Seksion 7

Malapit na Matuman ang Katuyuan sang Dios

1, 2. Ngaa mapat-od naton nga ang Dios magahikot sa pagtapos sang kalautan kag pag-antos?

¹ Bisan pa gintugutan sang Dios ang pagkadihimpit kag pag-antos sa malawig nga tion gikan sa pagtamod sang tawo, indi niya pagtugutan ang malain nga mga kahimtangan nga magpadayon sing dayon. Ang Biblia nagasugid sa aton nga nagtalana ang Dios sing espesipiko nga panahon para sa sining mga butang.

² “Sa tagsa ka butang may gintalana nga panag-on.” (Manugwali 3:⁠1) Kon matapos na ang gintalana sang Dios nga tion para sa kalautan kag pag-antos, nian magapasilabot sia sa mga hilikuton sang tawo. Tapuson niya ang kalautan kag pag-antos kag tumanon niya ang iya orihinal nga katuyuan nga pun-on ang duta sing himpit, malipayon nga tawhanon nga pamilya nga may bug-os nga paghidait kag kalig-unan sa pangabuhi sa tunga sang Paraiso nga mga kahimtangan.

Ang mga Paghukom sang Dios

3, 4. Paano ginalaragway sang tulun-an sang mga Hulubaton ang mga resulta sang pagpasilabot sang Dios?

³ Talupangda ang pila sang madamo nga tagna sa Biblia nga nagasugid kon ano ang mangin kahulugan sa indi madugay para sa tawhanon nga pamilya sang pagpasilabot sang Dios, kon sayuron, ang mga resulta sang iya mga paghukom:

⁴ “Ang mga matadlong magapuyo sa duta, kag ang mga himpit magapabilin sa sini. Tuhoy sa mga malauton, utdon sila gikan sa duta; kag tuhoy sa mga maluib, gabuton sila sa sini.”​—⁠Hulubaton 2:​21, 22.

5, 6. Paano ginapakita sang Salmo 37 kon ano ang mahanabo kon magpasilabot ang Dios?

⁵ “Ang mga manughikot sing malaut pagautdon, apang ang mga nagalaum kay Jehova amo ang magapanag-iya sang duta. Kag sa diutay pa nga tion, kag ang mga malauton wala na . . . Apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.”​—⁠Salmo 37:​9-11.

 ⁶ “Hulata si Jehova kag bantayi ang iya dalanon, kag sia magapataas sa imo sa pagpanag-iya sang duta. Kon ang mga malauton utdon, makita mo ini. Tandai ang himpit nga mga tawo kag tan-awa ang mga matadlong, kay ang palaabuton sina nga tawo mangin mahidaiton. Apang ang mga malalison laglagon sing tingob; ang palaabuton sang mga malauton pat-od nga utdon.”​—⁠Salmo 37:​34, 37, 38.

7. Anong maayo nga laygay ang ginahatag sa aton sang Pulong sang Dios?

⁷ Busa, bangod sang matahom nga palaabuton para sa mga nagakilala sa kinamatarong sang labing gamhanan nga Manunuga sa paggahom sa aton, ginalaygayan kita: “Kabay nga ang imo tagipusuon magbantay sang akon mga sugo, kay ang kalawigon sang mga adlaw kag katuigan sang kabuhi kag ang paghidait idugang sa imo.” Sa kamatuoran, ang dayon nga kabuhi idugang sa mga nagapili sa paghimo sang kabubut-on sang Dios! Sa amo, ang Pulong sang Dios nagalaygay sa aton: “Magsalig kay Jehova sa bug-os mo nga tagipusuon kag dili magsandig sa imo kaugalingon nga paghangop. Sa tanan mo nga dalanon kilalaha sia, kag sia mismo magatadlong sang imo mga banas.”​—⁠Hulubaton 3:​1, 2, 5, 6.

Paggahom sang Dios Gikan sa Langit

8, 9. Sa anong paagi tinluan sang Dios ining duta?

