Kapitulo 11

Yara Bala ang Imo Ngalan sa Libro Sang Kabuhi?

SARDIS

1. Ano ang espirituwal nga kahimtangan sang kongregasyon sa Sardis, kag paano ginsugdan ni Jesus ang iya mensahe?

 MGA 50 kilometros pabagatnan gikan sa moderno nga Akhisar (Tiatira) amo ang nahamtangan sang masunod nga kongregasyon nga magabaton sing mensahe gikan sa ginhimaya nga si Jesus: ang Sardis. Sang ikan-om nga siglo antes sang aton Kumon nga Dag-on, ini nga siudad amo ang bugalon nga kapital sang dumaan nga ginharian sang Lidia kag ang sentro sang tuman ka manggaranon nga si Hari Croesus. Sang panahon ni Juan, nakaagi ini sing kapiutan, kag ang himaya sini anay sa idalom ni Croesus isa na lamang ka maragtas. Sing kaanggid, ang Cristianong kongregasyon didto nag-imol man sa espirituwal. Sa una nga tion, wala ginsugdan ni Jesus ang iya mensahe sing pulong sang komendasyon. Sa baylo, nagsiling sia: “Kag sa anghel sang kongregasyon sa Sardis isulat mo: Amo ini ang mga butang nga ginasiling niya nga may pito ka espiritu sang Dios kag pito ka bituon, ‘Nahibaluan ko ang imo mga buhat, nga may ngalan ka nga ikaw buhi, apang ikaw patay.’”—Bugna 3:1.

2. (a) Ano ang kahulugan sa mga Cristiano sa Sardis nga si Jesus may “pito ka espiritu”? (b) Ano ang reputasyon sang kongregasyon sa Sardis, apang ano ang mga katunayan?

 ² Ngaa ginapakilala ni Jesus ang iya kaugalingon subong isa “nga may pito ka espiritu”? Bangod ini nga mga espiritu nagalaragway sa balaan nga espiritu ni Jehova nga nagailig sing bug-os. Sang ulihi, ginlaragway man ini ni Juan subong “pito ka mata,” nga nagapakita sang nagalapos nga panulok nga ginhatag kay Jesus sang balaan nga espiritu sang Dios. (Bugna 5:6) Sa amo, may ikasarang sia sa pagtukib kag sa pag-atubang sang bisan ano nga kahimtangan nga mahimo magluntad. (Mateo 10:26; 1 Corinto 4:5) Ang kongregasyon sa Sardis kilala nga buhi kag aktibo. Apang makita ni Jesus nga patay ini sa espirituwal. Mahimo gid nga ang kalabanan nga katapo sini liwat nga daw nagapabaya lang nga amo anay ang kahimtangan nila antes sila mangin mga Cristiano.—Ipaanggid ang Efeso 2:1-3; Hebreo 5:11-14.

3. (a) Ngaa dapat labi na nga talupangdon sang “anghel sang kongregasyon sa Sardis” ang katunayan nga si Jesus may “pito ka bituon”? (b) Ano nga mabaskog nga laygay ang ginhatag ni Jesus sa kongregasyon sa Sardis?

³ Ginpahanumdom man ni Jesus “ang anghel sang kongregasyon sa Sardis” nga Sia ang isa nga may “pito ka bituon.” Ginauyatan niya ang mga gulang sang kongregasyon sa iya tuo nga kamot, bangod may awtoridad sia nga tuytuyan sila sa ila pagbantay nga hilikuton. Dapat mangin interesado gid sila nga ‘mahibaluan ang dagway sang panong.’ (Hulubaton 27:23) Gani, dapat nila pamatian ang masunod nga mga pulong ni Jesus: “Mangin mabinantayon, kag palig-una ang mga butang nga nabilin nga malapit na mapatay, kay ang imo mga buhat wala ko masapwan nga nahimo sing bug-os sa atubangan sang akon Dios. Busa, padayon nga dumduma ang imo nabaton kag ang imo nabatian, kag padayon nga tumana ini, kag maghinulsol. Kon indi ka magmata, pat-od nga magaabot ako subong sang kawatan, kag indi mo gid mahibaluan kon ano nga oras ako magaabot sa imo.”—Bugna 3:2, 3.

