Ang Pagkahalangdon Sang Langitnon nga Trono ni Jehova
Kapitulo 14
Ang Pagkahalangdon Sang Langitnon nga Trono ni Jehova
Palanan-awon 2—Bugna 4:1–5:14
Tema: Ang makapulunaw nga mga hitabo sa atubangan sang trono sang paghukom sang Dios
Tion sang katumanan: Ini nga palanan-awon nagapakita sang mga hitabo kutob sang 1914 tubtob sa katapusan sang Milenyo kag lampas pa, kon ang tagsa ka tinuga sa langit kag sa duta magadayaw kay Jehova.—Bugna 5:13
1. Ngaa dapat gid kita mangin interesado sa mga palanan-awon nga ginapaambit sa aton ni Juan?
NAGSUGOD si Juan nga ipaambit sa aton ang dugang pa nga makatalandog nga mga palanan-awon. Paagi sa inspirasyon sang balaan nga espiritu yara gihapon sia sa adlaw sang Ginuo. Gani, may madalom nga kahulugan para sa aton nga nagakabuhi gid sa sina nga adlaw ang mga butang nga ginlaragway niya. Paagi sa sini nga mga palanan-awon, ginhukas ni Jehova ang tabon nga nagalipon sa langitnon nga mga butang kag ginahatagan kita sang iya pagtamod sa mga paghukom nga himuon niya sa duta. Dugang pa, langitnon man ukon dutan-on ang paglaum naton, ini nga mga bugna nagabulig sa aton nga makita kon ano ang aton papel sa katuyuan ni Jehova. Busa, dapat gid kita tanan padayon nga mangin interesado sa ginsiling ni Juan: “Malipayon ang nagabasa sing mabaskog kag ang mga nagapamati sang mga pulong sini nga tagna, kag nagatuman sang mga butang nga nasulat sa sini; kay malapit na ang gintalana nga tion.”—Bugna 1:3.
2. Ano ang masunod nga naeksperiensiahan ni Juan?
2 Ang masunod nga nakita ni Juan labaw gid sa bisan ano nga makita karon sang tawo sa video! Nagsulat sia: “Sa tapos sini nagtulok ako, kag, yari karon! may isa ka bukas nga ganhaan sa langit, kag ang una nga tingog nga nabatian ko anay kaangay sa trumpeta, nga nagpakighambal sa akon, nga nagasiling: ‘Saka diri, kag ipakita ko sa imo ang mga butang nga dapat mahanabo.’” (Bugna 4:1) Paagi sa palanan-awon nagsulod si Juan sa di-kitaon nga langit sa presensia ni Jehova, nga nabayaw sing mataas pa sa pisikal nga kahawaan nga nalagulad sang mga astronot, mataas pa sa mga galaksiya sang materyal nga uniberso. Subong nga daw nagsulod sia sa isa ka bukas nga ganhaan, gin-agda si Juan nga magpaayaw sa pagtan-aw sang tuman katahom nga kalangitan sang mga espiritu diin si Jehova nagalingkod sa iya mismo trono. (Salmo 11:4; Isaias 66:1) Daw ano nga pribilehiyo!
3. Ano ang ginapahanumdom sang tingog nga “kaangay sa trumpeta,” kag sin-o walay duhaduha ang Ginahalinan sini?
3 Wala ginapakilala sang Biblia kon sin-o ining “una nga tingog.” Kaangay sang mabaskog nga tingog ni Jesus nga nabatian antes sini, isa ini ka mabaskog nga tingog kaangay sang trumpeta. (Bugna 1:10, 11) Ginapahanumdom sini ang nagalanog nga tunog sang budyong nga nagsinyales sang presensia ni Jehova sa Bukid Sinai. (Exodo 19:18-20) Walay duhaduha nga si Jehova amo ang harianon nga Ginahalinan sang pagpanawag. (Bugna 1:1) Ginbuksan niya ang ganhaan agod nga si Juan, paagi sa palanan-awon, makasulod sa labing balaan nga duog sa bug-os nga kasangkaron nga nasakupan sang pagkasoberano ni Jehova.
Ang Mahimayaon nga Presensia ni Jehova
4. (a) Ano ang kahulugan sang palanan-awon ni Juan para sa hinaplas nga mga Cristiano? (b) Ano ang kahulugan sang palanan-awon para sa mga nagalaum nga mabuhi sing dayon sa duta?
