Kapitulo 132

Sa Tuo sang Dios

ANG pagpasagahay sang balaan nga espiritu sang Pentecostes pamatuod nga nagbalik na si Jesus sa langit. Ang palanan-awon nga ginhatag wala madugay pagkatapos sadto kay disipulo Esteban nagapamatuod man nga nakabalik na Sia didto. Samtang ginabato si Esteban bangod sang iya matutom nga pagpanaksi, nagsiling sia: “Yari karon! Nakita ko ang mga langit nga nabuksan kag ang Anak sang tawo nga nagatindog sa tuo sang Dios.”

Samtang yara sa tuo sang Dios, si Jesus nagahulat sang sugo halin sa iya Amay: “Gahom ka sa tunga sang imo mga kaaway.” Apang sa karon, samtang wala pa sia nagahikot batok sa iya mga kaaway, ano ang ginahimo ni Jesus? Nagagahom sia sa ibabaw sang iya hinaplas nga mga disipulo, ginatuytuyan sila sa ila pagbantala nga hilikuton kag ginahanda sila nga mangin, paagi sa pagkabanhaw, kaupod nga mga hari niya sa Ginharian sang iya Amay.

Halimbawa, ginpili ni Jesus si Saulo (nakilal-an sang ulihi paagi sa iya Romanong ngalan, si Pablo) sa pagpanguna sa paghimo-disipulo nga hilikuton sa iban nga mga kadutaan. Si Saulo makugi sa Kasuguan sang Dios, apang ginpatalang sia sang Judiyong relihioso nga mga lider. Subong resulta, indi lamang nga ugyon si Saulo sa pagkapatay ni Esteban kundi nagkadto sia sa Damasco dala ang awtorisasyon halin kay Caifas nga mataas nga saserdote agod dalhon pabalik sa Jerusalem ang madakpan nga mga lalaki kag mga babayi nga nakita niya didto nga mga sumulunod ni Jesus. Apang, samtang nagalakbay si Saulo, hinali nga nagsidlak ang palibot niya, kag napukan sia sa duta.

“Saulo, Saulo, ngaa bala nga ginahingabot mo ako?” pamangkot sang isa ka tingog gikan sa dikitaon nga ginhalinan. “Sin-o bala ikaw, Ginuo?” pamangkot ni Saulo.

“Ako si Jesus, nga ginahingabot mo,” sabat niya.

Si Saulo, nga ginbulag sang milagruso nga kapawa, ginsugo ni Jesus nga magsulod sa Damasco kag maghulat sing instruksion. Nian nagpakita si Jesus sa isa ka palanan-awon kay Ananias, isa sang mga disipulo niya. Nahanungod kay Saulo, si Jesus nagsiling kay Ananias: “Sia galamiton nga pinili nakon sa pagdala sang akon ngalan sa atubangan sang mga pungsod kag mga hari kag sa mga anak sang Israel.”

Sa pagkamatuod, paagi sa pagsakdag ni Jesus, si Saulo (nga kilala karon nga si Pablo) kag ang iban nga mga ebanghelisador nakahimo sing daku nga kadalag-an sa ila pagbantala kag pagpanudlo nga hilikuton. Sa kamatuoran, mga 25 ka tuig pagkatapos si Jesus nagpakita sa iya sa dalan pakadto sa Damasco, si Pablo nagsulat nga ang “maayong balita” “ginwali sa bug-os nga tinuga sa idalom sang langit.”

Pagligad sang madamo pa nga mga tuig, si Jesus naghatag sing mga serye sang mga palanan-awon sa iya hinigugma nga si apostol Juan. Paagi sa sining mga palanan-awon nga ginlaragway ni Juan sa tulun-an sang Bugna sa Biblia, sia, sa epekto, nagkabuhi agod makita si Jesus nga nagbalik sa paggahom sa Ginharian. Si Juan nagsiling nga “paagi sa inspirasyon” gindala sia sa tion sang “adlaw sang Ginuo.” Ano ining “adlaw”?

