Ang Kalag Suno sa Biblia

“Ang tawo nangin buhi nga kalag.”—⁠GENESIS 2:⁠7.

1. Ano ang dapat naton usisaon agod mahibaluan naton kon ano ang ginatudlo sang Biblia tuhoy sa kalag?

 NAHIBALUAN naton nga ang mga pagpati tuhoy sa kalag madamo kag nanuhaytuhay. Bisan sa tunga sang mga nagasiling nga ginapasad kuno nila ang ila mga pagpati sa Biblia, ang mga ideya tuhoy sa kon ano ang kalag kag kon ano ang nagakatabo sa sini kon mapatay kita wala nagapalareho. Apang ano gid ang ginatudlo sang Biblia tuhoy sa kalag? Agod mahibaluan ini, dapat naton usisaon ang kahulugan sang Hebreo kag Griegong mga tinaga nga ginbadbad “kalag” sa Biblia.

Ang “Kalag” Subong Isa ka Buhi nga Tinuga

2, 3. (a) Ano nga tinaga ang ginbadbad nga “kalag” sa Hebreong Kasulatan, kag ano ang sadsaran nga kahulugan sining tinaga? (b) Paano ginapamatud-an sang Genesis 2:7 nga ang tinaga nga “kalag” mahimo magpatuhoy sa bug-os nga tawo?

² Ang Hebreong tinaga nga ginbadbad “kalag” amo ang neʹphesh, kag 754 ka beses nga ginsambit ini sa Hebreong Kasulatan (kinaandan nga ginatawag ang Daan nga Testamento). Ano ang kahulugan sang neʹphesh? Suno sa The Dictionary of Bible and Religion, “masami [ini] nagapatuhoy sa bug-os nga buhi nga persona, sa bug-os nga indibiduwal.”

³ Halimbawa, ang Genesis 2:7 nagasiling: “Si Jehova nga Dios naghimo sang tawo gikan sa yab-ok kag naghuyop sa iya ilong sing ginhawa sang kabuhi, kag ang tawo nangin buhi nga kalag.” Talupangda nga si Adan wala makatigayon sing kalag; kundi sia mismo ang kalag​—⁠subong nga ang isa nga nangin doktor amo mismo ang doktor. Ang tinaga nga “kalag,” kon amo, makalaragway sa bug-os nga tawo.

4, 5. (a) Maghatag sing mga halimbawa nga nagapakita nga ang tinaga nga “kalag” nagapatuhoy sa bug-os nga tawo. (b) Paano ginasakdag sang The Dictionary of Bible and Religion ang paghangop nga ang tawo isa ka kalag?

⁴ Ining paghangop ginasakdag sa bug-os nga Hebreong Kasulatan, diin makita naton ang mga prase subong sang “kon ang isa ka kalag makasala” (Levitico 5:1), “ang bisan sin-o nga kalag nga maghimo sing bisan ano nga sahi sang hilikuton” (Levitico 23:30), “kon ang isa ka tawo madakpan nga nagkidnap sing kalag” (Deuteronomio 24:7), “ang iya kalag tinak-an” (Hukom 16:16), “tubtob san-o ang pagsakit ninyo sang akon kalag?” (Job 19:2), kag “ang akon kalag indi makatulog bangod sang pagpangalisod.”​—⁠Salmo 119:⁠28.

⁵ Wala ginapakita sa sining mga dinalan nga ang kalag isa ka sahi sang daw landong nga butang nga nagapadayon sa pagkabuhi sa tapos sang kamatayon. “Kon maghambal kita suno sa aton nahangpan nga ang ‘kalag’ sang isa ka hinigugma nagtaliwan agod makaupod sang Ginuo ukon maghambal kita tuhoy sa ‘dimamalatyon nga kalag’ indi ini mahangpan sa kultura sang DT [Daan nga Testamento],” siling sang The Dictionary of Bible and Religion.

6, 7. Anong tinaga ang ginbadbad nga “kalag” sa Cristianong Griegong Kasulatan, kag ano ang sadsaran nga kahulugan sining tinaga?

⁶ Ang tinaga nga ginbadbad “kalag” sing kapin sa isa ka gatos ka beses sa Cristianong Griegong Kasulatan (kinaandan nga ginatawag Bag-ong Testamento) amo ang psy·kheʹ. Kaangay sang neʹphesh, ining tinaga masami nga nagapatuhoy sa bug-os nga tawo. Halimbawa, binagbinaga ang masunod nga mga pinamulong: “Ang akon kalag ginatublag.” (Juan 12:27) “Gindakop sang kahadlok ang tagsa  ka kalag.” (Binuhatan 2:43) “Magpasakop ang tagsa ka kalag sa superyor nga mga awtoridad.” (Roma 13:1) “Magpamulong sing malinugpayon sa mga kalag nga nalisdan.” (1 Tesalonica 5:⁠14) “Pila lamang ka tawo, kon sayuron, walo ka kalag, ang naluwas sa tubig.”​—⁠1 Pedro 3:⁠20.

