Leksion 6

Ano ang Ginharian sang Dios?

Diin nahamtang ang Ginharian sang Dios? (1)

Sin-o ang Hari sini? (2)

May iban pa bala nga magagahom upod sa Hari? Kon amo, pila? (3)

Ano ang nagapakita nga nagakabuhi kita sa katapusan nga mga adlaw? (4)

Ano ang pagahimuon sang Ginharian sang Dios para sa katawhan sa palaabuton? (5-7)

1. Sang yari sia sa duta, gintudluan ni Jesus ang iya mga sumulunod nga ipangamuyo ang Ginharian sang Dios. Ang ginharian isa ka panguluhan nga ginapangunahan sang isa ka hari. Ang Ginharian sang Dios isa ka pinasahi nga panguluhan. Nahamtang ini sa langit kag magagahom sa ibabaw sining duta. Pakabalaanon sini ang ngalan sang Dios. Pagahimuon sini ang kabubut-on sang Dios sa duta subong sang sa langit.​—⁠Mateo 6:​9, 10.

2. Nanaad ang Dios nga si Jesus mangin Hari sa Iya Ginharian. (Lucas 1:​30-33) Sang si Jesus yari sa duta, ginpamatud-an niya nga mangin isa sia ka maluluy-on, makatarunganon, kag himpit nga Gumalahom. Sang nagbalik sia sa langit, wala sia sa gilayon naglingkod subong Hari sa Ginharian sang Dios. (Hebreo 10:​12, 13) Sang 1914, ginhatag ni Jehova kay Jesus ang awtoridad nga ginpanaad Niya sa iya. Kutob sadto, si Jesus naggahom sa langit subong ang gintangdo ni Jehova nga Hari.​—⁠Daniel 7:​13, 14.

3. Nagpili man si Jehova sing pila ka matutom nga lalaki kag babayi sa duta sa pagkadto sa langit. Magagahom sila kaupod ni Jesus subong mga hari, mga hukom, kag mga saserdote sa katawhan. (Lucas 22:​28-30; Bugna 5:​9, 10) Gintawag ni Jesus ining kaupod nga mga gumalahom sa iya Ginharian subong “diutay nga panong.” Ang ila kadamuon 144,000.​—⁠Lucas 12:32; Bugna 14:​1-3.

4. Sa gilayon nga si Jesus nangin Hari, gintagbong niya si Satanas kag ang iya malaut nga mga anghel gikan sa langit pakadto sa duta. Amo ina kon ngaa naglain gid ang kahimtangan diri sa duta sugod sang 1914. (Bugna 12:​9, 12) Ang mga inaway, mga tiggulutom, mga pamiste, nagadugang nga pagkamalinapason​—⁠ini tanan bahin sang “tanda” nga nagapakita nga si Jesus nagagahom  kag nga ining sistema yara na sa katapusan nga mga adlaw.​—⁠Mateo 24:​3, 7, 8, 12; Lucas 21:​10, 11; 2 Timoteo 3:⁠1-5.

5. Sa indi na lang madugay pagahukman ni Jesus ang katawhan, nagapain sa ila subong sang isa ka manugbantay nga nagapain sang mga karnero gikan sa mga kanding. Ang “mga karnero” amo yadtong magapamatuod sang ila kaugalingon nga matutom nga mga sakop. Magabaton sila sing kabuhi nga walay katapusan sa duta. Ang “mga kanding” amo yadtong magasikway sa Ginharian sang Dios. (Mateo 25:​31-34, 46) Sa malapit nga palaabuton, laglagon ni Jesus ang tanan nga mga katulad-kanding. (2 Tesalonica 1:​6-9) Kon luyag mo mangin isa sang “mga karnero” ni Jesus, dapat mo pamatian ang mensahe sang Ginharian kag magpanghikot suno sa imo natun-an.​—⁠Mateo 24:⁠14.

6. Ang duta karon natunga sa madamo nga pungsod. Ang tagsa may kaugalingon nga panguluhan. Ining mga pungsod masunson nga nagainaway batok sa isa kag isa. Apang buslan sang Ginharian sang Dios ang tanan nga panguluhan sang tawo. Magagahom ini subong ang lamang nga panguluhan sa ibabaw sang bug-os nga duta. (Daniel 2:44) Nian ang inaway, krimen, kag kasingki madula na. Ang tanan nga tawo magakabuhi sing mahidaiton kag nahiusa.​—⁠Miqueas 4:​3, 4.

7. Sa sulod sang Isa ka Libo ka Tuig nga Paggahom ni Jesus, ang matutom nga mga tawo mangin himpit, kag ang bug-os nga duta mangin paraiso. Pagkatapos sang isa ka libo ka tuig, mahimo na ni Jesus ang tanan nga ginpahimo sa iya sang Dios. Nian ibalik niya ang Ginharian sa iya Amay. (1 Corinto 15:24) Ngaa indi mo sugiran ang imo mga abyan kag hinigugma nahanungod sa kon ano ang pagahimuon sang Ginharian sang Dios?

[Retrato sa pahina 13]

Sa idalom sang paggahom ni Jesus, ang pagdumot ukon pag-ihig-ihig madula na