Kapitulo 21

Sa Sinagoga sang Iya Kaugalingon nga Banwa

WALA sing duhaduha nga may kalangkag sa Nasaret sang magpauli si Jesus. Antes sia maglakat agod bawtismohan ni Juan sang kapin na sa isa ka tuig ang nagligad, nakilal-an si Jesus nga isa ka panday. Apang karon nakilal-an na sia sing lapnag subong nagahimo sing milagro. Nalangkag ang lokal nga mga pumuluyo nga makita sia nga himuon ining makatilingala nga mga buhat sa tunga nila.

Ang ila kalangkag nagdugang sang si Jesus, suno sa iya kinabatasan, nagkadto sa sinagoga. Sa sadtong mga serbisyo, nagtindog sia sa pagbasa, kag ang linukot ni manalagna Isaias gindaho sa iya. Ginbasa niya ang nahanungod sa kon diin ginasugid ang tuhoy sa Isa nga ginhaplas sang espiritu ni Jehova, nga makita naton karon sa aton Biblia sa Isa kapitulo 61.

Sa tapos mabasa ang tuhoy sa kon paano ibantala sining Isa ang paghilway sa mga bihag, ang pagbalik sang panulok sang mga bulag, kag ang tuhoy sa tuig nga kalahamut-an ni Jehova, ginbalik ni Jesus ang linukot sa alagad kag naglingkod. Ang tanan nga mata natuon sa iya. Nian naghambal sia, ayhan sing malawiglawig, nga nagapaathag: “Karon ang kasulatan nga bag-o lang ninyo nabatian natuman.”

Natingala ang mga tawo sa iya “matahom nga mga pinamulong” kag nagsiling sa isa kag isa: “Anak sia ni Jose, indi bala?” Apang sang nahibaluan nga luyag nila sia makita nga nagahimo sing mga milagro, si Jesus nagpadayon: “Wala sing duhaduha iaplikar ninyo ini nga ilustrasyon sa akon, ‘Manugbulong, bulnga ang imo kaugalingon; ang mga butang nga nabatian namon nga nagakatabo sa Capernaum himua man diri sa imo kaugalingon nga tumandok nga teritoryo.’ ” Ayhan ang mga kaingod anay ni Jesus nagabatyag nga ang pagpang-ayo dapat sugdan sa balay, sa kaayuhan una sang iya kaugalingon nga katawhan. Gani ginbatyag nila nga ginpakanubo sila ni Jesus.

Nahisayran ang ila panghunahuna, ginsaysay ni Jesus ang pila ka maaplikar nga maragtas. Madamo ang mga balo sa Israel sadtong adlaw ni Elias, siling niya, apang si Elias wala ginpadala sa isa sa ila. Sa baylo, nagkadto sia sa indi Israelinhon nga balo sa Sidon, diin naghimo sia sang nagaluwas-kabuhi nga milagro. Kag sang mga adlaw ni Eliseo, madamo sing mga aruon, apang si Naaman lamang ang gintinluan ni Eliseo gikan sa Siria.

Naakig sa sining indi kalahamut-an nga maragtason nga pagpaanggid nga nagbuyagyag sang ila kakagod kag kakulang sing pagtuo, yadtong yara sa sinagoga nagtindog kag naglagas kay Jesus sa guwa sang siudad. Didto, sa bibi sang bukid diin natukod ang Nasaret, gintinguhaan nila nga ihulog sia. Apang nakalikaw si Jesus kag nakapalagyo nga wala maano. Lucas 4:16-30; 1 Hari 17:8-16; 2 Hari 5:8-14.

▪ Ngaa may daku nga kalangkag sa Nasaret?

▪ Ano ang ginhunahuna sang katawhan sa pamulongpulong ni Jesus, apang ano ang nagpaakig sa ila?

▪ Ano ang gintinguhaan nga himuon sang mga tawo kay Jesus?