Leksion 13

Paano Mo Masapwan ang Matuod nga Relihion?

Ang tanan bala nga relihion kalahamut-an sa Dios, ukon isa lamang? (1)

Ngaa tuman kadamo nga relihion ang nagapangangkon subong Cristiano? (2)

Paano mo makilala ang matuod nga mga Cristiano? (3-7)

1. Ginsugdan ni Jesus ang isa ka matuod nga Cristianong relihion. Gani dapat nga may isa lamang ka hubon, ukon grupo, sang matuod nga mga sumilimba ni Jehova nga Dios sa karon. (Juan 4:​23, 24; Efeso 4:​4, 5) Ginatudlo sang Biblia nga pila lamang ka tawo ang yara sa makitid nga dalan padulong sa kabuhi.​—⁠Mateo 7:​13, 14.

2. Ang Biblia nagtagna nga sa tapos mapatay ang mga apostoles, ang sayop nga mga panudlo kag dicristiano nga mga buhat amat-amat nga magasulod sa Cristianong kongregasyon. Ang mga tawo magaganyat sa mga tumuluo sa pagsunod sa ila sa baylo kay Cristo. (Mateo 7:​15, 21-23; Binuhatan 20:​29, 30) Amo ina kon ngaa tuman kadamo nga lainlain nga mga relihion nga nagapangangkon subong Cristiano ang makita naton. Paano naton makilala ang matuod nga mga Cristiano?

3. Ang labing talalupangdon nga tanda sang matuod nga mga Cristiano amo nga may matuod sila nga gugma sa tunga nila. (Juan 13:​34, 35) Wala sila ginatudluan sa paghunahuna nga mas maayo sila sangsa mga tawo halin sa iban nga mga rasa ukon duag sang panit. Wala man sila ginatudluan sa pagdumot sa mga tawo halin sa iban nga mga pungsod. (Binuhatan 10:​34, 35) Gani wala sila nagapakigbahin sa mga inaway. Ginapakig-angutan sang matuod nga mga Cristiano ang isa kag isa subong mga utod nga lalaki kag babayi.​—⁠1 Juan 4:​20, 21.

4. Ang isa pa ka tanda sang matuod nga relihion amo nga ang mga katapo sini may tudok nga pagtahod sa Biblia. Ginabaton nila ini subong ang Pulong sang Dios kag ginapatihan kon ano ang ginasiling sini. (Juan 17:17; 2 Timoteo 3:​16, 17) Ginakabig nila ang Pulong sang Dios subong nga mas importante sangsa tawhanon nga mga ideya ukon mga kinabatasan. (Mateo 15:​1-3, 7-9) Nagapanikasog  sila sa pagkabuhi suno sa Biblia sa ila adlaw-adlaw nga pagkabuhi. Gani wala sila nagabantala sing isa ka butang kag nian nagabuhat sing lain.​—⁠Tito 1:​15, 16.

5. Ang matuod nga relihion dapat man magpadungog sa ngalan sang Dios. (Mateo 6:⁠9) Ginpakilala ni Jesus ang ngalan sang Dios, si Jehova, sa iban. Amo man sini ang dapat himuon sang matuod nga mga Cristiano. (Juan 17:​6, 26; Roma 10:​13, 14) Sin-o nga mga tawo sa imo komunidad ang nagasugid sa iban nahanungod sa ngalan sang Dios?

6. Ang matuod nga mga Cristiano dapat magbantala nahanungod sa Ginharian sang Dios. Amo sini ang ginhimo ni Jesus. Pirme sia naghambal nahanungod sa Ginharian. (Lucas 8:⁠1) Ginsugo niya ang iya mga disipulo nga ibantala ini man nga mensahe sa bug-os nga duta. (Mateo 24:14; 28:​19, 20) Ang matuod nga mga Cristiano nagapati nga ang Ginharian sang Dios lamang ang makadala sing matuod nga paghidait kag kalig-unan sa sining duta.​—⁠Salmo 146:​3-5.

7. Ang mga disipulo ni Jesus dapat indi bahin sining malaut nga kalibutan. (Juan 17:16) Wala sila nagapasilabot sa politika kag sosyal nga mga binais sang kalibutan. Ginalikawan nila ang makahalalit nga paggawi, buhat, kag panimuot nga kinaandan sa kalibutan. (Santiago 1:27; 4:⁠4) Makilala mo bala ang isa ka relihiosong grupo sa imo komunidad nga may yara sining mga tanda sang matuod nga Cristianismo?

[Retrato sa pahina 27]

Ang matuod nga mga Cristiano nagahigugmaanay sa isa kag isa, nagatahod sang Biblia, kag nagabantala nahanungod sa Ginharian sang Dios