Ang Ila Pagtuo Nakalampuwas sa Mabudlay nga Pagtilaw
Kapitulo Singko
Ang Ila Pagtuo Nakalampuwas sa Mabudlay nga Pagtilaw
1. Ano ang ginabatyag sang madamo tuhoy sa debosyon sa Dios kag sa ila dutang natawhan?
DAPAT bala ipatuhoy ang imo debosyon sa Dios ukon sa pungsod nga imo ginapuy-an? Madamo ang magasabat sing, ‘Pareho ko sila nga ginapadunggan. Ginasimba ko ang Dios suno sa dikta sang akon relihion; sa amo man nga tion, nagapanaad ako nga mag-unong sa akon dutang natawhan.’
2. Paano ang hari sang Babilonia relihioso kag politiko?
2 Ang kinatuhayan sang relihioso nga debosyon kag sang patriotismo mahimo nga daw indi maathag karon, apang indi subong sini sa dumaan nga Babilonia. Sa pagkamatuod, ang sibil kag ang sagrado daw isa lamang amo kon ngaa kon kaisa indi ini mapatuhay. “Sa dumaan nga Babilonia,” sulat ni Propesor Charles F. Pfeiffer, “ang hari amo ang Mataas nga Saserdote kag ang sibil nga manuggahom. Sia ang nagahimo sing mga paghalad kag nagapat-od sang relihioso nga kabuhi sang iya mga sakop.”
3. Ano ang nagapakita nga si Nabocodonosor relihioso gid?
3 Binagbinaga si Hari Nabocodonosor. Ang iya mismo ngalan nagakahulugan sing “O Nebo, Amligi ang Manunubli!” Si Nebo amo ang dios sang kaalam kag agrikultura sa Babilonia. Si Nabocodonosor isa gid ka relihioso nga tawo. Subong nasambit na, gintukod niya kag ginpatahom ang mga templo sang madamo nga dios sa Babilonia kag labi na nga debotado sia kay Marduk, nga iya ginpadunggan sang iya mga kadalag-an sa pagpakig-away. * Mahimo man nga antes planuhon ang iya pagpakig-away, pirme sia nagapamangkot anay sa manugbabaylan.—Ezequiel 21:18-23.
4. Ilaragway ang relihioso nga espiritu sang Babilonia.
4 Sa pagkamatuod, nahil-ob sang relihioso nga espiritu ang bug-os nga Babilonia. Ginpabugal sang siudad ang kapin sa 50 ka templo, sa diin ginasimba ang nanuhaytuhay nga dios kag diosa, lakip ang tatlo ka dios nga si Anu (dios sang langit), si Enlil (dios sang duta, hangin, kag bagyo), kag si Ea (dios sang tubig). Ang isa pa ka trinidad amo si Sin (ang bulan nga dios), si Siamas (ang adlaw nga dios), kag si Istar (ang dios sang pertilidad). Ang madyik, pagkababaylan, kag astrolohiya may daku nga bahin sa pagsimba sang mga Babilonianhon.
5. Paano ang relihioso nga palibot sang Babilonia nangin isa ka hangkat para sa Judiyo nga mga bihag?
5 Ang pagkabuhi sa tunga sang katawhan nga nagasimba sa madamo nga dios isa ka daku nga hangkat para sa Judiyo nga mga bihag. Mga siglo antes sini, nagpaandam si Moises sa mga Israelinhon nga malain ang mangin resulta kon pilion nila ang pagrebelde batok sa Supremo nga Manughatag sing Kasuguan. Si Moises nagsiling sa ila: “Dalhon ka ni Jehova kag ang imo hari nga pagahumon mo sa imo pakadto sa pungsod nga wala mo makilal-i, ikaw ukon ang imo mga katigulangan; kag didto magaalagad ka sa iban nga mga dios, nga kahoy kag bato.”—Deuteronomio 28:15, 36.
6. Ngaa labi na nga mabudlay nga hangkat para kay Daniel, kay Hananias, kay Misael, kag kay Azarias ang pagkabuhi sa Babilonia?