4 Ano ang nakita ni Juan? Pamatii, samtang ginapaambit niya karon sa aton ang iya matahom gid nga eksperiensia: “Sa tapos sini gilayon nga napaidalom ako sa gahom sang espiritu: kag, yari karon! may trono sa langit, kag may isa nga nagalingkod sa trono.” (Bugna 4:2) Sa hinali lang, ginsaylo si Juan sa espiritu paagi sa aktibo nga puersa sang Dios padulong sa trono ni Jehova. Makakulunyag gid yadto para kay Juan! Nakita niya ang makasililaw nga kalangitan diin natigana para sa iya kag sa iban pa sang hinaplas nga mga Cristiano ang “di-madinulunton kag walay dagta kag wala nagalubad nga palanublion.” (1 Pedro 1:3-5; Filipos 3:20) Ang palanan-awon ni Juan may madalom man nga kahulugan para sa mga nagalaum nga mabuhi sing dayon sa duta. Nagabulig ini sa ila nga mahangpan ang himaya sang presensia ni Jehova kag ang kahimusan sang paggahom sa langit nga ginagamit ni Jehova sa paghukom sa mga pungsod kag sa tapos sini sa paggahom sa mga tawo sa duta. Isa gid ka maayo mag-organisar nga Dios si Jehova!
5. Ano nga katunayan ang nakita ni Juan nga ginsimbulo sang takop sang kaban sang katipan?
5 Ang daku nga bahin sang nakita ni Juan didto sa langit nagaanggid sa mga bahin sang tabernakulo sa kahanayakan anay. Gintukod ini nga tabernakulo mga 1,600 ka tuig antes sang panahon ni Juan subong isa ka santuaryo sang matuod nga pagsimba para sa mga Israelinhon. Ang kaban sang katipan yara sa Balaan sang mga Balaan sadto nga tabernakulo, kag didto sa ibabaw sang puro nga bulawan nga takop sadto nga Kaban nga naghambal si Jehova mismo. (Exodo 25:17-22; Hebreo 9:5) Busa, ang takop sang Kaban nagsimbulo sang trono ni Jehova. Nakita karon ni Juan ang ginasimbulo mismo: ang Soberano nga Ginuong Jehova nga nagalingkod nga tuman ka halangdon sa iya mahimayaon nga trono sa langit!
6. Ano ang ginapaalinton sa aton ni Juan nga panan-aw niya kay Jehova, kag ngaa nagakaigo ini?
6 Indi kaangay sang nauna nga mga manalagna nga nakakita sang trono ni Jehova paagi sa mga palanan-awon, wala ginalaragway ni Juan sing detalyado ang Isa nga Balaan nga nagalingkod sa sini. (Ezequiel 1:26, 27; Daniel 7:9, 10) Apang ginasugiran kita ni Juan kon ano sa panan-aw niya ang Isa nga nagalingkod sa trono: “Kag ang dagway sang isa nga nagalingkod kaangay sa bato nga jaspe kag sa malahalon nga pula nga bato, kag sa palibot sang trono may balangaw nga kaangay sa esmeralda kon tulukon.” (Bugna 4:3) Wala gid sing kaanggid ang katahom! Nakita ni Juan ang isa ka malinong kag makagalanyat nga katahom kaangay sang mahining kag nagainggat nga hiyas nga mga bato. Nagahisanto gid ini sa paglaragway ni disipulo Santiago kay Jehova subong “Amay sang langitnon nga mga kapawa”! (Santiago 1:17) Wala magdugay pagkatapos masulat ni Juan ang Bugna, nagsiling sia: “Ang Dios kapawa kag wala gid sing kadudulman sa iya.” (1 Juan 1:5) Daw ano ka mahimayaon nga Persona si Jehova!
