Kapitulo 7

Si Jesus kag ang mga Astrologo

MAY pila ka tawo halin sa Sidlangan. Mga astrologo sila​—mga tawo nga nagapangangkon nga mapatpat nila ang kahulugan sang posisyon sang mga bituon. Samtang didto sila sa Sidlangan, nakakita sila sing bag-o nga bituon, kag ginsundan nila ini sa ginatos ka milya pa Jerusalem.

Sang mag-abot ang mga astrologo sa Jerusalem, namangkot sila: “Diin bala ang natawo nga hari sang mga Judiyo? Kay nakita namon ang iya bituon sa Sidlangan, kag nagkari kami sa pagsimba sa iya.”

Sang mabatian ini ni Hari Herodes sa Jerusalem, naakig gid sia. Gani ginpatawag niya ang mga punong saserdote kag namangkot kon sa diin matawo ang Cristo. Ginapasad ang ila sabat sa Kasulatan, sila nagsabat: “Sa Betlehem.” Sa sina, ginpatawag ni Herodes ang mga astrologo kag ginsugo sila: “Lakat kag pangitaon sing tul-id ang bata, kag kon inyo makita sia balitaan ako ninyo, agod nga magkara man ako kag magsimba sa iya.” Apang, ang matuod, luyag ni Herodes nga ipapatay ang bata!

Sang maghalin sila, natabo ang isa ka butang nga makatilingala. Ang bituon nga nakita nila sang didto sila sa Sidlangan naglakbay nga una sa ila. Maathag nga indi ini isa ka kinaandan nga bituon, kundi pinasahi nga gin-aman para sa ila. Ginsundan ini sang mga astrologo tubtob nga nagdulog ini sa ibabaw gid sang balay nga ginapuy-an ni Jose kag ni Maria.

Sang magsulod sa balay ang mga astrologo, nakita nila si Maria upod sa iya anak, nga si Jesus. Sa sina sila tanan nagyaub sa iya. Kag ginpaguwa nila sa ila mga bag ang ila mga regalo nga bulawan, incienso, kag mirra. Sa tapos sadto, sang mabalik na sila kag sugiran si Herodes kon sa diin ang bata, ginpaandaman sila sang Dios sa damgo nga indi paghimuon ina. Gani nagpauli sila paagi sa lain nga dalanon.

Sin-o sa banta ninyo ang nag-aman sang bituon nga naglakbay sa langit agod tuytuyan ang mga astrologo? Dumduma, ang bituon wala magtuytoy sa ila direkta kay Jesus sa Betlehem. Sa baylo, gindala sila sa Jerusalem nga sa diin nakita nila si Hari Herodes, nga luyag magpatay kay Jesus. Kag nahimo niya kuntani ini kon wala magpasilabot ang Dios kag ginpaandaman ang mga astrologo nga indi pagsugiran si Herodes kon sa diin si Jesus. Ang kaaway sang Dios, nga si Satanas nga Yawa, amo ang luyag nga mapatay si Jesus, kag gingamit niya yadto nga bituon sa pagtuman sang iya katuyuan. Mateo 2:​1-12; Miqueas 5:2.

▪ Ano ang nagapakita nga ang bituon nga nakita sang mga astrologo indi kinaandan nga bituon?

▪ Sa diin si Jesus sang makita sia sang mga astrologo?

▪ Ngaa nahibaluan naton nga si Satanas ang nag-aman sang bituon agod tuytuyan ang mga astrologo?