Kon Diin Pangitaon ang mga Sabat

“Ang teoriya tuhoy sa walay katapusan nga pag-antos wala nagahisanto sa pagtuo sa gugma sang Dios para sa gintuga nga mga butang. . . . Ang pagpati sa dayon nga pagsilot sa kalag bangod sa mga sayop nga nahimo sa sulod sang pila ka tuig, nga wala ini ginahatagan sing kahigayunan nga tadlungon ini, wala nagahisanto sa rason.”—⁠NIKHILANANDA, HINDU NGA PILOSOPO.

1, 2. Bangod sang nanuhaytuhay nga mga pagpati tuhoy sa Pihak nga Kinabuhi, anong mga pamangkot ang nagautwas?

 KAANGAY sang Hindu nga pilosopo nga si Nikhilananda, madamo karon ang ginatublag sang panudlo tuhoy sa dayon nga pagpaantos. Sa sini man nga rason, indi mahangpan sang iban ang mga pagpati subong sang paglab-ot sa Nirvana kag paghiusa sa Tao.

² Apang, bangod sang ideya nga ang kalag dimamalatyon, ang mga relihion sa Sidlangan kag Katundan naghimo sing makalilibog nga mga pagpati tuhoy sa Pihak nga Kinabuhi. Posible bala nga mahibaluan ang kamatuoran tuhoy sa kon ano ang nagakatabo sa aton kon mapatay kita? Indi gid bala mapatay ang kalag? Sa diin naton pangitaon ang mga sabat?

Siensia kag Pilosopiya

3. Ang siensia bala ukon ang sientipiko nga metodo sang pagpangusisa ang may mga sabat sa mga pamangkot tuhoy sa kabuhi sa tapos sang kamatayon?

³ Yara bala sa siensia ukon sa sientipiko nga metodo sang pagpangusisa ang mga sabat sa mga pamangkot tuhoy sa Pihak nga Kinabuhi? Pasad sa ginaasoy nga mga eksperiensia sining karon lang tuhoy sa diutayan lang nga pagkapatay ukon ‘panganinaw sa kaugalingon nga nagaguwa sa lawas,’ ang iban nga mga mananalawsaw nagkomento tuhoy sa kabuhi sa tapos sang kamatayon. Sa tapos marepaso ang pila sang ila mga ginasiling sa iya lektura nga “Ang Kamatayon Bala Alagyan Padulong sa Kapawa?,” ang Katoliko nga teologo nga si Hans Küng naghinakop: “Ini nga sahi sang mga eksperiensia wala nagapamatuod nga posible ang kabuhi sa tapos sang kamatayon: ang katapusan nga lima ka minuto sa kabuhi sang nagahimumugto nga tawo nagapatuhoy lamang sa nagakatabo sa kaugalingon antes sang kamatayon kag indi sa dayon nga kabuhi sa tapos sang kamatayon.” Nagdugang pa sia: “Ang isyu tuhoy sa posible nga kabuhi sa tapos sang kamatayon may daku nga importansia sa kabuhi antes sang kamatayon. Nagakinahanglan ini sing sabat nga dapat pangitaon sa iban nga bahin kon indi ini mahatag sang medikal nga mga eksperto.”

4. Makabulig bala sa aton ang pilosopiya agod makita ang mga sabat sa tunga sang madamo nga posibilidad sang kabuhi sa tapos sang kamatayon nga ginatanyag sang nanuhaytuhay nga mga relihion?

⁴ Kamusta naman ang pilosopiya? Makabulig bala ini sa aton agod makita ang mga sabat sa tunga sang madamo nga posibilidad sang kabuhi sa tapos sang kamatayon nga ginatanyag sang nanuhaytuhay nga mga relihion? Ang pilosopiko nga pagpanalawsaw nagalakip sang “paghaumhaum,” siling sang ika-20 nga siglo nga Britanikong pilosopo nga si Bertrand Russell. Ang pilosopiya, suno sa The World Book Encyclopedia, isa ka “porma sang pagpamangkot​—⁠isa ka proseso sang pag-usisa, pagmulay, pagpatpat, kag paghaumhaum.” Tuhoy sa topiko nga Pihak nga Kinabuhi, ang pilosopiko nga mga paghaumhaum wala nagapalareho halin sa pagtawag sa pagkadimamalatyon subong isa ka handum lamang tubtob sa pagsiling nga isa ini ka natawhan nga kinamatarong sang tagsa ka tawo.

