Kapitulo 20

Ang Indi Maisip nga Dakung Kadam-an

1. Sa tapos malaragway ang pagpat-in sa 144,000, ano nga iban pa nga grupo ang nakita ni Juan?

 SA TAPOS malaragway ang pagpat-in sa 144,000, nagpadayon si Juan sa pagsugid sang isa sa labing makakulunyag nga bugna sa bug-os nga Kasulatan. Mahimo gid nga daw malumpat sa kalipay ang iya tagipusuon samtang ginasugid niya ini, nga nagasiling: “Sa tapos sini nagtulok ako, kag, yari karon! isa ka dakung kadam-an, nga wala sing tawo nga makaisip, gikan sa tanan nga pungsod kag tribo kag katawhan kag hambal, nga nagatindog sa atubangan sang trono kag sa atubangan sang Kordero, nga nagasuksok sing puti nga malaba nga mga panapton; kag may mga paklang sang palma sa ila mga kamot.” (Bugna 7:9) Huo, ang pagpugong sa apat ka hangin nagatugot sang kaluwasan sang isa pa ka grupo luwas sa 144,000 ka  katapo sang espirituwal nga Israel: ang dakung kadam-an gikan sa lainlain nga lenguahe kag pungsod. *—Bugna 7:1.

2. Ano ang paghangop sang kalibutanon nga mga komentarista tuhoy sa dakung kadam-an, kag paano man gintamod bisan gani sang mga Estudyante sang Biblia ini nga grupo sadto anay?

² Ginhangop sang kalibutanon nga mga komentarista ining dakung kadam-an subong amo ang undanon nga mga di-Judiyo nga nakumbertir sa Cristianismo ukon amo ang mga Cristiano nga ginpatay subong martir nga magakadto sa langit. Bisan gani ang mga Estudyante sang Biblia sadto anay nagkabig sa ila subong segunda klase nga langitnon nga hubon, subong sang ginsambit sang 1886 sa Tomo I sang Studies in the Scriptures, The Divine Plan of the Ages: “Nadula nila ang premyo nga trono kag ang tulad-Dios nga kinaugali, apang ibun-ag sila sa ulihi subong espiritu nga mga persona sa isa ka kahimtangan nga mas manubo sa tulad-Dios nga kinaugali. Bisan pa ginpakabalaan sila, nalandas sila sang kalibutanon nga espiritu tubtob sa punto nga napaslawan sila sa paghalad sang ila kabuhi.” Kag tubtob sang 1930, ginpabutyag ini nga pagpati sa Light, Tulun-an Uno: “Ang mga nagahuman sa sining dakung kadam-an napaslawan sa pagbaton sa imbitasyon nga mangin makugi nga mga saksi para sa Ginuo.” Ginlaragway sila subong nagapakamatarong sa kaugalingon nga grupo nga may ihibalo sa kamatuoran apang wala manikasog gid sa pagbantala sini. Magakadto sila sa langit subong segunda klase kag indi sila maggahom upod kay Cristo.

3. (a) Ano nga paglaum ang gintanyag sa pila sang matarong sing tagipusuon nga sang ulihi nangin makugi sa pagbantala nga hilikuton? (b) Paano ginpaathag sang The Watch Tower sang 1923 ang parabola tuhoy sa mga karnero kag mga kanding?

³ Apang, ang iban nga mga kaupod sang hinaplas nga mga Cristiano nangin makugi gid sa pagbantala. Wala sila naghandum nga magkadto sa langit. Ang ila paglaum naghisanto gid sa isa ka pamulongpulong publiko nga ginpresentar sang katawhan ni Jehova kutob sang 1918 tubtob 1922. Sang primero gid, natig-uluhan ini “Ang Katapusan Sang Kalibutan—Minilyon nga Nagakabuhi Karon ang Indi Na Makatilaw Sing Kamatayon.” * Pagkatapos sini, ginpaathag sang magasin nga Watch Tower nga Oktubre 15, 1923, ang parabola ni Jesus tuhoy sa mga karnero kag mga kanding (Mateo 25:31-46), nga nagasiling: “Ang mga karnero nagalaragway sa tanan nga katawhan sang mga pungsod, nga wala ginpanganak sang espiritu apang may huyog sa pagkamatarong, nga nagakilala kay Jesucristo subong ang Ginuo kag nagapaabot kag nagalaum sang isa ka mas maayo nga tion sa idalom sang iya paggahom.”

4. Paano ang kapawa tuhoy sa dutan-on nga klase nagsanag pa sang 1931? sang 1932? sang 1934?

⁴ Mga pila ka tuig sang ulihi, sang 1931, ginpaathag sang Vindication, Tulun-an Uno, ang Ezequiel kapitulo 9, nga ang mga tawo nga natandaan sa agtang para sa kaluwasan sa katapusan sang kalibutan amo ang mga karnero nga ginsambit sa parabola ni Jesus. Ginpaathag sang Vindication, Tulun-an Tres, nga ginpagua sang 1932, ang matarong nga panimuot sang tagipusuon ni Jehonadab, isa ka di-Israelinhon nga tawo, nga nagbuylog sa kangga ni Hari Jehu, isa ka hinaplas sa Israel, kag nag-upod sa iya agod makita ang kakugi ni Jehu sa paglaglag sa butig nga mga sumilimba. (2 Hari 10:15-17) Nagkomento ini nga tulun-an: “Sa tion nga ang katulad sang kay Jehu nga hilikuton [sa pagpahayag sang mga paghukom ni Jehova] nagapadayon, ginalaragway ukon ginalandong ni Jehonadab ang mga tawo sa duta karon nga may maayong kabubut-on, wala nagaugyon sa organisasyon ni Satanas, nagadampig sa pagkamatarong, kag amo ang amligan sang Ginuo sa tion sang Armagedon, luwason sa sina nga kagamo, kag hatagan sing kabuhi nga walay katapusan sa duta. Sila ang ‘mga karnero’ nga klase.” Sang 1934 maathag nga ginpakita sang The Watchtower nga ining mga Cristiano nga may dutan-on nga paglaum dapat magdedikar kay Jehova kag magpabawtismo. Ang kapawa tuhoy sa sining dutan-on nga klase amat-amat nga nagasanag.—Hulubaton 4:18.

