Isa ka Tumalagsahon nga Palaabuton!

“Ang bisan sin-o nga nagakabuhi kag nagapakita sing pagtuo sa akon indi na gid mapatay.”—⁠JUAN 11:⁠26.

1. Minilyon sang mga patay karon ang pagabanhawon sa ano nga sahi sang palibot?

 SA PAGKABANHAW sang minilyon, indi sila pagbanhawon sa walay pumuluyo nga duta. (Binuhatan 24:15) Magabugtaw sila sa napatahom nga mga palibot kag may nahanda para sa ila nga mga puluy-an, mga panapton, kag bugana nga pagkaon. Sin-o ang magahanda sining tanan? Maathag nga dapat may mga tawo nga nagapuyo sa bag-ong kalibutan antes magsugod ang pagkabanhaw sa duta. Apang sin-o?

2-4. Anong tumalagsahon nga palaabuton ang nagahulat sa mga nagakabuhi sa “katapusan nga mga adlaw”?

² Ginapakita sang natuman nga tagna sa Biblia nga nagakabuhi kita sa “katapusan nga mga adlaw” sining sistema sang mga butang.⁠ a (2 Timoteo 3:1) Sa indi madugay karon, magapatunga si Jehova nga Dios sa hilikuton sang tawo kag dulaon niya ang kalautan sa duta. (Salmo 37:​10, 11; Hulubaton 2:​21, 22) Sa amo nga tion, ano ang matabo sa mga tawo nga nagaalagad sing matutom sa Dios?

³ Indi paglaglagon ni Jehova ang mga matarong upod sa mga malauton. (Salmo 145:20) Wala pa gid niya mahimo ini, kag indi niya paghimuon ini kon tinluan niya ang duta gikan sa tanan nga kalautan. (Ipaanggid ang Genesis 18:​22, 23, 26.) Sa kamatuoran, ang katapusan nga tulun-an sang Biblia nagahambal tuhoy sa “isa ka dakung kadam-an nga wala sing tawo nga makaisip, gikan sa tanan nga pungsod kag tribo kag katawhan kag hambal,” nga nagguwa gikan sa “dakung kapipit-an.” (Bugna 7:⁠9-14) Huo, isa ka dakung kadam-an ang maluwas sa dakung kapipit-an nga magatapos sang malaut nga kalibutan karon, kag magasulod sila sa bag-ong kalibutan sang Dios. Didto, ang matinumanon nga katawhan makabenepisyo sing bug-os gikan sa makadalayaw nga aman sang Dios sa paghilway sa katawhan gikan sa sala kag kamatayon. (Bugna 22:​1, 2) Sa amo, ang “dakung kadam-an” indi na makaeksperiensia sing kamatayon. Daw ano ka tumalagsahon nga paglaum!

⁴ Masaligan bala naton ining makatilingala nga paglaum? Sa pagkamatuod! Si Jesucristo mismo nagsiling nga maabot ang tion nga ang mga tawo magakabuhi nga indi na mapatay. Antes ginbanhaw ang iya abyan nga si Lazaro, si Jesus nagsiling kay Marta: “Ang bisan sin-o nga nagakabuhi kag nagapakita sing pagtuo sa akon indi na gid mapatay.”​—⁠Juan 11:⁠26.

Ikaw Man Mahimo Mabuhi Sing Dayon

5, 6. Kon luyag mo mabuhi sing dayon sa Paraiso sa duta, ano ang dapat mo himuon?

⁵ Luyag mo bala mabuhi sing dayon sa Paraiso sa duta? Nalangkag ka bala nga makita liwat ang imo mga hinigugma? Nian dapat ka magkuha sing sibu nga ihibalo tuhoy sa kabubut-on kag mga katuyuan sang Dios. Sa isa ka pangamuyo sa Dios, si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—⁠Juan 17:⁠3.

⁶ Kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo  sang kamatuoran.” (1 Timoteo 2:​3, 4) Karon na ang tion nga tun-an mo kon paano ikaw, upod sa minilyon pa nga nagahimo sang kabubut-on sang Dios, mahimo magkabuhi sing dayon sa Paraiso sa duta. Malipay ang mga Saksi ni Jehova sa pagbulig sa imo nga magtuon sing dugang pa tuhoy sa Dios kag sa iya mga ginapatuman. Ngaa indi sila pakig-angutan sa Kingdom Hall nga malapit sa inyo ukon magsulat sa pinakamalapit nga direksion nga nalista sa masunod nga pahina?

[Nota]

[Mga Pamangkot sa Pagtinuon]

[Retrato sa pahina 31]

Ang “dakung kadam-an” indi na makaeksperiensia sing kamatayon