Isa ka Tumalagsahon nga Kuluhaan Sing mga Sabat

5. Ano ang pinakadaan nga libro nga nasulat?

⁵ Apang, may isa ka libro nga nagaunod sing matuod nga mga sabat sa importante nga mga pamangkot tuhoy sa kabuhi kag kamatayon. Amo ini ang pinakadaan nga libro nga nasulat, ang mga bahin sini ginsulat sang nagligad nga mga 3,500 ka tuig. Ang una nga  lima ka bahin sini nga libro ginsulat mga pila ka siglo sa wala pa masulat ang pinakauna nga mga ambahanon sang Hindu nga kasulatan, ang mga Veda, kag mga isa ka libo ka tuig sa wala pa magkabuhi sa duta sanday Buddha, Mahāvīra, kag Confucius. Ini nga libro natapos sang 98 C.⁠E., kapin sa 500 ka tuig antes ginpatok ni Muḥammad ang Islam. Ining tumalagsahon nga kuluhaan sing superyor nga kaalam amo ang Biblia.⁠ a

6. Ngaa mapaabot naton ang Biblia nga makasugid sa aton kon ano ang kalag?

⁶ Ang Biblia amo ang may pinakasibu nga dumaan nga maragtas sangsa bisan ano nga libro. Ang maragtas nga narekord sa Biblia nagsugod sa ginsuguran sang tawhanon nga pamilya kag nagapaathag kon paano kita nagluntad sa duta. Ginarekord pa gani sini ang tion antes gintuga ang mga tawo. Ini nga libro makahatag gid sa aton sing paghantop kon paano gintuga ang tawo kag kon ano ang kalag.

7, 8. Ngaa masinaligon nga makaliso kita sa Biblia para sa matuod kag makaalayaw nga mga sabat tuhoy sa kon ano ang nagakatabo sa aton kon mapatay kita?

⁷ Dugang pa, ang Biblia isa ka libro sang mga tagna nga natuman sing sibu. Halimbawa, detalyado nga gintagna sini ang pagbangon kag pagkapukan sang emperyo sang Medo-Persia kag sang Gresya. Sibu gid ining mga tagna amo kon ngaa ang pila ka kritiko nagtinguha, apang wala sila magmadinalag-on sa pagpamatuod nga ining mga hitabo ginsulat sa tapos matabo. (Daniel 8:​1-7, 20-22) Ang pila ka tagna nga narekord sa Biblia detalyado nga nagakatuman sa aton mismo tion.⁠ b​—⁠Mateo, kapitulo 24; Marcos, kapitulo 13; Lucas, kapitulo 21; 2 Timoteo 3:​1-5, 13.

⁸ Wala sing tawo, bisan daw ano pa kaalam, ang sibu nga makatagna sang palaabuton nga mga hitabo. Ang labing gamhanan kag labing maalam nga Manunuga sang uniberso ang lamang nga makahimo sini. (2 Timoteo 3:​16, 17; 2 Pedro 1:​20, 21) Ang Biblia isa gid ka libro gikan sa Dios. Sa pagkamatuod, ini nga libro makahatag sa aton sing matuod kag makaalayaw nga mga sabat tuhoy sa kon ano ang nagakatabo sa aton kon mapatay kita. Usisaon anay naton kon ano ang ginasiling sini tuhoy sa kalag.

[Mga nota]

[Mga Pamangkot sa Pagtinuon]

[Retrato sa pahina 18]

Ang pinakadaan nga libro nga nasulat

[Retrato sa pahina 18]

Ang libro nga nagahatag sing masaligan kag makaalayaw nga mga sabat