5. (a) Ano nga pagpakilala sa dakung kadam-an ang ginhimo sang 1935? (b) Sang ginpangabay ni J. F. Rutherford sang 1935 ang mga kombensionista nga nagalaum nga mabuhi sing dayon sa duta nga magtindog, ano ang natabo?

⁵ Ang paghangop sa Bugna 7:9-17 daw subong sang kapawa nga magasiga sing tuman kasanag! (Salmo 97:11) Sulitsulit nga ginpabutyag sang magasin nga Watchtower nga ang kombension nga natalana nga hiwaton sadto sang Mayo 30 tubtob  Hunyo 3, 1935, sa Washington, D.C., E.U.A., mangin “isa ka matuod gid nga paumpaw kag benepisyo” para sa mga ginlaragway ni Jehonadab. Nagmatuod gid ina! Sa isa ka makapahulag nga pamulongpulong nga natig-uluhan “Ang Daku nga Kadamuan,” nga ginhatag sa mga 20,000 ka kombensionista, si J. F. Rutherford, nga sadto amo ang nanguna sa pagbantala nga hilikuton sa bug-os nga kalibutan, naghatag sing Makasulatanhon nga pamatuod nga ang modernong-adlaw nga iban nga mga karnero amo man ang dakung kadam-an sa Bugna 7:9. Sa talipuspusan sini nga pamulongpulong, namangkot sia: “Mahimo bala magtindog palihug ang tanan nga nagalaum nga mabuhi sing dayon sa duta?” Sang magtindog ang daku nga bahin sang tumalambong, ang humalambal nagsiling: “Tan-awa! Ang daku nga kadamuan!” Nagluntad ang bug-os nga kalinong, nga ginsundan sang mabaskog nga pinalakpak. Nalipay gid ang Juan nga klase—subong man ang Jehonadab nga grupo! Pagkadason nga adlaw, 840 ka bag-o nga Saksi ang ginbawtismuhan, ang kalabanan sini nagapangangkon nga bahin sang dakung kadam-an.

Pagpat-od Kon Sin-o Gid ang Dakung Kadam-an

6. (a) Ngaa mahangpan naton sing maathag nga ang dakung kadam-an amo ang modernong-adlaw nga grupo sang dedikado nga mga Cristiano nga nagalaum nga mabuhi sing dayon sa duta? (b) Ano ang ginasimbulo sang puti nga malaba nga panapton sang dakung kadam-an?

⁶ Paano naton masiling nga ang dakung kadam-an amo gid ining modernong-adlaw nga grupo sang dedikado nga mga Cristiano nga nagalaum nga mabuhi sing dayon sa duta nga ginapanag-iyahan sang Dios? Nakita anay ni Juan sa palanan-awon ang langitnon nga grupo nga “ginbakal . . . para sa Dios gikan sa tagsa ka tribo kag hambal kag katawhan kag pungsod.” (Bugna 5:9, 10) Pareho man ang ginhalinan sang dakung kadam-an apang tuhay lamang ang ila destinasyon. Indi kaangay sang Israel sang Dios, indi limitado ang ila kadamuon. Wala sing tawo nga makasugid kon mangin pila gid sila. Ang ila malaba nga mga panapton ginpaputi sa dugo sang Kordero, nga nagasimbulo sang ila matarong nga panindugan sa atubangan ni Jehova bangod sang ila pagtuo sa halad ni Jesus. (Bugna 7:14) Kag nagawayway sila sing mga paklang sang mga palma, nga nagadayaw sa Mesias subong Hari nila.

7, 8. (a) Ano nga hitabo ang walay duhaduha nga ginpahanumdom kay Juan sang pagwayway sing mga paklang sang mga palma? (b) Ano ang kahulugan sang pagwayway sang dakung kadam-an sing mga paklang sang palma?

⁷ Samtang ginatan-aw niya ini nga palanan-awon, mahimo gid nga nagbalik ang panghunahuna ni Juan sa kapin sa 60 ka tuig nga nagligad sa katapusan nga semana ni Jesus sa duta. Sang Nisan 9, 33 C.E., sang magpanong ang kadam-an agod abiabihon si Jesus pasulod sa Jerusalem, “nagkuha sila sing mga paklang sang mga palma kag naggua sa pagsugata sa iya. Kag nagsinggit sila: ‘Luwasa sia, nagapangamuyo kami! Pakamaayuhon sia nga nagakari sa ngalan ni Jehova, ang hari sang Israel!’” (Juan 12:12, 13) Sa kaanggid nga paagi, ang pagwayway sang dakung kadam-an sing mga paklang sang palma kag ang pagsinggit nila nagapakita sang ila indi mapunggan nga kalipay sa pagbaton kay Jesus subong iya ni Jehova gintangdo nga Hari.