4. Paano ang mga pulong ni Pedro nakabulig sa kongregasyon sa Sardis sa ‘pagpalig-on sa mga butang nga nabilin’?

⁴ Dapat dumdumon sang mga gulang sa Sardis ang kalipay nga una nila nabatyagan sang matun-an nila ang kamatuoran kag ang mga pagpakamaayo nga nabaton nila sadto. Apang karon patay sila sa espirituwal nga pagpanghikot. Ang suga sang ila kongregasyon nagakipawkipaw bangod sang kakulang sing mga buhat sang pagtuo. Mga tinuig antes sini, ginsulatan ni apostol Pedro ang mga kongregasyon sa Asia (mahimo gid lakip ang Sardis) nga palig-unon nila ang apresasyon sa makalilipay nga maayong balita nga ginbaton sang mga Cristiano kag ginbantala “upod sa balaan nga espiritu nga ginpadala gikan sa langit”—nga ginlaragway sang pito ka espiritu sa palanan-awon ni Juan. Ginpahanumdom man ni Pedro yadtong mga Cristiano sa Asia nga sila ‘isa ka pinili nga kaliwatan, isa ka harianon nga pagkasaserdote, isa ka balaan nga pungsod, isa ka katawhan nga pinasahi nga ginapanag-iyahan, agod ibantala nila sing lapnag ang pagkahalangdon sang isa nga nagtawag sa ila gikan sa kadudulman pakadto sa iya makatilingala nga kapawa.’ (1 Pedro 1:12, 25; 2:9) Ang pagpamalandong sa sining espirituwal nga mga kamatuoran magabulig sa kongregasyon sa Sardis sa paghinulsol kag ‘pagpalig-on sang mga butang nga nabilin.’—Ipaanggid ang 2 Pedro 3:9.

5. (a) Ano ang natabo sa apresasyon sang mga Cristiano sa Sardis? (b) Ano ang matabo kon ang mga Cristiano sa Sardis indi magsunod sa laygay ni Jesus?

⁵ Sadto nga tion, ang ila apresasyon kag gugma sa kamatuoran kaangay sang kalayo nga halos napalong na. Pila na lamang ka baga ang padayon nga nagabaga. Ginpalig-on sila ni Jesus nga kuyaban ang baga, pasagrabon ang kalayo, maghinulsol sa ila mga sala nga resulta sang ila pagpatumbaya, kag mangin isa liwat ka kongregasyon nga buhi sa espirituwal. (Ipaanggid ang 2 Timoteo 1:6, 7.) Kay kon indi, kon hinali nga mag-abot si Jesus—“subong sang kawatan”—sa paghukom, ang kongregasyon sa Sardis indi makahanda.—Mateo 24:43, 44.

Magaabot “Subong Sang Kawatan”

6. Paano si Jesus nag-abot “subong sang kawatan” sang 1918, kag ano nga kahimtangan ang nasapwan niya sa tunga sang iya nagapangangkon nga mga sumulunod?