⁷ Ang psy·kheʹ, kaangay sang neʹphesh, maathag nga nagapatuhoy sa bug-os nga tawo. Suno sa iskolar nga si Nigel Turner, ining tinaga “nagapatuhoy sa tawo mismo, ang kaugalingon, ang materyal nga lawas nga ginhuypan sang Dios sang iya rûah [espiritu]. . . . Ang ginapadaku amo ang bug-os nga pagkatawo.”

8. Mga kalag bala ang mga sapat? Ipaathag.

⁸ Sa Biblia ang tinaga nga “kalag” indi lamang sa mga tawo naaplikar kundi sa mga sapat man. Halimbawa, sa paglaragway sang mga tinuga sa dagat, ang Genesis 1:​20 nagasiling nga ang Dios nagsugo: “Magpadagaya ang mga tubig sing buhi nga mga kalag.” Kag sang masunod nga adlaw sang pagpanuga, ang Dios nagsiling: “Magpatubo ang duta sing buhi nga mga kalag suno sa ila mga sari, hinuptanan nga sapat kag nagasaug nga sapat kag ilahas nga sapat sang duta suno sa ila mga sari.” (Genesis 1:​24; ipaanggid ang Numeros 31:⁠28.) Busa, ang “kalag” mahimo magpatuhoy sa buhi nga tinuga, tawo man ukon sapat.

Ang “Kalag” Subong ang Kabuhi Sang Isa ka Tinuga

9. (a) Ano ang dugang pa nga kahulugan sang tinaga nga “kalag”? (b) Nagasumpakil bala ini sa ideya nga ang kalag amo ang tawo mismo?

⁹ Kon kaisa, ang tinaga nga “kalag” nagapatuhoy sa kabuhi sang isa ka tawo ukon sapat. Wala sini ginabag-o ang kahulugan nga ginahatag sang Biblia sa kalag subong isa ka tawo ukon sapat. Sa pag-ilustrar: Nagasiling kita nga ang isa buhi, buot silingon nga sia isa ka buhi nga tawo. Masiling man naton nga sia may kabuhi. Sa amo man nga paagi, ang buhi nga tawo isa ka kalag. Apang, samtang nagakabuhi sia, ang “kalag” sarang mapatuhuyan subong isa ka butang nga yara sa iya.

10. Maghatag sing mga halimbawa nga nagapakita nga ang tinaga nga “kalag” mahimo magpatuhoy sa kabuhi sang isa ka tawo ukon sapat.

¹⁰ Halimbawa, ang Dios nagsiling kay Moises: “Patay na ang tanan nga tawo nga nagatinguha sang imo kalag.” (Exodo 4:19) Maathag nga ang mga kaaway ni Moises nagtinguha nga patyon sia. Ang kaanggid nga paggamit sa tinaga nga “kalag” makita man sa masunod nga mga pinamulong. “Nahadlok kami sing tama tungod sa amon kalag.” (Josue 9:24) “Nagpalagyo sila tungod sa ila kalag.” (2 Hari 7:7) “Ang matarong nga tawo nagapakamahal sang kalag sang iya hinuptanan nga sapat.” (Hulubaton 12:10) “Ang Anak sang tawo nagkari . . . sa paghatag sang iya kalag nga gawad sang madamo.” (Mateo 20:28) “Diutayan lang sia mapatay, nagpadayag sang iya kalag sa katalagman.” (Filipos 2:⁠30) Sa sining tagsa ka kaso, ang tinaga nga “kalag” nagakahulugan sing “kabuhi.”⁠ a

11. Ano ang masiling sa paggamit sang Biblia sa tinaga nga “kalag”?

¹¹ Gani ang tinaga nga “kalag” suno sa paggamit sang Biblia nagapatuhoy sa isa ka tawo ukon sapat ukon sa kabuhi sina nga tawo ukon sapat. Ang kahulugan nga ginahatag sang Biblia sa kalag simple, nagahisantuanay, kag wala ginapalubog sang masibod nga mga pilosopiya kag mga disparatis sang mga tawo. Apang ano ang nagakatabo sa kalag sa kamatayon? Agod masabat ina nga pamangkot, dapat naton anay mahangpan kon ngaa nagakapatay kita.

[Nota]

[Mga Pamangkot sa Pagtinuon]

[Mga retrato sa pahina 20]

Mga kalag sila tanan