6 Nasapwan karon sang mga Judiyo ang ila kaugalingon sa sina gid nga kahimtangan. Ang paghupot sing integridad kay Jehova labi na nga mabudlay para kay Daniel, kay Hananias, kay Misael, kag kay Azarias. Ining apat ka lamharon nga Hebreo pinasahi nga ginpili agod hanason para sa pag-alagad sa panguluhan. (Daniel 1:3-5) Dumduma nga ginpanghatagan pa sila sing Babilonianhon nga mga ngalan—Beltesasar, Sadrac, Mesac, kag Abednego—mahimo gid agod hayluhon sila nga magpasibu sa ila bag-o nga palibot. * Ang prominente nga mga posisyon sini nga mga tawo magahimo sang ila pagdumili sa pagsimba sa mga dios sang pungsod nga hilmunon gid—kag isa ka pagluib.
ISA KA PELIGRO ANG LARAWAN NGA BULAWAN
7. (a) Ilaragway ang larawan nga ginpatindog ni Nabocodonosor. (b) Ano ang katuyuan sang larawan?
7 Mahimo gid nga agod pabakuron ang paghiusa sang iya emperyo, nagpatindog si Nabocodonosor sing isa ka larawan nga bulawan sa kapatagan sang Dura. May kataason ini nga 60 ka maniko (27 metros) kag may kasangkaron nga 6 ka maniko (2.7 metros). * Nagapati ang iban nga ang larawan isa lamang ka haligi, ukon isa ka obelisk. Mahimo nga isa ini ka mataas kaayo nga tulungtungan nga ginatindugan sang isa ka daku nga estatwa kaangay sang tawo, ayhan nagalaragway kay Nabocodonosor mismo ukon sa dios nga si Nebo. Kon ano man, ining mataas nga monumento isa ka simbulo sang Emperyo sang Babilonia. Subong amo sini, gintuyo ini nga makita kag simbahon.—Daniel 3:1.
8. (a) Sin-o ang ginpatawag sa inagurasyon sang larawan, kag ano ang ginpatuman sa tanan nga nagtambong? (b) Ano ang mangin silot sa pagdumili sa pagyaub sa atubangan sang larawan?
8 Gani, naghanda si Nabocodonosor sing seremonya para sa inagurasyon. Gintipon niya ang iya mga satrapa, mga tulugyanan, mga gobernador, mga manuglaygay, mga tesorero, mga hukom, mga manugpatuman sang kasuguan, kag ang tanan nga administrador sa sakop nga mga distrito. Ang isa ka manugbalita nagsinggit: “Ginasugo sa inyo, O mga katawhan, mga pungsod kag mga hambal, nga sa tion nga mabatian ninyo ang tunog sang budyong, sang lantoy, sang sitara, sang trayanggulo nga arpa, sang de-kuwerdas nga lanton, sang gayta kag sang tanan nga sari sang lanton, maghapa kamo kag magsimba sa larawan nga bulawan nga ginpatindog ni Nabocodonosor nga hari. Kag ang bisan sin-o nga indi maghapa kag magsimba idap-ong sa amo nga tion sa nagadabdab nga kalayuhon nga hurno.”—Daniel 3:2-6.
9. Ano ang maathag nga kahulugan sang pagyaub sa atubangan sang larawan nga ginpatindog ni Nabocodonosor?
9 Ang iban nagapati nga ginhanda ni Nabocodonosor ini nga seremonya agod piliton ang mga Judiyo nga talikdan ang ila pagsimba kay Jehova. Mahimo nga indi subong sini, kay pasad sa ebidensia mga opisyales lamang sang panguluhan ang ginpatawag sa sini nga okasyon. Sa amo, ang mga Judiyo nga makatambong amo lamang sila nga may pila ka katungdanan sa panguluhan. Gani, mahimo gid nga ang pagyaub sa atubangan sang larawan isa ka seremonya nga gintuyo agod pabakuron ang paghiusa sang mga nagadumala. Ang iskolar nga si John F. Walvoord nagsiling: “Sa isa ka bahin yadto nga pagtipon sang mga opisyales isa ka makapahamuot nga pagpasundayag sang gahom sang emperyo ni Nabocodonosor kag sa pihak nga bahin importante gid subong pagkilala sa mga dios nga sa ila pagpati amo ang nagpadaug sa ila.”
