Seksion 5

May Daku nga Katuyuan ang Kabuhi

1, 2. Paano naton masiling nga ang Dios nagaulikid sa aton, kag diin kita dapat magliso para sa mga sabat sa mga pamangkot sang kabuhi?

¹ Ang paagi nga gintuga ang duta kag ang buhi nga mga butang sa sini nagapakita nga ang ila Manunuga isa ka Dios sang gugma nga may daku nga pag-ulikid. Kag ginapakita sang iya Pulong, ang Biblia, nga nagaulikid sia; nagahatag ini sa aton sing labing maayo nga mga sabat sa mga pamangkot nga: Ngaa yari kita diri sa duta? kag, Ano ang aton palaabuton?

² Dapat naton tun-an ang Biblia para sa sini nga mga sabat. Ang Pulong sang Dios nagasiling: “Kon pangitaon ninyo sia, makita sia ninyo, apang kon bayaan ninyo sia, sia magabiya sa inyo.” (2 Cronica 15:⁠2) Kon amo, ano ang ginapahayag sang aton pagtuon sa Pulong sang Dios nahanungod sa iya katuyuan para sa aton?

Kon Ngaa Gintuga sang Dios ang mga Tawo

3. Ngaa gintuga sang Dios ang duta?

³ Ginapakita sang Biblia nga ginhanda sang Dios ang duta nga ginahunahuna ilabi na ang mga tawo. Ang Isaias 45:18 nagasiling tuhoy sa duta nga ang Dios ‘wala magtuga sini sa walay pulos [kundi] naghuman sini agod papuy-an.’ Kag ginsangkapan niya ang duta sang tanan nga butang nga kinahanglanon sang tawo, indi lamang sa pagkabuhi, kundi sa pagkalipay sing bug-os sa kabuhi.​—⁠Genesis, kapitulo 1 kag 2.

4. Ngaa gintuga sang Dios ang unang mga tawo?

⁴ Sa iya Pulong, ginsiling sang Dios nga gintuga niya ang unang mga tawo, nga si Adan kag si Eva, kag ginpahayag niya kon ano ang iya ginplano para sa tawhanon nga pamilya. Sia nagsiling: “Himuon ta ang tawo sa dagway naton, suno sa kaangay naton, kag pagahumon sila sa kaisdaan sang dagat kag sa kapispisan sang kahanginan kag sa kahayupan kag sa bug-os nga duta kag sa tagsa ka butang nga nagasaug sa duta.” (Genesis 1:26) Padumalahon ang tawo sa “bug-os nga duta” kag sa kasapatan.

5. Diin ginbutang ang unang mga tawo?

⁵ Naghimo ang Dios sing isa ka daku, tulad parke nga hardin sa isa ka duog nga gintawag Eden, nga nahamtang sa Natung-an nga Sidlangan. Kag ‘ginkuha [niya] ang tawo kag ginbutang sia sa hardin sang Eden sa pagpanguma kag sa pag-atipan sini.’ Isa yadto ka paraiso nga may yara sang tanan nga makaon sang unang mga tawo. Kag naglakip ini sang “tagsa ka kahoy nga maanyag sa itululok kag maayo nga kalan-on,” subong man sang iban pa nga talamnunon kag madamo pa sang makawiwili nga mga sari sang mga sapat.​—⁠Genesis 2:​7-9, 15.

6. Gintuga ang mga tawo nga may anong mental kag pisikal nga mga kinaiya?

⁶ Ang lawas sang unang mga tawo gintuga nga himpit, agod nga indi sila magmasakit, magtigulang, ukon mapatay. Ginsangkapan man sila sing iban pa nga mga kinaiya, subong sang kahilwayan sa pagpili. Ginapaathag sa Genesis 1:27 ang isa pa ka paagi sang paghimo sa ila: “Gintuga sang Dios ang tawo sa iya kaugalingon nga dagway, sa dagway sang Dios gintuga niya sia; lalaki kag babayi gintuga niya sila.” Sanglit gintuga kita sa dagway sang Dios, ginhatagan kita indi lamang sing pisikal kag mental nga mga kinaiya kundi sing moral kag espirituwal man nga mga handum, kag dapat ini tumanon kon luyag naton mangin malipayon. Kag ihatag sang Dios ang paagi sa pagbusog sina nga mga kinahanglanon pati man ang ginakinahanglan nga pagkaon, tubig, kag hangin. Subong sang ginsiling ni Jesucristo, “indi lamang sa tinapay mabuhi ang tawo, kundi sa tagsa ka pulong nga nagaguwa sa baba ni Jehova.”​—⁠Mateo 4:⁠4.