7. Ano ang matun-an naton gikan sa kamatuoran nga may balangaw sa palibot sang trono ni Jehova?
7 Talupangda nga nakakita si Juan sa palibot sang trono sing balangaw, nga berde ang duag kaangay sang esmeralda. Ang Griego nga tinaga nga ginbadbad diri nga balangaw (irʹis) nagapahangop sing tipulon gid nga porma. Ang balangaw una nga ginsambit sa Biblia may kaangtanan sa adlaw ni Noe. Sang maghubas na ang tubig sang Anaw, ginpatuhaw ni Jehova ang isa ka balangaw sa panganod, kag ginpaathag niya kon ano ang ginasimbulo sini: “Ginahatag ko ang akon balangaw sa panganod, kag mangin tanda ini sang katipan sa tunga ko kag sang duta. Kag pat-od nga dumdumon ko ang akon katipan sa tunga ko kag ninyo kag sang tagsa ka buhi nga kalag sang tanan nga unod; kag indi na mangin anaw ang mga tubig sa paglaglag sang tanan nga unod.” (Genesis 9:13, 15) Ano, nian, ang ipahanumdom kay Juan sang langitnon nga palanan-awon? Ang balangaw nga iya nakita mahimo gid nga nagpahanumdom sa iya nga kinahanglan ang mahidaiton nga kaangtanan kay Jehova, subong sang ginaagom karon sang Juan nga klase. Ipatudok man sini sa iya hunahuna ang kalinong kag ang paghidait sang presensia ni Jehova, kalinong nga magalapnag sa tanan nga matinumanon nga katawhan kon ihumlad na ni Jehova ang iya tolda sa katawhan sa bag-ong duta nga katilingban.—Salmo 119:165; Filipos 4:7; Bugna 21:1-4.
Kon Sin-o ang 24 ka Gulang
8. Ano ang nakita ni Juan sa palibot sang trono, kag sin-o ang ginatiglawas sini?
8 Nahibaluan ni Juan nga may mga saserdote anay nga gintangdo agod mag-alagad sa dumaan nga tabernakulo. Gani mahimo nga nakibot sia sang makita ang iya masunod nga ginalaragway: “Kag sa palibot sang trono may duha ka pulo kag apat ka trono, kag sa sini nga mga trono nakita ko nga nagalingkod ang duha ka pulo kag apat ka gulang nga nagasuksok sing puti nga mga panapton, kag sa ila ulo may bulawan nga korona.” (Bugna 4:4) Huo, sa baylo sang mga saserdote, may yara 24 ka gulang, nga nagalingkod sa trono kag nakoronahan kaangay sang mga hari. Sin-o ining mga gulang? Wala sing liwan kundi ang mga hinaplas sa Cristiano nga kongregasyon, nga ginbanhaw kag nagalingkod sa langitnon nga katungdanan nga ginsaad sa ila ni Jehova. Paano naton nahibaluan ina?
9, 10. Paano naton nahibaluan nga ang 24 ka gulang nagalaragway sa hinaplas nga Cristiano nga kongregasyon sa mahimayaon nga posisyon sini sa langit?
9 Una sa tanan, may korona sila. Ginasambit sang Biblia ang hinaplas nga mga Cristiano nga makatigayon sing ‘di-madinulunton nga korona’ kag sing kabuhi nga walay katapusan—ang pagkadimamalatyon. (1 Corinto 9:25; 15:53, 54) Apang sanglit nagalingkod sa trono ining 24 ka gulang, ang bulawan nga mga korona sa sining konteksto nagalaragway sa harianon nga awtoridad. (Ipaanggid ang Bugna 6:2; 14:14.) Ginasakdag sini ang konklusion nga ang 24 ka gulang nagalaragway sa hinaplas nga mga sumulunod ni Jesus sa ila langitnon nga katungdanan, kay nakigkatipan si Jesus sa ila nga magalingkod sila sa mga trono sa iya Ginharian. (Lucas 22:28-30) Si Jesus lamang kag ining 24 ka gulang—indi bisan gani ang mga anghel—ang ginalaragway nga nagagahom sa langit sa presensia ni Jehova.
10 Nagahisanto ini sa ginsaad ni Jesus sa kongregasyon sa Laodicea: “Ang isa nga nagadaug tugutan ko nga maglingkod kaupod ko sa akon trono.” (Bugna 3:21) Apang ang katungdanan sa langit sang 24 ka gulang indi ang paggahom lamang. Sa introduksion sang tulun-an sang Bugna, nagsiling si Juan tuhoy kay Jesus: “Ginhimo niya kita nga isa ka ginharian, mga saserdote sa iya Dios kag Amay.” (Bugna 1:5, 6) Mga hari sila kag mga saserdote. “Mangin mga saserdote sila sang Dios kag ni Cristo, kag magagahom subong mga hari upod sa iya sa sulod sang isa ka libo ka tuig.”—Bugna 20:6.
