Simbaha ang Dios Suno sa Iya mga Kondisyon

SI Jesus nagsiling sa pangamuyo sa Dios: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga ginpadala mo, si Jesucristo.” (Juan 17:3) Ano nga sahi sang ihibalo? “Ang kabubut-on [sang Dios] amo nga ang tanan nga sahi sang tawo maluwas kag makadangat sa sibu nga ihibalo sa kamatuoran.” (1 Timoteo 2:4) Ginabadbad sang The Amplified Bible ang naulihi nga prase sa sining paagi: “Hibalua sing sibu kag sing husto ang [balaan] nga Kamatuoran.”

Gani luyag sang Dios nga makilala naton sia kag ang iya mga katuyuan sing sibu, nahisanto sa balaan nga kamatuoran. Kag ang Pulong sang Dios, ang Balaan nga Biblia, amo ang tuburan sinang kamatuoran. (Juan 17:​17; 2 Timoteo 3:​16, 17) Kon maton-an sang katawhan sing sibu ang ginasiling sang Biblia nahanungod sa Dios, nian likawan nila nga mangin kaangay sadtong ginsambit sa Roma 10:​2, 3, nga may “kakugi sa Dios; apang indi suno sa sibu nga ihibalo.” Ukon kaangay sang mga Samariahanon, nga ginsilingan ni Jesus: “Nagasimba kamo sang wala ninyo mahibalui.”​—⁠Juan 4:⁠22.

Busa, kon luyag naton nga kahamut-an kita sang Dios, dapat naton pamangkuton ang aton kaugalingon: Ano ang ginasiling sang Dios nahanungod sa iya kaugalingon? Paano niya luyag simbahon sia? Ano ang iya mga katuyuan, kag paano kita magabagay sa sini? Ang sibu nga ihibalo sa kamatuoran nagahatag sing husto nga mga sabat sa sinang mga pamangkot. Nian masimba naton ang Dios suno sa iya mga kondisyon.

Nagapakahuya sa Dios

“ANG mga nagapadungog sa akon padunggan ko,” siling sang Dios. (1 Samuel 2:30) Nagapadungog bala sa Dios nga tawgon ang bisan sin-o nga katupong niya? Nagapadungog bala sa iya nga tawgon si Maria nga “iloy sang Dios” kag ang “Manugpatunga nga babayi . . . sang Manunuga kag sang Iya mga tinuga,” subong ginasiling sang New Catholic Encyclopedia? Wala, ina nga mga ideya nagainsulto sa Dios. Wala sing bisan sin-o nga tupong sa iya; kag wala man sia sing undanon nga iloy, kay si Jesus indi Dios. Kag wala sing “Manugpatunga nga babayi,” kay ang Dios nagtangdo sing “isa [lamang] ka manugpatunga sang Dios kag sang mga tawo,” si Jesus.​—⁠1 Timoteo 2:​5; 1 Juan 2:​1, 2.

Indi maduhaduhaan nga gingumon kag ginpatiko sang doktrina sang Trinidad ang paghangop sang katawhan tuhoy sa matuod nga posisyon sang Dios. Ginapunggan sini ang mga tawo nga makilala sing sibu ang Bug-os Uniberso nga Soberano, si Jehova nga Dios, kag simbahon sia suno sa iya mga kondisyon. Ang teologo nga si Hans Küng nagsiling: “Ngaa dugangan pa ang ideya sang pagkaisa kag pagkatumalagsahon sang Dios nga makapatiko lamang ukon makahimo sina nga pagkaisa kag pagkatumalagsahon nga wala sing pulos?” Apang amo sina ang nahimo sang pagpati sa Trinidad.

Ang mga nagapati sa Trinidad wala “nagakilala sa Dios sing sibu.” (Roma 1:28) Ina nga bersikulo nagasiling man: “Ginpatumbayaan sila sang Dios sa wala nahamut-an nga panghunahuna, sa paghimo sing mga butang nga indi nagakaigo.” Ginalista sang bersikulo 29 tubtob 31 ang pila sadtong ‘indi nagakaigo’ nga mga butang, subong sang ‘pagpatay, pinuyas, limbong, wala sing kinaugali nga gugma, wala sing kaluoy.’ Ina gid nga mga butang ginabuhat sang mga relihion nga nagabaton sa Trinidad.

Halimbawa, masami nga ginhingabot kag ginpatay pa gani sang mga Trinitaryo ang mga nagsikway sa Trinidad nga doktrina. Kag nagpasobra pa sila. Ginpatay nila ang ila kaupod nga mga Trinitaryo sa tion sang inaway. Ano pa ang kapin ka ‘indi nagakaigo’ sang sa pagpatay sang mga Katoliko sa Katoliko, Ortodokso sa Ortodokso, Protestante sa Protestante​—⁠tanan sa ngalan sang amo gihapon nga Trinitaryo nga Dios?