7. Anong sugo ang ginhatag sa unang mag-asawa?

⁷ Dugang pa, naghatag ang Dios sing makalilipay nga sugo sa unang mag-asawa sang didto sila sa Eden: “Magmabungahon kag magbuad kag magtugob sang duta.” (Genesis 1:28) Gani  makapadamo sila kag makapanganak sing himpit nga mga anak. Kag samtang nagadamo ang tawo, may yara sila makalilipay nga hilikuton nga pasangkaron ang mga dulunan sang orihinal nga tulad-parke, nga paraiso sang Eden. Sa ulihi, ang bug-os nga duta mangin paraiso, nga ginapuy-an sang himpit, malipayon nga katawhan nga mabuhi sing dayon. Ang Biblia nagapahibalo sa aton nga sa tapos masugdan sang Dios ang tanan, “Nakita sang Dios ang tagsa ka butang nga nahimo niya kag, yari karon! tama gid kaayo.”​—⁠Genesis 1:⁠31; tan-awa man ang Salmo 118:17.

8. Paano atipanon sang mga tawo ang duta?

⁸ Maathag nga dapat gamiton sang mga tawo ang ginagamhan nga duta para sa ila kaayuhan. Apang himuon ini sa isa ka masaligan nga paagi. Ang mga tawo dapat mangin matinahuron nga mga manugdumala sang duta, indi mga manuglaglag sini. Ang paglaglag sa duta nga makita naton sa karon batok sa kabubut-on sang Dios, kag ang mga nagapakigbahin sa sini nagasumpakil sa katuyuan sang kabuhi sa duta. Magabayad gid sila sa sini, kay ang Biblia nagasiling nga ang Dios “magalaglag sang mga nagalaglag sang duta.”​—⁠Bugna 11:⁠18.

Katuyuan Gihapon sang Dios

9. Ngaa makasalig kita nga ang katuyuan sang Dios matuman?

⁹ Sa amo, halin pa sa ginsuguran katuyuan na sang Dios nga ang himpit nga pamilya sang tawo magpuyo sa duta sing dayon sa isa ka paraiso. Kag katuyuan gihapon niya ini! Ina nga katuyuan pat-od nga matuman. Ang Biblia nagasiling: “Si Jehova sang mga kasoldadusan nagsumpa, nga nagasiling: ‘Suno sa akon ginpainuino, amo ini ang mahanabo; kag suno sa akon gintuyo, amo ina ang mahimo.’ ” “Ginpamulong ko ini; pahanabuon ko man ini. Ginbuko ko ini, himuon ko man ini.”​—⁠Isaias 14:24; 46:⁠11.

10, 11. Ano ang ginsambit ni Jesus, ni Pedro, kag ni salmista David tuhoy sa Paraiso?

¹⁰ Ginsambit ni Jesucristo ang katuyuan sang Dios nga ipasag-uli ang paraiso sa duta sang ginsingganan niya ang isa ka tawo nga nagapangayo sing paglaum sa palaabuton: “Mangin kaupod ko ikaw sa Paraiso.” (Lucas 23:43) Ginsambit man ni apostol Pedro ang nagapakari nga bag-ong kalibutan sang magtagna sia: “May  bag-ong mga langit [isa ka bag-ong panguluhan nga nagagahom gikan sa langit] kag bag-ong duta [isa ka bag-ong katilingban sa duta] nga ginahulat naton suno sa saad [sang Dios], kag sa sini magapuyo ang pagkamatarong.”​—⁠2 Pedro 3:⁠13.

¹¹ Nagsulat man si salmista David nahanungod sa nagapakari nga bag-ong kalibutan kag kon tubtob san-o ini magadugay. Sia nagtagna: “Ang mga matarong magapanag-iya sang duta, kag magapuyo sila sa sini sing dayon.” (Salmo 37:29) Amo kon ngaa si Jesus nanaad: “Malipayon ang mga malum-ok sing panghunahuna, kay panublion nila ang duta.”​—⁠Mateo 5:⁠5.

12, 13. Sumaryuha ang dakung katuyuan sang Dios para sa katawhan.

¹² Daw ano ka daku nga paglaum ina, mabuhi sing dayon sa isa ka paraiso nga duta nga wala sang tanan nga kalautan, krimen, balatian, kasubo kag kasakit! Sa katapusan nga tulun-an sang Biblia, ang matagnaon nga Pulong sang Dios nagasumaryo sining dakung katuyuan sa pagsiling: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Nagadugang ini: “Kag ang Isa nga nagalingkod sa trono nagsiling: ‘Yari karon! Ginabag-o ko ang tanan nga butang.’ Nagsiling man sia: ‘Isulat ini, kay ining mga pulong masaligan kag matuod.’ ”​—⁠Bugna 21:​4, 5.

¹³ Huo, may dakung katuyuan ang Dios. Amo ini ang isa ka bag-ong kalibutan sang pagkamatarong, isa ka dayon nga paraiso, nga gintagna sang Isa nga may ikasarang kag magahimo sang iya ginasaad, kay ang iya “mga pulong masaligan kag matuod.”

[Mga Pamangkot sa Pagtinuon]

[Mga retrato sa pahina 20, 21]

Gintuyo sang Dios nga ang mga tawo magkabuhi sing dayon sa isa ka paraiso nga duta. Amo gihapon sina ang iya katuyuan

[Retrato sa pahina 22]

Sarang masukot sang tag-iya ang mga manug-arkila nga nagaguba sang iya balay