Kapitulo 130

Sa Dagat sang Galilea

NAGBALIK na karon ang mga apostoles sa Galilea, subong sang ginsugo sang nagligad ni Jesus sa ila nga himuon nila. Apang wala sila makahibalo kon ano ang himuon nila didto. Wala magdugay, ginsilingan ni Pedro sanday Tomas, Natanael, Santiago kag ang iya utod nga si Juan, kag ang duha pa ka apostoles: “Mangisda ako.”

“Kami man maupod sa imo,” sabat sang anom.

Sa bilog nga gab-i, wala gid sila sing nakuha. Apang, sang nagpamanagbanag na, si Jesus nagtindog sa baybayon, apang bisan pa ang mga apostoles wala makakilala nga si Jesus yadto. Nagsinggit sia: “Mga anak, may isda bala kamo?”

“Wala!” sabat nila.

“Iladlad ninyo ang pukot sa tuo sang sakayan kag makakita kamo,” siling niya. Kag sang ginladlad nila ini, indi na sila makasarang sa pagbatak sini bangod sang kadamuon sang isda.

“Ang Ginuo ini!” singgit ni Juan.

Sang mabatian ini, nagsuklob si Pedro sang iya kunop, kay nauba na niya ang iya panapton, kag nagsugbo sa dagat. Nian ginlangoy niya ang mga 90 metros pakadto sa hunasan. Ang iban nga mga apostoles nagsunod sa diutay nga bangka, nga nagaguyod sang pukot nga puno sang isda.

Sang nakatakas sila sa duta, nakita nila ang baga didto, kag isda nga natungtong sa sini, kag may tinapay. “Dala kamo diri sang mga isda nga nakuha na ninyo,” siling ni Jesus. Si Pedro nagsakay kag nagbutong patakas sang pukot. Nagaunod ini sing 153 ka dalagku nga mga isda!

“Kari kamo kag magpamahaw,” agda ni Jesus.

Wala sing isa sa ila ang nangahas sa pagpamangkot, “Sin-o bala ikaw?” bangod nakilala nila tanan nga si Jesus ini. Amo ini ang iya ikapito nga pagpakita pagkatapos nabanhaw, kag ang ikatlo sa mga apostoles subong grupo. Nagserbe sia sing pamahaw, naghatag sa kada isa sa ila sing tinapay kag isda.

Sang nakapamahaw na sila, si Jesus nga mahimo nagatulok sa madamo nga isda nga nakuha, nagpamangkot kay Pedro: “Simon nga anak ni Juan, ginahigugma mo bala ako sing labi sini sa ila?” Wala sing duhaduha nga ang buot niya silingon, Nabuyok ka bala sing labi sa pagpangisda sang sa hilikuton nga ginhanda ko sa imo?

“Ikaw nakahibalo nga ako nagahigugma sa imo,” sabat ni Pedro.

“Pahalba ang akon mga kordero,” sabat ni Jesus.

Sa liwat, sa ikaduha nga tion, namangkot sia: “Simon anak ni Juan, ginahigugma mo bala ako?”

“Huo, Ginuo, ikaw nakahibalo nga ako nagahigugma sa imo,” hanuot nga sabat ni Pedro.

“Tatapa ang akon mga karnero,” sugo liwat ni Jesus.

Nian, sa ikatlo nga tion, namangkot sia: “Simon nga anak ni Juan, ginahigugma mo bala ako?”

Sa karon nagkasubo si Pedro. Nagpalibog sia kon bala ginapangduhaduhaan ni Jesus ang iya katutom. Ti, sang ginbista si Jesus kasan-o lang tungod sang iya kabuhi, ginpanghiwala ni Pedro sing makatlo nga kilala niya sia. Gani si Pedro nagsiling: “Ginuo, ikaw nakahibalo sang tanan nga butang; ikaw nakahibalo nga ako nagahigugma sa imo.”

“Pahalba ang akon mga karnero,” sugo ni Jesus sa ikatlo nga tion.

Busa gingamit ni Jesus si Pedro subong paagi nga mapatudok niya sa iban ang hilikuton nga ginapahimo niya sa ila. Biyaan niya sa ulihi ang duta, kag luyag niya nga manguna sila sa pag-alagad sa mga magasulod sa toril sang Dios.

Subong nga si Jesus ginbilanggo kag ginpatay bangod ginhimo niya ang hilikuton nga ginpahimo sang Dios sa iya, gani, ginapakita niya karon nga amo man ang maeksperiensiahan ni Pedro. “Sang ikaw bataon,” siling ni Jesus sa iya, “nagwagkos ka sang imo kaugalingon kag nagkadto sa bisan diin nga buot mo. Apang kon magtigulang ka na, untayon mo ang imo mga kamot kag iban ang magawagkos sa imo kag magadala sa imo diin indi mo buot.” Walay sapayan sang martir nga kamatayon nga nagahulat kay Pedro, si Jesus naglaygay sa iya: “Padayon ka sa pagsunod sa akon.”

Sang nagliso, nakita ni Pedro si Juan kag namangkot: “Ginuo, magaano bala ining tawo?”

“Kon buot ko nga magpabilin sia tubtob nga ako magkari,” sabat ni Jesus, “ano bala ina sa imo? Padayon ka sa pagsunod sa akon.” Ginapahangop sining mga pulong ni Jesus sa madamong mga disipulo nga si apostol Juan indi mapatay. Apang, subong sang ginpaathag sang ulihi ni apostol Juan, wala magsiling si Jesus nga indi sia mapatay, kundi nagsiling lamang si Jesus: “Kon buot ko nga magpabilin sia tubtob nga ako magkari, ano bala ina sa imo?”

Si Juan sang ulihi naghambal man sining makahulugan nga mga pulong: “May madamo pa man nga iban nga mga butang nga ginhimo ni Jesus, nga kon isulat ang tagsatagsa ila, ginabanta ko nga bisan sa kalibutan indi makaigo ang mga tulun-an nga sulaton.” Juan 21:​1-25; Mateo 26:​32; 28:​7, 10.

▪ Ano ang nagapakita nga ang mga apostoles wala makahibalo kon ano ang himuon nila sa Galilea?

▪ Paano nakilala sang mga apostoles si Jesus sa Dagat sang Galilea?

▪ Pila ka beses na karon nagpakita si Jesus kutob sang ginbanhaw sia?

▪ Paano ginpadaku ni Jesus ang luyag niya nga himuon sang mga apostoles?

▪ Paano ginpakita ni Jesus kon paano mapatay si Pedro?

▪ Anong mga komento ni Jesus nahanungod kay Juan ang wala mahangpi sang madamo sa mga disipulo?