⁶ Ang paandam ni Jesus nga magaabot sia “subong sang kawatan” naaplikar gihapon tubtob karon. Pinasahi ini nga naaplikar sa mga Cristiano nga buhi pa sang adlaw sang Ginuo. Wala magdugay pagligad sang 1914, natuman ang tagna ni Malaquias: “‘Hinali nga magaabot sa Iya templo ang matuod nga Ginuo, nga ginapangita ninyo, kag ang mensahero sang katipan nga ginakahamut-an ninyo. Yari karon! Pat-od nga magaabot sia,’ siling ni Jehova sang mga kasuldadusan.” (Malaquias 3:1; Bugna 1:10) Subong “mensahero sang katipan,” nag-abot si Jesus agod usisaon  kag hukman ang mga nagapangangkon nga iya mga sumulunod. (1 Pedro 4:17) Sadtong tion, sang 1918, ang Cristiandad nadalahig sa pagpatulo sing dugo sa Bug-os Kalibutan nga Inaway I kag patay gid, sa espirituwal nga paghambal. Bisan ang matuod nga mga Cristiano, nga antes sang inaway makugi nga nagbantala, nakaeksperiensia man sing tion sang espirituwal nga pagkatuyo. Ang iban sang ila prominente nga mga gulang ginbilanggo, kag ang pagbantala nga hilikuton halos nag-untat na. Sang ginpukaw sang espiritu ni Jehova ining mga Cristiano sang tuig nga masunod, indi tanan nakahanda. Ang iban, kaangay sang buangbuang nga mga ulay sa parabola ni Jesus, wala masangkapi sa espirituwal para sa pribilehiyo sang pag-alagad kay Jehova. Apang, makalilipay, nga kaangay sang mainandamon nga mga ulay, madamo ang nagpamati sa paandam ni Jesus: “Busa, magpadayon kamo sa pagbantay, bangod wala kamo makahibalo sang adlaw ukon sang oras.”—Mateo 25:1-13.

7. Ngaa dapat karon magpabilin nga nagamata ang mga Cristiano?

⁷ Ang kinahanglanon nga mangin alisto ang Cristiano wala matapos sang maaga nga bahin sang adlaw sang Ginuo. Sa iya daku nga tagna tuhoy sa “tanda kon ining tanan nga butang napat-od na nga magadangat sa katapusan,” naghatag si Jesus sing mabaskog nga paandam: “Tuhoy sa amo nga adlaw ukon oras wala sing nakahibalo . . . Magpadayon kamo nga nagabantay, magpadayon kamo nga nagamata, kay wala kamo makahibalo kon san-o ang gintalana nga tion. Apang ang ginasiling ko sa inyo ginasiling ko sa tanan, Magpadayon kamo sa pagbantay.” (Marcos 13:4, 32, 33, 37) Huo, tubtob sa sini gid nga oras, ang tagsatagsa sa aton, sang hinaplas ukon sang dakung kadam-an, dapat magpabilin nga alisto kag magpanikasog gid nga indi kita matulugan sa espirituwal. Kon mag-abot ang adlaw ni Jehova “subong sang kawatan sa gab-i,” kabay nga masapwan kita nga nagamata agod makabaton kita sing paborable nga paghukom.—1 Tesalonica 5:2, 3; Lucas 21:34-36; Bugna 7:9.

8. Paano ginapapagsik sang Juan nga klase karon ang katawhan sang Dios agod magpabilin nga buhi sa espirituwal?

⁸ Ang Juan nga klase karon nagamata sa kinahanglanon nga papagsikon ang katawhan sang Dios sa pagpabilin nga buhi sa espirituwal. Sa sining katuyuan, ang pinasahi nga mga pagtinipon ginahimos sa bug-os nga duta sing makapila kada tuig. May isa ka tuig kasan-o lang nga ang kabilugan nga nagtambong sa 2,981 ka distrito nga kombension 10,953,744, kag 122,701 ka bag-o nga mga tumuluo ang ginbawtismuhan. Sa kapin sa isa ka gatos ka tuig na, ginagamit sang Juan nga klase ang Lalantawan nga magasin sa pagbantala sang ngalan kag katuyuan ni Jehova. Bilang reaksion sa mabaskog nga mga paghingabot sa tion sang duha ka bug-os kalibutan nga inaway, ginpukaw sang Ang Lalantawan ang mga Saksi ni Jehova nga papagsikon liwat ang ila kakugi paagi sa pagbalhag sing mga artikulo subong sang “Bulahan ang mga Wala Sing Kahadlok” (1919), “Isa ka Panawag sa Paghikot” (1925), kag “Lutusa ang Paghingabot” (1942).

9. (a) Ano ang dapat ipamangkot sang tanan nga Cristiano sa ila kaugalingon? (b) Ano nga pagpalig-on ang ginhatag sang Ang Lalantawan?