NAGDUMILI ANG MGA ALAGAD NI JEHOVA SA PAGKOMPROMISO
10. Ngaa indi problema para sa mga di-Judiyo ang pagsunod sa sugo ni Nabocodonosor?
10 Walay sapayan sang ila debosyon sa nanuhaytuhay nga patron nga dios, ang kalabanan sadtong nagtipon sa atubangan sang larawan ni Nabocodonosor wala magduhaduha sa pagsimba sa sini. “Naanad na sila tanan sa pagsimba sa mga idolo, kag ang pagsimba sa isa ka dios wala magpugong sa ila sa pagpadungog sa iban naman,” paathag sang isa ka iskolar sa Biblia. Nagpadayon sia: “Nahisanto ini sa daan na nga pagtamod sang mga nagasimba sa idolo nga may yara madamo nga dios . . . kag nga indi malain nga magpadungog sa dios sang iban nga katawhan ukon pungsod.”
11. Ngaa nagdumili sanday Sadrac, Mesac, kag Abednego sa pagyaub sa atubangan sang larawan?
11 Apang, para sa mga Judiyo, isa ini ka tuhay nga butang. Ginsugo sila sang ila Dios, nga si Jehova: “Dili ka maghimo para sa imo kaugalingon sing larawan nga tinigban ukon bisan ano nga kaangay sang bisan anong butang nga yara sa langit sa ibabaw ukon yara sa duta sa idalom ukon yara sa tubig sa idalom sang duta. Dili ka magyaub sa ila ukon masulay sa pag-alagad sa ila, kay ako si Jehova nga imo Dios isa ka Dios nga nagapatuman sing bug-os nga debosyon.” (Exodo 20:4, 5) Busa, sang magsugod ang musika kag ang mga nagtipon didto naghapa sa atubangan sang larawan, ang tatlo ka lamharon nga Hebreo—sanday Sadrac, Mesac, kag Abednego—nagpabilin nga nagatindog.—Daniel 3:7.
12. Ano ang ginsumbong sang pila ka Caldeanhon batok sa tatlo ka Hebreo, kag ngaa subong sina?
12 Ang pagdumili sang tatlo ka Hebreo nga opisyales sa pagsimba sa larawan nagpaakig sa pila ka Caldeanhon. Sa gilayon gid, nagkadto sila sa hari kag “ginsumbong ang mga Judiyo.” * Indi sila interesado nga paathagan. Sa handum nga silutan ang mga Hebreo bangod sang pagluib kag pagtraidor, ang mga manugsumbong nagsiling: “May pila ka Judiyo nga gintangdo mo sa pagdumala sa sakop nga distrito sang Babilonia, si Sadrac, si Mesac kag si Abednego; ining mabukod nga mga lalaki wala magsapak sa imo, O hari, wala sila nagaalagad sa imo mga dios, kag wala sila nagasimba sa larawan nga bulawan nga imo ginpatindog.”—Daniel 3:8-12.
13, 14. Ano ang nangin reaksion ni Nabocodonosor sa ginhimo nanday Sadrac, Mesac, kag Abednego?
13 Naalipungot gid si Nabocodonosor nga ginlalis sang tatlo ka Hebreo ang iya mando! Maathag nga napaslawan sia sa pagkumbertir kay Sadrac, kay Mesac, kag kay Abednego nga mangin matutom nga mga sumalakdag sang Emperyo sang Babilonia. Indi bala nga ginpatuon niya sila sa kaalam sang mga Caldeanhon? Ti, ginpang-islan pa gani niya ang ila mga ngalan! Apang kon naghunahuna si Nabocodonosor nga ang isa ka pinasahi nga edukasyon magatudlo sa ila sing bag-o nga paagi sang pagsimba ukon nga ang pag-ilis sa ila mga ngalan magabag-o sang ila identidad, nagsayop gid sia. Sanday Sadrac, Mesac, kag Abednego nagpabilin nga matutom nga mga alagad ni Jehova.
14 Nagsingkal si Hari Nabocodonosor. Sa gilayon gid, ginpatawag niya sanday Sadrac, Mesac, kag Abednego. Namangkot sia: “Matuod gid bala, O Sadrac, Mesac kag Abednego, nga wala kamo nagaalagad sa akon mga dios, kag wala kamo nagasimba sa larawan nga bulawan nga akon ginpatindog?” Walay duhaduha nga ginhambal ni Nabocodonosor ining mga pulong bangod indi sia makapati. Mahimo gid nga nangatarungan sia, ‘Paano malalis sang tatlo ka lalaki nga may maligdong nga panghunahuna ang tuman kaathag nga sugo—kag isa nga may mabug-at nga silot kon lalison?’—Daniel 3:13, 14.
15, 16. Ano pa nga kahigayunan ang ginhatag ni Nabocodonosor sa tatlo ka Hebreo?
