Kapitulo 96

Si Jesus kag ang Manggaranon nga Manugdumala nga Pamatan-on

SAMTANG nagalabay si Jesus sa distrito sang Perea padulong sa Jerusalem, nagdalagan sa iya ang isa ka pamatan-on nga tawo kag nagluhod sa atubangan niya. Ang tawo ginatawag nga manugdumala, ayhan bangod may daku sia nga palangakuan sa isa ka lokal nga sinagoga ukon mahimo nga katapo sia sang Sanhedrin. Subong man, manggaranon sia ka tama. “Maayong Manunudlo,” pamangkot niya, “ano ang dapat ko himuon agod makapanubli sing kabuhi nga wala sing katapusan?”

“Ngaa ginatawag mo ako nga maayo?” sabat ni Jesus. “Wala sing maayo, luwas sa isa lamang, ang Dios.” Mahimo gid nga gingamit sang pamatan-on nga tawo ang “maayo” subong titulo, gani ginpahibalo sia ni Jesus nga ina nga titulo iya lamang sang Dios.

“Apang, kon,” padayon ni Jesus, “luyag mo makasulod sa kabuhi, padayon nga tumana ang mga sugo.”

“Ang diin bala?” pamangkot sang tawo.

Sa pagbalikwat sang lima sa Napulo ka Sugo, si Jesus nagsabat: “Ti, Dili ka magpatay, Dili ka magpanglahi, Dili ka magpangawat, Dili ka magsaksi sing dimatuod, Tahura ang imo amay kag ang imo iloy.” Kag sa pagdugang sing kapin pa ka importante nga sugo, si Jesus nagsiling: “Dapat mo higugmaon ang imo isigkatawo subong sang imo kaugalingon.”

“Ginatuman ko ining tanan nga butang sugod sang bata pa ako,” sinsero gid nga sabat sang tawo. “Apang ano pa ang kulang sa akon?”

Sa pagpamati sa mabaskog kag hanuot nga pangabay sang tawo, nagbatyag si Jesus sing gugma sa iya. Apang nahantop ni Jesus ang gugma sang tawo sa materyal nga mga pagkabutang gani ginpakita niya kon ano ang iya kinahanglan: “Isa ka butang ang kulang sa imo: Lakat ka, ibaligya ang imo pagkabutang kag ihatag sa mga imol, kag makatigayon ka sing bahandi sa langit, kag kari ka, mangin sumulunod ko.”

Gintan-aw ni Jesus, wala sing duhaduha nga may kaluoy, samtang ang tawo nagatindog kag nagtalikod nga masubo gid. Ginbulag sia sang iya manggad sa bili sang matuod nga bahandi. “Daw ano kabudlay,” panganduhoy ni Jesus, “para sa mga may kuwarta ang pagsulod sa ginharian sang Dios!”

Nakibot ang mga disipulo sa ginpamulong ni Jesus. Apang labi pa nga nakibot sila sang magpamulong sia sing kabilugan nga talaksan: “Sa pagkamatuod, mahapos pa sa kamelyo nga maglapos sa buho sang dagom sang sa isa ka manggaranon nga tawo nga magsulod sa ginharian sang Dios.”

“Sin-o, sa pagkamatuod, ang maluwas?” luyag mahibaluan sang mga disipulo.

Nagatulok sa ila sing diretso, si Jesus nagsabat: “Sa mga tawo ini indi mahimo, apang indi sa Dios, kay ang tanan nga butang mahimo sang Dios.”

Bangod ang ila ginpili tuhay sa ginpili sang manggaranon nga manugdumala nga pamatan-on, si Pedro nagsiling: “Yari karon! Ginbayaan namon ang tanan kag nagsunod kami sa imo.” Gani namangkot sia: “Ano gid ang maangkon namon?”

“Sa pagtuga-liwat,” saad ni Jesus, “kon ang Anak sang tawo maglingkod sa iya trono nga mahimayaon, kamo nga nagasunod sa akon magalingkod man sa napulog-duha ka trono, nga nagahukom sa napulog-duha ka tribo sang Israel.” Huo, ginapakita diri ni Jesus nga mahanabo ang pagtuga-liwat sang mga kahimtangan sa duta agod nga ang mga kahimtangan mangin subong sa hardin sang Eden anay. Kag mabaton ni Pedro kag sang iban pa nga mga disipulo ang padya nga paggahom upod kay Cristo sa ibabaw sining bug-os-duta nga Paraiso. Sa pagkamatuod, ining dungganon nga padya takus sa bisan anong sakripisyo!

Apang, bisan sa karon may yara na mga padya, subong malig-on nga ginasiling ni Jesus: “Wala sing bisan sin-o nga nagabiya sa balay ukon mga utod nga lalaki ukon mga utod nga babayi ukon iloy ukon amay ukon mga anak ukon mga uma bangod sa akon kag bangod sa maayong balita ang indi makatigayon sing isa ka gatos ka pilo karon sa sining tion, mga balay, kag mga utod nga lalaki kag mga utod nga babayi kag mga iloy kag mga anak kag mga uma, nga may mga paghingabot, kag sa nagapakari nga sistema sang mga butang sing kabuhi nga wala sing katapusan.”

Subong ginsaad ni Jesus, bisan diin man sa kalibutan magkadto ang iya mga disipulo, magakalipay sila sa pagpakig-upod sang mga masigka-Cristiano nga kapin ka suod kag kapin ka hamili sang sa relasyon sang kinaugali nga mga katapo sang pamilya. Mahimo gid nga nawasi sang manggaranon nga manugdumala nga pamatan-on ining duha ka padya kag ang kabuhi nga wala sing katapusan sa langitnon nga Ginharian sang Dios.

Pagkatapos sadto si Jesus nagdugang: “Apang, madamo nga nahauna nga maulihi, kag mga ulihi nga mauna.” Ano ang buot niya silingon?

Buot niya silingon nga madamo nga tawo nga “nahauna” sa pagtigayon sang relihioso nga mga pribilehiyo, subong sang manggaranon nga manugdumala nga pamatan-on, ang indi makasulod sa Ginharian. Sila “maulihi.” Apang madamo, lakip ang mapainubuson nga mga disipulo ni Jesus, nga ginatamay sang nagapakamatarong sa kaugalingon nga mga Fariseo subong “ulihi”​—⁠subong mga tawo sang duta, ukon ‘am ha·’aʹrets​—⁠ang “mauna.” Ang mangin “nahauna” sila nagakahulugan nga mabaton nila ang pribilehiyo nga mangin kaupod nga mga manuggahom ni Cristo sa Ginharian. Marcos 10:​17-31; Mateo 19:​16-30; Lucas 18:​18-30.

▪ Mahimo gid nga anong sahi sang manugdumala ang manggaranon nga tawo nga pamatan-on?

▪ Ngaa namatok si Jesus nga tawgon sia nga maayo?

▪ Paano ang eksperiensia sang pamatan-on nga manugdumala nagailustrar sang katalagman sang pagkamanggaranon?

▪ Anong mga padya ang ginasaad ni Jesus sa iya mga sumulunod?

▪ Paano ang nahauna mangin naulihi, kag ang ulihi mauna?