Kapitulo 4

Nagkari si Jesus nga May Pagpalig-on

1. Kay sin-o karon nagsulat si Juan, kag sin-o karon ang dapat mangin interesado gid sa iya mensahe?

 ANG masunod dapat mangin interesante gid sa tanan nga nagapakig-upod sa mga kongregasyon sang katawhan sang Dios karon. Isa ini ka serye sang mga mensahe. May pinasahi ini nga aplikasyon samtang nagahilapit “ang gintalana nga tion.” (Bugna 1:3) Para sa aton walay katapusan nga kaayuhan nga pamatian naton ining mga kapahayagan. Ang rekord nagasiling: “Halin kay Juan para sa pito ka kongregasyon nga yara sa distrito sang Asia: Kabay nga may yara kamo di-bagay nga kaayo kag paghidait gikan sa ‘Isa nga amo karon kag amo anay kag ang magakari,’ kag gikan sa pito ka espiritu nga yara sa atubangan sang iya trono, kag gikan kay Jesucristo.”—Bugna 1:4, 5a.

2. (a) Ano ang ginasimbulo sang numero nga “pito”? (b) Sang adlaw sang Ginuo, kay sin-o naaplikar ang mga mensahe sa “pito ka kongregasyon”?

² Ginsulatan diri ni Juan ang “pito ka kongregasyon,” kag sa ulihi nga bahin sang tagna ginhingadlan niya ini sa aton. Ang numero nga “pito” masami ginasulit sa Bugna. Nagasimbulo ini sing pagkakompleto, labi na may kaangtanan sa mga butang sang Dios kag sang iya hinaplas nga kongregasyon. Sanglit ang kadamuon sang mga kongregasyon sang katawhan sang Dios sa bug-os nga kalibutan halos isa ka gatos ka libo na sa tion sang adlaw sang Ginuo, mapat-od naton nga ang ginsiling para sa “pito ka kongregasyon” sang mga hinaplas naaplikar man sa tanan nga katawhan sang Dios karon. (Bugna 1:10) Huo, si Juan may importante nga mensahe para sa tanan nga kongregasyon sang mga Saksi ni Jehova kag sa tanan nga nagapakig-upod sa ila, bisan diin man sa duta karon.

3. (a) Sa panamyaw ni Juan, sa diin naghalin ang “di-bagay nga kaayo kag paghidait”? (b) Ano nga mga pulong ni apostol Pablo ang kaanggid sa panamyaw ni Juan?

³ “Di-bagay nga kaayo kag paghidait”—katahom gid sini kag ilabi na kon binagbinagon naton kon sin-o ang ginahalinan sini! Ang “Isa” nga ginahalinan sini amo ang Soberano nga Ginuong Jehova, “ang Hari nga walay katapusan,” nga nagakabuhi “kutob sa tion nga walay latid tubtob sa tion nga walay latid.” (1 Timoteo 1:17; Salmo 90:2) Nadalahig man diri, “ang pito ka espiritu,” isa ka termino nga nagapakita sang bug-os nga pagpanghikot sang aktibo nga puersa sang Dios, ukon balaan nga espiritu, samtang nagahatag ini sing paghangop kag pagpakamaayo sa tanan nga nagatalupangod sa tagna. Ang may yara man importante nga papel amo si “Jesucristo,” nga tuhoy sa iya si Juan sang ulihi nagsulat: “Puno sia sang di-bagay nga kaayo kag kamatuoran.” (Juan 1:14) Sa amo, ang panamyaw ni Juan pareho man sa mga pulong nga ginsambit ni apostol Pablo sa paghinakop sang iya ikaduha nga sulat sa kongregasyon sang mga taga-Corinto: “Ang di-bagay nga kaayo ni Ginuong Jesucristo kag ang gugma sang Dios kag ang pag-ambit sa balaan nga espiritu mangin sa inyo tanan.” (2 Corinto 13:14) Kabay nga ining mga pulong maaplikar man sa aton tanan nga nagahigugma sa kamatuoran karon!—Salmo 119:97.