⁸ Walay duhaduha nga ang mga paklang sang mga palma kag ang mga paghinugyaw nagpahanumdom man kay Juan sang Piesta sang mga Tolda nga ginhiwat anay sang dumaan nga mga Israelinhon. Para sa sini nga piesta si Jehova nagsugo: “Kag panguhaon ninyo sa una nga adlaw ang bunga sang matahom nga mga kahoy, ang mga paklang sang mga kahoy nga palma kag ang mga sanga sang madabong nga mga kahoy kag sang mga alamo sa sapa, kag magkasadya kamo sa atubangan ni Jehova nga inyo Dios sing pito ka adlaw.” Gingamit ang mga paklang sang palma subong palatandaan sang pagkasadya. Ang temporaryo nga mga tolda pahanumdom nga ginluwas ni Jehova ang iya katawhan gikan sa Egipto, agod magpuyo sa mga tolda sa kahanayakan. “Ang mga dumuluong kag ang mga ilo sa amay kag ang mga balo” nagpakigbahin sa sini nga piesta. Ang bug-os nga Israel dapat “magkalipay gid.”—Levitico 23:40; Deuteronomio 16:13-15.

9. Sa ano nga paghugyaw sa kalipay nagabuylog ang dakung kadam-an?

⁹ Nagakaigo, nian, nga ang dakung kadam-an, bisan pa indi sila bahin sang espirituwal nga Israel, dapat magwayway sing mga paklang sang palma, kay malipayon kag mapinasalamaton nga ginapadungog nila ang kadalag-an kag kaluwasan sa Dios kag sa Kordero, subong sang ginsiling diri ni Juan: “Kag padayon sila nga nagasinggit sa mabaskog nga tingog, nga nagasiling: ‘Ang kaluwasan utang namon sa  amon Dios, nga nagalingkod sa trono, kag sa Kordero.’” (Bugna 7:10) Bisan pa ginpain na sila gikan sa tanan nga kaliwatan, nagasinggit ang dakung kadam-an nga may isa lamang ka “mabaskog nga tingog.” Paano nila mahimo ini, walay sapayan sang ila lainlain nga pungsod kag hambal?

10. Paano ang dakung kadam-an makasinggit sing nahiusa paagi sa isa ka “mabaskog nga tingog” walay sapayan sang ila lainlain nga pungsod kag hambal?

¹⁰ Ining dakung kadam-an bahin sang isa ka organisasyon nga amo lamang ang nahiusa karon sa duta kag ginahuman sang lainlain nga pungsod. Indi lainlain ang ila mga talaksan para sa lainlain nga pungsod kundi ginaaplikar nila tanan ang matarong nga mga prinsipio sang Biblia bisan diin man sila nagapuyo. Wala sila nagabuylog sa nasyonalistiko kag rebolusyonaryo nga mga lihok kundi ila na ‘ginsalsal ang ila mga espada nga mga punta sang arado.’ (Isaias 2:4) Wala sila nabahinbahin sa mga sekta ukon mga denominasyon, nga nagasinggit sing makagulumon ukon nagasumpakilay nga mga mensahe subong sang ginahimo sang mga relihion sang Cristiandad; kag wala man nila ginasalig sa nagapabayad nga klero nga klase ang pagdayaw nga dapat himuon nila. Wala sila nagasinggit nga ang ila kaluwasan utang nila sa balaan nga espiritu, kay indi sila mga alagad sang isa ka trinitaryo nga dios. Sa mga 200 ka geokrapiko nga teritoryo sa bug-os nga duta, nagahiusa sila sa pagtawag sa ngalan ni Jehova samtang nagahambal sila sing isa ka putli nga hambal sang kamatuoran. (Sofonias 3:9) Sing nagakaigo, ginakilala nila sing dayag nga ang ila kaluwasan nagagikan kay Jehova, ang Dios sang kaluwasan, paagi kay Jesucristo, ang Iya Pangulo nga Ahente sang kaluwasan.—Salmo 3:8; Hebreo 2:10.

11. Paano nakabulig ang binag-o nga teknolohiya sa dakung kadam-an sa pagpabaskog pa sang ila mabaskog na nga tingog?

¹¹ Nakabulig ang binag-o nga teknolohiya agod magbaskog pa ang mabaskog na nga tingog sang nagahiusa nga dakung kadam-an. Wala sing iban nga relihioso nga grupo sa duta ang nagakinahanglan nga magbalhag sing mga bulig sa pagtuon sa Biblia sa kapin sa 400 ka lenguahe, kay wala sing iban nga grupo ang interesado nga mapaalinton sa tanan nga tawo sa duta ang isa ka nahiusa nga mensahe. Subong isa ka dugang pa nga bulig sa sini, sa idalom sang pagdumala sang hinaplas nga Nagadumala nga Hubon sang mga Saksi ni Jehova, ginhimo ang Multilanguage Electronic Phototypesetting System (MEPS). Tubtob sa sini nga tion sang pag-imprinta, lainlain nga porma sang MEPS ang ginagamit sa kapin sa 125 ka lokasyon sa bug-os nga duta, kag nakabulig ini agod mabalhag ang ila makaduha sa bulan nga magasin, Ang Lalantawan, sa kapin sa 130 ka lenguahe sing dululungan. Dululungan man nga ginabalhag sang katawhan ni Jehova ang mga libro, subong sini nga libro, sa pila ka lenguahe. Sa amo, ang mga Saksi ni Jehova, nga ang kalabanan sa ila katapo sang dakung kadam-an, nagapahamtang kada tuig sing ginatos ka milyon ka publikasyon sa tanan sang kilala nga mga lenguahe, agod ang dugang pa nga kadamuan gikan sa tanan nga tribo kag mga lenguahe makatuon sang Pulong sang Dios kag magdugang sang ila tingog sa mabaskog nga tingog sang dakung kadam-an.—Isaias 42:10, 12.

Sa Langit Ukon sa Duta?

12, 13. Sa ano nga paagi ang dakung kadam-an “nagatindog sa atubangan sang trono kag sa atubangan sang Kordero”?