⁸ Tinluan sang Dios ang duta paagi sa labing maayo nga panguluhan nga matigayon sang katawhan. Isa ini ka panguluhan nga magapakita sing langitnon nga kaalam bangod magagahom ini gikan sa langit sa idalom sang pagtuytoy sang Dios. Kag dulaon sinang langitnon nga Ginharian ang tanan nga sahi sang tawhanon nga paggahom gikan sa duta. Indi na pagtugutan ang mga tawo sa paggahom nga hilway sa Dios.

⁹ Sa sining bahin ang tagna sa Daniel 2:44 nagasiling: “Sa mga adlaw sadto nga mga hari [mga panguluhan karon] ang Dios sang langit magapatindog sing isa ka ginharian [sa langit] nga dili gid malaglag. Kag ang ginharian indi pag-ipasa sa iban nga katawhan [ang mga tawo indi na pagtugutan sa paggahom nga hilway sa Dios]. Dugmukon sini kag papason ini tanan nga ginharian [nga nagaluntad karon], kag ini magapadayon tubtob sa walay katubtuban.”⁠—⁠Tan-awa man ang Bugna 19:​11-21; 20:​4-6.

10. Ngaa mapat-od naton nga sa idalom sang langitnon nga Ginharian sang Dios, wala na sing kagarukan sa paggahom?

¹⁰ Sa amo, indi na matilawan sang katawhan ang garok nga mga sahi sang paggahom, kay kon malaglag na sang Dios ining sistema, ang paggahom sang tawo nga hilway sa iya indi na liwat magaluntad. Kag ang Ginharian nga nagagahom gikan sa langit indi mangin garok, kay ang Dios amo ang Tagtukod kag Tag-amlig sini. Sa baylo, magapanghikot ini para sa daku nga kaayuhan sang tawhanon nga mga sakop sini.  Nian ang kabubut-on sang Dios himuon sa bug-os nga duta subong sang sa langit. Amo kon ngaa natudluan ni Jesus ang iya mga disipulo nga mangamuyo sa Dios: “Magkari ang imo ginharian. Paghimuon ang imo kabubut-on, subong sang sa langit, amo man sa duta.”​—⁠Mateo 6:⁠10.

Daw Ano Na Kita Kalapit?

11. Sa diin naton makita sa Biblia ang mga tagna nga magabulig sa aton sa paghibalo kon daw ano na kita kalapit sa katapusan sining sistema?

¹¹ Daw ano na kita kalapit sa katapusan sining indi makaalayaw nga sistema sang mga butang kag sa pamuno sang bag-ong kalibutan sang Dios? Ang tagna sang Biblia maathag nga nagahatag sa aton sing sabat. Halimbawa, gintagna mismo ni Jesus kon ano ang paabuton agod mahibaluan naton kon diin na kita sa ginasiling sang Biblia nga “katapusan sang sistema sang mga butang.” Narekord ini sa Mateo kapitulo 24 kag 25, Marcos 13, kag Lucas 21. Subong sang narekord man sa 2 Timoteo kapitulo 3, gintagna ni apostol Pablo nga magaabot ang panahon nga gintawag “katapusan nga mga adlaw” nga sa amo nga tion ang nanuhaytuhay nga mga hitabo dugang pa nga magapamatuod kon sa diin na kita sa lakat sang panahon.

12, 13. Ano ang ginsiling ni Jesus kag ni Pablo nahanungod sa panahon sang katapusan?

¹² Nagsiling si Jesus nga ini nga panahon sugdan sining mga hitabo: “Ang pungsod magatindog batok sa pungsod, kag may mga kakulang sing kalan-on kag mga linog sa nagakalainlain nga mga duog.” (Mateo 24:⁠7) Ginapakita sang Lucas 21:11 nga ginsambit man niya ang “mga pesti sa nagakalainlain nga mga duog.” Kag nagpaandam man sia tuhoy sa ‘nagabuad nga kalautan.’​—⁠Mateo 24:⁠12.

