Magkabuhi sing Dayon sa Isa ka Paraiso nga Duta
Seksion 8
Magkabuhi sing Dayon sa Isa ka Paraiso nga Duta
1, 2. Ano ang kahimtangan sang kabuhi sa idalom sang paggahom sang Ginharian sang Dios?
1 Ano ang kahimtangan sang kabuhi kon dulaon sang Dios ang kalautan kag pag-antos sa duta kag sugdan ang iya bag-ong kalibutan sa idalom sang mahigugmaon nga paggahom sang iya langitnon nga Ginharian? Ang Dios nagapanaad nga ‘humlaron niya ang iya kamot kag busgon ang handum sang tagsa ka buhi nga butang.’—Salmo 145:16.
2 Ano ang imo makatarunganon nga mga handum? Indi bala amo ang malipayon nga kabuhi, mapuslanon nga trabaho, materyal nga kabuganaan, matahom nga mga palibot, paghidait sa tunga sang tanan nga katawhan, kag kahilwayan gikan sa inhustisya, balatian, pag-antos, kag kamatayon? Kag ano ang masiling sa malipayon nga espirituwal nga pagtamod? Ini tanan nga butang malapit na matuman sa idalom sang paggahom sang Ginharian sang Dios. Talupangda kon ano ang ginasiling sang mga tagna sang Biblia tuhoy sa makalilipay nga mga pagpakamaayo nga magaabot sa sinang bag-ong kalibutan.
Himpit nga Paghidait sa Katawhan
3-6. Ano ang aton pasalig nga ang mga tawo makatigayon sing paghidait sa bag-ong kalibutan?
3 “Ginapatunong [sang Dios] ang mga inaway tubtob sa ukbong sang duta. Ginabali niya ang pana kag ginautod niya ang bangkaw; ginasunog niya sa kalayo ang mga kangga [para sa inaway].”—Salmo 46:9.
4 “Ang ila mga espada salsalon nila nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.”—Isaias 2:4.
5 “Ang mga mahagop magapanubli sang duta, kag magakalipay sing bug-os sa kabuganaan sang paghidait.”—Salmo 37:11.
6 “Ang bug-os nga duta nagapahuway kag malinong. Ang katawhan nagahinugyaw sa pag-amba.”—Isaias 14:7.
Ang Tawo kag mga Sapat Nagahidaitay
7, 8. Ano nga paghidait ang magaluntad sa ulot sang mga tawo kag mga sapat?
7 “Ang lobo magapuyo kaupod sang kordero, kag ang leopardo magaluko kaupod sang kanding nga tinday kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila. Kag ang baka kag ang oso magahalab; ang ila mga tinday magaluko sing tingob. Kag ang leon magakaon sing dagami kaangay sang baka. Kag ang bata nga nagasuso magahampang sa ibabaw sang buho sang dalitan nga man-ug; kag ang nalutas nga bata magakuot sang iya kamot sa palanaguan sang man-ug nga dalitan. Indi sila maghalit ukon maglaglag.”—Isaias 11:6-9.
8 “Sa sadto nga adlaw magapakigkatipan ako sa ila upod sa ilahas nga kasapatan sang latagon kag upod sa kapispisan sang langit kag upod sa mga butang nga nagasaug sa duta . . . pahigdaon ko sila sing malig-on.”—Oseas 2:18.
Himpit nga Panglawas, Walay Katapusan nga Kabuhi
9-14. Ilaragway ang kahimtangan sang panglawas sa bag-ong kalibutan.
9 “Sa sina nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa sina nga tion ang piang magalumpat subong sang usa, kag ang dila sang apa magaamba sa kalipay.”—Isaias 35:5, 6.
10 “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.”—Bugna 21:4.
11 “Wala sing pumuluyo nga magasiling: ‘Nagamasakit ako.’ ”—Isaias 33:24.
12 “Ang iya unod mangin linghod pa sangsa bata; magabalik sia sa mga adlaw sang iya batan-on nga kapagsik.”—Job 33:25.
13 “Ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.”—Roma 6:23.
14 “Ang bisan sin-o nga magpakita sing pagtuo sa iya . . . may kabuhi nga walay katapusan.”—Juan 3:16.
Ang Patay Nabanhaw
15-17. Ano ang paglaum sang mga napatay?
15 “May pagkabanhaw sang mga matarong kag mga dimatarong.”—Binuhatan 24:15.
16 “Ang takna magaabot nga ang tanan nga yara sa handumanan nga mga lulubngan [handumanan sang Dios] magapamati sang iya tingog kag magaguwa.”—Juan 5:28, 29.