¹² Paano naton mahibaluan nga ang ‘pagtindog sa atubangan sang trono’ wala nagakahulugan nga ang dakung kadam-an yara sa langit? Madamo kita sing maathag nga pamatuod sa sini nga punto. Halimbawa, ang Griego nga tinaga nga ginbadbad diri “sa atubangan” (e·noʹpi·on) literal nga nagakahulugan sing “sa itululok [ni]” kag makapila nga gingamit sa pagpatuhoy sa mga tawo sa duta nga yara “sa atubangan” ukon “sa itululok ni” Jehova. (1 Timoteo 5:21; 2 Timoteo 2:14; Roma 14:22; Galacia 1:20) Sang isa ka okasyon sang ang mga Israelinhon yara sa kahanayakan, nagsiling si Moises kay Aaron: “Isiling sa bug-os nga katilingban sang katawhan sang Israel, ‘Palapit kamo sa atubangan ni Jehova, kay nabatian niya ang inyo mga pagkumod.’” (Exodo 16:9) Indi kinahanglan nga isaylo sadto ang mga Israelinhon sa langit agod magtindog sa atubangan ni Jehova. (Ipaanggid ang Levitico 24:8.) Sa baylo, didto mismo sa kahanayakan nagtindog sila nga makita ni Jehova, kag ginpatuhoy niya ang iya igtalupangod sa ila.

¹³ Dugang pa, mabasa naton ini: “Kon ang Anak sang tawo mag-abot sa iya himaya . . . tipunon sa atubangan niya ang tanan nga pungsod.” Ang bug-os nga kaliwatan sang tawo wala didto sa langit kon matuman ini nga tagna. Kag, pat-od nga ang ‘magaagom sing kamatayon nga walay katapusan’ wala didto sa langit. (Mateo 25:31-33,  41, 46) Sa baylo, ang katawhan magatindog sa duta nga makita ni Jesus, kag iliso niya ang iya igtalupangod agod hukman sila. Sing kaanggid, ang dakung kadam-an yara “sa atubangan sang trono kag sa atubangan sang Kordero” kay nagatindog ini nga makita ni Jehova kag sang iya gintangdo nga Hari nga si Cristo Jesus, nga gikan sa ila magabaton ang dakung kadam-an sing kalahamut-an nga paghukom.

14. (a) Sin-o ang ginalaragway nga yara “sa palibot sang trono” kag “sa [langitnon nga] Bukid Sion”? (b) Bisan pa ang dakung kadam-an nagaalagad sa Dios “sa iya templo,” ngaa wala ini nagahimo sa ila nga isa ka saserdotenhon nga klase?

¹⁴ Ang 24 ka gulang kag ang hinaplas nga grupo sang 144,000 ginalaragway nga yara “sa palibot sang trono” ni Jehova kag “sa [langitnon nga] Bukid Sion.” (Bugna 4:4; 14:1) Ang dakung kadam-an indi isa ka saserdotenhon nga klase kag indi nila matigayon inang nabayaw nga posisyon. Matuod, ginalaragway sila sa Bugna 7:15 subong nagaalagad sa Dios “sa iya templo.” Apang ini nga templo wala nagapatuhoy sa nasulod nga santuaryo, ang Labing Balaan. Sa baylo, amo ini ang dutan-on nga luwang sang espirituwal nga templo sang Dios. Ang Griego nga tinaga nga na·osʹ, nga ginbadbad diri nga “templo,” masami nga nagapaalinton sang masangkad nga kahulugan sang bug-os nga edipisyo nga ginpatindog para sa pagsimba kay Jehova. Sa karon, isa ini ka espirituwal nga tinukod nga nagalakip sang langit kag duta.—Ipaanggid ang Mateo 26:61; 27:5, 39, 40; Marcos 15:29, 30; Juan 2:19-21, New World Translation Reference Bible, footnote.

Bug-os Uniberso nga Pagsinggit Sing Pagdayaw

15, 16. (a) Ano ang reaksion sa langit sa paglutaw sang dakung kadam-an? (b) Ano ang reaksion sang espiritu nga mga tinuga ni Jehova sa tagsa ka bag-o nga pagpahayag sang iya katuyuan? (c) Paano kita sa duta makabuylog sa pag-amba sing pagdayaw?

¹⁵ Ginadayaw sang dakung kadam-an si Jehova, apang may iban pa nga nagaamba man sang iya kadayawan. Nagsugid si Juan: “Kag ang tanan nga anghel nagatindog sa palibot sang trono kag sang mga gulang kag sang apat ka buhi nga tinuga, kag naghapa sila sa atubangan sang trono kag nagsimba sa Dios, nga nagasiling: ‘Kabay pa! Ang kadayawan kag himaya kag kaalam kag pagpasalamat kag dungog kag gahom kag kusog mangin sa aton Dios tubtob sa walay katubtuban. Kabay pa.’”—Bugna 7:11, 12.

¹⁶ Sang gintuga ni Jehova ang duta, ang tanan niya nga balaan nga mga anghel “nagdungan sa paghugyaw sa kalipay kag ang tanan nga anak sang Dios nagsinggit sa pagdayaw.” (Job 38:7) Ang tagsa ka bag-o nga pagpahayag sang katuyuan ni Jehova mahimo gid nga nagpahulag man sa mga anghel sa pagsinggit sing pagdayaw. Kon ang 24 ka gulang—ang 144,000 sa ila langitnon nga himaya—magsinggit sing mabaskog bilang pagkilala sa Kordero, ang tanan nga iban pa sa langitnon nga mga tinuga sang Dios magabuylog sa pagdayaw kay Jesus kag kay Jehova nga Dios. (Bugna 5:9-14) Ini nga mga tinuga nagakalipay sing tuman kay nakita na nila ang katumanan sang katuyuan ni Jehova nga banhawon ang matutom nga hinaplas nga mga tawo padulong sa isa ka mahimayaon nga kahimtangan sa espirituhanon nga duog. Kag karon, mabaskog nga nagaamba sing pagdayaw ang tanan nga matutom nga langitnon nga mga tinuga ni Jehova bangod sa paglutaw sang dakung kadam-an. Sa pagkamatuod, para sa tanan nga alagad ni Jehova, ang adlaw sang Ginuo isa ka makakulunyag nga tion agod mabuhi. (Bugna 1:10) Diri sa duta, isa gid ka pribilehiyo nga makaambit kita sa pag-amba sing pagdayaw paagi sa pagpanaksi sa Ginharian ni Jehova!