15 Luyag hatagan ni Nabocodonosor ang tatlo ka Hebreo sing isa pa ka kahigayunan. “Karon kon handa na kamo,” siling niya, “nga kon mabatian ninyo ang tunog sang budyong, sang lantoy, sang sitara, sang trayanggulo nga arpa, sang de-kuwerdas nga lanton, kag sang gayta kag sang tanan nga sari sang lanton, maghapa kamo kag magsimba sa larawan nga ginhimo ko, maayo. Apang kon indi kamo magsimba, sa amo nga tion idap-ong kamo sa nagadabdab nga kalayuhon nga hurno. Kag sin-o bala ina nga dios nga makaluwas sa inyo gikan sa akon mga kamot?”—Daniel 3:15.
16 Maathag nga wala gid magdulot sa hunahuna kag tagipusuon ni Nabocodonosor ang leksion gikan sa gindamgo nga larawan (nga narekord sa Daniel kapitulo 2). Ayhan nalipatan na niya ang iya mismo ginsiling kay Daniel: “Ang inyo Dios amo ang Dios sang mga dios kag Ginuo sang mga hari.” (Daniel 2:47) Daw ginahangkat karon ni Nabocodonosor si Jehova, sa pagsiling nga bisan gani Sia indi makaluwas sa mga Hebreo gikan sa silot nga nagahulat sa ila.
17. Ano ang nangin reaksion nanday Sadrac, Mesac, kag Abednego sa tanyag sang hari?
17 Indi na kinahanglan nga binagbinagon liwat nanday Sadrac, Mesac, kag Abednego ang butang. Sa gilayon sila nagsabat: “O Nabocodonosor, indi kinahanglan nga magsabat kami sa imo sing bisan isa ka pulong bahin sa sini. Kon amo ini, ang amon Dios nga ginaalagad namon makasarang magluwas sa amon. Gikan sa nagadabdab nga kalayuhon nga hurno kag gikan sa imo kamot, O hari, luwason niya kami. Apang kon indi, hibalua, O hari, nga ang imo mga dios indi ang ginaalagad namon, kag indi kami magsimba sa larawan nga bulawan nga imo ginpatindog.”—Daniel 3:16-18.
SA KALAYUHON NGA HURNO!
18, 19. Ano ang natabo sang gindap-ong ang tatlo ka Hebreo sa kalayuhon nga hurno?
18 Bangod naakig gid, ginsugo ni Nabocodonosor ang iya mga suluguon nga painiton ang hurno sing makapito pa sangsa kinaandan. Nian ginsugo niya ang “pila ka mabukod nga mga lalaki nga makusog” nga gapuson sanday Sadrac, Mesac, kag Abednego kag idap-ong sila sa “nagadabdab nga kalayuhon nga hurno.” Ginsunod nila ang sugo sang hari, kag gindap-ong ang tatlo ka Hebreo sa kalayo, nga nagapos kag napanaptan ang bug-os nga lawas—ayhan agod mas madali sila masunog. Apang, ang mga tinawo ni Nabocodonosor amo ang napatay sang kalayo.—Daniel 3:19-22.
19 Apang isa ka tumalagsahon nga butang ang natabo. Bisan pa sanday Sadrac, Mesac, kag Abednego yara sa tunga sang kalayuhon nga hurno, wala sila ginlamon sang kalayo. Handurawa lamang ang kakibot ni Nabocodonosor! Gindap-ong sila sa nagaharahara nga kalayo, nga nagapos sing maayo, apang buhi sila gihapon. Ti, nagadayandayan sila sa tunga sang kalayo nga wala sing gapos! Apang may natalupangdan pa si Nabocodonosor. “Indi bala nga tatlo ka mabukod nga lalaki nga nagapos ang gindap-ong naton sa tunga sang kalayo?” pamangkot niya sa iya mataas nga harianon nga mga opisyales. “Huo, O hari,” sabat nila. “Yari karon!” singgit ni Nabocodonosor, “apat ka mabukod nga lalaki ang makita ko nga nagadayandayan nga wala sing gapos sa tunga sang kalayo, kag wala sila maano, kag ang dagway sang ikap-at kaangay sa anak sang mga dios.”—Daniel 3:23-25.
20, 21. (a) Ano ang natalupangdan ni Nabocodonosor kay Sadrac, kay Mesac, kag kay Abednego sang magguwa sila gikan sa hurno? (b) Ano ang napilitan nga kilalahon ni Nabocodonosor?
