Leksion 7

Pagpalapit sing Suod sa Dios Paagi sa Pangamuyo

Ngaa importante mangamuyo sing tayuyon? (1)

Kay sin-o kita dapat mangamuyo, kag paano? (2, 3)

Ano ang nagakaigo nga mga tema para sa pangamuyo? (4)

San-o ka dapat mangamuyo? (5, 6)

Ginapamatian bala sang Dios ang tanan nga pangamuyo? (7)

1. Ang pangamuyo amo ang mapainubuson nga pagpakighambal sa Dios. Dapat ka mangamuyo sa Dios sing tayuyon. Sa amo magasuod ang imo balatyagon sa iya subong sa isa ka mahal nga abyan. Si Jehova daku kaayo kag gamhanan, apang ginapamatian niya ang aton mga pangamuyo! Nagapangamuyo ka bala sa Dios sing tayuyon?​—⁠Salmo 65:2; 1 Tesalonica 5:⁠17.

2. Ang pangamuyo bahin sang aton pagsimba. Busa, dapat kita mangamuyo sa Dios lamang, si Jehova. Sang si Jesus yari sa duta, nangamuyo sia pirme sa iya Amay, indi sa  iban pa. Amo man sini ang dapat naton himuon. (Mateo 4:10; 6:⁠9) Apang, ang tanan naton nga pangamuyo dapat pagahimuon sa ngalan ni Jesus. Nagapakita ini nga ginatahod naton ang posisyon ni Jesus kag nagatuo kita sa iya halad nga gawad.​—⁠Juan 14:6; 1 Juan 2:​1, 2.

3. Kon kita mangamuyo dapat kita makighambal sa Dios gikan sa aton tagipusuon. Indi kita dapat mangamuyo sing saulado ukon basahon ini gikan sa isa ka libro sang pangamuyo. (Mateo 6:​7, 8) Mahimo kita makapangamuyo sa bisan anong matinahuron nga posisyon, sa bisan ano nga tion, kag sa bisan diin nga lugar. Mabatian sang Dios bisan ang mahipos nga mga pangamuyo sang aton tagipusuon. (1 Samuel 1:​12, 13) Mas maayo nga mangita kita sing isa ka malinong nga lugar nga malayo sa iban nga tawo kon mangamuyo kita sing personal.​—⁠Marcos 1:⁠35.

4. Anong mga tema ang mahimo nimo mapangamuyo? Bisan ano nga butang nga mahimo makaapektar sang imo pagpakig-abyan sa iya. (Filipos 4:​6, 7) Ginapakita sang huwaran nga pangamuyo nga dapat naton ipangamuyo ang ngalan kag katuyuan ni Jehova. Mahimo man kita makapangabay nga iaman ang aton materyal nga mga kinahanglanon, patawaron ang aton mga sala, kag buligan nga maatubang ang pagsulay. (Mateo 6:​9-13) Ang aton mga pangamuyo indi dapat mahamkunon. Dapat lamang naton ipangamuyo ang mga butang nga nagahisanto sa kabubut-on sang Dios.​—⁠1 Juan 5:⁠14.

5. Mahimo ka mangamuyo kon ginapahulag ka sang imo tagipusuon nga magpasalamat ukon dayawon ang Dios. (1 Cronica 29:​10-13) Dapat ka mangamuyo kon may mga problema ka kag ang imo pagtuo ginatilawan. (Salmo 55:22; 120:⁠1) Nagakaigo ang mangamuyo antes ka magkaon. (Mateo 14:19) Si Jehova nagaagda sa aton nga mangamuyo “sa tanan nga okasyon”​—⁠Efeso 6:⁠18.

6. Labi na gid nga kinahanglan kita mangamuyo kon nakahimo kita sing mabug-at nga sala. Sa subong sina nga mga tion dapat kita mangayo sing kaluoy kag patawad ni Jehova. Kon itu-ad naton ang aton mga sala sa iya kag himuon ang aton bug-os nga masarangan nga indi ini pagliwaton, ang Dios “handa sa pagpatawad.”​—⁠Salmo 86:5; Hulubaton 28:⁠13.

7. Ang mga pangamuyo lamang sang matarong nga mga tawo ang ginapamatian ni Jehova. Agod pamatian sang Dios ang imo mga pangamuyo, dapat ka manikasog sa bug-os mo nga masarangan nga magkabuhi suno sa iya mga kasuguan. (Hulubaton 15:29; 28:⁠9) Dapat ka magpaubos kon nagapangamuyo ka. (Lucas 18:​9-14) Dapat ka manikasog suno sa kon ano ang imo ginapangamuyo. Sa amo ginapamatud-an mo nga may pagtuo ka kag sinsero gid ikaw sa imo ginapangamuyo. Sa sini lamang nga pagasabton ni Jehova ang imo mga pangamuyo.​—⁠Hebreo 11:⁠6.