Kapitulo 123

“Yari! Ang Tawo!”

NAHAMUOT sa paggawi ni Jesus kag ginakilala ang iya pagkawala sing sala, gintinguhaan ni Pilato ang isa pa ka paagi agod mabuhian sia. “May kinabatasan kamo,” siling niya sa kadam-an, “nga ako magbuhi sa inyo sing isa ka tawo sa Paskuwa.”

Si Barabas, kilala nga manugpatay kag isa man ka bilanggo, gani namangkot si Pilato: “Sin-o ang luyag ninyo nga buhian ko, si Barabas ukon si Jesus nga ginatawag Cristo?”

Ginbuyok sang puno nga mga saserdote nga nagsugyot sa ila, ginpangabay sang katawhan nga buhian si Barabas kag patyon si Jesus. Wala gihapon mag-ampo, nagsabat si Pilato, nga nagapamangkot liwat: “Sin-o sa duha ang luyag ninyo nga buhian ko sa inyo?”

“Si Barabas,” singgit nila.

“Busa, ano ang himuon ko kay Jesus nga ginatawag Cristo?” masubo nga pamangkot ni Pilato.

Sa isa ka makabulungol nga pagsinggit, sila nagsabat: “Ilansang sia!” “Ilansang, Ilansang sia!”

Nahibaluan nga ginapangayo nila ang kamatayon sang isa ka tawo nga wala sing sala, si Pilato nagpakiluoy: “Ngaa, ano bala nga kalainan ang nahimo sini nga tawo? Wala ako sing nakita sa iya nga takus sang kamatayon; busa silutan ko sia kag buhian.”

Walay sapayan sang iya pagtinguha, ang akig nga kadam-an, nga ginsugyot sang ila relihioso nga mga lider, nagpadayon sa pagsinggit: “Ilansang sia!” Bangod ginbuyok sang mga saserdote ang kadam-an nga magkinagula, ginpangayo nila ang dugo. Kag kon hunahunaon mo, lima ka adlaw antes sini, ang iban sa ila mahimo nga nalakip sa mga nag-abiabi kay Jesus pasulod sa Jerusalem subong Hari! Sa sining bug-os nga tion, ang mga disipulo ni Jesus, kon didto man sila, nagpabilin nga mahipos kag nagapanago.

Si Pilato, sang makita nga wala sing mahimo ang iya pagpakiluoy kundi, sa baylo, nagbaskog pa ang ginahod, nagkuha sing tubig kag nanghinaw sang iya mga kamot sa atubangan sang kadam-an, kag nagsiling: “Wala ako sing sala sa dugo sining tawo. Inyo ina salabton.” Sa sina, ang katawhan nagsabat: “Kami kag ang amon mga anak amo ang manabat sang iya kamatayon.”

Gani, nahisuno sa ila ginpangayo​—⁠kag agod pasundan ang kadam-an sa baylo nga himuon ang nahibaluan niya nga husto⁠—​ginbuhian ni Pilato si Barabas sa ila. Ginkuha niya si Jesus kag gin-ubahan sang iya panapton kag dayon ginpabunal. Indi ini kinaandan nga pagbunal. Ginalaragway sang The Journal of the American Medical Association ang pagbunal sang mga Romano:

“Ang kinaandan nga instrumento isa ka malip-ot nga latigo (fla­grum ukon fla­gel­lum) nga may pila ka tig-isa ukon nasalapid nga panit nga lubid nga lainlain sing kalabaon, nga sa diin may diutay nga salsalon nga mga bola ukon matalom nga mga tul-an sang karnero nga natakod sing lang-atlang-at. . . . Samtang sulit-sulit nga ginabunal sang Romano nga mga soldado ang likod sang biktima upod ang bug-os nga kusog, ang salsalon nga mga bola nagatuga sing madalom nga mga lagob, kag ang panit nga mga lubid kag mga tul-an sang karnero nagadulot sa panit kag sa unod sa idalom sini. Nian, samtang ginapadayon ang pagbunal, ang unod sa tul-an nayon mariri kag nagaresulta sa nagaabri nga unod nga may dugo.”

Sa tapos sining makapaantos nga pagbunal, gindala si Jesus sa palasyo sang gobernador, kag gintawag ang bug-os nga hubon sang mga soldado. Didto dugang pa nga gin-abusuhan sia sang mga soldado paagi sa pagsalapid sing korona nga tunukon kag ginsuklob ini sa iya ulo. Ginpauyat nila ang iya tuo nga kamot sing tabun-ak, kag ginpapanaptan sia sing purpura, ang sahi nga ginasuksok sang mga harianon. Dayon ginyaguta nila sia: “Mabuhi, hari sang mga Judiyo!” Ginduplaan man nila sia kag gintampa. Ginkuha nila ang tabun-ak sa iya kamot, kag ginbunal sia sa ulo, kag nag-ungot sing dugang pa sa iya ulo ang matalom nga mga tunok sang iya makahuluya nga “korona.”

Ang talalupangdon nga pagkahalangdon kag kusog ni Jesus sa atubangan sining pag-abuso sa iya nagpahamuot gid kay Pilato amo kon ngaa napahulag sia sa pagtinguha nga luwason sia. “Yari karon! ginpaguwa ko sia sa inyo agod nga mahibaluan ninyo nga wala ako sing nakita nga kasal-anan sa iya,” siling niya sa kadam-an. Ayhan naghunahuna sia nga kon makita nila ang ginpaantos nga kahimtangan ni Jesus, magahumok ang ila tagipusuon. Samtang nagatindog si Jesus sa atubangan sang wala sing kaluoy nga kadam-an, nga nasukluban sing tunukon nga korona kag sing kunop nga purpura kag ang iya nagadugo nga nawong nagakuriit sa kasakit, si Pilato nagsiling: “Yari! Ang tawo!”

Bisan pa puno sing lagob kag hanog ang iya lawas, nagatindog diri ang labing talalupangdon nga pigura sa bug-os nga maragtas, ang labing dungganon gid nga tawo nga nabuhi! Huo, nagpakita si Jesus sing mahipos nga pagkahalangdon kag pagkakalma nga tanda sang pagkahalangdon nga dapat kilalahon bisan ni Pilato, kay ang iya ginhambal mahimo gid nga bangod sang pagtahod kag kaluoy. Juan 18:​39⁠–​19:​5; Mateo 27:​15-17, 20-30; Marcos 15:​6-19; Lucas 23:​18-25.

▪ Sa anong paagi gintinguhaan ni Pilato nga buhian si Jesus?

▪ Paano gintinguhaan ni Pilato ang paglikaw sa salabton?

▪ Ano ang nadalahig sa pagbunal sa isa?

▪ Paano si Jesus ginyaguta sa tapos ginbunal?

▪ Ano ang dugang pa nga pagtinguha ni Pilato sa pagbuhi kay Jesus?