 Naglutaw ang Dakung Kadam-an

17. (a) Ano ang ginpamangkot sang isa sa 24 ka gulang, kag ano ang ginapahangop sang katunayan nga sarang mapangita sang gulang ang sabat? (b) San-o ginsabat ang pamangkot sang gulang?

¹⁷ Kutob sang panahon ni apostol Juan kag tubtob sa adlaw sang Ginuo, indi mahangpan sang hinaplas nga mga Cristiano kon sin-o gid ang dakung kadam-an. Busa, nagakaigo, nga ang isa sa 24 ka gulang, nga nagarepresentar sa mga hinaplas nga ato na sa langit, magpukaw sang panghunahuna ni Juan paagi sa pagpamangkot: “Kag bilang sabat ang isa sa mga gulang nagsiling sa akon: ‘Ang mga nagasuksok sing puti nga malaba nga panapton, sin-o sila kag diin sila naghalin?’ Gani sa gilayon nagsiling ako sa iya: ‘Ginuo ko, ikaw ang nakahibalo.’” (Bugna 7:13, 14a) Huo, sarang mapangita sina nga gulang ang sabat kag ihatag ini kay Juan. Nagapahangop ini nga ang mga binanhaw nga katapo sang 24 ka gulang nga grupo mahimo nga may bahin sa pagpaalinton sing balaan nga mga kamatuoran karon. Tuhoy naman sa mga katapo sang Juan nga klase nga yari pa sa duta, natukiban nila kon sin-o gid ang dakung kadam-an paagi sa pagpanilag sang ginahimo ni Jehova sa tunga nila. Nahangpan nila gilayon ang igpat sang kapawa gikan sa Dios nga nagpasanag sa teokratiko nga paghangop sang 1935, sa sibu nga tion ni Jehova.

18, 19. (a) Ano nga paglaum ang ginpadaku sang Juan nga klase sang katuigan 1920 kag katuigan 1930, apang sin-o, nga nagadamo ang kadamuon, ang nagbaton sang mensahe? (b) May kaangtanan sa 144,000, palatandaan sang ano ang pagpakilala sa dakung kadam-an sang 1935? (c) Ano ang ginapakita sang estadistika sang Memoryal?

¹⁸ Sang katuigan 1920 kag sang maaga nga bahin sang katuigan 1930, ginpadaku sang Juan nga klase ang langitnon nga paglaum, paagi sa mga publikasyon kag sa pagbantala nga hilikuton. Maathag nga wala pa sadto makompleto ang bug-os nga kadamuon sang 144,000. Apang ang nagadamo nga kadamuon sang mga nagpamati sa mensahe kag nagpakita sing kakugi sa pagpanaksi nga hilikuton nagpakita sing interes sa pagkabuhi sing dayon sa Paraiso nga duta. Wala sila sing handum nga magkadto sa langit. Indi amo sina ang pagtawag sa ila. Indi sila bahin sang diutay nga panong kundi sang iban nga mga karnero. (Lucas 12:32; Juan 10:16) Ang pagpakilala sa ila sang 1935 subong ang dakung kadam-an sang iban nga mga karnero isa ka palatandaan nga ang pagpili sa 144,000 halos nakompleto na sadto.

¹⁹ Ginasakdag bala sang mga estadistika ini nga konklusion? Huo. Sang 1938, sa bug-os nga kalibutan, 59,047 ka Saksi ni Jehova ang nagpakigbahin sa ministeryo. Sa sini, 36,732 ang nag-ambit sa mga emblema sa tuigan nga pagsaulog sang Memoryal sang kamatayon ni Jesus, nga nagapakita nga gintawag sila para sa langit. Sang mga tuig kutob sadto, ang kadamuon sini nga mga umalambit amat-amat nga nagbuhin, sa masami bangod natapos na sang matutom nga mga Saksi ni Jehova ang ila dutan-on nga kabuhi paagi sa kamatayon. Sang 2005, 8,524 lamang ang nag-ambit sa mga emblema sang Memoryal—0.05 porsiento lamang sang 16,390,116 nga nagtambong sa sadtong bug-os kalibutan nga selebrasyon.

20. (a) Sa tion sang Bug-os Kalibutan nga Inaway II, ano ang ginmuno ni J. F. Rutherford tuhoy sa dakung kadam-an? (b) Ano nga mga katunayan ang nagapakita karon nga ang dakung kadam-an daku matuod?

²⁰ Sang magdabdab ang ikaduha nga bug-os kalibutan nga inaway, mabaskog nga nagpanikasog si Satanas agod punggan ang pagtipon sa dakung kadam-an. Ang hilikuton ni Jehova gindumilian sa madamo nga pungsod. Sa tion sadtong madulom nga mga adlaw, kag antes sia mapatay sang Enero 1942, nabatian si J. F. Rutherford nga nagmuno: “Ti . . . daw indi na gali magdaku ang dakung kadam-an.” Apang bangod sa pagpakamaayo sang Dios, kabaliskaran ang natabo! Sang 1946 ang kadamuon sang mga Saksi nga nagaalagad sa bug-os nga kalibutan naglumpat sa 176,456—kalabanan sini bahin sang dakung kadam-an. Sang 2005, 6,390,022 ang kadamuon sang mga Saksi nga nagaalagad kay Jehova sing matutom sa 235 ka lainlain nga kadutaan—isa matuod ka DAKUNG KADAM-AN! Kag nagadamo pa ini.