“Ang Matutom nga Saksi”

4. Paano ginlaragway ni Juan si Jesucristo, kag ngaa nagakaigo gid ining mga paglaragway?

⁴ Masunod kay Jehova, si Jesus amo ang labing mahimayaon nga persona sa uniberso, nga ginakilala ni Juan, kag ginalaragway sia subong “‘ang Matutom nga Saksi,’ ‘Ang panganay gikan sa mga patay,’ kag ‘Ang Manuggahom sang mga hari sang duta.’” (Bugna 1:5b) Kaangay sang bulan sa langit, malig-on sia nga natukod subong labing daku nga Saksi sa pagka-Dios ni Jehova. (Salmo 89:37) Sa tapos niya mahuptan ang iya integridad tubtob sa mahalaron nga kamatayon, sia ang una gikan sa katawhan nga ginbanhaw padulong sa di-mamalatyon nga kabuhi subong espiritu. (Colosas 1:18) Karon sa atubangan mismo sang presensia ni Jehova, ginabayaw  sia labaw sa tanan nga hari sang duta, kag ginhatagan sing “bug-os nga awtoridad sa langit kag sa duta.” (Mateo 28:18; Salmo 89:27; 1 Timoteo 6:15) Sang 1914 ginpalingkod sia subong Hari agod maggahom sa tunga sang mga pungsod sa duta.—Salmo 2:6-9.

5. (a) Paano si Juan nagpadayon sa pagpabutyag sing apresasyon kay Ginuong Jesucristo? (b) Sin-o ang nagabenepisyo sa pagdulot ni Jesus sang iya himpit nga tawhanon nga kabuhi, kag paano ang hinaplas nga mga Cristiano nakaambit sa pinasahi nga pagpakamaayo?

⁵ Si Juan nagpadayon sa pagpabutyag sing apresasyon kay Ginuong Jesucristo sa sining makalilipay nga mga pulong: “Sa iya nga nagahigugma sa aton kag naghilway sa aton gikan sa aton mga sala paagi sa iya dugo—kag ginhimo niya kita nga isa ka ginharian, mga saserdote sa iya Dios kag Amay—huo, mangin sa iya ang himaya kag ang gahom sing dayon. Kabay pa.” (Bugna 1:5c, 6) Ginhatag ni Jesus ang iya himpit nga tawhanon nga kabuhi agod nga ang bisan sin-o sa kalibutan sang katawhan nga magatuo sa iya mapasag-uli sa himpit nga kabuhi. Ikaw, nga mahal nga bumalasa, mahimo malakip sa sini! (Juan 3:16) Apang ang mahalaron nga kamatayon ni Jesus nagbukas sang dalan agod makatigayon sing pinasahi nga pagpakamaayo ang mga nangin hinaplas nga mga Cristiano kaangay ni Juan. Ginpahayag sila nga matarong pasad sa halad nga gawad ni Jesus. Paagi sa pagsikway sang tanan nga dutan-on nga paglaum sa kabuhi, subong sang ginhimo ni Jesus, ang mga katapo sang diutay nga panong ginpanganak sang espiritu sang Dios, upod ang paglaum nga banhawon agod mag-alagad subong mga hari kag mga saserdote upod kay Jesucristo sa iya Ginharian. (Lucas 12:32; Roma 8:18; 1 Pedro 2:5; Bugna 20:6) Daw ano ka daku nga pribilehiyo! Indi katingalahan nga si Juan nagtuaw sing positibo gid nga ang himaya kag gahom iya ni Jesus!

‘Nagakari Upod sa mga Panganod’

6. (a) Ano ang ginapahibalo ni Juan nahanungod sa ‘pagkari ni Jesus kaupod sang mga panganod,’ kag mahimo nga ginpahanumdom si Juan sang ano nga tagna ni Jesus? (b) Paano si Jesus “nagakari,” kag sin-o ang makaeksperiensia sing daku nga kasubo sa duta?

⁶ Masunod, si Juan malipayon nga nagpahibalo: “Yari karon! Nagakari sia upod sa mga panganod, kag ang tagsa ka mata makakita sa iya, kag ang mga nagbuno sa iya; kag ang tanan nga tribo sang duta magapukpok sang ila kaugalingon sa kasubo bangod sa iya. Huo, kabay pa.” (Bugna 1:7) Wala sing duhaduha nga ginpahanumdom diri si Juan sang gintagna anay ni Jesus tuhoy sa katapusan sang sistema sang mga butang. Nagsiling si Jesus: “Nian makita sa langit ang tanda sang Anak sang tawo, kag nian ang tanan nga tribo sa duta magapukpok sang ila kaugalingon sa kalisod, kag makita nila ang Anak sang tawo nga nagakari sa mga panganod sa langit nga may gahom kag daku nga himaya.” (Mateo 24:3, 30) Sa amo,  ‘magakari’ si Jesus paagi sa pagliso sang iya igtalupangod agod himuon ang paghukom ni Jehova batok sa mga pungsod. Magaresulta ini sa daku nga mga pagbag-o sa duta, kag sanglit “ang tanan nga tribo sa duta” wala magsapak sa katunayan sang pagkahari ni Jesus, maeksperiensiahan gid nila “ang kapintas sang kasingkal sang Dios nga Labing Gamhanan.”—Bugna 19:11-21; Salmo 2:2, 3, 8, 9.