20 Nagpalapit si Nabocodonosor sa ganhaan sang kalayuhon nga hurno. “Sadrac, Mesac kag Abednego, kamo nga mga alagad sang Dios nga Labing Mataas,” panawag niya, “guwa kamo kag magpalapit diri!” Ang tatlo ka Hebreo nagguwa gikan sa tunga sang kalayo. Walay duhaduha nga naurungan ang tanan nga nakasaksi sa sini nga milagro, lakip ang mga satrapa, mga tulugyanan, mga gobernador, kag mataas nga mga opisyales. Ti, daw subong bala nga wala gid magsulod sa hurno ining tatlo ka lamharon nga lalaki! Wala man lang sila sing baho sang kalayo, kag bisan isa ka buhok sang ila ulo wala masirab.—Daniel 3:26, 27.
21 Napilitan karon si Hari Nabocodonosor sa pagkilala nga si Jehova amo ang Dios nga Labing Mataas. “Pakamaayuhon ang Dios nanday Sadrac, Mesac kag Abednego,” siling niya, “nga nagpadala sang iya anghel kag nagluwas sa iya mga alagad nga nagsalig sa iya kag nagbalhin sang pulong sang hari kag nagtugyan sang ila mga lawas, bangod indi sila mag-alagad kag indi magsimba sa bisan ano nga dios luwas sa ila kaugalingon nga Dios.” Nian, gindugang sang hari ining matigdas nga paandam: “Gikan sa akon ginapaguwa ang isa ka sugo, nga ang bisan ano nga katawhan, pungsod ukon hambal nga maghambal sing bisan ano nga malain batok sa Dios nanday Sadrac, Mesac kag Abednego dapat hiwahiwaon, kag ang balay sini dapat himuon nga publiko nga kasilyas; kay wala sing nagaluntad nga iban nga dios nga makaluwas kaangay sining isa.” Gani, ginpasag-uli ang tatlo ka Hebreo sa pabor sang hari kag ‘nag-uswag sa sakop nga distrito sang Babilonia.’—Daniel 3:28-30.
ANG PAGTUO KAG ANG MABUDLAY NGA PAGTILAW KARON
22. Paano ang mga alagad ni Jehova karon nagaatubang sing mga kahimtangan nga kaanggid sa kahimtangan anay nanday Sadrac, Mesac, kag Abednego?
22 Sa karon, ang mga sumilimba ni Jehova nagaatubang sing mga kahimtangan nga kaanggid sa kahimtangan anay nanday Sadrac, Mesac, kag Abednego. Matuod, ang katawhan sang Dios indi mga bihag sa literal nga kahulugan. Apang, nagsiling si Jesus nga ang iya mga sumulunod mangin “indi bahin sang kalibutan.” (Juan 17:14) Mga “dumuluong” sila bangod wala nila ginasunod ang dimakasulatanhon nga mga kinabatasan, mga panimuot, kag mga buhat sang mga tawo sa palibot nila. Subong sang ginsulat ni apostol Pablo, dapat nga ang mga Cristiano ‘indi magpadihon suno sa sining sistema sang mga butang.’—Roma 12:2.
23. Paano ang tatlo ka Hebreo nagpakita sing kalig-on, kag paano masunod sang mga Cristiano karon ang ila huwaran?
23 Nagdumili ang tatlo ka Hebreo nga dihunon sa sistema sang Babilonia. Wala sila madala walay sapayan sang Caldeanhon nga kaalam nga gintudlo sa ila sing maid-id. Ang ila tindog tuhoy sa pagsimba wala sing kondisyon, kag ang ila katutom para lamang kay Jehova. Ang mga Cristiano karon dapat mangin subong man sini kalig-on. Indi sila dapat mahuya nga tuhay sila sa mga tawo sa kalibutan. Sa pagkamatuod, “ang kalibutan nagataliwan kag amo man ang kailigbon sini.” (1 Juan 2:17) Gani isa ka kabuangan kag walay pulos nga sundon ining nagahingapos nga sistema sang mga butang.