17 “Ginhatag sang dagat ang mga patay nga yara sa iya, kag ginhatag sang kamatayon kag Hades [lulubngan] ang mga patay nga yara sa ila.”—Bugna 20:13.
Duta, Isa ka Paraiso sang Kabuganaan
18-22. Himuon nga ano ang bug-os nga duta?
18 “May mga ulan sang pagpakamaayo. Kag ang kahoy sang latagon magapamunga, kag ang duta magapatubas, kag mangin malig-on sila sa ila duta.”—Ezequiel 34:26, 27.
19 “Ang duta pat-od nga magahatag sang iya patubas; ang Dios, ang aton Dios, magapakamaayo sa aton.”—Salmo 67:6.
20 “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa.”—Isaias 35:1.
21 “Ang kabukiran kag ang mga kabakuluran magamalipayon sa atubangan ninyo nga may pag-amba, kag ang tanan nga kakahuyan sang latagon magapamalakpak sang ila mga kamot. Sa baylo sang talungon magatubo ang abeto. Sa baylo sang sapinit magatubo ang mirto.”—Isaias 55:12, 13.
22 “Mangin kaupod ko ikaw sa Paraiso.”—Lucas 23:43.
Maayong Pamalay Para sa Tanan
23, 24. Ano ang aton pasalig nga may bastante nga maayong pamalay para sa tanan?
23 “Magapatindog sila sing mga balay kag puy-an sila . . . Indi sila magpatindog kag iban ang magapuyo; indi sila magtanom kag iban ang magakaon. . . . Panginpuslan sing bug-os sang akon mga pinili ang binuhatan sang ila mga kamot. Indi sila magpangabudlay sa walay pulos, ukon magpanganak nga sa kalalat-an.”—Isaias 65:21-23.
24 “Magalingkod sila, ang tagsa ka tawo sa idalom sang iya ubas kag sa idalom sang iya higuera, kag wala na sing magapakurog sa ila.”—Miqueas 4:4.
Mahimo Ka Mabuhi sing Dayon sa Paraiso
25. Ano ang aton matahom nga palaabuton?
25 Daw ano katahom nga palaabuton! Daw ano ka matuod nga katuyuan ang matigayon sang kabuhi karon kon napasad sa malig-on nga paglaum nga sa bag-ong kalibutan sang Dios ang tanan nga problema karon mangin mga butang sang nagligad sing dayon! “Ang nagligad nga mga butang indi na pagdumdumon, ukon magsulod sa tagipusuon.” (Isaias 65:17) Kag daw ano ka makalipay mahibaluan nga ang kabuhi sa amo nga tion mangin dayon: “Lamunon [sang Dios] sing dayon ang kamatayon.”—Isaias 25:8.
26. Ano ang sekreto agod mabuhi sing dayon sa bag-ong kalibutan sang Dios?
26 Luyag mo bala magpuyo sing dayon sa sinang Paraiso nga bag-ong kalibutan nga tuman na kalapit karon? ‘Ano ang dapat ko himuon agod mahamut-an ako sang Dios sa katapusan sining kalibutan kag magpadayon sa pagkabuhi sa iya bag-ong kalibutan?’ mahimo ipamangkot mo. Dapat mo himuon ang ginsambit ni Jesus sa iya pangamuyo sa Dios: “Ini nagakahulugan sing kabuhi nga walay katapusan, ang ila pagkuha sing ihibalo tuhoy sa imo, ang lamang matuod nga Dios, kag tuhoy sa iya nga imo ginpadala, si Jesucristo.”—Juan 17:3.
27. Ano ang dapat mo himuon agod makaambit sa katuyuan sang Dios?
27 Busa, magtigayon sing Biblia, kag pamatud-i ang imo nabasahan sa sining brosyur. Pangitaa ang mga tawo nga nagatuon kag nagatudlo sining mga kamatuoran sang Biblia. Magbulag sa salimpapaw nga mga relihion nga nagatudlo kag nagahimo sing mga butang nga batok sa Biblia. Tun-i kon paano ikaw, upod sa minilyon pa nga nagahimo na sang kabubut-on sang Dios, makaambit sa katuyuan sang Dios nga ang mga tawo mabuhi sing dayon sa isa ka paraiso nga duta. Kag pensara sing maayo ang ginasiling sang inspirado nga Pulong sang Dios nahanungod sa malapit nga palaabuton: “Ang kalibutan magataliwan kag ang kailigbon sini, apang sia nga nagahimo sang kabubut-on sang Dios magapabilin sing dayon.”—1 Juan 2:17.
[Mga Pamangkot sa Pagtinuon]
[Retrato sa pahina 31]
Matuman sa indi madugay ang katuyuan sang Dios nga ipasag-uli ang dutan-on nga paraiso
