Seksion 6

Ngaa may Madamo gid nga Pag-antos kag Inhustisya?

1, 2. Bangod sang naeksperiensiahan sang mga tawo, anong mga pamangkot ang mahimo ipamangkot?

¹ Apang, kon gintuyo sang Supremo nga Persona nga ang himpit nga mga tawo magkabuhi sa duta sing dayon sa tunga sang paraiso nga mga kahimtangan kag kon amo sina gihapon ang iya katuyuan, ngaa wala sing paraiso karon? Ngaa, sa baylo, ang katawhan nagaeksperiensia sing madamo nga siglo sang pag-antos kag inhustisya?

² Sa walay duhaduha, ang maragtas sang tawo puno sing pag-antos bangod sang inaway, imperyalistiko nga pagpamihag, paghingalit, inhustisya, kaimulon, kalamidad, balatian, kag kamatayon. Ngaa kadamo gid sing malain nga mga butang nga natabo sa madamo gid sang walay sala nga mga biktima? Kon ang Dios labing gamhanan, ngaa gintugutan niya ining madamo nga pag-antos sa linibo ka tuig? Sanglit maayo gid ang pagdesinyo kag pag-areglar sang Dios sa uniberso, ngaa gintugutan niya ang kagamo kag kalaglagan sa duta?

Isa ka Halimbawa

3-5. (a) Ano nga ilustrasyon ang makabulig sa aton sa paghangop kon ngaa ang isa ka Dios sang kahim-ong magatugot sang kagamo sa duta? (b) Diin sa pila ka mahimo nga mga rason ang nagabagay sa kahimtangan sang duta?

³ Maggamit kita sing isa ka halimbawa sa pag-ilustrar kon ngaa ang isa ka Dios sang kahim-ong magatugot sang kagamo sa duta. Handurawa, palihug, nga nagalakat ikaw sa isa ka kagulangan kag nagahinampot sa isa ka balay. Sang gin-usisa mo ang balay, nakita mo nga magamo ini. Ang mga bintana guba, ang atop nagaluy-on, ang kahoy nga balkon puno sing buho, ang ganhaan kulang sing bisagra, kag wala sing tubig.

⁴ Bangod sining tanan nga depekto, magahinakop ka bala nga wala sing intelihente nga desinyador nga nagdesinyo sina nga balay? Magakombinsi bala sa imo ina nga kagamo nga ang balay nagtuhaw lamang? Ukon kon maghinakop ka nga may isa nga nagdesinyo kag nagtukod  sini, hunahunaon mo bala nga ini nga tawo indi lantip kag wala sing pensar?

⁵ Sang gin-usisa mo pa sing maid-id ang balay, nakita mo nga sang una mahim-ong ini kag nagahatag sing pamatuod nga ginpamensaran ini sing mahalungon. Apang karon gubaon na ini kag malapit na marusmak. Ano ang ginapakita sang mga depekto kag mga problema? Mahimo ini magpahangop nga (1) napatay ang tag-iya; (2) isa sia ka sangkol nga manunukod apang indi na sia interesado sa balay; ukon (3) ginpaarkilahan niya sing temporaryo ang iya propiedad sa walay kabalaslan nga mga manug-arkila. Ang naulihi nagaanggid sa kahimtangan sining duta.

Kon Ano ang Natabo

6, 7. Ano ang natabo kay Adan kag kay Eva sang ginlapas nila ang sugo sang Dios?

⁶ Pasad sa una nga rekord sang Biblia, natun-an naton nga indi katuyuan sang Dios nga ang mga tawo mag-antos ukon mapatay. Ang aton unang mga ginikanan, nga si Adan kag si Eva, napatay lamang bangod ginlalis nila ang Dios. (Genesis, kapitulo 2 kag 3) Sang maglalis sila, wala na nila ginhimo ang kabubut-on sang Dios. Nagpalayo sila sa pag-atipan sang Dios. Sa epekto, gindiskonektar nila ang ila kaugalingon gikan sa Dios, “ang tuburan sang kabuhi.”​—⁠Salmo 36:⁠9.

