Importante ang Kamatuoran Tuhoy sa Kalag
Importante ang Kamatuoran Tuhoy sa Kalag
“Mahibaluan ninyo ang kamatuoran, kag ang kamatuoran magahilway sa inyo.”—JUAN 8:32.
1. Ngaa importante nga usisaon naton ang aton pagpati tuhoy sa kalag kag kamatayon?
ANG relihion kag kultura sang isa amo sa masami ang resulta sang pagpati tuhoy sa patay kag sa Pihak nga Kinabuhi. Nahibaluan na naton nga nagalakip ini sing ideya halin sa pagtuo nga matigayon lamang sang kalag ang iya katapusan nga tulumuron sa tapos sang liwatliwat nga mga pagkabun-ag tubtob sa ideya nga ang pagkabuhi sing makaisa lamang amo ang ginabasihan sang imo hingapusan nga destinasyon. Busa, ang isa ka tawo mahimo magsalig nga sa ulihi mahiusa sia sa ultimo nga realidad kon mapatay sia, ang isa naman ka tawo nga malab-ot niya ang Nirvana, kag ang isa pa gid nga mabaton niya ang padya sa langit. Ano, nian, ang kamatuoran? Sanglit ang aton mga ginatuuhan may impluwensia sa aton mga panimuot, mga aksion, kag mga desisyon, indi bala kita dapat magtinguha nga hibaluon ang sabat sa sina nga pamangkot?
2, 3. (a) Ngaa masaligan naton ang ginasiling sang Biblia tuhoy sa kalag? (b) Suno sa nasambit sa Biblia, ano ang kamatuoran tuhoy sa kalag?
2 Ginaasoy sang pinakadaan nga libro sa kalibutan, ang Biblia, ang maragtas sang tawo halin gid sang gintuga ang unang tawhanon nga kalag. Ang mga panudlo sini wala sing lakot nga mga pilosopiya kag mga tradisyon sang mga tawo. Maathag nga ginasugid sang Biblia ang kamatuoran tuhoy sa kalag: Ang imo kalag amo ikaw, ang patay bug-os nga wala nagaluntad, kag ang mga patay nga yara sa memorya sang Dios pagabanhawon sa iya sibu nga tion. Ano ang kahulugan sa imo sang paghibalo sini?
3 “Mahibaluan ninyo ang kamatuoran, kag ang kamatuoran magahilway sa inyo,” siling ni Jesucristo sa iya mga sumulunod. (Juan 8:32) Huo, ang kamatuoran nagahilway. Apang gikan sa ano ginahilway kita sang kamatuoran tuhoy sa kalag?
Kahilwayan Gikan sa Kahadlok kag Pagkawalay Paglaum
4, 5. (a) Ano nga kahadlok ang ginadula sang kamatuoran tuhoy sa kalag? (b) Paano ang paglaum sa pagkabanhaw naghatag sing kaisog sa malapit na mapatay nga tin-edyer?
4 “Ang kalabanan nga tawo nahadlok sa kamatayon kag nagalikaw sila nga hunahunaon ini,” siling sang The World Book Encyclopedia. “Ang tinaga mismo nga ‘kamatayon’ halos daw wala na ginasambit sa Katundan,” siling sang isa ka istoryador. Kag sa iban nga mga kultura ang tal-us nga mga tinaga subong sang “nagtaliwan” kag “wala na” amo ang kinaandan nga ginagamit agod ilaragway ang pagkapatay sang isa ka tawo. Ang matuod, ining kahadlok sa kamatayon isa ka kahadlok sa butang nga wala mahibaluan, kay para sa kalabanan nga tawo ang kamatayon isa ka misteryo. Ang sibu nga ihibalo tuhoy sa kon ano ang nagakatabo kon mapatay kita nagapakanay sining kahadlok.
5 Binagbinaga, halimbawa, ang panghunahuna sang 15-anyos nga si Michaelyn. May leukemia sia kag makaluluoy nga napatay. Ang iya iloy nga si Paula naghinumdom: “Nagsiling si Michaelyn nga wala lang sa iya kon mapatay sia bangod nahibaluan niya nga ang kamatayon temporaryo lamang. Pirme namon anay ginhambalan ang tuhoy sa bag-ong kalibutan sang Dios kag ang tanan nga pagabanhawon sa sini. Daku gid ang pagtuo ni Michaelyn kay Jehova nga Dios kag sa pagkabanhaw—wala gid nagaduhaduha.” Ang paglaum sa pagkabanhaw naghilway sa sining maisog nga bata nga babayi gikan sa makapulunaw nga kahadlok sa kamatayon.
6, 7. Gikan sa anong pagkawalay paglaum ginahilway kita sang kamatuoran tuhoy sa kalag? Iilustrar.
6 Paano naapektuhan sang kamatuoran ang mga ginikanan ni Michaelyn? “Ang pagkapatay sang amon gamay nga bata nga babayi amo ang pinakamasakit nga butang nga natabo sa amon,” siling ni Jeff nga amay niya. “Apang nagasalig kami sing bug-os sa pagkabanhaw nga ginsaad ni Jehova, kag ginapaabot namon ang adlaw nga mahakos namon liwat ang amon palangga nga si Michaelyn. Mangin isa gid ina ka makalilipay nga pagkitaay liwat!”
7 Huo, ang kamatuoran tuhoy sa kalag nagahilway sa isa ka tawo gikan pagkawalay paglaum nga ginabatyag sang isa bangod sang pagkapatay sang isa ka hinigugma. Sa pagkamatuod, wala sing butang nga makadula sing bug-os sang kasakit kag kasubo nga mabatyagan kon mapatay ang isa nga hinigugma. Apang, ang paglaum sa pagkabanhaw, nagapakanay sang paglalaw kag sa amo mas mahapos antuson ang kasakit.
8, 9. Gikan sa anong kahadlok ginahilway kita sang kamatuoran tuhoy sa kahimtangan sang mga patay?
8 Ang Makasulatanhon nga kamatuoran tuhoy sa kahimtangan sang mga patay nagahilway man sa aton gikan sa kahadlok sa patay. Sugod sang matun-an ining kamatuoran, madamo sang nahigot anay sa disparatis nga mga rito tuhoy sa mga patay ang wala na karon nagakabalaka tuhoy sa mga sumpa, mga patimaan, mga anting-anting, kag mga pangalap, ukon nagadulot sila sing malahalon nga mga halad agod mapalinong ang ila mga katigulangan kag punggan sila sa pagbalik agod murtuhon ang mga buhi. Sa pagkamatuod, sanglit ang mga patay “wala makahibalo sing bisan ano,” ini nga mga buhat wala sing pulos.—Manugwali 9:5.
9 Ang kamatuoran tuhoy sa kalag, nga masapwan sa Biblia, matuod gid nga nagahilway kag masaligan. Apang binagbinaga man ang tumalagsahon nga paglaum nga ginatanyag sa imo sang Biblia.
[Mga Pamangkot sa Pagtinuon]
[Blurb sa pahina 29]
Ang kamatuoran tuhoy sa kalag nagahilway sa imo gikan sa kahadlok sa kamatayon, kahadlok sa patay, pagkawalay paglaum tuhoy sa pagkapatay sang isa nga hinigugma
