Kapitulo 93

Sang ang Anak sang Tawo Ginpahayag

SAMTANG didto pa si Jesus sa aminhan (ayhan sa Samaria ukon sa Galilea), ginpamangkot sia sang mga Fariseo nahanungod sa pag-abot sang Ginharian. Nagapati sila nga magaabot ini nga may daku nga kagarbo kag seremonya, apang si Jesus nagsiling: “Ang ginharian sang Dios wala nagaabot nga may mga tanda nga panilagan, kag indi sila magasiling, ‘Yari diri! ukon, ‘Yadto didto!’ Kay, yari karon! ang ginharian sang Dios yara sa tunga ninyo.”

Ang pulong ni Jesus nga “yara sa tunga ninyo” ginbadbad kon kaisa nga “yara sa inyo.” Gani abi sang iban ang buot silingon ni Jesus amo nga ang Ginharian sang Dios nagagahom sa tagipusuon sang mga alagad sang Dios. Apang, sing maathag, ang Ginharian sang Dios wala sa sulod sang tagipusuon sining dimatinuuhon nga mga Fariseo nga ginasugilanon ni Jesus. Apang, yari ini sa tunga nila, bangod ang gintangdo nga Hari sang Ginharian sang Dios, si Jesucristo, yara mismo sa tunga nila.

Ayhan pagkatapos nga makahalin ang mga Fariseo nga si Jesus nagpamulong sing dugang sa iya mga disipulo nahanungod sa pagkari sang Ginharian. Ginahunahuna niya labi na ang iya palaabuton nga presensia nga may gahom sa Ginharian sang magpaandam sia: “Magasiling sila sa inyo, ‘Yadto didto!’ ukon, ‘Yari diri!’ Dili kamo maghalin ukon magsunod sa ila [ining dimatuod nga mga Mesias]. Kay subong sang kilat nga nagaidlab kag nagapasanag sang kahawaan kutob sa isa ka bahin tubtob sa isa, mangin amo man ang Anak sang tawo sa iya adlaw.” Busa, ginapakita ni Jesus nga subong nga ang kilat makita sa madamo nga lugar, ang pamatuod sang iya presensia nga may gahom sa Ginharian maathag nga makita sa tanan nga maluyag sa pagtan-aw sini.

Nian ginpaanggid ni Jesus ang dumaan nga mga hitabo sa pagpakita kon mangin ano ang panimuot sang katawhan sa iya palaabuton nga presensia. Sia nagapaathag: “Subong sang nahanabo sa mga adlaw ni Noe, mangin amo man sa mga adlaw sang Anak sang tawo . . . Subong man sang nahanabo sa mga adlaw ni Lot: nagkalaon sila, nag-ilinom sila, nagpamakal sila, nagpamaligya sila, nagpananom sila, nagpatindog sila. Apang sa adlaw nga nagguwa si Lot sa Sodoma nag-ulan sing kalayo kag asupre gikan sa langit kag naglaglag sa ila tanan. Mangin amo man ini sa adlaw nga ipahayag ang Anak sang tawo.”

Si Jesus wala magsiling nga ang katawhan sang adlaw ni Noe kag sang adlaw ni Lot ginlaglag bangod lamang ginhimo nila ang kinaandan nga hilikuton nga pagkaon, pag-inom, pagpamakal, pagpamaligya, pagpananom, kag pagpatindog. Bisan si Noe kag si Lot kag ang ila mga pamilya naghimo sini. Apang ang iban naghimo sang ila matag-adlaw nga hilikuton nga wala nagasapak sa kabubut-on sang Dios, kag bangod sini nga ginlaglag sila. Bangod sina man nga rason, ang katawhan pagalaglagon kon si Cristo ipahayag sa dakung kapipit-an sining sistema sang mga butang.

Nagapadaku sa importansia sang paghulag sing maabtik sa pamatuod sang iya palaabuton nga presensia nga may gahom sa Ginharian, si Jesus nagdugang: “Sa sadtong adlaw ang yara sa atop apang ang iya mga galamiton yara sa sulod sang balay, dili magpanaug sa pagkuha sa sini, kag ang yara sa latagon man, dili magpauli. Dumduma ang asawa ni Lot.”

Kon makita ang pamatuod sang presensia ni Cristo, ang katawhan indi makatugot sang ila gugma sa ila materyal nga pagkabutang nga mag-upang sa ila gikan sa paghimo sing gilayon nga buhat. Sa pagguwa niya sa Sodoma, ang asawa ni Lot nagbalikid nga may pag-ulikid sa mga butang nga ginbiyaan, kag sia nangin haligi nga asin.

Nagapadayon sang iya paglaragway sa kahimtangan nga magaluntad sa tion sang palaabuton nga presensia, ginsilingan ni Jesus ang iya mga disipulo: “Sa sadto nga gab-i may duha ka tawo sa isa ka higdaan; ang isa kuhaon kag ang isa bayaan. May duha ka babayi nga nagagaling sing tingob; ang isa kuhaon kag ang isa bayaan.”

Ang kuhaon katumbas sa pagsulod ni Noe upod sa iya pamilya sa arka kag sang pagkuha sang anghel kay Lot kag sa iya pamilya paguwa sa Sodoma. Nagakahulugan ini sing kaluwasan. Sa pihak nga bahin, ang bayaan nagakahulugan sing pag-agom sing kalaglagan.

Sa sini nga punto, ang mga disipulo namangkot: “Diin bala, Ginuo?”

“Kon diin ang lawas nga patay, didto man magtipon ang mga agila,” sabat ni Jesus. Ang mga “ginkuha” para sa kaluwasan kaangay sang malayo sing panan-aw nga agila sa bagay nga nagtipon sila sa “lawas.” Ang lawas nagapatuhoy sa matuod nga Cristo sa iya dikitaon nga presensia nga may gahom sa Ginharian kag sa espirituwal nga sinalusalo nga ginaaman ni Jehova. Lucas 17:​20-37; Genesis 19:⁠26.

▪ Paano ang Ginharian yara sa tunga sang mga Fariseo?

▪ Sa anong paagi ang presensia ni Cristo kaangay sang kilat?

▪ Ngaa ang katawhan laglagon sa tion sang presensia ni Cristo?

▪ Ano ang kahulugan sang kuhaon, kag sang bayaan?