11. Ngaa nagakaigo nga ang numero sang mga gulang 24, kag ano ang kahulugan sina nga numero?
11 Ano ang kahulugan sang numero nga 24, bangod 24 ka gulang ang nakita ni Juan sa palibot sang trono? Sa madamo nga paagi, ginlaragway sila sang matutom nga mga saserdote sang dumaan nga Israel. Nagsulat si apostol Pedro sa hinaplas nga mga Cristiano: “Kamo ‘isa ka pinili nga kaliwatan, isa ka harianon nga pagkasaserdote, isa ka balaan nga pungsod, isa ka katawhan para sa pinasahi nga pagpanag-iya.’” (1 Pedro 2:9) Makawiwili mahibaluan nga ang Judiyo nga mga saserdote sang una nabahinbahin sa 24 ka dibisyon. Ang tagsa ka dibisyon may turno nga mag-alagad sing pila ka semana kada tuig sa atubangan ni Jehova, agod magpadayon ang sagrado nga pag-alagad nga wala sing lang-at. (1 Cronica 24:5-19) Busa, nagakaigo nga 24 ka gulang ang ginlaragway sa palanan-awon ni Juan tuhoy sa mga saserdote sa langit bangod nagaalagad sila kay Jehova sing dalayon, nga wala sing untat. Kon makompleto na, mangin 24 ang mga dibisyon, kag ang tagsatagsa may 6,000 ka mandadaug, kay ang Bugna 14:1-4 nagasugid sa aton nga 144,000 (24 x 6,000) ang ‘ginbakal gikan sa katawhan’ agod magtindog sa langitnon nga Bukid Sion upod sa Kordero nga si Jesucristo. Sanglit ang numero nga 12 nagasimbulo sa isa ka balanse nga organisasyon gikan sa pagtamod sang Dios, ang 24 nagadoble pa—ukon nagapalig-on—sina nga kahimusan.
Mga Kilat, mga Tingog, kag mga Daguob
12. Ano ang masunod nga nakita kag nabatian ni Juan, kag ano ang ginapahanumdom sang “mga kilat kag mga tingog kag mga daguob”?
12 Ano ang masunod nga nakita kag nabatian ni Juan? “Kag may mga kilat kag mga tingog kag mga daguob nga nagagikan sa trono.” (Bugna 4:5a) Ginapahanumdom gid sini ang iban sang makapulunaw nga pagpasundayag sang langitnon nga gahom ni Jehova! Halimbawa, sang “magkunsad” si Jehova sa Bukid Sinai, nagsiling si Moises: “Sang kaagahon sang ikatlo nga adlaw may mga daguob kag mga kilat, kag madamol nga panganod sa ibabaw sang bukid kag tama kabaskog nga tunog sang budyong. . . . Sang ang tunog sang budyong nagapadayon pa sa pagbaskog, nagsugod sa paghambal si Moises, kag ang matuod nga Dios nagsabat sa iya sa isa ka tingog.”—Exodo 19:16-19.
13. Ano ang ginalaragway sang mga kilat nga nagagikan sa trono ni Jehova?
13 Sa tion sang adlaw sang Ginuo, ginapasundayag ni Jehova ang iya gahom kag presensia sa isa ka dalayawon nga paagi. Indi, indi paagi sa literal nga kilat, kay mga tanda ang nakita ni Juan. Ano, nian, ang ginalaragway sang mga kilat? Ang pagkirab sang kilat makahatag sing kasanag, apang makapatay man ini sa bisan sin-o nga maigo sini. Busa, ining mga kilat nga nagagikan sa trono ni Jehova nagakaigo nga nagalaragway sa mga kirab sang kasanagan nga padayon nga ginahatag niya sa iya katawhan kag, mas importante pa, nagalaragway ini sa iya kalayuhon nga mga mensahe sang paghukom.—Ipaanggid ang Salmo 18:14; 144:5, 6; Mateo 4:14-17; 24:27.
14. Paano nagalanog ang mga tingog karon?
14 Ano naman ang mga tingog? Sang nagkunsad si Jehova sa Bukid Sinai, may tingog nga naghambal kay Moises. (Exodo 19:19) Ang mga tingog gikan sa langit nagbungat sing madamo nga sugo kag kapahayagan sa tulun-an sang Bugna. (Bugna 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Sa karon, nagahatag man si Jehova sing mga sugo kag mga kapahayagan sa iya katawhan, amo nga nagasanag ang ila paghangop sa mga tagna kag mga prinsipio sang Biblia. Ang makapasanag nga impormasyon masami nga ginapahayag sa internasyonal nga mga kombension, kag ina nga mga kamatuoran sa Biblia ginapahayag man sa bug-os nga kalibutan. Tuhoy sa matutom nga mga manugbantala sing maayong balita, nagsiling si apostol Pablo: “Sa katunayan, ‘sa bug-os nga duta ang ila tunog naggua, kag ang ila mga pinamulong tubtob sa mga ukbong sang napuy-an nga duta.’”—Roma 10:18.
