Superyor Bala Pirme ang Dios kay Jesus?

SI Jesus wala gid magpangangkon nga Dios. Ang tanan nga ginsiling niya nahanungod sa iya kaugalingon nagapakita nga wala niya ginkabig ang iya kaugalingon nga tupong sa Dios sa bisan anong paagi​—⁠indi sa gahom, indi sa ihibalo, indi sa edad.

Sa tagsa ka panahon sang iya pagluntad, kon bala sa langit ukon sa duta, ang iya panghambal kag paggawi nagapakita sing pagpasakop sa Dios. Ang Dios amo pirme ang superyor, si Jesus amo ang mas manubo nga gintuga sang Dios.

 Si Jesus Ginpatuhay sa Dios

SA LIWAT kag liwat, ginpakita ni Jesus nga sia isa ka tinuga nga tuhay sa Dios kag nga sia, si Jesus, may Dios nga labaw sa iya, ang Dios nga iya ginasimba, ang Dios nga iya ginatawag ”Amay.” Sa pangamuyo sa Dios, kon sayoron, sa Amay, si Jesus nagsiling, “Ikaw, ang lamang matuod nga Dios.” (Juan 17:3) Sa Juan 20:​17 sia nagsiling kay Maria Magdalena: “Makayab ako sa akon Amay kag sa inyo Amay, sa akon Dios kag sa inyo Dios.” (RS, Katoliko nga edisyon) Sa 2 Corinto 1:3 ginpalig-on ni apostol Pablo ining kaangtanan: “Bulahan ang Dios kag Amay sang aton Ginuong Jesucristo.” Sanglit si Jesus may Dios, ang iya Amay, indi mahimo nga sa amo man nga tion sia ang Dios.

Wala magpangalag-ag si apostol Pablo sa paghambal tuhoy kay Jesus kag sa Dios subong magkatuhay: “Para sa aton may isa ka Dios, ang Amay, . . . kag isa ka Ginuo, si Jesucristo.” (1 Corinto 8:​6, JB) Ginapakita sang apostol ang kinatuhayan sang ginsambit niya “ang presensia sang Dios kag ni Cristo Jesus kag sang mga anghel nga pinili.” (1 Timoteo 5:​21, RS Common Bible) Subong nga si Pablo nagahambal nga si Jesus kag ang mga anghel tuhay sa isa kag isa sa langit, amo man si Jesus kag ang Dios.

Ang mga pulong ni Jesus sa Juan 8:​17, 18 nagapahangop man sini. Sia nagasiling: “Sa inyo Kasuguan nasulat, ‘Ang panaksi sang duha ka tawo matuod.’ Ako ang nagasaksi sa akon kaugalingon, kag ang Amay nga nagpadala sa akon nagasaksi sa akon.” Ginapakita diri ni Jesus nga sia kag ang Amay, nga amo ang, Labing Gamhanan nga Dios, duha ka magkatuhay nga entidad, kay paano may mangin duha ka saksi?

Ginpakita ni Jesus sing dugang pa nga sia tuhay nga persona gikan sa Dios sa pagsiling: “Ngaa ginatawag mo ako nga maayo? Wala gid sing maayo kundi ang Dios lamang.” (Marcos 10:​18, JB) Gani nagsiling si Jesus nga wala sing isa nga subong kaayo sa Dios, bisan si Jesus mismo. Ang Dios maayo sa isa ka paagi nga nagapain sa iya kay Jesus.

Mapinasakupon nga Alagad sang Dios

SA LIWAT kag liwat, si Jesus nagpamulong subong sang: “Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay.” (Juan 5:​19, The Holy Bible, ni Monsinyor R. A. Knox) “Nagkari ako gikan sa langit, indi sa paghimo sang akon kabubut-on, kundi sang kabubut-on sang nagpadala sa akon.” (Juan 6:38) “Ang ginatudlo ko indi akon, kundi iya sang nagpadala sa akon.” (Juan 7:16) Indi bala ang nagpadala labaw sa ginpadala?