Apang, si Jesus maathag nga nagsiling: “Paagi sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Ginapasangkad ini sang Pulong sang Dios, nga nagasiling: “Ang mga anak sang Dios kag ang mga anak sang Yawa ginapahayag sining kamatuoran: Ang bisan sin-o nga wala nagahimo sing pagkamatarong indi iya sang Dios, amo man ang wala nagahigugma sang iya utod.” Ginapaanggid sini ang nagapatay sa ila espirituwal nga kauturan kay “Cain, nga iya sang malauton [Satanas] kag nagpatay sang iya utod.”​—⁠1 Juan 3:​10-12.

Sa amo, ang pagtudlo sing makagulumon nga mga doktrina nahanungod sa Dios nagdul-ong sa mga buhat nga nagasumpakil sa iya kasuguan. Sa pagkamatuod, ang natabo sa bug-os nga Cristiandad amo ang ginlaragway sang Danes nga teologo nga si Søren Kierkegaard: “Ang Cristiandad wala makatalupangod nga ginlaglag sini ang Cristianismo.”

Ang espirituwal nga kahimtangan sang Cristiandad nagabagay gid sa ginsulat ni apostol Pablo:  “Ginapahayag nila sing dayag nga kilala nila ang Dios, apang ginapanghiwala nila sia paagi sa mga buhat, bangod kalangil-aran sila kag dimatinumanon kag indi takus sa bisan ano nga maayong buhat.”​—⁠Tito 1:⁠16.

Sa dili madugay, kon laglagon na sang Dios ining malaut nga sistema sang mga butang karon, ang Trinitaryo nga Cristiandad magahatag sing paathag. Kag pagahukman sia sing malaglagon bangod sang iya nagapakahuya sa Dios nga mga buhat kag mga doktrina.​—⁠Mateo 24:​14, 34; 25:​31-34, 41, 46; Bugna 17:​1-6, 16; 18:​1-8, 20, 24; 19:​17-21.

Sikwaya ang Trinidad

ANG mga kamatuoran sang Dios indi mahimo bag-uhon. Busa, ang pagsimba sa Dios suno sa iya mga kondisyon nagakahulugan nga sikwayon ang Trinidad nga doktrina. Nagasumpakil ini sa ginpatihan kag gintudlo sang mga manalagna, ni Jesus, sang mga apostol, kag sang nahaunang mga Cristiano. Nagasumpakil ini sa ginasiling sang Dios nahanungod sa iya kaugalingon sa iya inspirado nga Pulong. Sa amo, sia nagalaygay: “Kilalaha nga ako lamang ang Dios kag wala na sing iban nga kaangay ko.”​—⁠Isaias 46:​9, TEV.

Ang mga interes sang Dios wala ginaalagdan paagi sa paghimo sa iya nga makagulumon kag makatalanhaga. Sa baylo, sa dugang nga pagkagumon sang mga tawo nahanungod sa Dios kag sa iya mga katuyuan, dugang pa nga nagabagay ini sa luyag sang Kaaway sang Dios, si Satanas nga Yawa, ang ‘dios sining kalibutan.’ Sia ang nagasakdag sinang dimatuod nga mga doktrina agod ‘bulagon ang mga painoino sang mga ditumuluo.’ (2 Corinto 4:4) Kag ang Trinidad nga doktrina nagaalagad man sa mga interes sang mga klerigo nga luyag maghupot sang ila pagkontrol sa katawhan, kay ginapalutaw nila nga ang mga teologo lamang ang makahangop sini.​—⁠Tan-awa ang Juan 8:⁠44.

Ang sibu nga ihibalo tuhoy sa Dios nagadala sing daku nga paumpaw. Ginahilway kita sini gikan sa mga panudlo nga nagasumpakil sa Pulong sang Dios kag gikan sa mga organisasyon nga nag-apostata. Subong ginsiling ni Jesus: “Makilala ninyo ang kamatuoran, kag ang kamatuoran magahilway sa inyo.”​—⁠Juan 8:⁠32.

Paagi sa pagpadungog sa Dios subong supremo kag pagsimba sa iya suno sa iya mga kondisyon, malikawan naton ang paghukom nga iya himuon sa dili madugay batok sa apostata nga Cristiandad. Sa baylo, mapaabot naton ang kahamuot sang Dios kon malaglag na ining sistema: “Ang kalibutan nagataliwan kag ang kailigbon sini, apang sia nga nagahimo sang kabubut-on sang Dios magapabilin sing dayon.”​—⁠1 Juan 2:⁠17.

[Retrato sa pahina 31]

Ining mga siglo na ang kadugayon nga eskultura sa Pransya nagalaragway sang koronasyon ni “birhen” Maria nga ginhatag sang Trinidad. Ang pagtuo sa Trinidad nagdul-ong sa pagsimba kay Maria subong “Iloy sang Dios”