15. Ano nga mga daguob ang naggikan sa trono sa sining tion sang adlaw sang Ginuo?
15 Ang daguob masami nga nagasunod sa kilat. Ginpatuhuyan ni David ang literal nga daguob subong “tingog ni Jehova.” (Salmo 29:3, 4) Sang nagpakig-away si Jehova para kay David batok sa iya mga kaaway, ang daguob ginsiling nga naggikan sa Iya. (2 Samuel 22:14; Salmo 18:13) Ginsilingan ni Elihu si Job nga ang tingog ni Jehova kaangay sang daguob, kay nagahimo Sia sing “dalagku nga mga butang nga indi naton mahangpan.” (Job 37:4, 5) Sa sini nga bahin sang adlaw sang Ginuo, ‘nagpadaguob,’ si Jehova sing paandam tuhoy sa dalagku nga mga buhat nga himuon niya batok sa iya mga kaaway. Ining simbuliko nga mga tunog sang daguob naglanog kag nagalanog liwat sa bug-os nga duta. Malipayon ikaw kon nagapamati ka sa sining nagadaguob nga mga pagpahayag kag maalamon nga nagagamit sang imo dila agod magbaskog pa ini!—Isaias 50:4, 5; 61:1, 2.
Mga Suga nga Kalayo kag Daw Salaming nga Dagat
16. Ano ang kahulugan sang “pito ka suga nga kalayo”?
16 Ano pa ang nakita ni Juan? Amo ini: “Kag may pito ka suga nga kalayo nga nagadabdab sa atubangan sang trono, kag nagakahulugan ini sang pito ka espiritu sang Dios. Kag sa atubangan sang trono may isa ka daw salaming nga dagat kaangay sang kristal.” (Bugna 4:5b, 6a) Ginasugid sa aton ni Juan mismo ang kahulugan sang pito ka suga: “Nagakahulugan ini sang pito ka espiritu sang Dios.” Ang numero siete nagasimbulo sang pagkakompleto gikan sa pagtamod sang Dios; gani mahimo gid nga ang pito ka suga nagalaragway sa kabug-usan sang nagapasanag nga puersa sang balaan nga espiritu. Nagapasalamat gid ang Juan nga klase karon nga gintugyanan sila sini nga kasanagan, upod ang salabton nga ipaalinton ini sa gutom sa espirituwal nga katawhan sang duta! Malipayon gid kita nga kada tuig ginatos ka milyon nga kopya sang Lalantawan nga magasin ang padayon nga nagapasilak sini nga kapawa sa mga 150 ka lenguahe!— Salmo 43:3.
17. Ano ang ginasimbulo sang “daw salaming nga dagat kaangay sang kristal”?
17 Nakakita man si Juan sing “daw salaming nga dagat kaangay sang kristal.” Ano ang ginasimbulo sini may kaangtanan sa mga gin-agda sa langitnon nga korte ni Jehova? Naghambal si Pablo tuhoy sa kon paano ginapakabalaan ni Jesus ang kongregasyon, “nga ginatinluan ini sang paghugas sang tubig paagi sa pulong.” (Efeso 5:26) Antes sia napatay, ginsilingan ni Jesus ang iya mga disipulo: “Matinlo na kamo bangod sang pulong nga akon napamulong sa inyo.” (Juan 15:3) Busa, mahimo gid nga ining daw salaming nga dagat kaangay sang kristal nagalaragway sa nagatinlo nga nasulat nga Pulong sang Dios. Ang mga katapo sang harianon nga pagkasaserdote nga nagaatubang sa presensia ni Jehova mahimo gid nga natinluan sing bug-os paagi sa iya Pulong.
Tan-awa—“Apat ka Buhi nga Tinuga”!
18. Ano ang nakita ni Juan sa tunga kag sa palibot sang trono?
18 Lain naman ang masunod nga nakita ni Juan. Nagsulat sia: “Kag sa tunga malapit sa trono kag sa palibot sang trono may apat ka buhi nga tinuga nga puno sing mga mata sa atubangan kag sa likod.”—Bugna 4:6b.