¹³ Si apostol Pablo nagtagna: “Apang hibalua ini, nga sa katapusan nga mga adlaw magaabot ang makahalanguyos nga mga tion nga mabudlay pakigbagayan. Kay ang mga tawo magamahigugmaon sang kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dimatutom, wala sing kinaugali nga gugma, indi tampad sa kasugtanan, mapatupatuon, wala sing pagpugong sa kaugalingon, mabangis, wala sing gugma sa kaayuhan, maluib, dasudaso, nagahabok sa pagpadayaw, mahigugmaon sa kinasadya sa baylo sang sa Dios, nga may dagway sang pagkadiosnon apang nagapanghiwala sang gahom sini . . . Ang malaut nga mga tawo kag mga malimbong magalain kag magalain pa, nga nagadaya kag ginadayaan.”​—⁠2 Timoteo 3:​1-5, 13.

14, 15. Paano ang mga hitabo sining ika-20 nga siglo nagapamatuod nga yari na kita matuod sa katapusan nga mga adlaw?

¹⁴ Natabo bala sa aton panahon yadtong mga butang nga gintagna ni Jesus kag ni Pablo? Huo, sa pagkamatuod. Ang Inaway Kalibutanon I amo ang pinakamabaskog nga inaway sa maragtas tubtob sadtong tion. Amo yadto ang una nga inaway kalibutanon kag amo ang tanda sang pagbag-o sa modernong maragtas. Upod sadto nga inaway amo ang mga kakulang sing kalan-on, epidemia nga mga balatian, kag iban pa nga mga kalamidad. Yadtong mga hitabo sugod sang 1914, suno kay Jesus, “isa ka pamuno lamang sang mga kasakit.” (Mateo 24:⁠8) Ginsugdan sini ang gintagna nga panahon nga gintawag “katapusan nga mga adlaw,” ang pamuno sang katapusan nga kaliwatan nga sa diin tugutan sang Dios ang kalautan kag pag-antos.

¹⁵ Mahimo gid nga indi lipod sa imo ang mga hitabo sang ika-20 nga siglo. Nahibaluan mo ang mga kinagubot nga nag-utwas. Mga 100 milyones ka tawo ang napatay sa mga inaway. Ginatos ka milyon pa ang napatay sa gutom kag balatian. Ang mga linog nagkutol sing dimaisip nga kabuhi. Nagadugang ang indi pagtahod sa kabuhi kag propiedad. Ang kahadlok sa krimen nangin bahin sang adlaw-adlaw nga pagkabuhi. Ang moral nga mga talaksan ginsikway. Ang paglupok sang populasyon nagatuga sing mga problema nga indi malubad. Ginapierdi sang polusyon ang kalidad sang kabuhi kag ginabutang pa gani ini sa katalagman. Sa pagkamatuod, yari na kita sa katapusan nga mga adlaw sugod sang 1914 kag nagahilapit sa katapusan nga bahin sang mga tagna sang Biblia nga nagadalahig sang aton tion.

16. Daw ano kalawig nga panahon ang katapusan nga mga adlaw?

¹⁶ Daw ano kalawig nga panahon ining katapusan nga mga adlaw? Si Jesus nagsiling tuhoy sa dag-on nga nakaeksperiensia sang “pamuno sang mga kasakit” kutob sang 1914: “Ining kaliwatan indi gid magtaliwan tubtob nga tanan ining butang matuman.” (Mateo 24:​8, 34-36) Sa amo, ang tanan nga bahin sang katapusan nga mga adlaw dapat mahanabo sa sulod sang pagkabuhi sang isa ka kaliwatan, ang kaliwatan  sang 1914. Ang pila ka tawo, kon amo, nga buhi na sang 1914 buhi gihapon kon malaglag ining sistema. Ina nga kaliwatan sang mga tawo tuman na ka tigulang karon, nagapakita nga diutay na lang nga tion ang nabilin antes laglagon sang Dios ang sistema sang mga butang karon.

17, 18. Ano nga tagna ang nagapakita nga malapit na gid kita sa katapusan sining kalibutan?

¹⁷ Ang isa pa ka tagna nga nagapakita nga ang katapusan sining sistema tuman na kalapit amo ang ginhatag ni apostol Pablo, nga nagtagna: “Ang adlaw ni Jehova magaabot gid subong sang makawat sa kagab-ihon. Samtang nagasiling sila: ‘Paghidait kag kalig-unan!’ nian sa hinali ang kalaglagan magaabot sa ila . . . , kag indi sila nga mas-a makalikaw.”​—⁠1 Tesalonica 5:​2, 3; tan-awa man ang Lucas 21:​34, 35.

