Leksion 4

Sin-o ang Yawa?

Si Satanas nga Yawa​—⁠diin sia naghalin? (1, 2)

Paano ginapatalang ni Satanas ang mga tawo? (3-7)

Ngaa dapat mo pamatukan ang Yawa? (7)

1. Ang tinaga nga “yawa” nagakahulugan sang isa nga nagasugid sing malaut nga mga kabutigan nahanungod sa iban. Ang “Satanas” nagakahulugan sing kaaway ukon manugsumpong. Mga termino ini nga ginhatag sa pangunang kaaway sang Dios. Sang primero, isa sia ka himpit nga anghel sa langit kaupod sang Dios. Apang, naghunahuna sia sang ulihi sang iya kaugalingon nga mas mataas kag naluyag sang pagsimba nga natungod sing nagakaigo sa Dios.​—⁠Mateo 4:​8-10.

2. Ining anghel, si Satanas, nakighambal kay Eva paagi sa isa ka man-ug. Paagi sa pagsugid sa iya sing mga kabutigan, nahaylo niya si Eva nga lalison ang Dios. Sa amo ginsalakay ni Satanas ang ginatawag nga “pagkasoberano,” ukon posisyon, sang Dios, subong ang Labing Mataas. Ginpangduhaduhaan ni Satanas kon bala ang Dios nagagahom sa isa ka takus nga paagi kag sa labing ikaayo sang Iya mga sakop. Ginpangduhaduhaan man ni Satanas kon bala may tawo nga magapabilin nga matutom sa Dios. Paagi sa paghimo sini, ginhimo ni Satanas ang iya kaugalingon nga kaaway sang Dios. Amo ina kon ngaa gintawag sia nga Satanas nga Yawa.​—⁠Genesis 3:​1-5; Job 1:​8-11; Bugna 12:⁠9.

3. Ginatinguhaan ni Satanas nga dayaon ang mga tawo sa pagsimba sa iya. (2 Corinto 11:​3, 14) Ang isa ka paagi nga ginadaya niya ang mga tawo amo ang sa kalalangan sang butig nga relihion. Kon ang isa ka relihion nagatudlo sing mga kabutigan nahanungod sa Dios, ginahimo gid sini ang katuyuan ni Satanas. (Juan 8:44) Ang mga tawo nga katapo sang butig nga relihion mahimo magapati sing sinsero nga ginasimba nila ang matuod nga Dios. Apang si Satanas gid ang ila ginaalagad. Sia ‘ang dios sining kalibutan.’​—⁠2 Corinto 4:⁠4.

4. Ang espiritismo isa pa ka paagi nga ginapaidalom ni Satanas ang katawhan sa iya gahom. Mahimo sila manawag sa mga espiritu sa pag-amlig sa ila, sa paghalit sa iban, sa pagpakot sang palaabuton, ukon sa paghimo sing mga milagro. Si Satanas amo ang malauton nga puwersa sa likod sining tanan nga buhat. Agod mapahamut-an ang Dios, indi kita dapat magpasilabot sa espiritismo.​—⁠Deuteronomio 18:​10-12; Binuhatan 19:​18, 19.

5. Ginapatalang man ni Satanas ang mga tawo sa kalalangan sang sobra nga pagpabugal sa rasa kag sa pagsimba sa politikal  nga mga organisasyon. Ang iban nagahunahuna nga ang ila pungsod ukon rasa mas maayo sangsa iban. Apang indi ini matuod. (Binuhatan 10:​34, 35) Ang iban nga mga tawo nagalaum nga malubad sang politikal nga mga organisasyon ang mga problema sang tawo. Paagi sa paghimo sini, ginasikway nila ang Ginharian sang Dios. Amo lamang ini ang solusyon sa aton mga problema.​—⁠Daniel 2:⁠44.

6. Ang isa pa ka paagi nga ginapatalang ni Satanas ang mga tawo amo ang sa kalalangan sang pagsulay sa ila paagi sa makasasala nga mga kailigbon. Si Jehova nagasugo sa aton nga likawan ang makasasala nga mga buhat bangod nakahibalo sia nga magahalit ini sa aton. (Galacia 6:​7, 8) Mahimo nga luyag sang iban nga mga tawo nga buylugan ninyo sila sa sining mga buhat. Apang, dumduma, si Satanas amo gid ang maluyag nga himuon mo ining mga butang.​—⁠1 Corinto 6:​9, 10; 15:⁠33.

7. Mahimo gamiton ni Satanas ang paghingabot ukon pagpamatok agod bayaan mo si Jehova. Ang pila sang imo mga hinigugma mahimo nga maakig katama bangod nagatuon ka sa Biblia. Ayhan ang iban magauliga sa imo. Apang kay sin-o mo utang ang imo kabuhi? Luyag ka pahugon ni Satanas agod magauntat ka sa pagtuon nahanungod kay Jehova. Indi pagpadauga si Satanas! (Mateo 10:​34-39; 1 Pedro 5:​8, 9) Paagi sa pagpamatok sa Yawa, mapahalipay mo si Jehova kag mapakita nga ginasakdag mo ang Iya pagkasoberano.​—⁠Hulubaton 27:⁠11.

[Mga retrato sa pahina 9]

Ang butig nga relihion, espiritismo, kag nasyonalismo nagapatalang sa mga tawo

[Retrato sa pahina 9]

Pamatuki si Satanas paagi sa padayon nga pagtuon nahanungod kay Jehova