Leksion 2

Sin-o ang Dios?

Sin-o ang matuod nga Dios, kag ano ang iya ngalan? (1, 2)

May ano sia nga sahi sang lawas? (3)

Ano ang iya talalupangdon nga mga kinaiya? (4)

Dapat bala kita maggamit sing mga imahen kag mga simbulo sa aton pagsimba sa iya? (5)

Ano ang duha ka paagi nga makatuon kita nahanungod sa Dios? (6)

1. Ang mga tawo nagasimba sing madamo nga butang. Apang ang Biblia nagasugid sa aton nga may isa lamang ka MATUOD nga Dios. Gintuga niya ang tanan nga butang sa langit kag sa duta. Bangod sia ang naghatag sa aton sing kabuhi, sia lamang ang Isa nga dapat naton simbahon.​—⁠1 Corinto 8:​5, 6; Bugna 4:⁠11.

2. Ang Dios may madamo nga titulo apang may isa lamang ka ngalan. Ina nga ngalan amo ang JEHOVA. Sa kalabanan nga Biblia, ang ngalan sang Dios ginkuha kag gin-islan sing mga titulo nga GINUO ukon DIOS. Apang sang ginsulat ang Biblia, ang ngalan nga Jehova mabasa sa sini sing mga 7,000 ka beses!​—⁠Exodo 3:15; Salmo 83:⁠18.

3.Si Jehova may lawas, apang indi ini kaangay sang aton. “Ang Dios isa ka Espiritu,” siling sang Biblia. (Juan 4:24) Ang espiritu  isa ka porma sang kabuhi nga mas mataas sangsa aton. Wala sing tawo ang nakakita sa Dios. Si Jehova nagapuyo sa langit, apang makita niya ang tanan nga butang. (Salmo 11:​4, 5; Juan 1:18) Apang, ano ang balaan nga espiritu? Indi ini isa ka persona kaangay sang Dios. Kundi, amo ini ang aktibo nga puwersa sang Dios.​—⁠Salmo 104:⁠30.

4. Ginapahayag sang Biblia sa aton ang personalidad ni Jehova. Ginapakita sini nga ang iya talalupangdon nga mga kinaiya amo ang gugma, katarungan, kaalam, kag gahom. (Deuteronomio 32:4; Job 12:13; Isaias 40:26; 1 Juan 4:⁠8) Ang Biblia nagasugid sa aton nga sia man maluluy-on, malulo, mapinatawaron, maalwan, kag mapailubon. Kita, kaangay sang matinumanon nga mga anak, dapat manikasog sa pag-ilog sa iya.​—⁠Efeso 5:​1, 2.

5. Dapat bala kita magyaub ukon magpangamuyo sa mga imahen, mga larawan, ukon mga simbulo sa aton pagsimba? Indi! (Exodo 20:​4, 5) Si Jehova nagasiling nga sia lamang ang dapat naton simbahon. Indi sia magapaambit sang iya himaya kay bisan sin-o ukon sa bisan ano. Ang mga imahen wala sing gahom sa pagbulig sa aton.​—⁠Salmo 115:​4-8; Isaias 42:⁠8.

6. Paano naton makilala ang Dios sing maayo pa? Ang isa ka paagi amo ang pagpanilag sa mga butang nga gintuga niya kag sa paghunahuna sing maayo kon ano ang ginasugid sini sa aton. Ang mga tinuga sang Dios nagapakita sa aton nga may daku sia nga gahom kag kaalam. Makita naton ang iya gugma sa tanan nga ginhimo niya. (Salmo 19:​1-6; Roma 1:20) Ang isa pa ka paagi nga makatuon kita nahanungod sa Dios amo ang pagtuon sa Biblia. Paagi sa sini, madamo sia sing ginasugid sa aton nahanungod sa kon ano sia nga sahi sang Dios. Ginasugiran man niya kita nahanungod sang iya katuyuan kag kon ano ang luyag niya nga himuon naton.​—⁠Amos 3:7; 2 Timoteo 3:​16, 17.

[Mga retrato sa pahina 5]

Nagatuon kita nahanungod sa Dios paagi sa pagpanuga kag sa Biblia