Leksion 12

Pagpakita sing Pagtahod sa Kabuhi kag Dugo

Paano naton dapat tamdon ang kabuhi? (1) aborsion (1)

Paano ginapakita sang mga Cristiano nga mahalungon sila? (2)

Sala bala ang magpatay sing mga sapat? (3)

Ano ang pila ka mga buhat nga wala nagapakita sing pagtahod sa kabuhi? (4)

Ano ang kasuguan sang Dios sa dugo? (5)

Nagalakip bala ini sa mga pagtayon sing dugo? (6)

1. Si Jehova amo ang Tuburan sang kabuhi. Utang sa Dios sang tanan buhi nga mga butang ang ila kabuhi. (Salmo 36:⁠9) Ang kabuhi sagrado sa Dios. Bisan ang kabuhi sang wala pa matawo nga bata sa tiyan sang iya iloy hamili kay Jehova. Ang hungod nga pagpatay sa sining nagatubo nga lapsag malain sa mata sang Dios.​—⁠Exodo 21:​22, 23; Salmo 127:⁠3.

2. Ang matuod nga mga Cristiano maamligon. Ginapat-od nila nga ang ila mga salakyan kag ang ila mga puluy-an indi peligruso. (Deuteronomio 22:⁠8) Ang mga alagad sang Dios wala nagapasayangsayang sang ila kabuhi para lamang sa paglipaylipay ukon kinasadya. Gani wala sila nagapakigbahin sa masingki nga mga isport nga nagahalit sing hungod sa iban nga mga tawo. Ginalikawan nila ang kalingawan nga nagapalig-on sing kasingki.​—⁠Salmo 11:5; Juan 13:⁠35.

3. Ang kabuhi sang sapat sagrado  man sa Manunuga. Ang isa ka Cristiano mahimo magpatay sing mga sapat sa pag-aman sing kalan-on kag panapton ukon sa pag-amlig sang iya kaugalingon gikan sa balatian kag katalagman. (Genesis 3:21; 9:3; Exodo 21:28) Apang ang pagpintas sa mga sapat ukon pagpatay sa ila tungod lamang sang isport ukon paglipaylipay malain.​—⁠Hulubaton 12:⁠10.

4. Ang pagpanigarilyo, pagmama, kag pagdroga para sa paglipaylipay indi para sa mga Cristiano. Ining mga bisyo malain bangod (1) nagaulipon ini sa aton, (2) nagahalit ini sang aton lawas, kag (3) dimatinlo ini. (Roma 6:19; 12:1; 2 Corinto 7:⁠1) Mahimo gid nga mabudlay untatan ining mga bisyo. Apang dapat naton ini himuon agod pahamut-an si Jehova.

5. Ang dugo sagrado man sa mata sang Dios. Ang Dios nagasiling nga ang kalag, ukon kabuhi, yara sa dugo. Gani malain ang magkaon sing dugo. Malain man ang magkaon sing karne sang isa ka sapat nga wala ginpadugo sing nagakaigo. Kon ang isa ka sapat ginkuga ukon napatay sa isa ka siod, indi ini dapat pagkaunon. Kon ini ginpana ukon gintiro, dapat ini sa gilayon paduguon kon ini pagakaunon.​—⁠Genesis 9:​3, 4; Levitico 17:​13, 14; Binuhatan 15:​28, 29.

6. Malain bala ang magpatayon sing dugo? Dumduma, si Jehova nagasugo nga maglihi kita sa dugo. Nagakahulugan ini nga indi naton dapat pagpasudlon sa aton kaugalingon nga lawas sa bisan ano nga paagi ang dugo sang iban nga mga tawo ukon bisan ang aton kaugalingon nga dugo nga gintago. (Binuhatan 21:25) Gani ang matuod nga mga Cristiano indi magapatayon sing dugo. Magabaton sila sing iban nga mga sahi sang medikal nga pagbulong, kaangay sang pagtayon sing indi dugo nga mga produkto. Luyag nila mabuhi, apang indi sila magatinguha sa pagluwas sang ila kabuhi paagi sa paglapas sa kasuguan sang Dios.​—⁠Mateo 16:⁠25.

[Retrato sa pahina 25]

Agod pahamut-an ang Dios, dapat naton likawan ang mga pagtayon sing dugo, dimatinlo nga mga bisyo, kag dikinahanglanon nga mga katalagman