Kapitulo 59

Sin-o Gid si Jesus?

SANG ang sakayan nga ginasakyan ni Jesus kag sang iya mga disipulo nagdungka sa Betsaida, gindala sang mga tawo ang isa ka bulag sa iya kag nagpakiluoy nga tandugon niya ang tawo kag ayuhon sia. Ginkaptan ni Jesus ang tawo kag gindala sia paguwa sa minuro kag, sang naduplaan niya ang iya mga mata, nagpamangkot: “May makita ka bala?”

“Makita ko ang mga tawo,” sabat niya, “apang ginatan-aw ko sila subong sang kakahuyan, nga nagalakat.” Ginpandungan niya sang iya mga kamot ang iya mga mata, ginbalik ni Jesus ang iya panulok agod makakita sia sing maayo. Nian ginpapauli ni Jesus ang tawo kag ginsingganan nga indi magsulod sa siudad.

Manuglakat na karon si Jesus kag ang iya mga disipulo pakadto sa mga minuro sang Cesaria Filipos, sa naaminhan nayon sang Palestina. Taklaron ini nga nagatuptop sing mga 50 kilometros, pakadto sa matahom nga lugar sang Cesaria Filipos, mga 350 metros sa ibabaw sang nibel sang dagat. Mga pila ka adlaw ang kalawigon sang paglakbay.

Sa dalan, si Jesus nagpangamuyo sing pahain. Mga siam ukon napulo ka bulan na lamang ang nabilin sa wala pa sia mapatay, kag nabalaka sia nahanungod sa iya mga disipulo. Madamo na ang nag-untat sa pagsunod sa iya. Ang iban nagumon kag nabang-awan bangod ginsikway niya ang mga panikasog sang tawo nga himuon sia nga hari kag bangod wala sia maghatag sing tanda gikan sa langit sa pagpamatuod sang iya pagkahari sang ginhangkat sia sang iya mga kaaway. Ano ang ginapatihan sang iya mga apostoles nahanungod sa pagkilala sa iya? Sang magpalapit sila sa iya ginapangamuyuan, si Jesus nagpamangkot: “Sin-o bala ako sa ginsiling sang katawhan?”

“Ang iban nagasiling si Juan Bautista,” sabat nila, “ang iban nagasiling si Elias, kag ang iban si Jeremias ukon isa sang mga manalagna.” Huo, nagdumdom ang mga tawo nga si Jesus isa sining mga lalaki nga ginbanhaw gikan sa minatay!

“Apang sin-o bala ako sa inyo?” pamangkot ni Jesus.

Si Pedro maabtik nga nagsabat: “Ikaw ang Cristo, ang Anak sang Dios nga buhi.”

Sa tapos mapabutyag ang kahamuot sa sabat ni Pedro, si Jesus nagsiling: “Ako man nagasiling sa imo, Ikaw si Pedro, kag sa ibabaw sining Igang tukuron ko ang akon kongregasyon, kag ang mga gahom sang Hades indi makalandas sa iya.” Diri una nga ginapahibalo ni Jesus nga tukuron niya ang isa ka kongregasyon kag bisan ang kamatayon indi makahimo sa mga katapo sini nga bihag pagkatapos sang ila matutom nga pagkabuhi sa duta. Nian ginsilingan niya si Pedro: “Sa imo akon ihatag ang mga yabi sang ginharian sang langit.”

Busa ginpahayag ni Jesus nga si Pedro magabaton sing pinasahi nga mga pribilehiyo. Wala paghatagi si Pedro sing nahauna nga lugar sa tunga sang mga apostoles, ukon ginhimo sia nga sadsaran sang kongregasyon. Si Jesus amo ang Igang nga sa sini pagatukuron ang iya kongregasyon. Apang ginhatag kay Pedro ang tatlo ka yabi nga magabukas, kon sa aton pa, sang kahigayunan para sa mga grupo sang katawhan sa pagsulod sa Ginharian sang langit.

Gingamit ni Pedro ang una nga yabi sang Pentecostes 33 C.⁠E. agod ipakita sa mahinulsulon nga mga Judiyo kon ano ang himuon nila agod maluwas. Wala madugay sa tapos sadto gingamit niya ang ikaduha sa pagbukas sa tumuluo nga mga Samariahanon sang kahigayunan nga makasulod sa Ginharian sang Dios. Nian, sang 36 C.⁠E. gingamit niya ang ikatlo nga yabi paagi sa pagbukas sa disirkunsidado nga mga Gentil, kay Cornelio kag sa iya mga abyan, sang amo man nga kahigayunan.

Ginpadayon ni Jesus ang iya pagpakighambal sa iya mga apostoles. Ginbang-aw niya sila paagi sa pagsugid sang mga pag-antos kag kamatayon nga pagaatubangon niya sa dili madugay sa Jerusalem. Bangod wala mahangpi nga si Jesus pagabanhawon pa langitnon nga kabuhi, ginpahigad ni Pedro si Jesus. “Magmalulo sa imo kaugalingon, Ginuo,” siling niya. “Indi gid ini mahanabo sa imo.” Nagliso si Jesus kag nagsabat: “Halin ka sa atubangan ko, Satanas! Kasandaran ka sa akon, kay wala ka nagahunahuna sang mga butang nga iya sang Dios, kundi sang iya sang mga tawo.”

Sing maathag, ang iban luwas sa mga apostoles nagalakbay kaupod ni Jesus, busa gintawag niya sila kag ginpaathag nga indi mahapos ang mangin sumulunod niya. “Kon sin-o nga tawo ang buot magsunod sa akon,” siling niya, “magdumili sia sang iya kaugalingon kag magpas-an sang iya usok sang pag-antos kag magsunod sa akon. Kay ang bisan sin-o nga buot magluwas sang iya kabuhi madulaan sini; kag ang bisan sin-o nga magdula sang iya kabuhi bangod sa akon kag sa maayong balita makakita sini.”

Huo, kon luyag nila mangin takus sa iya kahamuot, dapat magmaisog ang mga sumulunod ni Jesus kag magsakripisyo sang ila kaugalingon. Sia nagsiling: “Kay ang bisan sin-o nga magkahuya sa akon kag sa akon mga pulong sa sining makihilahion kag makasasala nga kaliwatan, magakahuya sa iya ang Anak sang tawo kon magkari sia sa iya kaugalingon nga himaya kag sa himaya sang Amay kag sang balaan nga mga anghel.” Marcos 8:22-38; Mateo 16:13-28; Lucas 9:​18-27.

▪ Ngaa nabalaka si Jesus sa iya mga disipulo?

▪ Ano ang pagtamod sang katawhan sa pagkakilala kay Jesus?

▪ Ano nga mga yabi ang ginhatag kay Pedro, kag paano ini gamiton?

▪ Ano nga pagbadlong ang natigayon ni Pedro, kag ngaa?