¹⁸ Ang Cold War natapos na karon, kag ang pag-ilinaway sang mga pungsod mahimo nga indi na isa ka daku nga katalagman. Gani mahimo magabatyag ang mga pungsod nga nagahilapit na sila sa bag-ong kalibutan nga kahimusan. Apang kon ginabatyag nila nga ang ila mga panikasog nagamadinalag-on, magakahulugan ini sing kabaliskaran sang ila ginahunahuna, kay mangin amo ina ang katapusan nga sinyales nga ang paglaglag sang Dios sa sining sistema malapit na. Dumduma, ang politikanhon nga mga negosasyon kag mga tratado wala nagahimo sing matuod nga mga pagbag-o sa katawhan. Wala sini ginahimo ang mga tawo nga maghigugmaanay. Kag indi matapna sang mga lider sang kalibutan ang krimen, ukon ang balatian kag kamatayon. Gani indi pagsaligi ang nagausbong nga paghidait kag kalig-unan sang tawo kag maghunahuna nga malapit na malubad sining kalibutan ang iya mga problema. (Salmo 146:⁠3) Ang mangin kahulugan gid sinang pagsinggit amo nga malapit na malaglag ining kalibutan.

Pagbantala sing Maayong Balita

19, 20. Ano nga tagna nga nagadalahig sang pagbantala sa katapusan nga mga adlaw ang makita naton nga nagakatuman?

¹⁹ Ang isa pa ka tagna nga nagapakita nga yari na kita sa katapusan nga mga adlaw sugod sang 1914 amo ang ginhatag ni Jesus: “Ang maayong balita kinahanglan ibantala anay sa tanan nga kapungsuran.” (Marcos 13:10) Ukon suno sa Mateo 24:14: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”

²⁰ Sa karon, subong wala pa gid matabo sa maragtas, ang maayong balita tuhoy sa katapusan sining kalibutan kag ang nagapakari nga Paraiso nga bag-ong kalibutan sa idalom sang Ginharian sang Dios ginabantala sa bug-os nga duta. Nanday sin-o? Sang minilyon ka mga Saksi ni Jehova. Nagabantala sila sa tanan nga pungsod sa duta.

21, 22. Ano, labi na, ang nagapakilala sa mga Saksi ni Jehova subong matuod nga mga Cristiano?

²¹ Dugang sa ila pagbantala nahanungod sa Ginharian sang Dios, ang mga Saksi ni Jehova nagagawi sa paagi nga nagapakilala sa ila subong matuod nga mga sumulunod ni Cristo, kay sia nagsiling: “Paagi sa sini makilala sang tanan nga kamo mga disipulo ko, kon maghigugmaanay kamo.” Sa amo, ang mga Saksi ni Jehova ginahiusa sang indi mabugras nga higot sang gugma sa isa ka tugob-globo nga paghiliutod.​—⁠Juan 13:35; tan-awa man ang Isaias 2:​2-4; Colosas 3:14; Juan 15:​12-14; 1 Juan 3:​10-12; 4:​20, 21; Bugna 7:​9, 10.

²² Ginapatihan sang mga Saksi ni Jehova ang ginasiling sang Biblia: “Ang Dios walay ginapasulabi, kundi sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:​34, 35) Ginatamod nila ang ila mga masigka-Saksi sa tanan nga pungsod subong ila espirituwal nga kauturan nga mga lalaki kag mga babayi, walay sapayan sang ila kaliwatan ukon duag. (Mateo 23:⁠8) Kag ang katunayan nga ining tugob-globo nga paghiliutod wala sa kalibutan karon nagadugang pa sing pamatuod nga ang katuyuan sang Dios matuman sa indi madugay.

[Mga Pamangkot sa Pagtinuon]

[Retrato sa pahina 26]

Ang himpit nga langitnon nga Ginharian sang Dios mangin amo lamang ang panguluhan sang katawhan sa bag-ong kalibutan