Kapitulo 24

Sang Magkari si Jesus sa Duta

NANGIN masako gid ang adlaw ni Jesus sa Capernaum upod sa iya apat ka disipulo, nga naghinakop sa pagdala sang katawhan sang Capernaum sang tanan nga masakiton agod ayuhon niya sang gab-i. Wala sing tion sa pagkinaugalingon.

Aga pa karon sang masunod nga adlaw. Samtang madulomdulom pa, nagbangon si Jesus kag nagguwa nga isahanon. Nagkadto sia sa isa ka mamingaw nga duog nga sa diin makapangamuyo sia sa iya Amay sing pahain. Apang ang pag-isahanon ni Jesus wala magdugay bangod sang mahisayran ni Pedro kag sang iban nga wala sia, ginpangita nila sia.

Sang makit-an nila si Jesus, si Pedro nagsiling: “Ginapangita ka sang tanan.” Luyag sang katawhan sang Capernaum nga magpabilin si Jesus. Gin-apresyar gid nila ang ginhimo niya para sa ila! Apang nagkari bala si Jesus sa duta agod una sa tanan maghimo sining milagruso nga mga pagpang-ayo! Ano ang ginsiling niya nahanungod sini?

Suno sa isa ka kasaysayan sang Biblia, ginsabat ni Jesus ang iya mga disipulo: “Makadto kita sa kasilingan nga mga banwa, agod nga makawali man ako didto, kay bangod sini nagkari ako.” Bisan pa nagpamilit ang katawhan nga magpabilin si Jesus, ginsilingan niya sila: “Dapat ko man iwali ang maayong balita sang ginharian sang Dios sa iban nga mga siudad, kay sa sining katuyuan ginpadala ako.”

Huo, nagkari si Jesus sa duta agod labi na ibantala ang Ginharian sang Dios, nga magabindikar sang ngalan sang iya Amay kag magalubad sing dayon sang tanan nga balatian sang tawo. Apang, agod pamatud-an nga ginpadala sia sang Dios, naghimo si Jesus sing milagruso nga mga pagpang-ayo. Sa amo man nga paagi, si Moises sang nagligad nga mga siglo, naghimo sing mga milagro agod pamatud-an nga sia alagad sang Dios.

Karon, sang maghalin si Jesus sa Capernaum, agod magbantala sa iban nga mga siudad, ang iya apat ka disipulo nag-upod sa iya. Ining apat amo si Pedro kag ang iya utod nga si Andres, kag si Juan kag ang iya utod nga si Santiago. Madumduman ninyo nga sang nagligad lamang nga semana, gin-agda sila agod mangin nahauna nga nagalakbay nga masigkamanugpangabudlay ni Jesus.

Ang pagbantala ni Jesus sa bug-os nga Galilea upod sa iya apat ka disipulo madinalag-on gid! Sa kamatuoran, ang balita nahanungod sa iya mga pagpanghikot nakalab-ot gani bisan sa bug-os nga Siria. Daku nga kadam-an gikan sa Galilea, Judea, kag sa tabok sang Suba Jordan ang nagsunod kay Jesus kag sa iya mga disipulo. Marcos 1:35-39; Lucas 4:42, 43; Mateo 4:23-25; Exodo 4:1-9, 30, 31.

▪ Ano ang natabo sang aga sa tapos sang masako nga adlaw ni Jesus sa Capernaum?

▪ Ngaa ginpadala si Jesus sa duta, kag ano nga katuyuan ang natuman sang iya mga milagro?

▪ Sin-o ang nag-upod kay Jesus sa iya pagbantala sa bug-os nga Galilea, kag ano ang reaksion sa mga pagpanghikot ni Jesus?