⁷ Kaangay sang makina nga nagahinay kag nagadulog kon madiskonektar sa koryente, ang ila lawas kag hunahuna nagluya. Subong resulta, si Adan kag si Eva nagluya, nagtigulang, kag sang ulihi napatay. Ano nian ang natabo? Nagbalik sila sa ila ginhalinan: “Yab-ok ka kag sa yab-ok magabalik ka.” Ginpaandaman sila sang Dios nga kamatayon ang mangin resulta kon lapason nila ang iya kasuguan: “Mapatay gid kamo.”​—⁠Genesis 2:17; 3:⁠19.

8. Paano ang sala sang aton unang mga ginikanan nakaapektar sa pamilya sang tawo?

⁸ Wala lamang napatay ang aton unang mga ginikanan kundi pati man ang ila tanan nga kaliwatan, ang bug-os nga kaliwatan sang tawo, napaidalom sa kamatayon. Ngaa? Bangod suno sa kasuguan sang genetiko, ginapanubli sang kabataan ang mga kinaiya sang ila mga ginikanan. Kag ang napanubli sang tanan nga mga anak gikan sa aton una nga mga ginikanan amo ang pagkadihimpit kag kamatayon. Ang Roma 5:12 nagasugid sa aton: “Paagi sa isa ka tawo [si Adan, nga katigulangan sang katawhan] nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala [paagi sa pagpanubli sing pagkadihimpit, nga amo ang, makasasala nga mga huyog].” Kag sanglit ang sala, pagkadihimpit, kag kamatayon amo lamang ang nahibaluan sang mga tawo, ginatamod ini sang iban subong kinaugali kag indi malikawan. Apang, ang una nga mga tawo gintuga nga may ikasarang kag handum sa pagkabuhi sing dayon. Amo kon ngaa ang kalabanan nga katawhan wala gid nahamuot nga ang ila kabuhi utdon sang kamatayon.

Ngaa Kadugay Gid?

9. Ngaa gintugutan sang Dios ang pag-antos nga magpadayon sing tuman kadugay?

⁹ Ngaa gintugutan sang Dios ang mga tawo sa paglakat sa ila dalanon sing tuman kadugay? Ngaa gintugutan niya ang pag-antos sa sining madamo nga siglo? Ang isa ka daku nga rason amo nga ginpautwas ang isa ka importante gid nga hulusayon: Sin-o ang may kinamatarong sa paggahom? Dapat bala nga ang Dios ang mangin Manuggahom sang mga tawo, ukon mahimo bala nila gamhan ang ila kaugalingon sing madinalag-on nga wala sia?

10. Anong ikasarang ang ginhatag sa mga tawo, upod ang anong salabton?

¹⁰ Ang mga tawo gintuga nga may hilway nga kabubut-on, kon sayuron, may ikasarang sa pagpili. Wala sila ginhimo kaangay sang mga robot ukon kaangay sang mga sapat, nga ginatuytuyan lamang sang duna. Gani sarang makapili ang mga tawo kon sin-o ang ila alagdon. (Deuteronomio 30:19; 2 Corinto 3:17) Sa amo, ang Pulong sang Dios nagalaygay: “Mangin subong sang hilway nga mga tawo, apang wala nagagamit sang inyo kahilwayan, nga subong bulag sa kalautan, kundi subong mga ulipon sang Dios.” (1 Pedro 2:16) Apang, samtang ang mga tawo may makalilipay nga dulot sa pagpili sing hilway, dapat nila batunon ang mangin mga resulta sang ila ginpili nga buhat.

11. Ano lamang ang paagi agod mahibaluan kon bala ang isa ka dalanon sang tawo nga hilway sa Dios mangin madinalag-on?

¹¹ Ang aton unang mga ginikanan nagsayop sa pagpili. Ginpili nila ang dalanon nga hilway sa Dios. Matuod, mahimo nga patyon sang Dios sa gilayon ang unang rebelyuso nga mag-asawa sa tapos nila gin-abusuhan ang ila hilway nga kabubut-on. Apang wala ina kuntani makahusay sang hulusayon tuhoy sa kinamatarong sang  Dios sa paggahom sa katawhan. Sanglit ginhandum sang unang mag-asawa ang kahilwayan gikan sa Dios, dapat sabton ang pamangkot: Magaresulta ayhan ini sa isa ka malipayon, madinalag-on nga kabuhi? Ang lamang nga paagi sa paghibalo sini amo ang pagtugot sa aton unang mga ginikanan kag sa ila mga anak sa paglakat sa ila kaugalingon nga dalanon, kay amo sina ang ila ginpili. Ipakita sang tion kon bala ang mga tawo gintuga nga mangin madinalag-on sa paggahom sa ila kaugalingon nga hilway sa ila Manunuga.