7. Paano ang “tagsa ka mata,” lakip ang mga di-matinumanon, “makakita” kay Jesus?

⁷ Sang katapusan nga gab-i ni Jesus upod sa iya mga disipulo, ginsingganan niya sila: “Sa malip-ot pa nga tion kag ang kalibutan indi na makakita sa akon.” (Juan 14:19) Paano, nian, nga “ang tagsa ka mata makakita sa iya”? Indi naton dapat paabuton nga si Jesus makita sang iya mga kaaway paagi sa ila pisikal nga mga mata, kay si apostol Pablo nagsiling, sa tapos magkayab si Jesus sa langit, nga si Jesus karon “nagapuyo sa kapawa nga di-mapalapitan,” kag “wala sing tawo nga nakakita ukon makakita” sa iya. (1 Timoteo 6:16) Mahimo gid nga ang buot silingon ni Juan sa tinaga nga “makakita” amo ang “paghantop,” subong nga makita naton, ukon mahantop, ang di-makita nga mga kinaiya sang Dios paagi sa iya mga tinuga. (Roma 1:20) Si Jesus ‘nagakari upod sa mga panganod’ sa kahulugan nga indi sia makita sang literal nga mga mata subong nga ang adlaw indi makita kon natakpan ini sang mga panganod. Bisan pa ang adlaw ginatakpan sang mga panganod kon adlaw, nahibaluan naton nga yara ang adlaw bangod sang kasanag sa palibot naton. Sing kaanggid, bisan pa indi makita si Ginuong Jesus, ipahayag sia kaangay sang ‘nagadabdab nga kalayo, samtang nagatimalos sia sa mga wala nagatuman sa maayong balita tuhoy sa iya.’ Mapilitan man sila nga ‘makita sia.’—2 Tesalonica 1:6-8; 2:8.

8. (a) Sin-o ang “mga nagbuno sa iya” sang 33 C.E., kag sin-o sila karon? (b) Sanglit si Jesus wala na sa duta, paano sia ‘mabuno’ sang mga tawo?

⁸ ‘Makita’ man si Jesus sang “mga nagbuno sa iya.” Sin-o sila? Sang ginpatay si Jesus sang 33 C.E., literal nga ginbuno sia sang Romano nga mga soldado. May bahin ang mga Judiyo sa sadto nga sala sa pagpatay, kay ginsingganan ni Pedro ang iban sa ila sang Pentecostes: “Ginhimo sia sang Dios nga Ginuo kag Cristo, si Jesus nga ginlansang ninyo sa usok.” (Binuhatan 2:5-11, 36; ipaanggid ang Zacarias 12:10; Juan 19:37.) Yadtong mga Romano kag mga Judiyo patay na karon sa halos 2,000 ka tuig. Gani ang mga ‘nagabuno’ sa iya karon mahimo gid nga nagarepresentar sa mga pungsod kag mga tawo nga nagapakita sing amo man nga pagdumot nga ginpakita sang ginlansang si Jesus. Wala na sa duta si Jesus. Apang kon ginahingabot sang mga manugpamatok ang mga Saksi ni Jehova, nga nagapanaksi kay Jesus, ukon nagahipos lang sila sa sina nga pagtratar, daw subong nga ina nga mga manugpamatok ‘nagabuno’ kay Jesus mismo.—Mateo 25:33, 41-46.

“Ang Alpha kag ang Omega”

9. (a) Sin-o karon ang nagahambal, kag makapila sia naghambal sa Bugna? (b) Ano ang buot silingon sang pagtawag ni Jehova sa iya kaugalingon nga “ang Alpha kag ang Omega” kag “Labing Gamhanan?”