19. Ano ang ginalaragway sang apat ka buhi nga tinuga, kag paano naton nahibaluan ini?
19 Ano ang ginalaragway sini nga mga tinuga? Ang palanan-awon nga ginsugid sang isa pa ka manalagna nga si Ezequiel nagabulig sa aton agod mahibaluan naton ang sabat. Nakita ni Ezequiel si Jehova nga nagalingkod sa trono sa isa ka langitnon nga kangga, nga ginaupdan sang buhi nga mga tinuga nga may mga kinaiya kaanggid sang ginlaragway ni Juan. (Ezequiel 1:5-11, 22-28) Sang ulihi, nakita liwat ni Ezequiel yadto nga kangga nga trono nga ginaupdan sang buhi nga mga tinuga. Apang, sini nga tion ginpatuhuyan niya ang buhi nga mga tinuga subong mga kerubin. (Ezequiel 10:9-15) Mahimo gid nga ang apat ka buhi nga tinuga nga nakita ni Juan nagalaragway sa madamo nga kerubin sang Dios—mga tinuga nga may mataas nga ranggo sa Iya organisasyon sang mga espiritu. Indi matingala si Juan nga makita ang mga kerubin nga nagapuesto nga tuman kalapit kay Jehova, kay sa dumaan nga kahimusan sang tabernakulo, may duha ka kerubin nga bulawan nga ginapasundayag sa ibabaw sang takop sang kaban sang katipan, nga nagalaragway sa trono ni Jehova. Gikan sa ulot sining mga kerubin, ang tingog ni Jehova nagbungat sing mga sugo para sa pungsod sang Israel sadto.—Exodo 25:22; Salmo 80:1.
20. Sa ano nga paagi masiling nga ang apat ka buhi nga tinuga yara “sa tunga malapit sa trono kag sa palibot sang trono”?
20 Ining apat ka buhi nga tinuga yara “sa tunga malapit sa trono kag sa palibot sang trono.” Ano gid ang kahulugan sini? Mahimo nga nagakahulugan ini nga nahamtang sila sa palibot sang trono sa isa ka paagi nga ang isa nagatindog sa tunga sang tagsa ka kilid. Sa amo, ginbadbad sang Today’s English Version ang orihinal nga Griegong mga pulong sing subong sini: “nagapalibot sa trono sa tagsa ka kilid sini.” Ukon, mahimo ini magkahulugan nga ang apat ka buhi nga tinuga yara sa sentro sa langit nga nahamtangan sang trono. Mahimo gid nga amo sini kon ngaa ginbadbad sang The Jerusalem Bible ang prase sing subong sini: “sa sentro, nga nagagrupo sa palibot sang trono mismo.” Ang importante amo nga malapit ang mga kerubin sa trono ni Jehova, kaanggid sa mga kerubin nga nakita ni Ezequiel sa tagsa ka pamusod sang organisasyonal nga kangga ni Jehova. (Ezequiel 1:15-22) Ini tanan nagahisanto sa mga pulong sang Salmo 99:1: “Si Jehova nagahari. . . . Nagalingkod sia sa ibabaw sang mga kerubin.”
21, 22. (a) Paano ginalaragway ni Juan ang apat ka buhi nga tinuga? (b) Ano ang ginalaragway sang paglutaw sang tagsa sang apat ka buhi nga tinuga?
21 Nagpadayon si Juan: “Kag ang nahauna nga buhi nga tinuga kaangay sa leon, kag ang ikaduha nga buhi nga tinuga kaangay sa tinday nga baka, kag ang ikatlo nga buhi nga tinuga may nawong kaangay sa iya sang tawo, kag ang ikap-at nga buhi nga tinuga kaangay sa nagalupad nga agila.” (Bugna 4:7) Ngaa magkatuhay ang hitsura sang apat ka buhi nga tinuga? Mahimo gid nga ining pinasahi nga buhi nga mga tinuga nagapadaku sang espesipiko nga mga kinaiya sang Dios. Una, amo ang leon. Ginagamit ang leon sa Biblia subong simbulo sang kaisog, ilabi na sa pagsakdag sang katarungan kag pagkamatarong. (2 Samuel 17:10; Hulubaton 28:1) Sa amo, ang leon nagakaigo nga nagalaragway sa maisugon nga katarungan nga isa ka kinaiya sang Dios. (Deuteronomio 32:4; Salmo 89:14) Ang ikaduha nga buhi nga tinuga nagaanggid sa tinday nga baka. Ano nga kinaiya sang baka ang ginapahanumdom sa imo? Mapuslanon gid ang baka para sa mga Israelinhon anay bangod sang gahom ukon kusog sini. (Hulubaton 14:4; tan-awa man ang Job 39:9-11.) Busa, ang tinday nga baka nagalaragway sa gahom kag dinamiko nga kusog nga ginahatag ni Jehova.—Salmo 62:11; Isaias 40:26.