12. Paano ginhukman ni Jeremias ang paggahom sang tawo, kag ngaa subong sini?

¹² Nahibaluan sang manunulat sang Biblia nga si Jeremias kon ano ang mangin resulta. Gintuytuyan sang gamhanan nga balaan nga espiritu, ukon aktibo nga puwersa sang Dios, sia maminatud-on nga nagsulat: “Nahibaluan ko gid, O Jehova, nga ang dalanon sang dutan-on nga tawo wala sa iya kaugalingon. Wala sa tawo nga nagalakat ang pagtuytoy sang iya tikang. Tadlunga ako, O Jehova.” (Jeremias 10:​23, 24) Nahibaluan niya nga ang mga tawo dapat tuytuyan sang langitnon nga kaalam sang Dios. Ngaa? Bangod sa simple nga rason nga wala gintuga sang Dios ang mga tawo nga mangin madinalag-on nga wala sang iya pagtuytoy.

13. Ano ang indi maduhaduhaan nga ginpakita sang mga resulta sang linibo ka tuig nga paggahom sang tawo?

¹³ Ang mga resulta sang linibo ka tuig nga paggahom sang tawo nagapakita sing indi maduhaduhaan nga indi matuytuyan sang mga tawo ang ila dalanon nga hilway sa ila Manunuga. Bangod gintilawan ini, wala sila sing balasulon sa malaglagon nga mga resulta kundi ang ila kaugalingon lamang. Maathag nga ginapakita ini sang Biblia: “Ang Igang [Dios], himpit ang iya binuhatan, kay ang tanan niya nga dalanon katarungan. Dios sang katutom, nga sa iya wala sing kalautan; matarong kag matadlong sia. Sila naghikot sing malaglagon sa ila kaugalingon; indi sila mga anak niya, sila ang may depekto.”​—⁠Deuteronomio 32:​4, 5.

Magapasilabot ang Dios sa Indi Madugay

14. Ngaa indi na pagpalantangon sang Dios ang iya pagpasilabot sa mga hilikuton sang tawo?

¹⁴ Sa tapos mahatagan sing bastante nga tion ang mga tawo sa pagpasundayag sang kapaslawan sang ila paggahom sa sulod sang mga siglo, mahimo na karon magpasilabot ang Dios sa mga hilikuton sang tawo kag untaton ang pag-antos, kasubo, balatian, kag kamatayon. Sa tapos matugutan ang mga tawo nga malab-ot ang  putukputukan sang ila mga katigayunan sa siensia, industriya, medisina, kag iban pa nga mga patag, indi na kinahanglan nga ang mga tawo nga hilway sa ila Manunuga hatagan pa sang Dios sing dugang nga mga siglo agod ipasundayag kon bala makapaluntad sila sing isa ka mahidaiton, tulad-paraiso nga kalibutan. Wala nila mahimo ini kag indi nila mahimo ini. Ang kahilwayan gikan sa Dios nagresulta sa isa ka tuman kalaw-ay, makangilidlis, kag makamamatay nga kalibutan.

15. Anong laygay sang Biblia ang dapat naton pamatian?

¹⁵ Bisan pa may yara sinsero nga mga manuggahom nga naghandum sa pagbulig sa katawhan, ang ila mga panikasog wala magmadinalag-on. Bisan diin karon may yara pamatuod nga ang paggahom sang tawo nalusod. Amo kon ngaa ang Biblia nagalaygay: “Dili kamo magsalig sa mga prinsipe, ukon sa anak sang dutan-on nga tawo, nga sa iya wala sing kaluwasan.”​—⁠Salmo 146:⁠3.

[Mga Pamangkot sa Pagtinuon]

[Retrato sa pahina 24, 25]

Bisan ang sinsero nga mga manuggahom sa kalibutan wala makapaluntad sing isa ka mahidaiton, tulad-paraiso nga kalibutan