Ang mahalungon nga pagtuon sa mga tagna sang Biblia, lakip na ang tagna gid ni Jesus nahanungod sa katapusan nga mga adlaw, nagapakita nga ang “adlaw sang Dios” nagsugod sa maragtason nga tuig sang 1914, huo, sa sulod sini nga kaliwatan! Gani nagbalik si Jesus sing dikitaon sang 1914, nga wala mahibalui sang publiko kag ang iya lamang matutom nga mga alagad ang nakahibalo sang iya pagbalik. Sadto nga tuig, ginhatag ni Jehova kay Jesus ang sugo nga maggahom sa tunga sang iya mga kaaway!

Sa pagtuman sang sugo sang iya Amay, gintabog ni Jesus si Satanas kag ang iya mga demonyo gikan sa langit, kag gintagbong sila sa duta. Sang nakita ini sa palanan-awon, si Juan nakabati sang tingog sa langit nga nagabantala: “Karon nag-abot ang kaluwasan kag ang gahom kag ang ginharian sang aton Dios kag ang pagbulut-an sang iya Cristo!” Huo, sang 1914 si Cristo nagsugod sa paggahom subong Hari!

Maayo nga balita gid ini para sa mga sumilimba ni Jehova sa langit! Ginlaygayan sila: “Magkalipay, O langit kag kamo nga nagapuyo sa sini!” Apang kamusta ang kahimtangan sa mga yara sa duta? “Kailo sa duta kag sa dagat,” siling sang tingog halin sa langit, “kay ang Yawa nagpanaug sa inyo sa dakung kasingkal, bangod nga nakahibalo sia nga may malip-ot lamang sia nga tion.”

Yari kita sa sining malip-ot nga tion karon. Ang katawhan ginapainpain karon sa pagsulod sa bag-ong kalibutan sang Dios ukon sa pag-atubang sing kalaglagan. Ang kamatuoran amo, ang imo palaabuton ginapat-od karon paagi sa imo reaksion sa maayong balita sang Ginharian sang Dios nga ginabantala sa bug-os nga duta sa idalom sang pagtuytoy ni Cristo.

Kon ang pagpainpain sa mga tawo matapos, si Jesucristo magaalagad subong Ahente sang Dios sa pagdula sa duta sang bug-os nga sistema sang mga butang ni Satanas kag sang tanan nga nagasupurta sini. Himuon ni Jesus ining pagdula sa tanan nga kalautan sa inaway nga ginatawag sa Biblia nga Har⁠–​Magedon, ukon Armagedon. Pagkatapos sina, si Jesus, nga amo ang labing daku nga Persona sa uniberso sunod kay Jehova nga Dios, magadakop kay Satanas kag sang iya mga demonyo kag magagapos sa ila sa isa ka libo ka tuig sa “kadadalman,” kon sayuron, isa ka kahimtangan nga daw kaangay sang patay nga wala sing hilikuton. Binuhatan 7:​55-60; 8:​1-3; 9:​1-19; 16:​6-10; Salmo 110:​1, 2; Hebreo 10:​12, 13; 1 Pedro 3:​22; Lucas 22:​28-30; Colosas 1:​13, 23; Bugna 1:​1, 10; 12:​7-12; 16:​14-16; 20:​1-3; Mateo 24:​14; 25:​31-33.

▪ Pagkatapos nga nagkayab si Jesus sa langit, diin sia nahamtang, kag ano ang ginahulat niya?

▪ Sa ibabaw ni sin-o naggahom si Jesus pagkatapos nga nagkayab sa langit, kag paano nadayag ang iya paggahom?

▪ San-o nagsugod ang “adlaw sang Ginuo,” kag ano ang natabo sang nagsugod ini?

▪ Anong pagpainpain nga hilikuton ang ginahimo karon nga nagaapektar sa kada isa sa aton sing personal, kag sa anong sadsaran ginahimo ang pagpainpain?

▪ Kon matapos ang pagpainpain nga hilikuton, anong mga hitabo ang magasunod?