Kapitulo 101

Sa Betania, sa Balay ni Simon

SANG maghalin si Jesus sa Jerico, nagpadulong sia sa Betania. Halos isa ka adlaw ang biyahe, bangod 19 kilometros ini nga taklaron. Ang Jerico mga 250 metros sa ubos sang nibel sang dagat, kag ang Betania mga 760 metros sa ibabaw sang nibel sang dagat. Ang Betania, mahimo madumduman mo, amo ang ginaistaran ni Lazaro kag sang iya duha ka utod nga babayi. Ang diutay nga minuro mga tres kilometros halin sa Jerusalem, kay nahamtang ini sa nasidlangan nga bahin sang Bukid sang Olivo.

Madamo na ang nag-abot sa Jerusalem para sa Paskuwa. Nag-abot sila sing tem­prano agod tinluan ang ila kaugalingon sa seremonya. Ayhan nakatandog sila sing bangkay ukon nakahimo sing butang nga naghimo sa ila nga dimatinlo. Gani ginsunod nila ang mga paagi sa pagtinlo sang ila kaugalingon agod masaulog sing kalahamut-an ang Paskuwa. Sang magtipon ining mga nag-abot sing temprano sa templo, madamo ang naghaumhaom nga basi mag-abot si Jesus sa Paskuwa.

Ang Jerusalem amo ang sentro sang kontrobersiya nahanungod kay Jesus. Nahibaluan na sang tanan nga luyag sia dakpon sang mga lider sang relihion agod patyon. Sa katunayan, nagsugo sila nga kon nahibaluan sang bisan sin-o kon diin sia, dapat nila ini isugid sa ila. Tatlo ka beses sang ulihi nga binulan​—⁠sa Piesta sang mga Payagpayag, sa Piesta sang Dedikasyon, kag pagkatapos niya ginbanhaw si Lazaro​—⁠gintinguhaan sining mga lider nga patyon sia. Gani, nagpalibog ang katawhan, magapakita bala liwat si Jesus sa publiko? “Ano bala sa hunahuna ninyo?” pinamangkutanay nila.

Sa karon, nag-abot si Jesus sa Betania anom ka adlaw sa wala pa ang Paskuwa, nga nagtupa sa Nisan 14 suno sa Judiyong kalendaryo. Nag-abot si Jesus sa Betania mga Biernes sang gab-i, nga amo ang umpisa sang Nisan 8. Indi sia mahimo maglakbay pakadto sa Betania sa Sabado bangod ang paglakbay sa Inugpahuway​—⁠kutob sa pagtunod sang adlaw sang Biernes tubtob sa pagtunod sang adlaw sang Sabado⁠—​ginadumili sang Judiyong kasuguan. Ayhan nagkadto si Jesus sa balay ni Lazaro, subong sang ginhimo niya sang una, kag nagpaligad didto sang gab-i sang Biernes.

Apang, isa pa ka pumuluyo sang Betania ang nag-agda kay Jesus kag sa iya mga kaupdanan para sa isa ka panihapon sang Sabado sang gab-i. Sia amo si Simon, nga isa anay ka aruon, nga ayhan gin-ayo ni Jesus. Bangod sang iya mapisan nga kinaiya, si Marta nagaalagad sa mga bisita. Apang, subong sang batasan niya, si Maria nagpamati kay Jesus, sini nga tion sa paagi nga nagpautwas sing kontrobersiya.

Ginbuksan ni Maria ang isa ka tibudtibod nga alabastro, ukon diutay nga prasko, nga may unod nga mga tunga sa kilo nga ihalaplas, “matuod nga lana.” Malahalon gid ini. Sa pagkamatuod, ang bili sini katumbas sa isa ka tuig nga suweldo! Sang ginbubo ni Maria ang lana sa ulo ni Jesus kag sa iya mga tiil kag ginpahiran ang mga tiil ni Jesus sang iya buhok, ang maamyon nga kahumot nagtugob sa bug-os nga balay.

Naakig ang mga disipulo kag namangkot: “Sa ano bala nga katuyuan ini nga pag-usik?” Nian si Judas Iscariote nagsiling: “Ngaa ining malahalon nga ihalaplas wala ginbaligya sa tatlo ka gatos ka denario kag ginhatag sa mga imol?” Apang si Judas wala gid nabalaka sa imol, kay madugay na sia nga nagapangawti sa kahon sang kuwarta nga ginatago sang mga disipulo.

Ginpangapinan ni Jesus si Maria. “Pabayai ninyo sia,” sugo niya. “Ngaa bala ginagamo ninyo ini nga babayi? Kay sia nakahimo sing buhat nga maayo sa akon. Kay ang mga imol kaupod ninyo pirme, apang ako indi ninyo pirme kaupod. Ginhimo niya ang bug-os niya nga masarangan; ginhaplasan niya ako sing mahumot nga lana agod maaman ang akon lawas sa akon lubong. Sa pagkamatuod nagasiling ako sa inyo, Bisan diin iwali ining maayong balita sa bug-os nga kalibutan, hambalon man ang ginhimo sining babayi sa handumanan nakon.”

Yara si Jesus sa Betania kapin na sa 24 ka oras, kag naglapta ang balita nahanungod sa iya pag-abot. Busa, madamo ang nagkadto sa balay ni Simon agod makita si Jesus, apang nagkari man sila agod makita si Lazaro nga didto man. Gani ang puno nga mga saserdote nagsugo sa pagpatay indi lamang kay Jesus kundi kay Lazaro man. Amo sini bangod madamo ang nagtuo kay Jesus kay nakita nila nga buhi ang isa nga ginbanhaw niya gikan sa minatay! Sa pagkamatuod, daw ano gid kalaut ang mga lider sang relihion! Juan 11:​55⁠–​12:​11; Mateo 26:​6-13; Marcos 14:​3-9; Binuhatan 1:⁠12.

▪ Ano ang ginadiskusyunan sa templo sa Jerusalem, kag ngaa?

▪ Ngaa mahimo gid nga nag-abot si Jesus sa Betania sang Biernes sa baylo nga Sa­bado?

▪ Sang mag-abot si Jesus sa Betania, sa diin sia mahimo gid nga nagpaligad sang Inugpahuway

▪ Ano nga buhat ni Maria ang nagpautwas sing kontrobersiya, kag paano sia ginpangapinan ni Jesus?

▪ Ano ang ginailustrar sang sobra nga kalaut sang puno nga mga saserdote?