⁹ Karon, kalatingalahan sa mga kalatingalahan! Ang Soberano nga Ginuong Jehova mismo nagahambal. Nagakaigo gid ini subong introduksion sa mga palanan-awon nga buot na ipahayag, kay sia ang aton Dakung Instruktor kag Ginahalinan gid sang Bugna! (Isaias 30:20) Ang aton Dios nagasiling: “Ako ang Alpha kag ang Omega, . . . ang Isa nga amo karon kag amo anay kag ang magakari, ang Labing Gamhanan.” (Bugna 1:8) Amo ini ang una sa tatlo ka kahigayunan sa Bugna nga si Jehova mismo naghambal gikan sa langit. (Tan-awa man ang Bugna 21:5-8; 22:12-15.) Madali nga makilala sang mga Cristiano sang una nga siglo ang alpha kag ang omega subong una kag katapusan nga letra sang Griegong alpabeto. Ang pagtawag ni Jehova sa iya kaugalingon paagi sa sining duha ka letra, nagapadaku nga una sa iya, wala sing labing gamhanan nga Dios, kag wala na sing iban pa masunod sa iya. Sing madinalag-on, tapuson niya sing dayon ang hulusayon tuhoy sa pagka-Dios. Ibindikar sia sing dayon subong isa kag ang lamang nga labing gamhanan nga Dios, ang Supremo nga Soberano sa ibabaw sang tanan niya nga tinuga.—Ipaanggid ang Isaias 46:10; 55:10, 11.

10. (a) Paano masunod nga ginlaragway ni Juan ang iya kaugalingon, kag diin sia ginbilanggo? (b) Ang linukot nga ginsulat ni Juan mahimo gid nga ginpadala sa mga kongregasyon sa bulig nanday sin-o? (c) Paano ang espirituwal nga pagkaon masami nga ginaaman karon?

¹⁰ Nagasalig nga tuytuyan ni Jehova ang mangin resulta sang mga butang, ginsingganan ni Juan ang iya mga masigkaulipon: “Ako si Juan, ang inyo utod kag umalambit upod sa inyo sa kapipit-an kag sa ginharian kag sa pagbatas upod kay Jesus, yara sa isla sang Patmos bangod sa paghambal tuhoy sa Dios kag sa pagpanaksi  tuhoy kay Jesus.” (Bugna 1:9) Isa ka bilanggo sa Patmos bangod sa maayong balita, nagabatas sing mga kapipit-an upod sa iya mga utod, nagalaum gid nga makaambit sa nagapakari nga Ginharian, nakita karon sang tigulang na nga si Juan ang una sa mga palanan-awon sa Bugna. Wala sing duhaduha nga napalig-on gid sia sining mga palanan-awon, subong nga ang Juan nga klase ginapapagsik karon sa pagtan-aw sa katumanan sini. Wala naton nahibal-an kon paano ginpadala ni Juan ang linukot sang Bugna sa mga kongregasyon, bangod bilanggo sia sadto. (Bugna 1:11; 22:18, 19) Mahimo gid nga ang mga anghel ni Jehova nagbulig agod matigayon ini, subong nga masami nila gin-amligan ang matutom nga mga Saksi ni Jehova nga nagaalagad walay sapayan sang mga pagdumili karon, amo kon ngaa nadalhan nila sing sibu sa tion nga espirituwal nga pagkaon ang ila gutom sa kamatuoran nga mga kauturan.—Salmo 34:6, 7.

11. Ano nga pribilehiyo, nga kaanggid sa gin-apresyar ni Juan, ang ginapakabahandi gid karon sang Juan nga klase?

¹¹ Pat-od nga gin-apresyar gid ni Juan ang iya pribilehiyo nga gamiton ni Jehova subong Iya alagyan sang pagpaalinton sa mga kongregasyon! Sing kaanggid, ginapakabahandi gid karon sang Juan nga klase ang ila pribilehiyo sa pag-aman sa panimalay sang Dios sing espirituwal nga “pagkaon sa nagakaigo nga tion.” (Mateo 24:45) Kabay nga isa ikaw sa mga ginapalig-on sining espirituwal nga aman agod nga matigayon mo ang makalilipay nga tulumuron nga kabuhi nga walay katapusan!—Hulubaton 3:13-18; Juan 17:3.

[Mga Pamangkot sa Pagtinuon]

[Kahon sa pahina 21]

Pagbaton Sing Espirituwal nga Pagkaon sa Mabudlay nga mga Tion

Sa sining katapusan nga mga adlaw, nga nag-antos ang mga Saksi ni Jehova sing daku nga paghingabot kag kabudlayan, nangin importante gid nga makabaton sila sing espirituwal nga pagkaon agod magpabilin sila nga mabakod sa pagtuo. Sa masami, nahatag ang bastante nga bulig, bangod sa pila ka talalupangdon nga mga pagpasundayag sang gahom ni Jehova.