21. (a) Paano ang pagtipon sa katawhan sang Dios sa tion sang adlaw sang Ginuo nagahisanto sing bug-os sa palanan-awon ni Juan? (b) Paano natuman ang pila ka importante nga mga tagna?

²¹ Sa amo, ang pagtipon sa katawhan sang Dios sa tion sang adlaw sang Ginuo nagahisanto sing bug-os sa palanan-awon ni Juan: una, ang pagtipon sa mga nagkalabilin sang 144,000; nian ang pagtipon sa dakung kadam-an. Subong sang gintagna ni Isaias, sa karon “sa ulihi nga bahin sang mga adlaw,” ang katawhan sang tanan nga pungsod nagapanong agod mag-ambit sa putli nga pagsimba kay Jehova. Kag, nagakalipay gid kita sa pagtuga ni Jehova sing “bag-ong mga langit kag bag-ong duta.” (Isaias 2:2-4; 65:17, 18) Ginatipon sang Dios ang “tanan nga butang kay Cristo, ang  mga butang sa langit kag ang mga butang sa duta.” (Efeso 1:10) Ang hinaplas nga mga manunubli sang langitnon nga Ginharian—pinili sa sulod sang mga siglo kutob sang panahon ni Jesus—amo ang “mga butang sa langit.” Kag karon, ang dakung kadam-an sang iban nga mga karnero amo ang una sa “mga butang sa duta.” Ang imo pag-alagad nahisanto sa sina nga kahimusan mahimo magkahulugan sing dayon nga kalipay para sa imo.

Ang mga Pagpakamaayo sa Dakung Kadam-an

22. Ano nga dugang pa nga impormasyon ang nabaton ni Juan tuhoy sa dakung kadam-an?

²² Paagi sa alagyan nga ginagamit sang Dios, nakabaton si Juan sing dugang pa nga impormasyon tuhoy sa sining dakung kadam-an: “Kag sia [ang gulang] nagsiling sa akon: ‘Sila amo ang naggua gikan sa dakung kapipit-an, kag ginlabhan nila ang ila malaba nga mga panapton kag ginpaputi ini sa dugo sang Kordero. Amo kon ngaa yara sila sa atubangan sang trono sang Dios; kag nagahimo sila sing sagrado nga pag-alagad sa iya sa adlaw kag gab-i sa iya templo; kag ang Isa nga nagalingkod sa trono magahumlad sang iya tolda sa ibabaw nila.’”—Bugna 7:14b, 15.

23. Ano ang dakung kapipit-an nga gikan sa amo ‘magagua’ ang dakung kadam-an?

²³ Sa isa ka mas maaga nga higayon, nagsiling si Jesus nga ang talipuspusan sang iya presensia nga may himaya sa Ginharian amo ang “dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21, 22) Sa katumanan sina nga tagna, buy-an sang mga anghel ang apat ka hangin sang duta agod laglagon ang bug-os kalibutan nga sistema ni Satanas. Ang una nga malaglag amo ang Babilonia nga Daku, ang bug-os kalibutan nga emperyo sang butig nga relihion. Nian, sa putukputukan sang kapipit-an, luwason ni Jesus ang mga katapo sang 144,000 nga nabilin pa sa duta, upod ang indi maisip nga dakung kadam-an.—Bugna 7:1; 18:2.

24. Paano makalipikar ang mga indibiduwal sang dakung kadam-an para sa kaluwasan?

²⁴ Paano makalipikar ang mga indibiduwal sang dakung kadam-an para sa kaluwasan? Ginsugiran sang gulang si Juan nga “ginlabhan nila ang ila malaba nga mga panapton kag ginpaputi ini sa dugo sang Kordero.” Buot silingon, nagpakita sila sing pagtuo kay Jesus subong Manunubos nila, nagdedikar kay Jehova, nagsimbulo sang ila dedikasyon paagi sa pagpabawtismo sa tubig, kag “nagahupot sing maayo nga konsiensia” paagi sa ila matadlong nga paggawi. (1 Pedro 3:16, 21; Mateo 20:28) Sa amo, matinlo sila kag matarong sa itululok ni Jehova. Kag ginahuptan nila ang ila kaugalingon nga “wala sing dagta gikan sa kalibutan.”—Santiago 1:27.

25. (a) Paano ang dakung kadam-an nagahalad kay Jehova sing “sagrado nga pag-alagad sa adlaw kag gab-i sa iya templo”? (b) Paano ‘ginahumlad ni Jehova ang iya tolda’ sa dakung kadam-an?

²⁵ Dugang pa, nangin makugi sila nga mga Saksi ni Jehova— “nagahimo sila sing sagrado nga pag-alagad sa iya sa adlaw kag gab-i sa iya templo.” Isa ka bala sa sining dedikado nga dakung kadam-an? Kon amo, pribilehiyo mo nga mag-alagad kay Jehova nga walay untat sa dutan-on nga luwang sang iya daku nga espirituwal nga templo. Sa karon, sa idalom sang pagtuytoy sang mga hinaplas, ang dakung kadam-an amo ang nagahimo sang mas daku nga bahin sang pagpanaksi nga hilikuton. Walay sapayan sang mga salabton sa pagpangita sing ikabuhi, ginatos ka libo sa ila ang nagaalagad sing bug-os tion subong mga payunir. Apang bahin man ikaw ukon indi sina nga grupo, bilang isa ka dedikado nga katapo sang dakung kadam-an, mahimo ikaw mangin malipayon nga bangod sang imo pagtuo kag mga buhat, ginapakamatarong ka subong abyan sang Dios kag ginaabiabi subong bisita sa iya tolda. (Salmo 15:1-5; Santiago 2:21-26) Sa amo ‘ginahumlad ni Jehova ang iya tolda’ sa mga nagahigugma sa iya kag, subong isa ka maayo nga tagbalay, ginaamligan niya sila.—Hulubaton 18:10.

