksion sa kinahanglanon nga magtuo sila sa Dios. Subong sang ginsiling niya: “Ang bisan ano nga ginapangayo ninyo sa pangamuyo, magtuo kamo nga ginabaton ninyo, kag maangkon ninyo ini.” Daw ano gid ka importante nga leksion nga matun-an nila, labi na bangod sang daku nga pagtilaw nga magaabot sa dili madugay! Apang, may isa pa ka koneksion sa ulot sang pagkalaya sang higuera nga kahoy kag sang kalidad sang pagtuo.

Ang pungsod sang Israel, kaangay sining higuera nga kahoy, may malalangon nga dagway. Bisan pa ang pungsod may katipan nga kaangtanan sa Dios kag mahimo nga sa guwa daw nagatuman sang iya mga regulasyon, napamatud-an ini nga wala sing pagtuo, wala sing maayong bunga. Bangod sang kakulang sing pagtuo, sikwayon sini ang Anak sang Dios mismo! Gani, paagi sa pagpalaya sa walay bunga nga higuera, maathag nga ginpakita ni Jesus kon ano ang mangin katapusan nga resulta para sa sining wala sing bunga, wala sing pagtuo nga pungsod.

Wala madugay, si Jesus kag ang iya mga disipulo nagsulod sa Jerusalem, kag subong sang batasan na nila, nagkadto sila sa templo, diin si Jesus nagsugod sa pagpanudlo. Ang puno nga mga saserdote kag ang mga tigulang sang katawhan, walay duhaduha nga nakadumdom sang ginhimo ni Jesus sang nagligad nga adlaw batok sa mga manugbaylo sang kuwarta, naghangkat sa iya: “Sa kay sin-o awtoridad ginahimo mo ini nga mga butang? Kag sin-o bala ang naghatag sa imo sini nga awtoridad?”

Sa pagsabat, si Jesus nagsiling: “Ako man mamangkot sa inyo sing isa ka pamangkot. Kon inyo masugid sa akon ang sabat, nian ako man magasugid sa inyo kon sa kay sin-o awtoridad ginahimo ko ini nga mga butang: Ang bawtismo ni Juan, diin bala ini maggikan? Sa langit ukon sa mga tawo?”

Ang mga saserdote kag mga tigulang ­nagpinamangkutanay kon paano sila ­magasabat. “Kon magsiling kita, ‘Gikan sa langit,’ masiling sia sa aton, ‘Ngaa wala kamo magpati sa iya?’ Apang, kon magsiling kita, ‘Gikan sa mga tawo,’ nahadlok kita sa kadam-an, kay ginakilala nila si Juan nga isa ka manalagna.”

Indi mahibal-an sang mga lider kon ano ang isabat. Gani nagsabat sila kay Jesus: “Wala kami makahibalo.”

Si Jesus man nagsiling: “Indi ko man kamo pagsugiran kon sa kay sin-o awtoridad ginahimo ko ini nga mga butang.” Mateo 21:​19-27; Marcos 11:​19-33; Lucas 20:​1-8.

▪ Ano ang importante sa Martes, Nisan 11?

▪ Anong mga leksion ang ginhatag ni Jesus sang ginpalaya niya ang higuera?

▪ Paano ginsabat ni Jesus ang mga namangkot kon sa kay sin-o awtoridad ginhimo niya ang mga butang?