⁹ Subong sang sa Sardis, importante nga padayon nga usisaon sang tanan nga Cristiano sa mga kongregasyon karon ang ila kaugalingon. Dapat nga padayon naton tanan nga pamangkuton ang aton kaugalingon: Ang aton bala ‘mga buhat nahimo sing bug-os’ sa atubangan sang aton Dios? Wala ginahukman ang iban, ginapalambo bala naton mismo espiritu sang pagsakripisyo sang kaugalingon kag nagatinguha sa paghatag sing bug-os-kalag nga pag-alagad sa Dios? May kaangtanan sa sini, ang Lalantawan nga magasin naghatag sing pagpalig-on paagi sa pagbinagbinag sang mga topiko subong sang “Padayon nga Pamatud-i Kon Ano Kamo” kag “Indi Na Magkabuhi Para sa Aton Kaugalingon.” * Paagi sa sining Makasulatanhon nga bulig, usisaon naton ang aton nasulod nga pagkatawo samtang nagatinguha kita sa paglakat sing mapainubuson kag mapangamuyuon nga may integridad sa atubangan ni Jehova.—Salmo 26:1-3; 139:23, 24.

“Pila ka Ngalan”

10. Ano nga makapalig-on nga butang ang natalupangdan ni Jesus sa kongregasyon sa Sardis, kag paano ini dapat mag-apektar sa aton?

¹⁰ Ang masunod nga mga pulong ni Jesus sa kongregasyon sa Sardis makapalig-on gid. Nagsiling sia: “‘Apang, may yara ikaw pila ka ngalan sa Sardis nga wala maghigko sang ila mga panapton, kag magalakat sila upod sa akon nga may puti nga mga panapton, bangod takus sila. Gani, sia nga nagadaug magasuksok sing puti nga  mga panapton; kag indi ko gid pagpanason ang iya ngalan sa libro sang kabuhi, kundi kilalahon ko ang iya ngalan sa atubangan sang akon Amay kag sa atubangan sang iya mga anghel.” (Bugna 3:4, 5) Wala bala ining mga pulong nagapukaw sa aton kag nagapalig-on sang aton determinasyon nga mangin matutom? Bangod sang pagpatumbaya sang hubon sang mga gulang, ang kongregasyon sa kabilugan mahimo makatulog sing hamuok sa espirituwal. Apang, ang pila ka indibiduwal sa sulod sini mahimo magtinguha sing maisugon nga huptan ang ila Cristianong identidad nga putli kag wala nadagtaan kag sa amo padayon nga nagahupot sing maayo nga ngalan sa atubangan ni Jehova.—Hulubaton 22:1.

11, 12. (a) Bisan sa tion sang daku nga apostasya, paano ang iban mahimo gid nga nangin kaangay sang matutom nga “pila ka ngalan” sa Sardis? (b) Ano nga paumpaw ang nag-abot sa tulad-trigo nga mga Cristiano sa tion sang adlaw sang Ginuo?

¹¹ Huo, ang “mga panapton” nagapatuhoy sa matarong nga identidad sang isa ka tawo subong Cristiano. (Ipaanggid ang Bugna 16:15; 19:8.) Pat-od gid nga nalipay si Jesus sa pagtan-aw nga, walay sapayan sang indi pagsapak sang kalabanan, ang “pila ka ngalan,” ang pila ka hinaplas nga mga Cristiano sa Sardis, nakatipig sini nga identidad. Sing kaanggid, sang ang nagapangangkon nga mga Cristiano napaidalom sa Babilonia nga Daku, ang bug-os kalibutan nga emperyo sang butig nga relihion, sa tion sang malawig nga mga siglo sang daku nga apostasya, pat-od gid nga may yara sadto pila ka indibiduwal nga nagtinguha, walay sapayan sang daku nga mga kabudlayan, nga himuon ang kabubut-on ni Jehova. Matarong ini sila kaangay sang trigo nga natago sa tunga sang madamol nga gamhon sang mga sekta.—Bugna 17:3-6; Mateo 13:24-29.