24. Paano ang tindog sang matuod nga mga Cristiano kon ipaanggid sa tindog sang tatlo ka Hebreo?
24 Dapat magbantay ang mga Cristiano batok sa tanan nga sahi sang idolatriya, lakip ang malalangon nga mga sahi. * (1 Juan 5:21) Sanday Sadrac, Mesac, kag Abednego matinumanon kag matinahuron nga nagtindog sa atubangan sang larawan nga bulawan, apang nahibaluan nila nga ang pagyaub sa atubangan sini indi lamang pagpakita sing pagtahod. Isa ini ka buhat sang pagsimba, kag ang pagpakigbahin sa sini magapaakig kay Jehova. (Deuteronomio 5:8-10) Si John F. Walvoord nagsulat: “Daw subong yadto sang pagsaludo sa bandera, apang, bangod ang katutom sa relihion naangot sa katutom sa pungsod, mahimo man nga may relihioso ini nga kahulugan.” Ang matuod nga mga Cristiano karon may subong man sina kalig-on nga tindog batok sa idolatriya.
25. Ano nga leksion ang natun-an mo gikan sa matuod nga sugilanon nanday Sadrac, Mesac, kag Abednego?
25 Ang rekord sang Biblia tuhoy kay Sadrac, kay Mesac, kag kay Abednego nagahatag sing maayo gid nga huwaran para sa tanan nga determinado sa paghatag sing bug-os nga debosyon kay Jehova. Mahimo gid nga ginahunahuna ni apostol Pablo ining tatlo ka Hebreo sang maghambal sia tuhoy sa madamo nga nagpakita sing pagtuo, lakip yadtong “nakapalong sang gahom sang kalayo.” (Hebreo 11:33, 34) Padyaan ni Jehova ang tanan nga nagailog sini nga pagtuo. Ang tatlo ka Hebreo ginluwas gikan sa kalayuhon nga hurno, apang mapat-od naton nga banhawon niya ang tanan nga matutom nga napatay subong mga nagahupot sing integridad kag pakamaayuhon sila sing kabuhi nga walay katapusan. Ano man ang matabo, si Jehova “nagabantay sa mga kalag sang iya mga matutom; ginaluwas niya sila gikan sa kamot sang mga malauton.”—Salmo 97:10.
[Mga Footnote]
^ Ang iban nagapati nga si Marduk, nga ginkabig nga amo ang tagtukod sang Emperyo sang Babilonia, nagarepresentar kay Nimrod nga ginpakadios. Apang, indi ini mapat-od.
^ Ang “Beltesasar” nagakahulugan sing “Amligi ang Kabuhi sang Hari.” Ang “Sadrac” mahimo nagakahulugan sing “Sugo ni Aku,” ang Sumerianhon nga dios nga bulan. Ang “Mesac” posible nga nagapatuhoy sa isa ka Sumerianhon nga dios, kag ang “Abednego” nagakahulugan sing “Alagad ni Nego,” ukon Nebo.
^ Bangod sang tuman nga kadakuon sang larawan, nagapati ang pila ka iskolar sang Biblia nga ini nahuman sa kahoy kag dayon ginsampawan sing bulawan.
^ Ang Aramaiko nga ekspresyon nga ginbadbad nga “ginsumbong” nagakahulugan sing ‘kaunon ang mga bahin’ sang isa ka tawo—usangon sia, nga subong bala, paagi sa pasipala.
^ Halimbawa, ginaangot sang Biblia ang pagkahakog kag paghamkon sa idolatriya.—Filipos 3:18, 19; Colosas 3:5.
ANO ANG IMO NAHANTOP?
• Ngaa nagdumili sanday Sadrac, Mesac, kag Abednego sa pagyaub sa atubangan sang larawan nga ginpatindog ni Nabocodonosor?
• Ano ang reaksion ni Nabocodonosor sa ginhimo sang tatlo ka Hebreo?
• Paano ginpadyaan ni Jehova ang tatlo ka Hebreo bangod sang ila pagtuo?
• Ano ang imo natun-an gikan sa pagbinagbinag sang matuod nga sugilanon nanday Sadrac, Mesac, kag Abednego?
[Mga Pamangkot]
[Bug-os pahina nga retrato sa pahina 68]
[Mga retrato sa pahina 70]
1. Torre sang templo (ziggurat) sa Babilonia
2. Templo ni Marduk
3. Bronsi nga tapitapi nga nagalaragway sang mga dios nga si Marduk (wala) kag si Nebo (tuo) nga nagatindog sa mga dragon
4. Ang cameo ni Nabocodonosor, nga kilala sa iya ginpatindog nga mga tinukod
[Bug-os pahina nga retrato sa pahina 76]
[Bug-os pahina nga retrato sa pahina 78]