22 Ang ikatlo nga buhi nga tinuga may nawong nga kaangay sa iya sang tawo. Mahimo gid nga nagalaragway ini sa gugma nga kaangay sa gugma sang Dios, kay diri sa duta ang tawo lamang ang gintuga sa dagway sang Dios, nga nagapakita sing tumalagsahon gid nga sahi sang gugma. (Genesis 1:26-28; Mateo 22:36-40; 1 Juan 4:8, 16) Walay duhaduha nga ginapasundayag sang mga kerubin ini nga kinaiya samtang nagaalagad sila sa palibot sang trono ni Jehova. Kamusta naman ang ikap-at nga buhi nga tinuga? Kaangay ini sang nagalupad nga agila. Ginapatalupangod mismo ni Jehova ang masipat nga panan-aw sang agila: “Ang mga mata sini nagalantaw sa malayo.” (Job 39:29) Busa, ang agila nagakaigo gid nga nagasimbulo sa malayo sing panan-aw nga kaalam. Si Jehova amo ang Tuburan sang kaalam. Ang iya mga kerubin nagagamit sing kaalam sang Dios samtang ginatuman nila ang iya mga sugo.—Hulubaton 2:6; Santiago 3:17.
Ang Pagdayaw kay Jehova Nagalanog
23. Ano ang ginasimbulo sang kamatuoran nga ang apat ka buhi nga tinuga ‘puno sing mga mata,’ kag ano ang ginapadaku sang ila tatlo ka paris nga pakpak?
23 Nagpadayon si Juan sa iya paglaragway: “Kag tuhoy sa apat ka buhi nga tinuga, ang tagsa sa ila may anom ka pakpak; puno sila sing mga mata sa palibot kag sa idalom. Kag wala sila sing pahuway sa adlaw kag gab-i samtang nagasiling sila: ‘Balaan, balaan, balaan si Jehova nga Dios, ang Labing Gamhanan, nga amo anay kag amo karon kag ang magakari.’” (Bugna 4:8) Ang madamo nga mata nagapahangop sang kompleto kag malayo sing panan-aw nga panulok. Wala sing untat nga ginagamit ini sang apat ka buhi nga tinuga, kay wala sila nagakinahanglan sing tulog. Ginailog nila ang Isa nga tuhoy sa iya nasulat na: ‘Ang mga mata ni Jehova nagapanghulonghulong sa bug-os nga duta agod ipakita ang iya kusog para sa ila nga ang tagipusuon himpit sa iya.’ (2 Cronica 16:9) Bangod madamo sila sing mata, ang mga kerubin makakita bisan diin. Wala sing makalampas sa ila panulok. Gani nasangkapan sila sing maayo sa pag-alagad sa Dios sa iya paghukom. Tuhoy sa iya, amo ini ang ginasiling: “Ang mga mata ni Jehova yara sa tagsa ka duog, nga nagabantay sa mga malaut kag sa mga maayo.” (Hulubaton 15:3) Kag paagi sa tatlo ka paris nga pakpak—ang numero tres ginagamit sa Biblia sa pagpadaku—makahulag ang mga kerubin sing subong kadasig sa kilat sa pagpahibalo sang mga paghukom ni Jehova kag sa paghimo sini.
24. Paano ginadayaw sang mga kerubin si Jehova, kag ano ang kahulugan sini?
24 Pamatii! Ang ambahanon sang pagdayaw nga ginaamba sang mga kerubin kay Jehova matahom pamatian kag makapulukaw sang balatyagon: “Balaan, balaan, balaan si Jehova nga Dios, ang Labing Gamhanan, nga amo anay kag amo karon kag ang magakari.” Sa liwat, ang tatlo ka beses nga pagsambit sa tinaga nga balaan nagapahangop sang kabaskugon. Mabakod nga ginapamatud-an sang mga kerubin ang pagkabalaan ni Jehova nga Dios. Sia ang Tuburan kag ang supremo nga Talaksan sang pagkabalaan. Sia man “ang Hari nga dayon,” amo pirme “ang Alpha kag ang Omega, ang nahauna kag ang naulihi, ang ginsuguran kag ang katapusan.” (1 Timoteo 1:17; Bugna 22:13) Wala nagapahuway ang mga kerubin samtang ginapahayag nila ang walay tupong nga mga kinaiya ni Jehova sa tanan nga tinuga.