Halimbawa, sa Alemanya sa idalom ni Hitler, gin-mimeograph kag ginpanagtag sang mga Saksi ang mga kopya sang Ang Lalantawan, walay sapayan nga opisyal nga gindumilian ini sang mapintas nga Nazi nga mga awtoridad. Sa Hamburg ginsalakay sang mga Gestapo ang balay diin ginahimo ini nga pag-mimeograph. Gamay lamang ini nga balay, kag wala sing lugar sa sini nga mataguan sang bisan ano. Ang makinilya ginbilin sa sulod sang kabinet sang mga pinggan, kag ang daku nga makina sa pag-mimeograph gintago sa sulod sang kahon sang patatas sa silong sang balay. Dugang pa, may isa ka maleta nga puno sing mga magasin sa likod sang kahon! Daw indi malikawan nga matukiban gid ini. Apang ano ang natabo? Sang ginbuksan sang isa ka opisyal ang kabinet, ginhimo niya ini sa isa ka paagi nga wala niya makita ang makinilya. Tuhoy naman sa silong sang balay, ang tagbalay nagreport: “Nagtindog ang tatlo ka opisyal sa tunga sang kuarto, didto mismo sa nahamtangan sang kahon sang patatas upod ang maleta nga puno sing mga Lalantawan sa likod sini. Apang daw wala nila ini matalupangdan, nga subong bala nabulagan sila.” Bangod sining talalupangdon nga bulig sang Dios, ini nga panimalay padayon nga nag-abiyo sing espirituwal nga pagkaon walay sapayan sang mabudlay kag makatalagam nga mga tion.

Sang katuigan 1960, nagdabdab ang inaway sibil sa ulot sang Nigeria kag sang nagbulag nga probinsia sang Biafra. Sanglit ang Biafra ginalibutan sang teritoryo sang Nigeria, isa lamang ka hulugpaan sang eroplano ang nagaangot sini sa iban nga bahin sang kalibutan. Nagakahulugan ini nga ang mga Saksi sa Biafra yara sa katalagman nga mautdan sing suplay sang espirituwal nga pagkaon. Nian, sang maaga nga bahin sang 1968, gin-asayn sang awtoridad sang Biafra ang isa nila ka tinawo sa serbisyo sibil sa isa ka importante nga katungdanan sa Europa kag ang isa pa gid gin-asayn sa hulugpaan sang Biafra. Natabuan nga ining duha lunsay mga Saksi ni Jehova, kag yara sila sa duha ka punta sang lamang nga sugpon nga nagaangot sang Biafra sa iban nga bahin sang kalibutan. Ginkilala sining duha nga si Jehova ang nagpahanabo sini nga kahimusan. Gani, nagboluntaryo sila para sa delikado kag makatalagam nga hilikuton sa pagpasulod sing espirituwal nga pagkaon sa Biafra. Kag nahimo nila ini sa bug-os nga tion nga may inaway. Ang isa sa ila nagkomento: “Mabudlay patihan nga ini nga kahimusan padihot sang tawo.”

[Chart sa pahina 19]

Simbuliko nga mga Numero sa Bugna

Numero Simbuliko nga Kahulugan

2 Nagasimbulo sa mabakod nga pagpamatuod sa isa ka butang.

(Bugna 11:3, 4; ipaanggid ang Deuteronomio 17:6.)

3 Nagapahangop sing pagpadaku. Nagapakita man sing

kabaskugon. (Bugna 4:8; 8:13; 16:13, 19)

4 Nagasimbulo sa pagkabug-os uniberso ukon pagkakuadrado

sa proporsion. (Bugna 4:6; 7:1, 2; 9:14; 20:8; 21:16)

6 Nagasimbulo sa pagkadihimpit, butang nga indi normal,

makahalawhaw. (Bugna 13:18; ipaanggid ang 2 Samuel 21:20.)

7 Nagasimbulo sa pagkakompleto suno sa talaksan sang Dios,

nagapatuhoy man ini sa mga katuyuan ni Jehova ukon ni

Satanas. (Bugna 1:4, 12, 16; 4:5; 5:1, 6; 10:3, 4; 12:3)

10 Nagasimbulo sa pagkabug-os ukon pagkakompleto sa

pisikal nga paagi, may kaangtanan sa mga butang sa

duta. (Bugna 2:10; 12:3; 13:1; 17:3, 12, 16)

12 Nagasimbulo sa organisasyon nga ginpatok sang Dios sa

langit ukon sa duta. (Bugna 7:5-8; 12:1; 21:12, 16; 

22:2)

24 Nagasimbulo sa bugana (doble) nga pang-organisasyonal

nga kahimusan ni Jehova. (Bugna 4:4)

Ang iban nga mga numero nga ginasambit sa Bugna dapat hangpon sing literal. Sa masami, ang konteksto nagabulig sa paghibalo sini. (Tan-awa ang Bugna 7:4, 9; 11:2, 3; 12:6, 14; 17:3, 9-11; 20:3-5.)