Leksion 3

Sin-o si Jesucristo?

Ngaa gintawag si Jesus nga “panganay” nga Anak sang Dios? (1)

Ngaa gintawag sia nga “Pulong”? (1)

Ngaa nagkari si Jesus sa duta subong isa ka tawo? (2-4)

Ngaa naghimo sia sing mga milagro? (5)

Ano ang pagahimuon ni Jesus sa malapit nga palaabuton? (6)

1. Si Jesus nagkabuhi sa langit subong isa ka espiritu nga persona antes sia nagkari sa duta. Sia ang nahauna nga tinuga sang Dios, gani ginatawag sia nga “panganay” nga Anak sang Dios. (Colosas 1:15; Bugna 3:14) Si Jesus amo lamang ang Anak nga gintuga sang Dios mismo. Gingamit ni Jehova ang wala pa mangin tawo nga si Jesus subong iya “pangulo nga manugpangabudlay” sa pagtuga sa tanan iban pa nga mga butang sa langit kag sa duta. (Hulubaton 8:​22-31; Colosas 1:​16, 17) Gingamit man sia sang Dios subong Iya pangulo nga humalambal. Amo ina kon ngaa ginatawag si Jesus nga “Pulong.”​—⁠Juan 1:​1-3; Bugna 19:⁠13.

2. Ginpadala sang Dios ang Iya Anak sa duta paagi sa pagliton sang iya kabuhi sa taguangkan ni Maria. Gani si Jesus wala sing tawhanon nga amay. Amo ina kon ngaa wala sia makapanubli sing bisan ano nga sala ukon pagkadihimpit. Ginpadala sang Dios si Jesus sa duta tungod sa tatlo ka rason: (1) Sa pagtudlo sa aton sang kamatuoran tuhoy sa Dios (Juan 18:37), (2) sa paghupot sing himpit nga integridad, nagaaman sing huwaran para sundon naton (1 Pedro 2:21), kag (3) sa paghalad sang iya kabuhi agod hilwayon kita gikan sa sala kag kamatayon. Ngaa kinahanglanon ini?​—⁠Mateo 20:⁠28.

3. Paagi sa paglapas sa sugo sang Dios, ang nahaunang tawo, si Adan, nakahimo sang ginatawag sang Biblia nga “sala.” Gani ginpamatbatan sia sang Dios sing kamatayon. (Genesis 3:​17-19) Indi na sia takus sa mga talaksan sang Dios, gani indi na sia himpit. Amat-amat sia nga nagtigulang kag napatay. Ginliton ni Adan ang sala sa tanan niya nga anak. Amo ina kon ngaa nagatigulang man kita, nagamasakit, kag nagakapatay. Paano maluwas ang katawhan?​—⁠Roma 3:23; 5:⁠12. 

4. Si Jesus isa ka himpit nga tawo kaangay ni Adan. Apang, indi kaangay ni Adan, si Jesus matinumanon sing himpit sa Dios bisan sa idalom sang labing daku nga pagtilaw. Busa mahimo niya mahalad ang iya himpit tawhanon nga kabuhi agod ibayad sa sala ni Adan. Amo ini ang ginatawag sa Biblia nga “gawad.” Busa ang mga anak ni Adan mahimo mahilway gikan sa katagudilian sang kamatayon. Ang tanan nga nagatuo kay Jesus pagapatawaron sang ila mga sala kag makabaton sing kabuhi nga walay katapusan.​—⁠1 Timoteo 2:​5, 6; Juan 3:⁠16; Roma 5:​18, 19.

5. Sang yari sia sa duta gin-ayo ni Jesus ang mga masakiton, ginpakaon ang mga nagutom, kag ginpalinong ang mga bagyo. Ginbanhaw pa gani niya ang mga patay. Ngaa naghimo sia sing mga milagro? (1) Naluoy sia sa mga tawo nga nagaantos, kag luyag niya sila buligan. (2) Ang iya mga milagro nagpamatuod nga sia Anak sang Dios. (3) Nagpakita ini kon ano ang pagahimuon niya para sa matinumanon nga katawhan kon maggahom sia subong Hari sa ibabaw sang duta.​—⁠Mateo 14:14; Marcos 2:​10-12; Juan 5:​28, 29.

6. Si Jesus napatay kag ginbanhaw sang Dios subong espiritu nga tinuga, kag nagbalik sia sa langit. (1 Pedro 3:18) Sugod sadto, ginhimo sia sang Dios nga isa ka Hari. Sa dili madugay dulaon ni Jesus ang tanan nga kalautan kag pag-antos sa sining duta.​—⁠Salmo 37:​9-11; Hulubaton 2:​21, 22.

[Retrato sa pahina 7]

Ang ministeryo ni Jesus naglakip sang pagpanudlo, paghimo sing mga milagro, kag bisan sang paghalad sang iya kabuhi para sa aton