Ining kaangtanan maathag sa ilustrasyon ni Jesus tuhoy sa ulubasan. Ginpaangay niya ang Dios, nga iya Amay, sa tag-iya sang ulubasan, nga naglakat kag gintulin ini sa mga mangunguma, nga nagtiglawas sa Judiyong klero. Sang magpadala sang ulihi ang tag-iya sing ulipon agod magkuha sing pila ka bunga gikan sa ulubasan, ginbunal sang mga mangunguma ang ulipon kag ginpalakat sia nga wala sing dala. Nian nagpadala ang tag-iya sing ikaduha nga ulipon, kag sang ulihi sing ikatlo, nga pareho sing gindangatan. Sang ulihi, ang tag-iya nagsiling: “Ipadala ko ang akon anak [Jesus] nga hinigugma. Ayhan tahuron nila sia.” Apang ang malaut nga mga mangunguma nagsiling: “ ‘Amo ini ang manunubli; patyon ta sia, agod ang panublion mangin aton.’ Gani gindala nila sia sa guwa sang ulubasan kag ginpatay.” (Lucas 20:​9-16) Sa amo gin-ilustrar ni Jesus ang iya kaugalingon nga palangakuan subong isa nga ginpadala sang Dios sa paghimo sang kabubut-on sang Dios, subong sang amay nga nagapadala sa mapainubuson nga anak.

Ang mga sumulunod ni Jesus pirme nga nagtamod sa iya subong isa ka mapinasakupon nga alagad sang Dios, indi subong katupong sang Dios. Nagpangamuyo sila sa Dios nahanungod sa “imo balaan nga alagad, nga imo hinaplas, . . . kag ang mga tanda kag mga kalatingalahan ginhimo paagi sa ngalan sang imo balaan nga alagad nga si Jesus.”​—⁠Binuhatan 4:​23, 27, 30, RS, Katoliko nga edisyon.

 Ang Dios Superyor sa Tanan nga Tion

SA GINSUGURAN gid sang ministeryo ni Jesus, sang magbutwa sia gikan sa tubig nga ginbawtismuhan sa iya, ang tingog sang Dios gikan sa langit nagsiling: “Ini ang hinigugma ko nga Anak, nga sa iya nahamuot ako.” (Mateo 3:​16, 17) Nagasiling bala ang Dios nga sia ang iya kaugalingon nga anak, nga nahamut-an niya ang iya kaugalingon, nga ginpadala niya ang iya kaugalingon? Indi, ang Dios nga Manunuga nagasiling nga, subong amo sia ang superyor, nahamuot sia sa isa nga manubo sa iya, ang iya Anak nga si Jesus, para sa buluhaton sa palaabuton.

Ginpakita ni Jesus ang pagkasuperyor sang iya Amay sang sia magsiling: “Ang espiritu ni Jehova yari sa akon, bangod nga ginhaplas niya ako sa pagwali sing maayong balita sa mga imol.” (Lucas 4:18) Ang paghaplas isa ka paghatag sing awtoridad ukon komisyon sang isa nga superyor sa isa nga wala pa sing awtoridad. Maathag diri nga ang Dios amo ang superyor, kay ginhaplas niya si Jesus, kag ginhatagan sia sing awtoridad nga wala pa anay sa iya.

Maathag nga ginpakita ni Jesus ang pagkasuperyor sang iya Amay sang ang iloy sang duha ka disipulo nangabay sa iya nga ang iya duha ka anak palingkuron ang isa sa wala kag ang isa sa tuo ni Jesus kon magsulod sia sa iya Ginharian. Si Jesus nagsabat: “Ang pagpalingkod sa akon tuo ukon sa akon wala, indi ako ang magahatag sina; ila ini sang gin-amanan sang akon Amay,” kon sayoron, ang Dios. (Mateo 20:​23, JB) Kon si Jesus amo ang Labing Gamhanan nga Dios, sia kuntani ang magahatag sina nga mga palangakuan. Apang indi ina mahatag ni Jesus, kay ang Dios ang magahatag sina, kag si Jesus indi ang Dios.