¹² Nagsaad si Jesus nga mangin kaupod sia sining tulad-trigo nga mga Cristiano sa “tanan nga adlaw tubtob sa katapusan sang sistema sang mga butang.” Nakilala niya kon sin-o sila kag kon ano nga maayo nga mga ngalan ang nahimo nila para sa ila kaugalingon. (Mateo 28:20; Manugwali 7:1) Handurawa ang kalipay sang matutom nga “pila” nga buhi pa sang magsugod ang adlaw sang Ginuo! Ginpain sila sang ulihi gikan sa patay sa espirituwal nga Cristiandad kag gintipon sa isa ka matarong nga kongregasyon nga mas kaanggid sa kongregasyon sa Smirna.—Mateo 13:40-43.

13. Ano nga mga pagpakamaayo ang nagahulat sa hinaplas nga mga Cristiano nga wala “maghigko sang ila mga panapton”?

¹³ Ang mga sa Sardis nga matutom tubtob sa katapusan kag wala nagahigko sang ila Cristianong identidad makaagom sing makalilipay nga paglaum. Sa tapos matukod ang Mesianikong Ginharian ni Jesus sang 1914, ginbanhaw sila sa espiritu nga kabuhi kag subong mga mandadaug ginpanaptan sila sing puti nga mga panapton bilang simbulo sang ila wala sing mansa, wala sing dagta  nga pagkamatarong. Bangod naglakat sila sa makitid nga dalan nga nagadul-ong sa kabuhi, makatigayon sila sing dayon nga padya.—Mateo 7:14; tan-awa man ang Bugna 6:9-11.

Yara sa Libro Sang Kabuhi Sing Dayon!

14. Ano “ang libro sang kabuhi,” kag kay sin-o mga ngalan ang nasulat sa sini?

¹⁴ Ano “ang libro sang kabuhi,” kag kay sin-o mga ngalan ang huptan diri? Ang libro, ukon linukot, sang kabuhi nagapatuhoy sa rekord sang mga alagad ni Jehova nga takus sa pagbaton sang padya nga kabuhi nga walay katapusan. (Malaquias 3:16) Espesipiko nga ginapatuhuyan sa Bugna ang mga ngalan sang hinaplas nga mga Cristiano. Apang nasulat man sa sini ang mga ngalan sang takus sa kabuhi nga walay katapusan sa duta. Dugang pa, ang mga ngalan sarang ‘mapanas’ sa sina nga libro. (Exodo 32:32, 33) Apang, ang mga katapo sang Juan nga klase nga ang ila ngalan nagapabilin sa libro sang kabuhi tubtob sa ila kamatayon magabaton sing di-mamalatyon nga kabuhi sa langit. (Bugna 2:10) Amo ini ang mga ngalan nga pinasahi nga ginkilala ni Jesus sa atubangan sang iya Amay kag sang Iya mga anghel. Daw ano ka dalayawon ina nga padya!

15. Ano ang himuon sang mga katapo sang dakung kadam-an agod ang ila mga ngalan masulat sa libro sang kabuhi nga indi na mapanas?

¹⁵ Ang dakung kadam-an, nga ang ila ngalan nasulat man sa libro sang kabuhi, magagua sa dakung kapipit-an nga buhi. Paagi sa pagpakita sing pagtuo sa sulod sang Isa ka Libo ka Tuig nga Paghari ni Jesus kag sa tion sang katapusan nga pagtilaw nga magasunod, pagapadyaan sila sing kabuhi nga walay katapusan sa Paraiso sa duta. (Daniel 12:1; Bugna 7:9, 14; 20:15; 21:4) Nian ang ila mga ngalan magapabilin nga indi na mapanas sa libro sang kabuhi. Sa tapos mahibaluan ang ginapresentar diri paagi sa balaan nga espiritu, indi ka ayhan magsabat nga may kapagsik sa sulit-sulit nga laygay ni Jesus: “Ang isa nga may dulunggan magpamati sa ginasiling sang espiritu sa mga kongregasyon”?—Bugna 3:6.

[Nota]

[Mga Pamangkot sa Pagtinuon]

[Retrato sa pahina 57]

Kabay nga magpabilin ang imo ngalan sa libro sang kabuhi