Ngaa Nagakapatay Kita?
Ngaa Nagakapatay Kita?
“Kalinong naghari sa mga pukatod, kagulangan walay tinimuktimok; kapispisan sa mga kahoy nagatulog: hulaton mo; ikaw sa dimadugay kaangay nila magadulog.”—JOHANN WOLFGANG VON GOETHE, ALEMAN NGA MAMALAYBAY.
1, 2. (a) Gintuga ang mga tawo nga may ano nga handum? (b) Ano nga sahi sang kabuhi ang naagom sang unang mag-asawa?
GINTUGA sang Dios ang mga tawo nga may handum sa pagkabuhi sing dayon. Sa pagkamatuod, ang Biblia nagasiling nga nagbutang sia sing “walay katubtuban nga balatyagon sa ila tagipusuon.” (Manugwali 3:11, Beck) Apang indi lamang ang handum sa pagkabuhi sing dayon ang ginhatag sang Dios sa mga tawo. Ginhatagan man niya sila sing kahigayunan agod matigayon ini.
2 Ang aton unang mga ginikanan, sanday Adan kag Eva, gintuga nga himpit, nga wala sing depekto sa hunahuna ukon sa lawas. (Deuteronomio 32:4) Hunahunaa lamang—wala sing nagalukmatlukmat nga palanakit, wala sing makahalalit nga kahadlok ukon kabalaka! Dugang pa, ginbutang sila sang Dios sa isa ka matahom nga paraiso nga puluy-an. Gintuyo sang Dios nga ang tawo magkabuhi sing dayon kag nga sa ulihi ang duta matugob sang iya himpit nga mga anak. (Genesis 1:31; 2:15) Ngaa, nian, nagakapatay kita?
Kamatayon ang Nangin Resulta Sang Paglalis
3. Ang dayon nga kabuhi para kanday Adan kag Eva nasandig sa ano?
3 Ginsugo sang Dios si Adan: “Gikan sa tagsa ka kahoy sa katamnan mahimo ka makakaon nga may kaayawan. Apang tuhoy sa kahoy sang ihibalo sang maayo kag malaut indi ka magkaon gikan sini, kay sa adlaw nga magkaon ka gikan sini mapatay ka nga totoo.” (Genesis 2:16, 17) Gani may kondisyon ang dayon nga kabuhi para kanday Adan kag Eva; nasandig ini sa ila pagtuman sa Dios.
4. Sang makasala sanday Adan kag Eva, ngaa nadula nila ang paglaum nga mabuhi sing dayon sa Paraiso?
4 Apang, makapasubo nga ginlalis nanday Adan kag Eva ang kasuguan sang Dios. (Genesis 3:1-6) Bangod sang ila ginhimo, nangin mga makasasala sila, kay “ang sala pagkamalinapason.” (1 Juan 3:4) Subong resulta, nadula nanday Adan kag Eva ang ila paglaum sa dayon nga kabuhi. Ngaa? Bangod “ang bayad sang sala amo ang kamatayon.” (Roma 6:23) Gani, subong pamatbat kanday Adan kag Eva, ang Dios nagsiling: “Yab-ok ka kag sa yab-ok magabalik ka.” Pagkatapos sadto, ginpaguwa ang aton unang mga ginikanan sa ila Paraiso nga puluy-an. Sang adlaw nga nagpakasala sila, nabatyagan nanday Adan kag Eva ang mahinay apang dalayon nga proseso sang kamatayon.—Genesis 3:19, 23, 24.
“Ang Kamatayon Naglapnag sa Tanan nga Tawo”
5. Paano ang kamatayon naglaton sa bug-os nga kaliwatan sang tawo?
5 Ang sala nangin bahin karon sang lawas nanday Adan kag Eva. Gani, indi sila makaanak sing himpit nga anak, subong nga ang dihimpit nga dihunan indi makadihon sing himpit nga butang. (Job 14:4) Sa pagkamatuod, ang tagsa ka tawo nga mabun-ag nagapamatuod nga nadula sang aton unang mga ginikanan ang himpit nga panglawas kag ang dayon nga kabuhi para sa ila kaugalingon kag para sa ila kaliwat. Ang Cristianong apostol nga si Pablo nagsulat: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag busa ang kamatayon naglaton sa tanan nga tawo bangod sila tanan nakasala.”—Roma 5:12; ipaanggid ang Salmo 51:5.
6. Ngaa nagakapatay kita?
6 Ang mga sientipiko karon wala makahibalo kon ngaa ang mga tawo nagatigulang kag nagakapatay. Apang, ginapaathag sang Biblia nga nagakapatay kita bangod natawo kita nga makasasala, kag napanubli naton ining kahimtangan gikan sa aton unang tawhanon nga mga ginikanan. Apang ano ang nagakatabo sa aton kon mapatay kita?
[Mga Pamangkot sa Pagtinuon]