Ang mga pangamuyo mismo ni Jesus isa ka mabaskog nga halimbawa sang iya kubos nga posisyon. Sang malapit na mapatay si Jesus, ginpakita niya kon sin-o ang iya superyor paagi sa pagpangamuyo: “Amay, kon buot mo, ipahilayo sa akon ining tagayan. Apang, indi ang akon kabubut-on, kundi ang imo, paghimuon.” (Lucas 22:42) Sa kay sin-o sia nangamuyo? Sa isa bala ka bahin sang iya kaugalingon? Indi, nangamuyo sia sa isa nga tuhay gid sa iya, ang iya Amay, ang Dios, nga ang iya kabubut-on superyor kag tuhay sa iya kaugalingon, ang lamang nga Isa nga ‘makapahilayo sining tagayan.’

Nian, sang malapit na sia mapatay, si Jesus nagsinggit: “Dios ko, Dios ko, ngaa ginpatumbayaan mo ako?” (Marcos 15:​34, JB) Sa kay sin-o nagsinggit si Jesus? Sa iya bala kaugalingon ukon sa isa ka bahin sang iya kaugalingon? Sa pagkamatuod, yadtong singgit, “Dios ko,” wala maghalin sa isa nga nagkabig sang iya kaugalingon nga Dios. Kag kon si Jesus Dios, nian sin-o ang nagpatumbaya sa iya? Sia bala? Indi ina makatarunganon. Si Jesus nagsiling man: “Amay, sa imo mga kamot gintugyan ko ang akon espiritu.” (Lucas 23:46) Kon si Jesus Dios, ano ang rason nga itugyan niya ang iya espiritu sa Amay?

Sa tapos mapatay si Jesus, nagpabilin sia sa lulubngan sa halos tatlo ka adlaw. Kon Dios sia, nian ang Habacuc 1:​12 sayop sang magsiling ini: “O Dios ko, ang akon Balaan, indi ka mapatay.” Apang ang Biblia nagasiling nga si Jesus napatay kag wala sing pangalibutan sa lulubngan. Kag sin-o ang nagbanhaw kay Jesus gikan sa minatay? Kon sia matuod nga patay, indi niya mabanhaw ang iya kaugalingon. Sa pihak nga bahin, kon sia indi matuod nga patay, ang iya ginpakunokuno nga kamatayon wala makabayad sa bili sang gawad para sa sala ni Adan. Apang ginbayaran niya yadto nga bili sing bug-os paagi sa iya matuod nga kamatayon. Gani ang ‘Dios [amo] ang nagbanhaw [kay Jesus] paagi sa paghuklas sang mga kasakitan sang kamatayon.’ (Binuhatan 2:24) Ginbanhaw sang superyor, ang Dios nga Labing Gamhanan, ang mas manubo, ang iya alagad nga si Jesus, gikan sa minatay.

Ang ikasarang bala ni Jesus sa paghimo sing mga milagro, subong sang pagbanhaw sa mga tawo, nagapakita nga Dios sia? Ti, ang mga apostoles kag ang mga manalagna nga sanday Elias kag Eliseo may amo man sina nga gahom, apang wala ina maghimo sa ila nga labaw sa mga tawo. Ginhatagan sang Dios sing gahom sa paghimo  sing mga milagro ang mga manalagna, si Jesus, kag ang mga apostoles agod ipakita nga ginasakdag Niya sila. Apang wala ini maghimo sa ila nga bahin sang isa ka madamo nga Pagka-Dios.

Limitado ang Ihibalo ni Jesus

SANG gintagna ni Jesus ang katapusan sining sistema sang mga butang, sia nagsiling: “Apang nahanungod sadtong adlaw ukon sadtong oras wala sing isa nga nakahibalo, bisan pa ang mga anghel sa langit, ukon ang Anak, kundi ang Amay lamang.” (Marcos 13:​32, RS, Katoliko nga edisyon) Kon si Jesus nangin katupong nga Anak nga bahin sang Pagka-Dios, kuntani nahibaluan niya ang nahibaluan sang Amay. Apang wala makahibalo si Jesus, bangod indi sia tupong sa Dios.

Subong man, mabasa naton sa Hebreo 5:8 nga si Jesus ‘nakatuon sing pagkamatinumanon paagi sa iya gin-antos.’ Mahanduraw bala naton nga ang Dios dapat pa magtuon sing isa ka butang? Indi, apang nahimo ina ni Jesus, bangod wala niya mahibaluan ang tanan nga nahibaluan sang Dios. Kag dapat niya ton-an ang butang nga indi na kinahanglan nga ton-an sang Dios​—⁠ang pagkamatinumanon. Ang Dios wala sing dapat tumanon nga bisan sin-o.