26. Ano nga iban pa nga pagpakamaayo ang maagom sang dakung kadam-an?

²⁶ Nagpadayon ang gulang: “Indi na sila paggutumon ukon uhawon pa, kag ang adlaw indi na magsilak sing masingkal sa ila ukon ang bisan ano pa nga makapalaso nga init, bangod ang Kordero, nga yara sa tunga malapit sa trono, magabantay sa ila, kag magatuytoy sa ila sa mga tuburan sang tubig sang kabuhi. Kag pahiran sang Dios ang tagsa ka luha sa ila mga mata.” (Bugna 7:16, 17) Huo, maabiabihon gid si Jehova! Apang daw ano kadalom ang kahulugan sini nga mga pulong?

27. (a) Paano si Isaias nagtagna sing butang nga kaanggid sa mga pulong sang isa ka gulang? (b) Ano ang nagapakita nga ang tagna ni Isaias nagsugod nga matuman sa Cristiano nga kongregasyon sang panahon ni Pablo?

²⁷ Binagbinagon naton ang tagna nga kaanggid sa sini nga mga pulong: “Amo ini ang ginsiling ni  Jehova: ‘Sa isa ka tion sang maayong kabubut-on ginsabat ko ikaw, kag sa isa ka adlaw sang kaluwasan ginbuligan ko ikaw . . . Indi sila paggutumon ukon pag-uhawon, ukon sakiton sila sang makapalaso nga init ukon adlaw. Kay ang Isa nga naluoy sa ila magatuytoy sa ila, kag sa higad sang mga tuburan sang tubig ubayan niya sila.’” (Isaias 49:8, 10; tan-awa man ang Salmo 121:5, 6.) Ginbalikwat ni apostol Pablo ang isa ka bahin sini nga tagna kag gin-aplikar ini sa “adlaw sang kaluwasan” nga nagsugod sang Pentecostes 33 C.E. Nagsulat sia: “Kay nagasiling sia [Jehova]: ‘Sa isa ka tion nga nahamut-an ginpamatian ko ikaw, kag sa isa ka adlaw sang kaluwasan gintabangan ko ikaw.’ Yari karon! Karon amo ang tion nga nahamut-an gid. Yari karon! Karon amo ang adlaw sang kaluwasan.”— 2 Corinto 6:2.

28, 29. (a) Paano natuman ang mga pulong ni Isaias sang nahauna nga siglo? (b) Paano nagakatuman ang mga pulong sang Bugna 7:16 tuhoy sa dakung kadam-an? (c) Ano ang mangin resulta sang pagtuytoy sa dakung kadam-an padulong sa “mga tuburan sang tubig sang kabuhi”? (d) Ngaa mangin tumalagsahon ang dakung kadam-an sa tunga sang katawhan?

²⁸ Paano natuman sadto ang saad tuhoy sa indi pagkagutom ukon pagkauhaw ukon pag-antos sing makapalaso nga init? Sa pagkamatuod, may mga tion sang nahauna nga siglo nga ang mga Cristiano sadto nag-antos sing literal nga gutom kag kauhaw. (2 Corinto 11:23-27) Apang, sa espirituwal nga paagi, bugana sila. Gin-amanan sila sing bugana, amo kon ngaa wala sila gingutom ukon gin-uhaw sa espirituwal nga mga butang. Dugang pa, wala gintugutan ni Jehova nga ang init sang iya kaakig magdabdab batok sa ila sang ginlaglag niya ang Judiyo nga sistema sang mga butang sang 70 C.E. Ang mga pulong sang Bugna 7:16 may kaanggid nga espirituwal nga katumanan para sa dakung kadam-an karon. Upod sa hinaplas nga mga Cristiano, nagaagom sila sing bugana nga espirituwal nga mga aman.—Isaias 65:13; Nahum 1:6, 7.

²⁹ Kon isa ikaw sa sina nga dakung kadam-an, ang maayo nga kahimtangan sang imo tagipusuon magatiklod sa imo nga ‘maghugyaw sa kalipay,’ walay sapayan sang dapat mo batason nga mga kabudlayan kag mga pag-ipit sa nagahinunod na nga mga tinuig sang sistema ni Satanas. (Isaias 65:14) Sa sina nga kahulugan, bisan sa karon, sarang ‘mapahiran ni Jehova ang tagsa ka luha sa imo mga mata.’ Wala na sing peligro nga ang nagatagiti nga “adlaw” sang malaglagon nga paghukom sang Dios magahalit sa imo, kag kon buy-an na ang apat ka hangin sang kalaglagan, mahimo nga maluwas ka gikan sa “makapalaso nga init” sang kaakig ni Jehova. Kon matapos na ina nga kalaglagan, tuytuyan ka sang Kordero agod makabenepisyo ka sing bug-os gikan sa makapapagsik nga “mga tuburan sang tubig sang kabuhi,” nga nagalaragway sa tanan nga aman nga ginahimo ni Jehova agod nga makatigayon ka  sing kabuhi nga walay katapusan. Ang imo pagtuo sa dugo sang Kordero mabindikar kay amat-amat nga ipasag-uli sa kahimpitan ang tawo. Kamo nga bahin sang dakung kadam-an mangin tumalagsahon sa tunga sang katawhan subong ang “minilyon” nga indi na makatilaw sing kamatayon! Sa matuod nga kahulugan, pahiran ang tagsa ka luha sa inyo mga mata.—Bugna 21:4.

