Kapitulo 66

Sa Piesta sang mga Payagpayag

NANGIN bantog si Jesus sa halos tatlo ka tuig sugod sang iya bawtismo. Madamo nga linibo ang nakakita sang iya mga milagro, kag ang mga balita nahanungod sa iya mga ginhimo naglapnag sa bug-os nga pungsod. Karon, samtang nagatipon ang katawhan para sa Piesta sang mga Payagpayag sa Jerusalem, ginpangita nila sia didto. “Diin yadto nga tawo?” luyag nila mahibal-an.

Ginbaisan si Jesus. “Maayo sia nga tawo,” siling sang iban. “Indi, kundi nagapatalang sia sa katawhan,” siling naman sang iban. May madamo nga hinambalanay nga subong sini sa tion sang nagabukas nga mga adlaw sang piesta. Apang wala sing isa nga may kaisog sa paghambal sa publiko para kay Jesus. Amo sini bangod nahadlok ang mga tawo nga basi balusan sila sang Judiyong mga lider.

Sang matapos ang halos katunga sang piesta, nag-abot si Jesus. Nagkadto sia sa templo, nga sa diin natingala ang katawhan sa iya dalayawon nga ikasarang sa pagtudlo. Sanglit wala gid makaeskwela si Jesus sa mga eskwelahan sang mga rabbi, nagtingala ang mga Judiyo: “Paano nakahibalo ining tawo sang kaalam, nga wala gid sia makaeskwela?”

“Ang akon ginatudlo indi akon,” paathag ni Jesus, “kundi iya sang nagpadala sa akon. Kon ang bisan sin-o nagahandum sa paghimo sang Iya kabubut-on, mahibaluan niya ang panudlo kon bala gikan ini sa Dios ukon nagahambal ako sa akon kaugalingon.” Ang panudlo ni Jesus nagasakdag sang kasuguan sang Dios. Sa amo, dapat mangin maathag nga ginatinguhaan niya ang himaya sang Dios, indi ang iya kaugalingon. “Wala bala si Moises maghatag sa inyo sing Kasuguan?” pamangkot ni Jesus. Bilang pagsabdong, nagsiling sia: “Wala sing isa sa inyo ang nagatuman sa Kasuguan.”

“Ngaa nagatinguha kamo sa pagpatay sa akon?” pamangkot ni Jesus.

Ang mga tawo sa kadam-an, ayhan mga bisita sa piesta, wala makahibalo sina nga panikasog. Ginkabig nila nga imposible nga may isa nga maghandum sa pagpatay sinang dalayawon nga manunudlo. Gani nagpati sila nga sayop si Jesus sa paghunahuna sini. “May demonyo ka,” siling nila. “Sin-o ang nagatinguha sa pagpatay sa imo?”

Luyag sang Judiyong mga lider nga ipapatay si Jesus, bisan pa mahimo nga wala ini mahisayri sang kadam-an. Sang gin-ayo ni Jesus ang isa ka tawo sa Adlaw nga Inugpahuway sang nagligad nga isa ka tuig kag tunga, ang mga lider nagtinguha sa pagpatay sa iya. Gani ginapatalupangod karon ni Jesus ang ila pagkadirasonable paagi sa pagpamangkot sa ila: “Kon ang isa ka tawo nagabaton sing sirkunsisyon sa adlaw nga inugpahuway, agod nga indi malalis ang kasuguan ni Moises, naakig bala kamo sa akon bangod nga gin-ayo ko sing bug-os ang lawas sang tawo sa adlaw nga inugpahuway? Dili kamo maghukom suno sa dagway, kundi maghukom sing matarong nga paghukom.”

Ang mga pumuluyo sang Jerusalem, nga nakahibalo sang kahimtangan, nagsiling karon: “Indi bala amo ini ang tawo nga ginatinguhaan nila nga patyon? Kag yari sia karon! nagapamulong sa dayag, kag wala sila nagasiling sing bisan ano sa iya. Nakahibalo gid ayhan ang mga manugdumala nga ini amo ang Cristo?” Ining mga pumuluyo sang Jerusalem nagapaathag kon ngaa wala sila nagapati kay Jesus subong amo ang Cristo: “Kita nakahibalo sining tawo kon diin sia gikan; kag kon ang Cristo magkari, walay isa nga makahibalo diin sia gikan.”

Si Jesus nagsabat: “Kamo nakakilala kag nakahibalo kon diin ako gikan. Subong man, wala ako magkari sa akon kaugalingon nga pagbuot, kundi sia nga nagpadala sa akon matuod, kag wala kamo makakilala sa iya. Kilala ko sia, bangod tiglawas ako gikan sa iya, kag Sia nagpadala sa akon.” Sa sini gintinguhaan nila nga dakpon sia, ayhan agod bilangguon sia ukon ipapatay sia. Apang wala sila magmadinalag-on bangod indi pa yadto ang tion nga mapatay si Jesus.

Sa gihapon, madamo ang nagtuo kay Jesus, subong amo gid dapat ang himuon nila. Ti, naglakat sia sa tubig, nagpatinong sa madlos, nagpalinaw sa maunos nga dagat, milagruso nga nagpakaon sa linibolibo sing pila ka bilog lamang nga tinapay kag isda, nag-ayo sa masakiton, nagpalakat sa piang, nagbukas sang mga mata sang bulag, nag-ayo sa mga aruon, kag nagbanhaw pa sing patay. Gani namangkot sila: “Kon ang Cristo magkari, magahimo bala sia sing madamo pa nga mga tanda sang sa nahimo sining tawo?”

Sang mabatian sang mga Fariseo ang kadam-an nga nagahuringhuring sining mga butang, sila kag ang puno nga mga saserdote nagpadala sing mga opisyal sa pagdakop kay Jesus. Juan 7:11-32.

▪ San-o nag-abot si Jesus sa piesta, kag ano ang ginasiling sang mga tawo nahanungod sa iya?

▪ Ngaa nagsiling ang iban nga may demonyo sia?

▪ Ano ang pagtamod sang mga pumuluyo sang Jerusalem kay Jesus?

▪ Ngaa madamo ang nagtuo kay Jesus?