Ang kinatuhayan sa ulot sang kon ano ang nahibaluan sang Dios kag kon ano ang nahibaluan ni Cristo nagluntad man sang si Jesus ginbanhaw pa langit kaupod sang Dios. Talupangda ang nahauna nga mga pulong sang katapusan nga tolon-an sang Biblia: “Ang bugna ni Jesucristo, nga ginhatag sang Dios sa iya.” (Bugna 1:​1, RS, Katoliko nga edisyon) Kon si Jesus bahin sang Pagka-Dios, dapat bala sia hatagan sing bugna sang isa pa ka bahin sang Pagka-Dios​—⁠ang Dios? Sa pagkamatuod dapat nga nahibaluan niya ang tanan nahanungod sini, kay ang Dios nakahibalo. Apang wala makahibalo si Jesus, bangod indi sia Dios.

Si Jesus Nagapabilin nga Isa ka Sakop

SANG wala pa sia mangin tawo, kag subong man sang sa duta sia, si Jesus sakop sang Dios. Sa tapos sia mabanhaw, nagpabilin sia sa isa ka manubo kag ikaduha nga posisyon.

Nagahambal tuhoy sa pagkabanhaw ni Jesus, si Pedro kag ang iya mga kaupod nagsiling sa Judiyong Sanhedrin: “Ginbayaw sang Dios ining isa [Jesus] . . . sa iya tuo.” (Binuhatan 5:31) Si Pablo nagsiling: “Ginbayaw sia sang Dios sa isa ka superyor nga posisyon.” (Filipos 2:9) Kon si Jesus amo ang Dios, paano nabayaw ni Jesus ang iya kaugalingon, kon sayoron, ginpasaka sa isa ka mas mataas nga posisyon sang sa iya anay ginauyatan? Isa na sia ka nabayaw nga bahin sang Trinidad. Kon, sang wala pa ang pagbayaw sa iya, si Jesus tupong na sa Dios, ang pagbayaw sa iya sing dugang pa naghimo sa iya nga superyor sa Dios.

Si Pablo nagsiling man nga si Cristo nagsulod sa “langit gid, agod sa pagpahayag sa atubangan sang Dios tungod sa aton.” (Hebreo 9:​24, JB) Kon magpahayag ka sa atubangan sang isa, paano ikaw mangin amo sia? Indi mahimo ina. Pat-od gid nga tuhay ikaw kag napain.

Sing kaanggid, sang wala pa sia ginbato tubtob sa kamatayon, ang martir nga si Esteban “nagtangla sa langit kag nakakita sang himaya sang Dios kag kay Jesus nga nagatindog sa tuo sang Dios.” (Binuhatan 7:55) Sing maathag, nakita niya ang duha ka magkatuhay nga indibiduwal​—⁠apang wala sing balaan nga espiritu, wala sing Trinidad nga Pagka-Dios.

Sa rekord sang Bugna 4:8 tubtob 5:​7, ang Dios ginpakita nga nagalingkod sa iya langitnon nga trono, apang wala si Jesus. Nagpalapit sia sa Dios agod kuhaon ang linukot gikan sa tuo nga kamot sang Dios. Ginapakita sini nga sa langit si Jesus indi ang Dios kundi tuhay sa iya.

Sa paghisanto sa bag-o lang masambit, ang Bulletin of the John Rylands Library sa Manchester, Inglaterra, nagasiling: “Sa iya kabuhi sa langit sa tapos sia ginbanhaw, si Jesus ginalaragway subong isa gihapon ka indibiduwal nga tuhay kag napain sa Dios subong amo sia anay sang nagakabuhi sia sa duta subong si Jesus. Upod sa Dios kag kon ipaanggid sa Dios, sia, sa pagkamatuod, isa lamang ka langitnon nga persona sa langitnon nga panimalay sang Dios, subong sang mga anghel​—⁠apang subong Anak sang Dios, sia nagatindog sa tuhay nga kategoriya, kag labaw sa ila tanan.”​—⁠Ipaanggid ang Filipos 2:⁠11.