Pagpat-od Sang Pagtawag

30. Ano nga halangdon nga danyag ang ginapakita sa aton sa palanan-awon ni Juan, kag sin-o ang ‘makatindog’?

³⁰ Daw ano kahalangdon nga danyag ang ginapakita sa aton sini nga mga pulong! Si Jehova mismo yara sa iya trono, kag ang tanan niya nga alagad, langitnon kag dutan-on, nagahiusa sa pagdayaw sa iya. Ginaapresyar sang iya dutan-on nga mga alagad kon daw ano ka makapulunaw nga pribilehiyo ang makaambit sa sining nagabaskog nga koro sang pagdayaw. Sa indi madugay, magahukom na si Jehova kag si Cristo Jesus kag mabatian ang singgit: “Nag-abot na ang daku nga adlaw sang ila kasingkal, kag sin-o ang sarang makatindog?” (Bugna 6:17) Ang sabat? Pila lamang sa katawhan, lakip ang sin-o man sa napat-inan nga 144,000 nga nabilin pa sa unod kag ang dakung kadam-an sang iban nga mga karnero nga ‘magatindog,’ buot silingon, maluwas upod sa ila.—Jeremias 35:19; 1 Corinto 16:13.

31. Paano dapat maapektuhan sang katumanan sang palanan-awon ni Juan ang mga Cristiano, ang mga hinaplas kag ang dakung kadam-an?

³¹ Bangod sini nga kamatuoran, ang hinaplas nga mga Cristiano sang Juan nga klase nagapanikasog gid “padulong sa lalambuton tungod sa padya sang langitnon nga pagtawag sang Dios paagi kay Cristo Jesus.” (Filipos 3:14) Nakahibalo gid sila nga kinahanglan nila ang pinasahi nga pagbatas bangod sang mga nagakatabo karon. (Bugna 13:10) Sa tapos sang matutom nga pag-alagad kay Jehova sa madamo nga tinuig, ginahuptan nila sing malig-on ang ila pagtuo, nga nagakalipay nga ang ila ngalan “nasulat sa langit.” (Lucas 10:20; Bugna 3:5) Nahibaluan man sang mga katapo sang dakung kadam-an nga “sia [lamang] nga nakabatas tubtob sa katapusan amo ang maluwas.” (Mateo 24:13) Samtang ang dakung kadam-an subong isa ka grupo magagua sa dakung kapipit-an, ang mga indibiduwal sa sini dapat magpanikasog sa pagpabilin nga matinlo kag aktibo.

32. Ano nga hilingagawon nga kahimtangan ang ginapadaku sang kamatuoran nga duha lamang ka grupo ang ‘magatindog’ sa adlaw sang kasingkal ni Jehova?

³² Wala sing pamatuod nga luwas sa sining duha ka grupo may iban pa nga ‘magatindog’ sa adlaw  sang kasingkal ni Jehova. Ano ang kahulugan sini para sa minilyon nga kada tuig nagapakita sing pagtahod sa halad ni Jesus paagi sa pagtambong sa pagsaulog sang Memoryal sang iya kamatayon apang wala pa magpakita sing pagtuo sa halad ni Jesus tubtob sa punto nga mangin dedikado, bawtismado nga mga alagad ni Jehova, kag aktibo nga mag-alagad sa iya? Dugang pa, kamusta naman sila nga sang una aktibo apang gintugutan nila ang ila tagipusuon nga “mabug-atan sang . . . mga kabalaka sa kabuhi”? Kabay nga magmata sila, kag magpabilin nga nagamata, agod ‘magmadinalag-on sila sa pagpalagyo sa sini tanan nga butang nga gintalana nga mahanabo, kag sa pagtindog sa atubangan sang Anak sang tawo’—si Jesucristo. Malip-ot na lang ang tion!—Lucas 21:34-36.

[Mga nota]

[Mga Pamangkot sa Pagtinuon]

[Kahon sa pahina 119]

Ang mga Pagpatpat Iya Sang Dios

Sa sulod sang madamo nga dekada nagapangusisa ang Juan nga klase kon sin-o gid ang dakung kadam-an apang wala sila makakita sing makaalayaw nga paathag. Ngaa? Makita naton ang sabat sa mga pulong sang matutom nga si Jose, sang nagsiling sia: “Indi bala iya sang Dios ang mga pagpatpat?” (Genesis 40:8) San-o kag paano ginapatpat sang Dios ang katumanan sang iya mga tagna? Sa masami, kon ang mga tagna natalana na nga matuman ukon nagakatuman na agod ang mensahe sini maathag nga mahantop sang iya nagapangusisa nga mga alagad. Ini nga paghangop ginahatag “sa pagtudlo sa aton, agod nga paagi sa aton pagbatas kag paagi sa lugpay gikan sa Kasulatan makatigayon kita sing paglaum.”—Roma 15:4.

[Kahon sa pahina 124]

Ang mga katapo sang dakung kadam-an

▪ nagagikan sa tanan nga pungsod kag tribo kag katawhan kag hambal

▪ nagatindog sa atubangan sang trono ni Jehova

▪ naglaba kag nagpaputi sang ila malaba nga mga panapton sa dugo sang Kordero

▪ nagapadungog sang kaluwasan kay Jehova kag kay Jesus

▪ magagua sa dakung kapipit-an

▪ nagaalagad kay Jehova sa iya templo sa adlaw kag gab-i

▪ nagabaton sang mahigugmaon nga pag-amlig kag pag-atipan ni Jehova

▪ ginatuytuyan ni Jesus padulong sa mga tuburan sang tubig sang kabuhi

 [Retrato sa pahina 121]

[Retrato sa pahina 127]

Ang kaluwasan sang dakung kadam-an utang nila sa Dios kag sa Kordero

[Retrato sa pahina 128]

Tuytuyan sang Kordero ang dakung kadam-an sa mga tuburan sang tubig sang kabuhi