Kapitulo 18

Si Juan Nagbuhin, si Jesus Nagdugang

PAGKATAPOS sang Paskuwa sang tigpamulak sang 30 C.E., si Jesus kag ang iya mga disipulo nagbiya sa Jerusalem. Apang, wala sila magbalik sa ila mga puluy-an sa Galilea kundi nagkadto sila sa Judea, nga sa diin nagbawtismo sila. Si Juan Bautista nagbawtismo man sa isa ka tuig na karon, kag may mga disipulo pa sia nga nagapakig-upod sa iya.

Ang matuod, si Jesus wala sing ginbawtismuhan, kundi mga disipulo niya ang naghimo sini sa idalom sang iya pagtuytoy. Ang ila pagbawtismo pareho sing kahulugan sa ginhimo ni Juan, subong simbulo sang paghinulsol sang Judiyo sa iya mga sala batok sa Kasuguan nga katipan sang Dios. Apang, sang mabanhaw sia, ginsugo ni Jesus ang iya mga disipulo sa pagbawtismo nga may tuhay nga kahulugan. Ang Cristianong bawtismo karon isa ka simbulo sang pagdedikar sang isa ka tawo sa pag-alagad kay Jehova nga Dios.

Apang, sa sining maaga nga bahin sang ministeryo ni Jesus, si Juan kag sia, bisan pa indi sila magkaupod sa pagpanghikot, nagpanudlo kag nagbawtismo sa mga mahinulsulon. Apang nagkahisa ang mga disipulo ni Juan kag nagreklamo sa iya nahanungod kay Jesus: “Rabbi, . . . tan-awa, ining isa nagabawtismo kag ang tanan nagadugok sa iya.”

Sa baylo nga mahisa, nagkalipay si Juan sa kadalag-an ni Jesus kag luyag man niya magkalipay ang iya mga disipulo. Ginpahanumdom niya sila: “Kamo gid nagasaksi sa akon, nga nagsiling ako, indi ako ang Cristo, kundi nga ako ginpauna sa iya.” Nian naggamit sia sing matahom nga ilustrasyon: “Sia nga may nobya amo ang nobyo. Apang, ang abyan sang nobyo, kon magtindog sia kag mabatian sia, nagakalipay sing daku bangod sang tingog sang nobyo. Busa ining kalipay ko nabug-os na.”

Si Juan, subong abyan sang Nobyo, nagkalipay sang nagligad nga anom ka bulan sang ginpakilala niya ang iya mga disipulo kay Jesus. Ang iban sini sa ila nangin palaabuton nga mga katapo sang langitnon nga nobya nga klase ni Cristo nga pagatapuan sang mga Cristiano nga ginhaplasan sing espiritu. Luyag ni Juan nga magsunod man ang iya mga disipulo kay Jesus, kay ang iya katuyuan amo ang paghanda sang dalan para sa madinalag-on nga ministeryo ni Cristo. Subong ginpaathag ni Juan Bautista: “Sia magdugang, apang ako magbuhin.”

Ang bag-o nga disipulo ni Jesus nga si Juan, nga sang una disipulo man ni Juan Bautista, nagsulat tuhoy sa ginhalinan ni Jesus kag sang Iya importante nga papel sa kaluwasan sang tawo, nga nagasiling: “Ang nagahalin sa ibabaw labaw sa tanan. . . . Ginahigugma sang Amay ang Anak kag gintugyan niya ang tanan nga butang sa iya kamot. Ang nagatuo sa Anak may kabuhi nga wala sing katapusan; apang ang wala nagatuman sa Anak indi makakita sang kabuhi, kundi ang kasingkal sang Dios nagapabilin sa iya.”

Wala madugay sa tapos ginpaathag ni Juan Bautista ang pagbuhin sang iya hilikuton, gindakop sia ni Hari Herodes. Ginpangasawa ni Herodes si Herodias, nga asawa sang iya utod nga si Felipe, kag sang ginbuyagyag ni Juan nga indi nagakaigo ang iya ginhimo, ginpabilanggo sia ni Herodes. Sang mabatian ni Jesus nga gindakop si Juan, nagbiya sia sa Judea upod sa iya mga disipulo padulong sa Galilea. Juan 3:​22–​4:​3; Binuhatan 19:​4; Mateo 28:​19; 2 Corinto 11:​2; Marcos 1:​14; 6:​17-20.

▪ Ano ang kahulugan sang mga bawtismo nga ginhimo sa idalom sang pagtuytoy ni Jesus sa wala pa ang iya pagkabanhaw? Kag sa tapos sang iya pagkabanhaw?

▪ Paano ginpakita ni Juan nga ang reklamo sang iya mga disipulo indi makatarunganon?

▪ Ngaa ginbilanggo si Juan?