Ang Bulletin nagasiling man: “Apang, ang ginasiling tuhoy sa iya kabuhi kag mga hilikuton subong langitnon nga Cristo wala nagakahulugan ukon nagapahangop nga sa iya balaan nga kahimtangan nagatindog sia nga tupong sa Dios kag isa ka bug-os nga Dios. Sa kabaliskaran, sa laragway sa Bag-ong Testamento sang iya langitnon nga persona kag ministeryo makita naton ang pigura nga tuhay kag sakop sa Dios.”

Sa walay katapusan nga palaabuton sa langit,  si Jesus magapabilin nga tuhay kag sakop nga alagad sang Dios. Amo sini ang pagpabutyag sang Biblia: “Sa tapos sina magaabot ang katapusan, kon itugyan niya [Jesus sa langit] ang ginharian sa Dios nga Amay . . . Nian ang Anak man magapasakop sa Isa nga nagpasakop sang tanan nga butang sa iya, agod nga ang Dios mangin tanan sa tanan.”​—⁠1 Corinto 15:​24, 28, NJB.

Wala Gid Magsiling si Jesus nga Dios Sia

MAATHAG ang tindog sang Biblia. Indi lamang ang Labing Gamhanan nga Dios, nga si Jehova, isa ka personalidad nga tuhay kay Jesus kundi Sia sa tanan nga tion amo ang iya superyor. Si Jesus pirme ginapresentar subong tuhay kag mas manubo, isa ka mapainubuson nga alagad sang Dios. Amo kon ngaa ang Biblia maathag nga nagasiling nga “ang ulo ni Cristo amo ang Dios” sa amo man nga paagi nga “ang ulo sang tagsa ka lalaki amo si Cristo.” (1 Corinto 11:3) Kag amo kon ngaa si Jesus mismo nagsiling: “Ang Amay daku pa sa akon.”​—⁠Juan 14:​28, RS, Katoliko nga edisyon.

Ang kamatuoran amo nga si Jesus indi ang Dios kag wala gid sia magsiling sina. Ginakilala ini sang nagadugang nga kadamuon sang mga eskolar. Subong ginasiling sang Rylands Bulletin: “Ang kamatuoran dapat atubangon nga ang pagpanalawsaw sa Bag-ong Testamento, nagasiling, nga ang katapusan nga katluan ukon kap-atan ka tuig nagadul-ong sa nagadugang nga kadamuon sang kilala nga mga eskolar sa Bag-ong Testamento sa konklusyon nga si Jesus . . . wala gid magpati nga Dios sia.”

Ang Bulletin nagasiling man tuhoy sa mga Cristiano sang nahaunang siglo: “Busa, sang ginhatagan nila [si Jesus] sing nagapadungog nga mga titulo subong ang Cristo, Anak sang tawo, Anak sang Dios kag Ginuo, mga paagi ini sang pagsiling nga sia indi Dios, kundi ginhimo niya ang hilikuton sang Dios.”

Sa amo, bisan ang pila ka relihioso nga mga eskolar nagabaton nga ang ideya nga si Jesus Dios nagasumpakil sa bug-os nga pagpamatuod sang Biblia. Didto, ang Dios amo pirme ang superyor, kag si Jesus amo ang sakop nga alagad.

[Blurb sa pahina 19]

‘Ang pagpanalawsaw sa Bag-ong Testamento nagadul-ong sa nagadugang nga kadamuon sang mga eskolar sa konklusyon nga si Jesus wala gid magpati nga Dios sia.’​—⁠Bulletin of the John Rylands Library

[Retrato sa pahina 17

Ginsilingan ni Jesus ang mga Judiyo: “Nagkari ako gikan sa langit, indi sa paghimo sang akon kabubut-on, kundi sang kabubut-on sang nagpadala sa akon.”​—⁠Juan 6:​38

[Retrato sa pahina 18]

Sang si Jesus magsinggit: “Dios ko, Dios ko, ngaa ginpatumbayaan mo ako?” sa pagkamatuod wala sia magpati nga sia ang Dios