25. Paano ang buhi nga mga tinuga kag ang 24 ka gulang nagahiusa sa pagdayaw kay Jehova?
25 Nagalanog sa langit sang mga langit ang pagdayaw kay Jehova! Nagpadayon ang paglaragway ni Juan: “Kag kon ang apat ka buhi nga tinuga maghatag sing himaya kag dungog kag pasalamat sa Isa nga nagalingkod sa trono, ang Isa nga nagakabuhi tubtob sa walay katubtuban, ang duha ka pulo kag apat ka gulang nagaluhod sa atubangan sang Isa nga nagalingkod sa trono kag nagasimba sa Isa nga nagakabuhi tubtob sa walay katubtuban, kag gin-itsa nila ang ila mga korona sa atubangan sang trono, nga nagasiling: ‘Takus ka, Jehova, nga amon Dios, nga magbaton sing himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.’” (Bugna 4:9-11) Sa bug-os nga Kasulatan, isa ini sang labing halangdon nga pagpahayag sing pagdayaw kay Jehova, nga aton Dios kag Soberano nga Ginuo!
26. Ngaa ginaitsa sang 24 ka gulang ang ila mga korona sa atubangan ni Jehova?
26 Ang 24 ka gulang may panghunahuna nga subong sang ginapasundayag ni Jesus, nga ginaitsa pa gani ang ila mga korona sa atubangan ni Jehova. Wala gid sa ila hunahuna nga bayawon ang ila kaugalingon sa atubangan sang Dios. Mapainubuson nga ginakilala nila nga ang lamang nga katuyuan sang ila pagkahari amo ang paghatag sing dungog kag himaya sa iya, subong sang pirme ginahimo ni Jesus. (Filipos 2:5, 6, 9-11) Mapainubuson nga ginakilala nila ang ila pagkanubo kag ginapahayag nila nga ang ila paggahom nasandig sa pagkasoberano ni Jehova. Sa amo, tinagipusuon nga nagaugyon sila sa mga kerubin kag sa tanan nga matutom nga mga tinuga sa paghatag sing kadayawan kag himaya sa Dios nga nagtuga sang tanan nga butang.—Salmo 150:1-6.
27, 28. (a) Paano ang paglaragway ni Juan sa sini nga palanan-awon dapat mag-apektar sa aton? (b) Ano nga mga pamangkot ang nagautwas sa kon ano ang masunod nga nakita kag nabatian ni Juan?
27 Sin-o ang indi mapahulag kon mabasa niya ang pag-asoy ni Juan tuhoy sa sini nga palanan-awon? Matahom gid ini kag makadalayaw! Apang ano gid ayhan ang aktual sini? Ang pagkaharianon ni Jehova dapat magpapagsik sa bisan sin-o nga may mainapresyahon nga tagipusuon nga magbuylog sa apat ka buhi nga tinuga kag sa 24 ka gulang sa pagdayaw sa Iya, paagi sa pangamuyo kag sa dayag nga pagpahayag sang Iya ngalan. Amo ini ang Dios nga may pribilehiyo ang mga Cristiano nga mangin mga saksi Niya karon. (Isaias 43:10) Dumduma nga ang palanan-awon ni Juan naaplikar sa adlaw sang Ginuo, nga amo na karon ang aton tion. “Ang pito ka espiritu” yara pirme agod magtuytoy kag magpalig-on sa aton. (Galacia 5:16-18) Ang Pulong sang Dios matigayon karon agod buligan kita nga mangin balaan sa pag-alagad sa balaan nga Dios. (1 Pedro 1:14-16) Sa pagkamatuod, malipayon kita sa pagbasa sing mabaskog sang mga pulong sini nga tagna. (Bugna 1:3) Nagapalig-on gid ini sa aton nga mangin matutom kay Jehova kag indi pagtugutan ang kalibutan nga tublagon kita gikan sa aktibo nga pag-amba sang iya kadayawan!—1 Juan 2:15-17.
28 Tubtob sa sini nga punto, ginlaragway ni Juan ang iya nakita sang gin-agda sia sa pagsulod sa bukas nga ganhaan sa langit. Talalupangdon gid nga ginasugid niya nga si Jehova, sa bug-os nga pagkahalangdon sang Iya pagkahari kag pagkadungganon, nagalingkod sa Iya langitnon nga trono. Ginalibutan sia sang pinakagamhanan sa tanan nga organisasyon—nga nagabadlak sa katahom kag pagkatutom. Ang sesyon sa balaan nga Korte nagsugod na. (Daniel 7:9, 10, 18) Mahanabo ang isa ka tumalagsahon nga butang. Ano ini, kag paano ini nagaapektar sa aton karon? Matan-aw kita samtang ginapakita ini!
[Mga Pamangkot sa Pagtinuon]
[Retrato sa pahina 75]
[Retrato sa pahina 78]
